Hikwalahokayini Timbhoni Ta Yehovha Ti Vulavula Ni Vanhu Lava Enkarhini Lowu Nga Hundza Va Nga Te “A Ndzi Swi Tsakeli”?

Timbhoni ta Yehovha ti susumetiwa hi leswi tirhandzaka Xikwembu ni vanhu, ta swi rhandza ku byela vanhu hinkwavo rungula ra Bibele ku katsa ni vanhu lava enkarhini lowu hundzeke va nga te ‘‘A ndzi swi tsakeli.’’ (Matewu 22:37-​39) Ku rhandza Xikwembu swi hi susumetela ku yingisa xileriso xa N’wana wa xona xa ku ‘‘nyikela vumbhoni lebyi heleleke.’’ (Mitirho 10:42; 1 Yohane 5:3) Leswi hi swi endla hi ku byela vanhu mahungu lamanene ya Xikwembu hi ku phindhaphindha, hilaha vaprofeta va Xikwembu va le nkarhini lowu hundzeke va endleke hakona. (Yeremiya 25:4) Hikwalaho ka leswi hi rhandzaka vaakelani va hina, hi ringeta ku avelana na vona hinkwavo “mahungu lamanene ya Mfumo” lama ponisaka vutomi ku katsa ni lava eku sunguleni a va nga ma tsakeli.​ —Matewu 24:14.

Mikarhi yo tala hi kuma vanhu lava tsakelaka loko hi tlhelela emakaya lama vanhu va kona a va nga tsakeli eku sunguleni. Xiya swivangelo leswi swinharhu:

• Vanhu va rhurha.

• Van’wana emakaya wolawo va kombisa ku tsakela eka rungula ra hina.

• Vanhu va cinca. Leswi swi endlekaka emisaveni ni leswi munhu a langutanaka na swona swi endla leswaku van’wana va sungula ku ‘tikarhatela ku va ni vuxaka ni Xikwembu’ ni ku tlhela va sungula ku tsakela mahungu lama humaka eBibeleni. (Matewu 5:3) Hambi lava a va nga lavi ku twa nchumu va nga ha cinca, hilaha muapostola Pawulo na yena a endleke hakona.​—1 Timotiya 1:13.

Hambiswiritano, a hi sindzisi munhu ku yingisa rungula ra hina. (1 Petro 3:15) Hi twisisa leswaku munhu un’wana ni un’wana u fanele a ti tekela xiboho loko swi ta etimhakeni leti khumbaka vugandzeri.​—Deteronoma 30:19, 20.