Vafana vambirhi va languta fasitere ra movha leri nga fayiwa hi bolo ya vona yo tlanga khrikete

VANTSHWA VA VUTISA

Ndzi Nga Swi Lulamisa Njhani Swihoxo Swa Mina?

Xana wena a wu ta endla yini?

Hlaya hi leswi humeleleke Karina kutani u ehleketa swi ri karhi swi humelela wena. Xana wena a wu ta endla yini?

Karina u ri: “Siku rin’wana loko ndzi ri karhi ndzi ya exikolweni, a ndzi chayela movha hi rivilo lerikulu kutani phorisa ra le magondzweni ri ndzi yimisile ivi ri ndzi nyika thikithi. A ndzi hlundzuke swinene! Ndzi byele Mhani kutani a ndzi byela leswaku ndzi fanele ndzi byela Papa kambe a ndzi nga swi lavi ku n’wi byela.”

Xana wena a wu ta endla yini?

Goza A: A ndzi nga ta n’wi byela Papa naswona a ndzi ta tiyiseka leswaku a nga pfuki a swi tivile.
Goza B: A ndzi ta byela Papa leswi endlekeke.

U nga ha ringeka ku hlawula Goza A. Kumbexana, mhani wa wena a nga ha anakanya leswaku u n’wi byerile papa wa wena. Kambe ku ni swivangelo leswinene ku va u vula swihoxo swa wena—hambi swi katsa thikithi ro chayela hi rivilo lerikulu kumbe swin’wana leswi u swi endleke.

Swivangelo swinharhu swa ku va u pfumela swihoxo swa wena

1. Hikuva i nchumu lowunene ku wu endla. Loko Bibele yi hlamusela milawu leyi Vakreste va faneleke va hanya ha yona, yi ri: ‘Hi navela ku tikhoma hi ku tshembeka eka swilo hinkwaswo.’—Vaheveru 13:18.

“Ndzi endle hilaha ndzi nga kotaka hakona ku va ndzi tshembeka ni ku va ni vutihlamuleri bya swiendlo swa mina naswona ndzi lulamisa xihoxo xa mina hi ku hatlisa.”—Alexis.
2. Hikuva vanhu va tala ku rivalela lava pfumelaka leswaku va endle swihoxo. Bibele yi ri: “Loyi a fihlaka ku tlula nawu kakwe a nge humeleli, kambe loyi a tiphofulaka kutani a tshika, u ta kombiwa tintswalo.”—Swivuriso 28:13.

“Swi lava xivindzi ku pfumela leswaku u endle xihoxo kambe swi endla leswaku vanhu va ku tshemba. Va swi xiya leswaku wa tshembeka. Ku pfumela xihoxo xa wena, swi antswisa xiyimo.”—Richard.
3. Xa nkoka swinene, u va u tsakisa Yehovha Xikwembu. Bibele yi ri: “Munhu la kanganyisaka i nchumu lowu nyenyetsaka eka Yehovha, kambe Yena u rhandza lavo lulama.”—Swivuriso 3:32.

“Endzhaku ka loko ndzi endle xihoxo lexikulu, ndzi sungule ku xiya leswaku ndzi fanele ndzi xi vika ni ku pfumela leswaku ndzi xi endlile. Yehovha a a nga ta ndzi katekisa loko ndzi nga endli swilo hi ndlela yakwe.”—Rachel.

Xana Karina u endle yini hi xihoxo lexi a xi endleke? U ringete ku fihlela papa wa yena xihoxo xakwe xa thikithi ra ku chayela hi rivilo lerikulu. Kambe a nga swi kotanga ku xi fihla hilaha ku nga heriki. Karina u ri: “Endzhakunyana ka lembe, loko papa a ri karhi a langutisa tirhekhodo ta ndzindza-khombo, hiloko a xiya leswaku ku na thikithi ra ku chayela hi rivilo lerikulu leri a ri ri hi vito ra mina. A ndzi ri ekhombyeni—hambi ku ri mhani a a ndzi hlundzukerile hikuva a ndzi endlanga leswi a ndzi byeleke swona!”

Dyondzo leyi a yi dyondzeke: Karina u ri: “Ku fihla swihoxo swi endla swilo swi nyanya. Hi ku famba ka nkarhi swi ta humelela.”

Ndlela leyi u nga dyondzaka ha yona eka swihoxo swa wena

Hinkwerhu ha swi endla swihoxo. (Varhoma 3:23; 1 Yohane 1:8) Hilaha se hi dyondzeke ha kona, ku pfumela ni ku lulamisa swi komba ku titsongahata ni ku va la kuleke emianakanyweni.

Goza leri u nga ri tekaka i ku dyondza eka swihoxo swa wena. Lexi twisaka ku vava, vantshwa van’wana a va swi endli sweswo! Va nga ha titwa hilaha muntshwa un’wana loyi a vuriwaka Priscilla a titweke hakona. U ri: “Swihoxo swa mina a swi tshamela ku ndzi heta matimba. A ndzi titwa ndzi nga pfuni nchumu, swihoxo swa mina a swi fana ni ndzhwalo lowukulu lowu a ndzi nga koti ku wu rhwala. A ndzi titwa ndzi tshikilelekile.”

Nhwanyana u chayela a ri karhi a tilanguta exivonini xa movha

Xana minkarhi yin’wana u titwa hi ndlela yoleyo? Loko swi ri tano, tsundzuka leswi: Ku tshamela ku anakanya hi swihoxo swa wena swa khale swi fana ni ku chayela u langute xivoni lexi ku kombaka swilo swa le ndzhaku. Ku anakanyisisa hi swihoxo swa wena swa khale swi ta ku endla u titwa u nga pfuni nchumu ni ku ku heta matimba lerova u nga ha swi koti ku langutana ni swihoxo swin’wana swa nkarhi lowu taka.

Ku ri na sweswo, ha yini u nga vi na vonelo lerinene?

“Dyondza eka swihoxo swa wena leswaku u nga ha swi endli nakambe. Kambe u nga ehleketi ngopfu hi swona lerova swi ku heta matimba.”—Elliot.

“Eka swihoxo leswi ndzi swi endleke, ndzi ringeta ku dyondza swo karhi eka xin’wana ni xin’wana xa swona leswaku ndzi endla swilo hi ndlela leyinene ni ku ndzi pfuna leswaku ndzi nga ha swi endli. Hi yona ndlela leyinene yo endla swilo hikuva yi ku pfuna leswaku u kula emianakanyweni.”—Vera.

LESWI TINTANGHA TA WENA TI SWI VULAKA

“Vanhu van’wana va hlundzuka ngopfu hikwalaho ka swihoxo swa vona, kasi van’wana a va na mhaka na swona. I swinene ku va u swi languta hi matlhelo mambirhi—ku khathala hi swihoxo swa wena leswaku u dyondza eka swona kutani u nga swi endli.”—Connor.

“Loko switsutsumi swi wa, swi tlhela swi tikarhata leswaku swi pfuka swi ya emahlweni. Na wena hi leswi u faneleke u endla swona loko u endla swihoxo. Loko u dyondza eka swihoxo swa wena ni ku tirhisa matimba ya wena ku swi lulamisa, u va munhu lonene.”—Dami.

“I swa nkoka ku tsundzuka swihoxo leswi u swi endleke leswaku u dyondza eka swona. Tirhisa dyondzo leyi u yi kumeke leswaku u papalata ku tlhela u swi endla. Kambe swihoxo leswi u swi endleke u nga swi pfumeleli swi ku heta matimba. Tirhisa dyondzo leyi u yi kumeke kutani u ya emahlweni ni vutomi.”—Zipporah.