Xibye xa nkuma wa mufi etlhelo ka xifaniso xakwe

Xana Bibele Yi Ri Yini Hi Ku Hisa Ntsumbu?

Nhlamulo ya Bibele

EBibeleni a ku na nkongomiso wo karhi hi ta ku hisa ntsumbu. A ku na nawu wa le Bibeleni mayelana nileswaku ntsumbu wu fanele wu celeriwa kumbe wu hisiwa.

Bibele a yi hlamuseli leswaku malandza yo tshembeka ya Xikwembu a ya va lahla njhani vafi va vona. Hi xikombiso, Abrahama u endle matshalatshala leswaku a kuma ndhawu yo lahla nkatakwe Sara.—Genesa 23:2-20; 49:29-32.

Bibele yi tlhela yi hlamusela hi ta vanhu van’wana lava gandzelaka Xikwembu lava hiseke ntsumbu. Hi xikombiso, loko Hosi Sawulo wa le Israyele ni vana vakwe va majaha vanharhu va dlayiwile enyimpini, mintsumbu ya vona eku sunguleni a yi ri etikweni ra valala naswona a va va lahle bya mbyana. Loko mhaka yoleyo yi fika etindleveni ta Vaisrayele lava tshembekaka va vurhena, va landze mintsumbu ya Sawulo ni majaha yakwe, va yi hisa kutani va teka nkuma wa yona va ya wu celela. (1 Samuwele 31:8-13) Bibele yi komba leswaku a ku fanele ku endliwa tano hi nkuma wa vavanuna volavo.—2 Samuwele 2:4-6.

Mavonelo lama tolovelekeke lama hoxeke hi ta ku hisa ntsumbu

Mavonelo lama hoxeke: Ku hisa ntsumbu swi kombisa ku ka u nga wu xiximi.

Ntiyiso wa mhaka: Bibele yi ri vafi va tlhelela entshurini, hi leswi hi ntumbuluko swi endlekaka loko ntsumbu wu bola. (Genesa 3:19) Ku hisa ntsumbu swi wu endla wu hatlisa wu hundzuka nkuma kumbe ritshuri.

Mavonelo lama hoxeke: Eminkarhini ya ku tsariwa ka Bibele, a ku hisiwa ntsena mintsumbu ya vanhu lava a va nga tsakeriwi hi Xikwembu.

Ntiyiso wa mhaka: Mintsumbu ya vanhu van’wana lava nga tshembekangiki, vo tanihi Akani ni ndyangu wakwe yi hisiwile. (Yoxuwa 7:25) Mintsumbu ya vona a yi fanele yi hisiwa kambe a swi vuli swona leswaku a ku ri nawu. (Deteronoma 21:22, 23) Hilaha swi hlamuseriweke ha kona eku sunguleni, mintsumbu ya vanhu van’wana vo tshembeka vo tanihi Yonathani n’wana wa Sawulo wu hisiwile.

Mavonelo lama hoxeke: Ku hisa ntsumbu wa munhu swi n’wi sivela leswaku Xikwembu xi nga ha n’wi pfuxi.

Ntiyiso wa mhaka: Mayelana ni ta ku pfuxiwa ka vafi, Xikwembu xi ta va pfuxa ku nga khathariseki leswaku ntsumbu wa munhu wu lo celeriwa, wu lo hisiwa, kumbe u fele elwandle kumbe u dyiwe hi swiharhi. (Nhlavutelo 20:13) Vanhu lava pfuxiwaka eku feni, Lowa Matimba Hinkwawo u ta va vumbela miri lowuntshwa.

U Nga Xi Endla Njhani Xiboho Loko Swi Ta eMhakeni Yo Hisa Ntsumbu Kumbe Ku Wu Celela?

Loko u endla xiboho mayelana ni leswi u nga ta n’wi lahlisa xiswona munhu, xiya tinhla leti landzelaka.

Ku rhandza ka mufi. EBibeleni ku ni swirho swa mindyangu leswi xiximeke rito ra mufi, emhakeni ya leswi a vuleke leswaku ku fanele ku endliwa swona hi ntsumbu wakwe.—Genesa 50:4, 5; Eksoda 13:19.
Mindhavuko ya laha hi tshamaka kona. Hakanyingi i ya nkoka eka ndlela leyi mintsumbu yi lahliwaka ha yona. (Yohane 19:40) Hi xikombiso, eminkarhini ya Bibele, vanhu a va tolovele ku lahla vafi. (Genesa 49:31; 1 Samuwele 28:3) Hilaha ku fanaka, ninamuntlha munhu a nga ha hlawula ku lahla mufi wakwe hi ku ya hi ndhavuko wa laha a tshamaka kona tanihi leswi mindhavuko yo tano yi nga lwisaniki ni misinya ya milawu ya Bibele.
Nawu wa tiko. Bibele yi khutaza leswaku hi yingisa valawuri. (Varhoma 13:1) Etindhawini tin’wana valawuri va veka milawu ya leswaku mintsumbu yi fanele yi lahliwa njhani. Hi xikombiso, valawuri van’wana va veka nawu wa leswaku loko ntsumbu wu hisiwile wu fanele wu lahliwa kwihi nkuma wa kona.
Ndlela leyi van’wana va titwaka ha yona. Matsalwa ma hi khutaza leswaku hi anakanyela van’wana. (Vafilipiya 2:4) Loko hi endla xiboho xa leswi hi nga ta swi endla hi nkuma wa mufi, hi fanele hi kambisisa swivutiso leswi: Xana swirho leswin’wana swa ndyangu swi titwa njhani hi ku hisa ntsumbu kumbe ku n’wi lahla esirheni? Xana vaaki va le ndhawini ya ka hina va wu teka njhani mukhuva wolowo?