Xana Pagatori I Dyondzo Leyi Nga eBibeleni?

Nhlamulo leyi humaka eBibeleni

Nikatsongo. Rito pagatori a ri kona eBibeleni naswona leswaku mimoya ya vanhu lava feke yi basisiwa epagatori a hi dyondzo ya le Bibeleni.a Xiya leswi Bibele yi swi dyondzisaka mayelana ni xidyoho ni rifu ni ndlela leyi swi hambanaka ha yona ni dyondzo ya pagatori.

• Ku va ni ripfumelo eka ngati ya Yesu, hi swona swi basisaka munhu exidyohweni, ku nga ri ku ya tshama endhawini leyi vuriwaka pagatori. Bibele yi vula leswaku “ngati ya Yesu N’wana wa [Xikwembu] ya hi basisa eswidyohweni hinkwaswo” ni leswaku ‘Yesu Kreste u hi ntshunxe eswidyohweni swa hina hi ngati yakwe.’ (1 Yohane 1:7; Nhlavutelo 1:5) Yesu u nyikele “hi moya-xiviri wakwe wu va nkutsulo wa lavo tala” leswaku a hakela swidyoho swa vona.​—Matewu 20:28.

• Vanhu lava feke a va tivi nchumu. “Hikuva lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” (Eklesiasta 9:5) Leswi munhu la feke a nga twiki ku vava, a nge basisiwi hi ndzilo wa pagatori.

• Loko Munhu a file a nga xupuriwi hikwalaho ka swidyoho. Bibele yi vula leswaku “hakelo leyi tisiwaka hi xidyoho i rifu” ni leswaku “loyi a feke, xidyoho xa yena xi hlanguriwile.” (Varhoma 6:7, 23) Rifu i nxupulo lowu heleke wa xidyoho.