Xana Timbhoni Ta Yehovha Ti Yi Teka Njhani Minkosi?
Ndlela leyi hi tekaka minkosi hayona ni leswi endliwaka eka yona, yi kumeka eka tidyondzo ta le Bibeleni leti katsaka leti landzelaka:
A swi bihanga ku rila loko hi feriwe hi loyi hi n’wi rhandzaka. Vadyondzisiwa va Yesu va ririle loko va feriwe hi lava a va va rhandza. (Yohane 11:33-35, 38; Mitirho 8:2; 9:39) Kutani a hi teki minkosi ku ri leyi hi faneleke hi tiphina eka yona. (Eklesiasta 3:1, 4; 7:1-4) Kambe hi yi teka ku ri nkarhi wo chavelela lava feriweke.—Varhoma 12:15.
Vafi a va tivi nchumu. Swi nga ri na mhaka tinxaka kumbe mindhavuko ya hina, hi papalata mikhuva kumbe swiendlo leswi lwisanaka ni tidyondzo ta Bibele ta leswaku vafi a va tivi nchumu naswona a va nge va pfuni lava hanyaka. (Eklesiasta 9:5, 6, 10) Swiendlo sweswo swi katsa mirindzelo, minkhuvo yo tsundzuka vafi, ku phahla, ku vulavula ni vafi ni ku kombela mpfuno wa vona ni ku ambala mabendlhele kumbe swiambalo swo kombisa ku rila lava feke. Hi fambela ekule ni mikhuva ni swiendlo sweswo hileswi hi yingisaka xitsundzuxo lexi xa le Bibeleni: ‘Tihambaniseni . . . naswona tshikani ku khumba xilo lexi nga basangiki.’—2 Vakorinto 6:17.
Ku ni ntshembo hi lava feke. Bibele yi vula leswaku ku ta va ni ku pfuxiwa ka vafi naswona va ta pfuxiwa loko rifu ri herisiwile. (Mitirho 24:15; Nhlavutelo 21:4) Hilaha ntshembo wolowo wu va pfuneke hakona Vakreste va le nkarhini lowu nga hundza, na hina wa hi pfuna leswaku hi papalata mikhuva yo kombisa ku rila vafi hi ndlela leyi hundzeletiweke.—1 Vatesalonika 4:13.
Bibele yi hi khutaza ku titsongahata. (Swivuriso 11:2) Hikwalaho, a hi yimi na yona mhaka ya leswaku eminkosini ku va nkarhi wo “bombisa” swilo leswi munhu a nga na swona kumbe mali yakwe. (1 Yohane 2:16) A hi endli minkosi ya manyunyu leyi xikongomelo xa yona ku nga ku tiphina, ku bombisa mabokisi yo lahla vafi lama durhaka swinene kumbe ku ambala hi ndlela yo durha swinene hi xikongomelo xo nyanyula lava teke enkosini.
A hi va sindzisi van’wana ku endla minkosi ku fana na hina. Emhakeni leyi, hi yingisa xitsundzuxo lexi xa le Bibeleni: “Un’wana ni un’wana u ta tihlamulela eka Xikwembu.” (Varhoma 14:12) Kambe loko van’wana va lava ku tiva leswi hi pfumelaka eka swona, hi endla tano hi “moya wo rhula ni hi xichavo lexi enteke.”—1 Petro 3:15.
Xana minkosi ya Timbhoni yi njhani?
Ndhawu: Loko ndyangu wu va ni nkosi naswona ku fika siku ra ku lahla mufi wa vona, sweswo swi nga ha endleriwa kun’wana ni kun’wana laha ndyangu wu hlawulaka kona, ko tanihi le Holweni ya Mfumo ya Timbhoni ta Yehovha, ekaya ra mufi kumbe ekaya leri hlawuriweke hi ndyangu, endhawini leyi nkosi wu nga ta fambiseriwa kona kumbe emasirheni.
Ku fambisiwa ka nkosi: Ku va ni mbulavulo lowu chavelelaka lava feriweke hi ku va hlamusela leswi Bibele yi swi dyondzisaka hi vafi ni hi ntshembo wa ku pfuxiwa ka vona. (Yohane 11:25; Varhoma 5:12; 2 Petro 3:13) Nongonoko wa nkosi wu hi tsundzuxa vumunhu lebyinene bya mufi, hi ku hi chumbutela tidyondzo leti khutazaka leti hi ti dyondzeke eka xikombiso xa ripfumelo ra mufi.—2 Samuwele 1:17-27.
Ku yimbeleriwa tinsimu leti humaka eBibeleni. (Vakolosa 3:16) Ntirho wa nkosi wu gimetiwa hi xikhongelo lexi chavelelaka.—Vafilipiya 4:6, 7.
Ku hakela nkosi kumbe minyikelo: A hi hakerisi mali eka nchumu wihi na wihi lowu endliwaka hi vukhongeri bya hina, sweswo swi katsa na le minkosini naswona a hi fambisi xindhichana xa minyikelo loko hi ri karhi hi gandzela etinhlengeletanweni ta hina ta vandlha.—Matewu 10:8.
Vanhu lava lavekaka enkosini: Hambi ku ri vanhu lava nga riki Timbhoni na vona va amukelekile leswaku va ta enkosini loko wu khomeriwe eHolweni ya Mfumo ya Timbhoni ta Yehovha. Vanhu hinkwavo va pfumeleriwa ku ta loko ku fambisiwa nkosi, hilaha va pfumeleriwaka hakona ku ta etinhlengeletanweni ta vandlha ta Timbhoni ta Yehovha.
Xana Timbhoni ta ya eminkosini leyi fambisiwaka hi vukhongeri byin’wana?
Mbhoni yin’wana ni yin’wana ya Yehovha yi ti endlela xiboho hi ku ya hi ripfalo ra yona leri leteriweke hi Bibele. (1 Timotiya 1:19) Hambiswiritano, a hi katseki eka mikhuva ya vukhongeri leyi hi vonaka yi nga pfumelelani na Bibele.—2 Vakorinto 6:14-17.