U Nga Ku Hlula Njhani Ku Chava Rifu?

Nhlamulo ya Bibele

Swa fanela ku va hi chava rifu tanihi nala naswona hi teka magoza lama faneleke leswaku hi sirhelela vutomi bya hina. (1 Vakorinto 15:26) Hambiswiritano, ku chava rifu loku sekeriweke eka tidyondzo ta mavunwa kumbe vukholwa-hava, ku endla vanhu va va “evuhlongeni vutomi bya vona hinkwabyo.” (Vaheveru 2:15) Ku tiva ntiyiso swi ta ku ntshunxa eka ku chava rifu loku nga faneliki loku nga ku tsonaka ntsako evuton’wini.—Yohane 8:32.

Ntiyiso malunghana ni rifu

• Vafi a va tivi nchumu. (Pisalema 146:4) A wu fanelanga u chava leswaku u ta twa ku vava kumbe u ta xanisiwa loko se u file hikuva Bibele yi fanisa ku fa ni ku etlela.—Pisalema 13:3; Yohane 11:11-14.

• Vafi a va nge hi vavisi. Hambi ku ri khale ka valala lava a va ri ni madzolonga ‘va hluriwe hi rifu.’ (Swivuriso 21:16) Bibele yi vula leswaku “rivengo ra vona ni mavondzo ya vona se swi herile.”—Eklesiasta 9:6.

• Loko hi fa a swi vuli leswaku swi herile hi hina. Xikwembu xi ta pfuxa vanhu lava feke.—Yohane 5:28, 29; Mintirho 24:15.

• Xikwembu xi tshembisa leswaku enkarhini lowu taka, “rifu a ri nge he vi kona.” (Nhlavutelo 21:4) Malunghana ni siku rero Bibele yi ri: “Lavo lulama va ta dya ndzhaka ya misava, va ta tshama eka yona hi masiku,” va nga ha chavi rifu nikatsongo.—Pisalema 37:29.