Ku Sirhelela Ntshunxeko Wa Vugandzeri Eka Vanhu Lava Tshamaka eTindhawini To Karhi Va Ri Voxe

Eka madzana ya timiliyoni ta vanhu lava tshamaka eLatin America, ku ni vanhu va timiliyoni lava nga ni tindzimi ni mindhavuko ya vona vini. Vo tala va vanhu lava i vamakwerhu lava tekaka ndhavuko wa vona wu ri wa nkoka. Leswaku ku pfuniwa vanhu va tiva ntiyiso, va hundzuluxela ni ku fambisa mikandziyiso ya Timbhoni ta Yehovha hi tindzimi to tlula 130 ta le Latin America.a Hambiswiritano, van’wana va kanetiwa hileswi va hlawulaka ku tirhela Yehovha ni leswi va alaka ku katseka eka mikhuva yo karhi leyi nga fambisaniki ni matsalwa laha va tshamaka kona. Xana minyikelo ya wena yi tirhisiwe njhani leswaku yi va pfuna?

Va Pfuniwe Leswaku Va Vuya Ekaya

EMexico, vamakwerhu eHuichol endhawini ya tintshava ya le Jalisco State hi ku titsongahata va ale ku katseka eka mikhuva ya vukhongeri leyi a yi lwisana ni ripfalo ra vona.b Kambe leswi swi hlundzukise van’wana emugangeni wolowo. Hi December 4, 2017, ntlawa wa vanhu lava hlundzukeke wu hlasele Timbhoni ni vanhu van’wana lava a va ri na tona. Vanhu volavo va va sindzise leswaku va famba emugangeni wolowo, va va onhela nhundzu ya vona ni ku xungeta ku va dlaya loko vo ringeta ku vuya.

Timbhoni ta le kusuhi ti hatle tipfuna vamakwerhu hi swilo leswi a va swi lava. Kambe xana a ku fanele ku endliwa yini leswaku va kota ku tlhelela ekaya? Makwerhu la vuriwaka Agustín u ri: “A hi nga ri na mali leyi eneleke leswaku hi lava loyara naswona a hi nga ku tiva laha a hi fanele hi ya kona leswaku hi ya kuma mpfuno wa swa nawu.”

Leswi ntshuxeko wa vamakwerhu wo gandzela a wu hlaseriwa, rhavi ra le Central America ri hatle ri teka goza. Xo sungula, va kombele maphorisa ya laha va tshamaka kona leswaku va lavisisa milandzu leyi. Xa vumbirhi, va kume mpfumelelo eka Komiti Ya Vahlanganisi Ya Huvo Leyi Fumaka ya Timbhoni ta Yehovha leswaku va tirha ni ndzawulo ya swa nawu entsindza wa misava hinkwayo ni ku pfuna vamakwerhu va le Huichol eka nandzu lowu va hehliwaka hi wona. Mhaka leyi yi hetelele yi fike eka Huvo leyi Tlakukeke, ekhotonkulu ya le Mexico.

Ntlawa wa magqweta ya le matikweni yo hambanahambana ma lunghiselele mhaka leyi nga lo tlangandla, leyi eka yona ma hlamuseleke leswaku tanihi leswi van’wana va faneleke va xixima ndhavuko wa vanhu lava tshama endhawini leyi va nga voxe, vanhu volavo va fanele va xixima ni ku sirhelela ntshuxeko wa swirho swa wona hinkwaswo. Vanhu hinkwavo va ni timfanelo swi nga ri na mhaka leswaku va tshama kwihi.

Hi July 8, 2020, Huvo leyi Tlakukeke yi yime ni Timbhoni ta Yehovha. Yi vule leswaku hinkwavo lava hlongoriweke va fanele va tlhelela laha a va tshama kona. Agustín, loyi ku vulavuriweke ha yena eku sunguleni u boxa ndlela leyi yena ni van’wana va titwaka hayona, u ri: “Ha tsaka ni ku swi tlangela leswi vamakwerhu va hi endleleke swona. Loko a va nga hi pfunanga, a hi ta va hi nga kotanga ku endla nchumu.”

“Va Endleriwe Swo Tala Hambileswi A Va Ri Vatsongo”

Vamakwerhu lava nga eSan Juan de Ilumán ku nga ximutana lexi nga Ecuador laha ku tshamaka vanhu lava nga voxe eOtavalo Valley na vona va langutane ni nkaneto lowu fanaka. Hi 2014, endzhaku ka loko va kume maphepha hinkwawo lama lavekaka va sungule ku aka Holo ya Mfumo. Hambiswiritano, mufundhisi u endle leswaku vanhu vo tlula 100 va sindzisa ku yimisa ntirho wo aka. Vaakatiko va byele Timbhoni ta Yehovha ku tshika ku hlangana swin’we leswaku ti gandzela.

Tindzawulo ta swa nawu ta le rhavini ra Ecuador ni le ntsindza wa misava hinkwayo ti hlanganile leswaku ti sirhelela vandlha hileswi a ri nga ha ri na wona ntshuxeko wo gandzela. Vamakwerhu va yi yise ekhoto mhaka yoleyo. Sweswo swi endle leswaku vanhu va le mugangeni va nga ha va xanisi naswona swi endle vamakwerhu va tlhela va sungula ku ya etinhlengeletanweni ta vandlha ni ku hetisa ku aka Holo ya Mfumo. Leswaku va sirhelela timfanelo ta vamakwerhu enkarhini lowu taka, vayimeri va hina va kombele khoto ku endla xiboho hi xivutiso lexi xa nkoka: Xana vanhu lava tshamaka etindhawini leti va ngo va voxe va fanele va xixima timfanelo ta vanhu emisaveni hinkwayo?

Hi July 16, 2020, Khoto Ya Vumbiwa ya le Ecuador, ku nga khoto leyi tlakukeke yi twe hi mhaka leyi. Vamakwerhu lava nga magqweta eEcuador va yimele vandlha. Ku engetela kwalaho, vamakwerhu va mune lava nga tiloyara ematikweni yo hambanahambana lava nga ni ntokoto va vulavule ni khoto. Hikwalaho ka swipimelo swa COVID-19, va vulavule va ri ematikweni yo hambanahambana hi ku tirhisa videoconference. A ku ri ro sungula khoto yi pfumelela ntlawa wa swa nawu wu yimela Timbhoni ta Yehovha emisaveni hinkwayo hi ku tirhisa endlelo leri.c Ntlawa lowu wu boxe valawuri va swa nawu emisaveni hinkwayo wu tiyisekisa leswaku vanhu lava titshamelaka va ri voxe a va fanelanga va tshika timfanelo ta vona ntsena hikwalaho ka leswi va nga vaakatiko lava titshamelaka voxe.

Vamakwerhu va le Otavalo Valley va xi yimele hi mahlongati xiboho xa Khoto ya Vumbiwa. Ku fikela sweswi, va tsakisiwe hi mpfuno lowu va wu kumeke. César, loyi a nga nkulu evandlheni ra Ilumán Quichua u ri: “I Yehovha ntsena loyi a nga endlelaka vanhu vatsongo swo tala hi ku tirhisa nhlangano wakwe.”

Magqweta lama katsekeke eka mhaka leyi hinkwavo i Timbhoni ta Yehovha naswona ma tsaka hikwalaho ka leswi ma hoxeke xandla handle ko lava ku hakeriwa. Hambiswiritano, ku pfula milandzu, ku yi lunghiselela ni ku ya ekhoto a swi lava nkarhi ni mali. Magqweta ya hina ni vamakwerhu van’wana va hete tiawara to tlula 380 va ri karhi va lunghiselela ku ya ekhoto ni tiawara tin’wana ta 240 va ri karhi va hundzuluxela ti-document ta nandzu wa le Mexico. Kwalomu ka magqweta ya 40 ma hete tiawara ta madzana eka nandzu wa le Ecuador. Xana hi yi kume kwihi mali yo hakelela swikoxo swa nandzu lowu vamakwerhu a va hehliwa ha wona? Hi ku nyikela hi ku tirhisa tindlela to hambanahambana leti hlamuseriwaka eka donate.jw.org. Ha ku khensa ku hanana ka wena.