“A ndzi ri ni ximbilwambilwana xin’wana xo chavisa”

VUTOMI BYA MINA BYA KHALE

Ndzi velekiwe eSan Juan Chancalaito, exidorobanini lexitsongo xa le Chiapas, eMexico. Ekaya hi Machol, ku nga rixaka ra Vamaya. Vatswari va mina a va ri na vana va 12 naswona mina ndzi wa vuntlhanu eka lava 12. Loko ndza ha ri ntsongo, mina ni vamakwavo va mina a hi dyondza Bibele ni Timbhoni ta Yehovha. Lexi twisaka ku vava, a ndzi swi tirhisanga leswi ndzi swi dyondzeke eBibeleni loko ndza ha ri ntsongo.

Loko ndzi ri ni malembe ya 13, se a ndzi dzaha swidzidzirisi naswona a ndzi yiva. Hi nkarhi wolowo, ndzi sukile ekaya naswona a ndzi nga tshami eka ndhawu yin’we. Loko ndzi ri ni malembe ya 16, ndzi sungule ku tirha laha a ku byariwa bangi. Ndzi tirhe kwalaho kwalomu ka lembe naswona siku rin’wana nimadyambu loko hi ri karhi hi fambisa mbangi hi xikepe, ku humelele vavanuna lava a va hlomile hi swibamu ku nga ntlawa wun’wana lowu na wona a wu xavisa mbangi, wu fika wu hi hlasela. Ndzi baleke ku duvuriwa hi ku nyupela ematini kukondza ndzi ya humelela hi tlhelo lerin’wana. Kutani ndzi balekele eUnited States.

Kwalaho, ndzi ye emahlweni ni ku xavisa swidzidzirisi kutani ndzi nghene ekhombyeni. Loko ndzi ri ni malembe ya 19, ndzi khomiwile ndzi ya ekhotsweni hikwalaho ka vugevenga ni ku dlaya munhu. Loko se ndzi ri ejele ndzi joyine ntlawa wa swigevenga ndzi tlhele ndzi endla madzolonga man’wana. Hikwalaho ka sweswo, valawuri va kwalaho va ndzi yise ejele ra le Lewisburg le Pennsylvania leri a ri ri ni varindzi va xiyimo xa le henhla.

Loko ndzi ri eLewisburg mahanyelo ya mina yo biha ma ye ma nyanya. Tanihi leswi a ndzi ri ni Mfungho wo yimela ntlawa wo karhi, loko ndzi fika kwalaho ndzi joyine ntlawa lowu na wona a wu wela eka ntlawa lowu a ndzi ri eka wona. Ndzi ye ndzi va na madzolonga swinene ni ku tshamela ku holova ni vanhu. Siku rin’wana ndzi katsekile eka nyimpi ya mintlawa yimbirhi leyi a yi lwa ejele. Hi lwe nyimpi yo chavisa swinene naswona a hi banana hi tinhonga to tlanga khrikete ni tinsimbi to tika to jima hi tona. Vatirhi va le jele va tirhise swibalesa swa gasi swo dakwisa leswaku va lamula nyimpi yoleyo. Endzhaku ka sweswo, valawuri va ndzi yise endhawini leyi a ku tshama vakhotsiwa lava karhataka swinene. A ndzi ri ni ximbilwana swinene naswona a ndzi rhuketela. A ndzi nga chavi ku ba vanhu. Ku vula ntiyiso, a swi ndzi tsakisa. A ndzi nga titwi nandzu hi mahanyelo ya mina.

NDLELA LEYI BIBELE YI CINCEKE VUTOMI BYA MINA HA YONA

Laha a ndzi ri kona a ndzi pfaleriwe ndzi ri ndzexe naswona hikwalaho ka sweswo a ndzi tihungasa hi ku hlaya Bibele. Hi ku famba ka nkarhi murindzi un’wana u ndzi nyike buku leyi nge, You Can Live Forever in Paradise on Earth.a Loko ndzi ri karhi ndzi dyondza Bibele ndzi tsundzuke swilo swo tala leswi ndzi swi dyondzeke na Timbhoni ta Yehovha loko ndza ha ri ntsongo. Endzhaku ka sweswo ndzi anakanyisise hi swilo swo biha leswi ndzi swi endleke hikwalaho ka leswi a ndzi ri ni madzolonga. Ndzi tlhele ndzi anakanyisisa hi ndyangu wa ka hina. Tanihi leswi vasesi wa mina va veke Timbhoni ta Yehovha ndzi tele hi miehleketo ya leswaku va ta ‘hanya hilaha ku nga riki na makumu.’ Kutani ndzi tivutisile leswaku ‘mina ndzi ta tsandziwa hi yini?’ Ku sukela kwalaho ndzi tiyimisele ku cinca.

Hambiswiritano, a ndzi swi tiva leswaku a ndzi lava mpfuno leswaku ndzi ta cinca. Xo sungula ndzi khongele eka Yehovha Xikwembu ndzi kombela mpfuno. Nakambe ndzi tsalele rhavi ra hofisi ya Timbhoni ta Yehovha eUnited States ndzi kombela dyondzo ya Bibele. Rhavi ri endle malunghiselelo ya leswaku vandlha ra le kusuhi ri tihlanganisi na mina. Hi nkarhi wolowo, a ndzi nga pfumeleriwi ku endzeriwa hi vanhu van’wana handle ka vandyangu wa mina, kutani Mbhoni yin’wana ya le vandlheni yi sungule ku ndzi tsalela mapapila yo ndzi khutaza ni ku ndzi nyika mikandziyiso ya Bibele, leswi ndzi endleke ndzi ya ndzi swi navela swinene ku cinca.

Kutani ndzi endle xiboho lexikulu loko ndzi sukela ntlawa lowu a ndzi tshama na wona, ku ringana malembe yo tala. Tanihi leswi murhangeri wa ntlawa wa hina na yena a yisiwe eka vabohiwa lava karhataka, ndzi ye eka yena hi nkarhi wa hina wa ku hungasa kutani ndzi n’wi byele leswaku ndzi lava ku va Mbhoni ya Yehovha. Lexi ndzi hlamariseke, u ndzi byele leswi: “Loko u tiyimiserile, endla tano. Mina a ndzi nge ngheneleli eka swilo swa Xikwembu. Kambe loko u lava ku huma eka ntlawa wa hina hi xitayele, wa byi tiva vuyelo bya kona.”

Endzhaku ka malembe mambirhi varindzi va sungule ku xiya ku cinca ka mina. Hikwalaho ka sweswo, va sungule ku ndzi twela. Hi xikombiso, varindzi a va nga ha ndzi khomi loko va ndzi humesa ndzi ya eku hlambeni. Murindzi un’wana u tile eka mina a ndzi khutaza leswaku ndzi ya emahlweni ndzi endla ku cinca. Valawuri va le khotsweni va tlhele va ndzi yisa ekhotsweni ra vanhu lava nga karhateki, ekusuhi na khotso lerikulu hi lembe ra mina ro hetelela ejele. Hi 2004, endzhaku ka loko ndzi khomiwile malembe ya khume, ndzi humesiwile kutani ndzi yisiwa eMexico, hi bazi ya vakhotsiwa.

Endzhaku ka loko ndzi fike eMexico, ndzi ye eHolweni ya Timbhoni ta Yehovha. Loko ndzi ya eminhlanganweni ro sungula a ndzi ambale yunifomo ya le khotsweni, leyi a ku ri yona mpahla ya kahle leyi a ndzi ri na yona. Ku nga khathariseki ndlela leyi a ndzi languteka ha yona, Timbhoni ti ndzi amukele hi moya lowunene. Loko ndzi vona musa wa tona ndzi titwe ndzi ri exikarhi ka Vakreste va ntiyiso. (Yohane 13:35) Eka nhlangano wolowo vakulu va endle malunghiselelo ya leswaku ndzi dyondzeriwa Bibele. Endzhaku ka lembe hi ti 3 ta September 2005, ndzi khuvuriwile ndzi va Mbhoni ya Yehovha.

Hi January 2007 ndzi sungule ku va mutirheli wa nkarhi hinkwawo, ndzi heta tiawara ta 70 n’hweti ni n’hweti ndzi dyondza Bibele na vanhu. Hi 2011 ndzi ve eka Xikolo xa Bibele xa Vamakwerhu lava nga Tekangiki (sweswi xi vitaniwa Xikolo Xa Vachumayeri Va Mfumo). Xikolo lexi xi ndzi pfunile ku hetisisa vutihlamuleri bya mina eVandlheni.

Hi 2013, ndzi tekane ni nsati wa mina la rhandzekaka Pilar. U ri: “Hikwalaho ka ndlela leyi ndzi n’wi khomaka ha yona a nga tshembi swilo leswi ndzi n’wi byelaka leswaku ndzi swi endlile enkarhini lowu hundzeke. A ndzi si tshama ndzi tlhelela eka mahanyelo ya mina ya khale. Mina ni nsati wa mina hi xiye leswaku munhu loyi ndzi nga yena sweswi i vumbhoni bya leswaku Bibele yi ni matimba yo hundzula vutomi bya vanhu.—Varhoma 12:2.

NDLELA LEYI NDZI VUYERIWEKE HA YONA

Ndzi twa onge marito ya Yesu lama nga eka Luka 19:10 ma tirha eka mina. Kwalaho u te: “[Ndzi] tele ku ta lava ni ku ponisa leswi lahlekeke.” A ndza ha titwi ndzi lahlekile evuton’wini. A ndza ha fambi ndzi vavisa vanhu. Ndzi nkhensa Bibele, ndza tiphina hi ku va ni xikongomelo hi vutomi, ku tirhisana na van’wana hi ku rhula kambe xa nkoka swinene i vuxaka lebyinene lebyi ndzi nga na byona ni Muvumbi wa mina Yehovha.