Hi Swihi Swikombiso Swa ‘Masiku Yo Hetelela’ Kumbe ‘Mikarhi Ya Makumu’?

Nhlamulo ya le Bibeleni

Bibele yi hlamusela swiendlakalo, swiyimo ni mahanyelo leswi a swi ta fungha “ku fika ka makumu” kumbe “ku hela ka mikarhi.” (Matewu 24:3; Bibele Ya Mahungu Lamanene) Bibele yi hlamusela mikarhi leyi hi hanyaka eka yona tanihi “masiku yo hetelela” kumbe ‘mikarhi ya makumu.’—2 Timotiya 3:1; Daniyele 8:19; Bibele Ya Mahungu Lamanene.

Hi byihi vuprofeta byin’wana bya le Bibeleni mayelana ni ‘masiku yo hetelela’?

Bibele yi boxe swilo swo tala leswi a swi ta endleka leswi a swi ta va “xikombiso” xa masiku ya makumu. (Luka 21:7) Xiya swin’wana swa swikombiso sweswo leswi landzelaka:

Tinyimpi emisaveni hinkwayo. Yesu u vule leswi: “Hikuva matiko ma ta hlaselana ni mifumo yi ta hlaselana.” (Matewu 24:7) Hilaha ku fanaka, Nhlavutelo 6:4 yi vulavula hi mugadi wa hanci loyi a yimelaka nyimpi loyi a a ta “susa ku rhula emisaveni.”

Ndlala. Yesu u vule leswi: “Ku ta va ni ku kayivela ka swakudya.” (Matewu 24:7) Buku ya Nhlavutelo yi vulavula hi mugadi un’wana wa hanci, loyi a yimelaka ndlala naswona a khomeke xikalo xa swakudya.—Nhlavutelo 6:5, 6.

Ku tsekatseka lokukulu ka misava. Yesu u vule leswaku ku ta va ni “ku tsekatseka ka misava etindhawini to hambanahambana.” (Matewu 24:7; Luka 21:11) Ku tsekatseka loku lokukulu ka misava a ku ta vanga ku xaniseka emisaveni hinkwayo naswona a ku ta fa vanhu vo tala swinene.

Mintungu. Yesu u vule leswaku ku ta va ni “mintungu.”—Luka 21:11, Bibele Ya Matsalwa Yo Kwetsima Ya Misava Leyintshwa.

Vugevenga. Hambileswi swi nga ni malembe yo tala vugevenga byi ri kona kambe Yesu u vule leswaku emasikwini yo hetelela, a ku ta va ni ku “andza ka vubihi.”—Matewu 24:12.

Ku onhiwa ka misava. Nhlavutelo 11:18 yi vula leswaku a ku ta va ni vanhu lava “onhaka misava.” A va ta endla tano hi tindlela to tala, ku nga ri hi swiendlo swo biha ntsena kambe ni hi migingiriko leyi onhaka mbango.

Mahanyelo lama hohlokeke. Eka 2 Timotiya 3:1-4, hi ku angarhela Bibele yi boxe leswaku a ku ta va ni vanhu lava “nga khensiki, lava nga tshembekiki, . . . lava nga tiyimiselangiki ku pfumelelana ni van’wana, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka.” Mahanyelo lawa a ma ta nyanya ku biha, ku fikela laha swi nga lo tlangandla leswaku hi hanya ‘emikarhini yo nonon’hwa leyi swi tikaka ku hanya eka yona.’

Ku tlhantlheka ka mindyangu. Eka 2 Timotiya 3:2, 3, Bibele yi boxe leswaku vanhu vo tala a va nga ta va ni “rirhandzu” eka mindyangu ya vona naswona vana a va ta va lava nga “yingisiki vatswari.”

Rirhandzu ra vona eka Xikwembu a ri ta hola. Yesu u boxe leswaku: “Rirhandzu ra vo tala ri ta hola.” (Matewu 24:12) Yesu a a vula leswaku ndlela leyi vanhu vo tala va rhandzaka Xikwembu hayona a yi ta tsana. Hilaha ku fanaka 2 Timotiya 3:4 yi vula leswaku emasikwini yo hetelela, vanhu vo tano va ta va “lava rhandzaka ku tiphina ku ri ni ku rhandza Xikwembu.”

Vukhongeri lebyi nga ni vukanganyisi. Eka 2 Timotiya 3:5, Bibele yi boxe leswaku vanhu a va ta vonaka onge va gandzela Xikwembu kambe entiyisweni va nga hanyi hi milawu ya xona.

Ku twisisa vuprofeta bya Bibele ku ta ya ku andza. Buku ya Daniyele yi vule leswaku “enkarhini wa makumu,” vanhu vo tala a va ta kuma vutivi bya ntiyiso wa le Bibeleni, ku katsa ni ku twisisa vuprofeta lebyi boxiweke.—Daniyele 12:4.

Ntirho wo chumayela emisaveni hinkwayo. Yesu u vule leswi: “Mahungu lawa lamanene ya Mfumo ma ta chumayeriwa emisaveni hinkwayo.”—Matewu 24:14.

Ku andza ka vanhu lava nga khathaliki hi nchumu ni vahlekuri. Yesu u vule leswaku vanhu a va ta swi ba hi makatla swikombiso leswi nga le rivaleni swa leswaku makumu ma tshinele. (Matewu 24:37-39) Ku engetela kwalaho, 2 Petro 3:3, 4 yi vule leswaku van’wana a va ta byi bakanya hi ku helela vumbhoni byebyo, va vula leswaku a byi vuli nchumu.

Vuprofeta hinkwabyo byi hetisekile. Yesu u vule leswaku masiku ya makumu a hi ta ma vona hi ku hetiseka ka vuprofeta lebyi hinkwabyo, lebyi a byi ta endleka hi nkarhi wun’we.—Matewu 24:33.

Xana hi hanya “emasikwini yo hetelela”?

Ina. Swiyimo swa misava ku katsa ni ntlhandlamano wa mikarhi ya le Bibeleni, swi kombisa leswaku masiku ya makumu ma sungule hi 1914, ku nga lembe leri nyimpi yo sungula ya misava yi sunguleke ha rona. Leswaku u vona ndlela leyi swiyimo swa misava swi swi kombisaka hakona leswaku hi hanya emasikwini yo hetelela, hlalela vhidiyo leyi landzelaka:

Mfumo wa Xikwembu wu sungule ku fuma etilweni hi 1914 naswona xo sungula lexi wu nga xi endla i ku hlongola Sathana Diyavulosi ni madimona yakwe etilweni kutani va ta laha misaveni va ta hambukisa misava. (Nhlavutelo 12:7-12) Nkucetelo wa Sathana hi wu vona eka mahanyelo yo biha ni swiendlo swa vanhu vo tala namuntlha leswi endlaka masiku yo hetelela ma va “mikarhi yo nonon’hwa leyi swi tikaka ku hanya eka yona.”—2 Timotiya 3:1.

Mikarhi leyi yo nonon’hwa yi dyisa vanhu vo tala mbitsi. Va karhateka hileswi vanhu va nga ha swi kotiki ku hanyisana. Van’wana va chava leswaku hina vanhu hi ta kala hi herisana hi xi hina.

Hi hala tlhelo vanhu van’wana lava na vona va nga tshikilela hi swiyimo swa misava leyi va ni ntshembo hi vumundzuku. Va tiyiseka leswaku ku nga ri khale Mfumo wa Xikwembu wu ta teka goza ra ku herisa swiphiqo swa misava leyi hinkwaswo. (Daniyele 2:44; Nhlavutelo 21:3, 4) Va rindzele Xikwembu leswaku xi hetisisa switshembiso swa xona naswona va kuma nchavelelo eka marito ya Yesu lama nge: “Loyi a tiyiseleke ku ya fika emakumu u ta ponisiwa.”—Matewu 24:13; Mikiya 7:7.