Langutelo Ra Bibele

“Ntiyiso Wu Ta Mi Ntshunxa”—Njhani?

VANHU va timiliyoni va titwa va ntshunxekile, kambe entiyisweni a swi tano. Hi xikombiso, vo tala i mahlonga ya vukholwa-hava. Van’wana va chava lava feke, lava va nga ha ringetaka ku va tsakisa hi magandzelo lama durhaka. Hambiswiritano, van’wana a va tiyiseki leswaku ku humelela yini loko munhu a fa, naswona va chava rifu hi ndlela leyi hundzeletiweke. Kambe, xana vanhu volavo va nga ntshunxeka eka vukholwa-hava byebyo, eku tshikileriweni hambi ku ri eka swiphiqo swa timali? Ina! Hilaha marito ya Yesu lama tshahiweke laha henhla ma kombisaka hakona, ndlela yo kuma ntshunxeko i ku tiva ntiyiso. Kambe ntiyiso wihi? Xana i ntiyiso lowu tolovelekeke kumbe wa muxaka wun’wana?

Yesu u hi paluxele nhlamulo ya kona. U te: “Loko mi tshama eritweni ra mina, hakunene mi vadyondzisiwa va mina, naswona mi ta tiva ntiyiso, kutani ntiyiso wu ta mi ntshunxa.” (Yohane 8:31, 32) ‘Rito’ ra Yesu ni tidyondzo takwe swi kumeka eBibeleni.

Loko Yesu a vula leswaku “ntiyiso wu ta mi ntshunxa,” a a vulavula hi ku ntshunxeka eka xidyoho ni rifu. Hambiswiritano, ku tiva ntiyiso wa Rito ra Xikwembu swi hi ntshunxa eka vukholwa-hava, ku chava lava feke ni ku chava rifu hi ndlela leyi hundzeletiweke. Njhani?

1. Ku ntshunxeka eka vukholwa-hava. Vanhu vo tala va kholwa leswaku ku ni swilo swo karhi leswi tisaka mabadi. Van’wana a va swi koti ku endla swiboho swa nkoka va nga si ya etin’angeni kumbe va phahla.

Ndlela leyi ntiyiso wa Bibele wu ntshunxaka vanhu ha yona: Eminkarhini ya Bibele, vanhu van’wana va Xikwembu va sungule ku tshembela eka vukholwa-hava, hambi ku ri ku gandzela “xikwembu xa Nkateko” ni “xikwembu xa ku Kunguhateriwa”! Xana Yehovha Xikwembu u swi langute njhani sweswo? U te: “Mi hambete mi endla swo biha ematihlweni ya mina.” (Esaya 65:11, 12) Xikwembu xi titwa hi ndlela leyi fanaka loko vanhu va vutisa vangoma leswaku va lava nkongomiso evuton’wini, xi te: “Un’wana ni un’wana la vutisaka mungoma . . . i nchumu lowu nyenyetsaka eka Yehovha.”—Deteronoma 18:11, 12.

Vukholwa-hava ni vungoma swi ni khombo hikuva i “marhengu ya Diyavulosi,” loyi Yesu a n’wi vitaneke “tata wa mavunwa.” (Vaefesa 6:11; Yohane 8:44) Loko u lava nkongomiso eka timhaka ta nkoka, xana u nga lava mpfuno eka muhembi? Nikatsongo! Hikwalaho, u ta va u tlharihile loko u papalata xin’wana ni xin’wana lexi fambisanaka ni “tata wa mavunwa.”

Loko u lava ku endla swiboho leswinene evuton’wini, tirhisa milawu ya Bibele naswona u tiva xikongomelo xa Xikwembu malunghana ni vanhu. Swivuriso 2:6 yi ri: “Yehovha u nyika vutlhari; enon’weni wakwe ku ni vutivi ni ku twisisa.”

2. Ku ntshunxeka eka ku chava vafi. Vanhu vo tala va kholwa leswaku lava feke va nga pfuna lava hanyaka kumbe va va vavisa. Vanhu volavo va vona onge va fanele va va endlela switlhavelo leswaku va nga hlundzuki. Hikwalaho ka sweswo, vanhu van’wana va tipeta eswikweletini leswikulu leswaku va endla switlhavelo ni minkhuvo leyi durhaka.

Ndlela leyi ntiyiso wa Bibele wu ntshunxaka vanhu ha yona: Bibele yi hi byela ntiyiso malunghana ni xiyimo xa vafi. Hi xikombiso, Yesu u vule leswaku lava feke va ‘etlele.’ (Yohane 11:11, 14) Xana a a vula yini? Nhlamulo yi kumeka eka Eklesiasta 9:5 leyi nge: “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” I ntiyiso, lava feke swi fana niloko va etlele vurhongo lebyikulu, a va tivi nikatsongo. Entiyisweni, a va ha ri kona, hikwalaho a va nge swi koti ku hi endlela leswinene kumbe ku hi vavisa.

Hambiswiritano, vanhu van’wana va vula leswaku va tshame va vulavula ni lava feke. Xana sweswo swi kotekisa ku yini? Nakambe, Bibele ya hlamula. Yi hi byela leswaku enkarhini wa vanhu vo sungula, nhlayo yo karhi ya tintsumi ti xandzukele Xikwembu. (2 Petro 2:4) Mimoya leyi yo homboloka leyi vuriwaka madimona, yi ringeta ku xisa vanhu. (1 Timotiya 4:1) Ndlela yin’wana leyi ma endlaka sweswo ha yona, i ku tiendla vanhu lava feke, xisweswo ma hlohlotela mavunwa ya leswaku vafi va hanya hi xivumbeko xin’wana kumbe exivandleni xin’wana.

3. Ku ntshunxeka eka ku chava rifu hi ndlela leyi hundzeletiweke. Entiyisweni, rifu i nala, hilaha Bibele yi vulaka hakona. (1 Vakorinto 15:26) Hikwalaho, ha ri chava rifu naswona hi ringeta ku ri balekela. Nilokoswiritano, a hi fanelanga hi chava rifu ku tlula mpimo.

Ndlela leyi ntiyiso wa Bibele wu ntshunxaka vanhu ha yona: Bibele yi hi paluxela ntiyiso hi ta xiyimo xa vafi, yi tlhela yi kombisa leswaku xikongomelo xa Xikwembu i ku pfuxa vafi leswaku va tlhela va hanya. Yesu u te: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena [Kreste] kutani va huma.”—Yohane 5:28, 29; Mintirho 24:15.

Xana va ta “huma” hi ndlela yihi? Yesu u hi nyike nhlamulo ya kona loko a pfuxa vanhu vo hlaya eka lava feke. Eka xiendlakalo ha xin’we, munhu wa kona a a vuyela exiyin’weni xa ku va munhu wa nyama, eka xiyimo lexi a a ri eka xona eku sunguleni. (Marka 5:35-42; Luka 7:11-17; Yohane 11:43, 44) Mhaka leyi yi fambisana ni xiga lexi nge “ku pfuxiwa,” leswi vulaka “ku yima.” Loko Xikwembu xi vulavula na Daniyele nandza wa xona loyi a a dyuharile, xi te: “U ta wisa [kumbe u etlela ekufeni], kambe u ta yima u kuma xiavelo xa wena eku heleni ka masiku.” (Daniyele 12:13) Kunene, marito wolawo ma fanele ma n’wi tiyisile Daniyele leswaku a nga chavi rifu.

Xivangelo xin’wana xa ku va Yesu a te emisaveni a ku ri “ku chumayela hi ku ntshunxiwa ka makhumbi,” ku nga lava a va ri evuhlongeni bya vukhongeri bya mavunwa. (Luka 4:18) Leswi tidyondzo takwe ti nga eBibeleni, ti hambeta ti ntshunxa vanhu siku ni siku. Ha tshemba leswaku ntiyiso wa Bibele wu ta ntshunxa vanhu hilaha ku nga heriki.

XANA U TSHAME U TIVUTISA?

Xana ntiyiso wa Bibele wu hi ntshunxaka njhani eka

● vukholwa-hava?—Esaya 8:19, 20; 65:11, 12.

● ku chava vafi?—Eklesiasta 9:5; Yohane 11:11, 14.

● ku chava rifu?—Yohane 5:28, 29; Mintirho 24:15.

[Marito lama tshahiweke exihlokweni lama nga eka tluka 11]

Ntiyiso wa Bibele wu ntshunxa vanhu eka vukholwa-hava, ku chava vafi ni ku chava rifu ku tlula mpimo