Xana Timbhoni Ta Yehovha Ti Swi Languta Njhani Ku Dlaya Vukati?
Hi yingisa leswi Bibele yi swi vulaka hi vukati ni ku dlaya vukati. Xikwembu xi sungule vukati leswaku wanuna ni wansati va tshama swin’we hilaha ku nga heriki. Xivangelo xin’we xa le Matsalweni xo dlaya vukati i ku tikhoma ko biha hi swa masangu.—Matewu 19:5, 6, 9.
Xana Timbhoni ta va pfuna vatekani lava swi nga fambiki kahle evukatini bya vona?
Ina, hi tindlela to hambanahambana:
Mikandziyiso. Nkarhi ni nkarhi mikandziyiso leyi yi vulavula hi rungula leri nga tiyisaka vukati, hambi ku ri lebyi swi vonakaka onge a ka ha ri na ntshembo. Hi xikombiso, vona nhlokomhaka leyi nge, “Ku Namarhela Xihlambanyo Xa Wena eVukatini,” “Ndlela Yo Rivalela” ni leyi nge, “Endlani Leswaku Mi Tlhela Mi Tshembana.”
Tinhlengeletano. Etinhlengeletanweni ta hina ta vandlha, ta miganga ni ta swifundzha, hi bula hi switsundzuxo swa le Bibeleni leswi nga pfunaka vatekani.
Vakulu. Vakulu va vandlha va pfuna vatekani hi ku tirhisa matsalwa yo kota Vaefesa 5:22-25.
Xana vakulu va vandlha va fanele va seketela xiboho xa loko Mbhoni yi lava ku dlaya vukati?
Doo! Hambiloko vakulu va komberiwe ku pfuna vatekani lava nga ni swiphiqo, a va pfumeleriwanga ku va byela leswi va faneleke va swi endla. (Vagalatiya 6:5) Hambiswiritano, loyi a hlawulaka ku dlaya vukati ku nga ri na swivangelo swa le Matsalweni a nga tshunxekanga hi ku ya hi Matsalwa ku tlhela a nghenela vukati.—1 Timotiya 3:1, 5, 12.
Timbhoni ti swi languta njhani loko vatekani va hambana?
Bibele yi khutaza vatekani leswaku va tshama swin’we hambiloko swi nga fambi kahle evukatini. (1 Vakorinto 7:10-16) Swiphiqo swo tala swi nga lulamisiwa loko va khongela hi mbilu hinkwayo, va tirhisa misinya ya milawu ya le Bibeleni ni ku tlhela va rhandzana.—1 Vakorinto 13:4-8; Vagalatiya 5:22.
Nilokoswiritano, eka swiyimo swo tika swo tanihi leswi landzelaka, Vakreste van’wana va hlawule ku hambana ni lava va tekaneke na vona:
Ku nga hlayisi ndyangu hi vomu.—1 Timotiya 5:8.
Ku biwa.—Pisalema 11:5.
Ku siveriwa ku gandzela Xikwembu. Hi xikombiso, munghana wa vukati a nga ha ringeta ku sindzisa Mbhoni leswaku yi tlula nawu wa Xikwembu hi ndlela yo karhi naswona munghana wa vukati loyi a xungetiweke a nga ha endla xiboho xo hambana na yena tanihi ndlela yo “yingisa Xikwembu tanihi mufumi ku tlula vanhu.”—Mitirho 5:29.