Lava Nga Vulavuriki A Va Rivariwanga

Yehovha Xikwembu u lava leswaku vanhu hinkwavo swi nga ri na mhaka swiyimo swa vona, va dyondza hi yena ni hi Mfumo wakwe wa le tilweni. (1 Timotiya 2:3, 4) Hikwalaho ka sweswo, Timbhoni ta Yehovha ti humesa Tibibele ni swo pfuneta ku yi dyondza swa vanhu vo tala hi laha ti nga kotaka ha kona ku katsa ni swa lava nga vulavuriki. Kahlekahle, nhlangano wa hina wu humese mikandziyiso ya magidi ya ririmi ra mavoko hi xivumbeko xa tivhidiyoa leyi kumekaka hi tindzimi ta mavoko to tlula 100! Xana yi endliwa ni ku fambisiwa njhani mikandziyiso leyi? I yini leswi hi swi antswiseke loko nkarhi wu ri karhi wu famba?

Xana Tivhidiyo Ta Ririmi Ra Mavoko Ti Endliwa Njhani?

Mikandziyiso ya ririmi ra mavoko yi endliwa hi mitlawa ya vahundzuluxeri emisaveni hinkwayo. Xirho ha xin’we xa ntlawa xi wu kambisisa hi vukheta nkandziyiso lowu faneleke wu hundzuluxeriwa. Endzhaku ka sweswo, va bula hi ndlela leyi va nga ri vekaka hayona rungula rolero hi ririmi ra mavoko. Loko va heta, va rhekhoda nkandziyiso wolowo wu va vhidiyo. Sweswinyana, ku ni mitlawa ya 60 leyi hundzuluxelaka switirhisiwa swo pfuneta ku dyondza Bibele hi ririmi ra mavoko nkarhi ni nkarhi naswona ku ni mitlawa ya 40 leyi endlaka tano mikarhi yin’wana.

Khale a swi durha ku endla tivhidiyo ta ririmi ra mavoko. Tikhamera ni switirhisiwa swin’wana a swi durha ngopfu ku tlula leswi swi nga xiswona namuntlha. Nakambe tivhidiyo a ti rhekhodiwa exitudiyo lexi a hi fanele hi tiakela xona naswona mikarhi yin’wana a hi fanele hi pfuxeta miako leyi nga kona. Leswaku ku kumeka swilo hinkwaswo leswi ntlawa wa vahundzuluxeri va ririmi ra mavoko wu swi lavaka, a swi ta koxa tidolara to tlula 30 000.b

Leswaku ku tirhisiwa minyikelo hi ndlela leyinene, nhlangano wa hina wu lave tindlela to antswisa ni ku olovisa ntirho wo hundzuluxela. Xisweswo hi tirhise switirhisiwa swa manguva lawa leswi olovaka ku swi tirhisa naswona swi nga durhiki. Ku ri ni ku va ku tirhisiwa xitudiyo, mitlawa ya vahundzuluxeri yi nga ti vekela xikirini xa rihlaza kutani yi rhekhoda tivhidiyo etihofisini ta yona. Loko ku laveka vanhu vo tala vo rhekhoda hi ririmi ra mavoko, vamakwerhu va nga rhekhoda swiphemu swo karhi swa nkandziyiso va ri etihofisini ta vona kumbe va ri emakaya; a swa ha bohi leswaku va ya exitudiyo.

Hi tlhele hi endla software ku pfuna lava rhekhodaka hi ririmi ra mavoko leswaku va endla ntirho wa vona. Ku antswisiwa koloko ku hungute nkarhi wo tala lowu vahundzuluxeri a va wu heta va ri karhi va endla nkandziyiso wa ririmi ra mavoko. Vamakwerhu va ku tlangela ku antswisiwa loku. Makwerhu la vuriwaka Alexander u ri: “Sweswi tivhidiyo ta ririmi ra mavoko ti humesiwa ko tala ku tlula eku sunguleni. Leswi swa ndzi tsakisa. Ndzi hlalela tivhidiyo siku ni siku.”

Sweswinyana, leswaku ntlawa wa vahundzuluxeri wu kuma swo tirha, ku laveka tidolara ta le hansi ka 5 000. Hikwalaho ka sweswo, hi kota ku endla tivhidiyo ta ririmi ra mavoko hi tindzimi to tala.

Ti Fambisiwa Njhani Tivhidiyo Ta Ririmi Ra Mavoko?

Loko ntlawa wu heta ku rhekhoda nkandziyiso wa ririmi ra mavoko, lava tirhisaka tivhidiyo leti va fanele va kota ku ti kuma. Enkarhini lowu nga hundza a hi humesa tivhidiyo khasete na ti-DVD kambe a swi durha, swi dya nkarhi wo tala ni ku tlhela swi tirhisana. Leswi rhekhodiweke a swi rhumeriwa eka khamphani yin’wana leswaku ku endliwa tikopi. Eku heteleleni, tivhidiyo khasete ni ti-DVD a swi rhumeriwa emavandlheni. Hi 2013 ntsena, hi tirhise ku tlula 2 000 000 wa tidolara leswaku hi endla ti-DVD ta ririmi ra mavoko.

Vanhu lava nga vulavuriki a va yi tlangela swinene mikandziyiso yoleyo. Hambiswiritano, a hi mikarhi hinkwayo a swi olova ku tirhisa tivhidiyo, ngopfungopfu leswi tikhasete ni ti-DVD a swi ya swi tala. Mikarhi yin’wana a swi lava ti-DVD to hlayanyana leswaku ku rhekhodiwa buku yin’we ya Bibele. Makwerhu wa xinuna wa le Brazil loyi a vuriwaka Gilnei u ri: “Nkarhi ni nkarhi loko hi fanele hi hlaya tsalwa, a hi fanele hi lava vhidiyo khasete leyi faneleke leswaku hi kuma tsalwa. A swi tika swinene.” Makwerhu wa xisati loyi a vuriwaka Rafayane, loyi a a tirhisa ti-DVD ta ririmi ra mavoko, u ri: “A swi karharisa ku endla dyondzo ya munhu hi yexe. A hi heta nkarhi wo tala hi ri karhi hi lava matsalwa ni swikombo.” Loko vamakwerhu va ri karhi va chumayela, hakanyingi a va famba ni ti-DVD kumbe tivhidiyo khasete leti a va ta ti tlangela vanhu lava tsakelaka eka ti TV ta vona. Vamakwerhu van’wana a va teka swo tlanga ti-DVD swa vona. Hambiswiritano swi nga si ya kwihi ku sungule ku va ni swo tlanga ti-DVD leswi nga ni xikirini naswona vamakwerhu a va tirhisa swona. Bobby, loyi a tshamaka eUnited States u ri: “Endzhaku ko n’wi komba tsalwa hakanyingi a wu boheka ku ya eka DVD yin’wana loko u lava ku n’wi komba tsalwa rin’wana. Leswi a swi heta nkarhi wo tala naswona a swi endla swi nga olovi ku tirhisa Bibele loko hi bula ni vanhu.”

Hi 2013, nhlangano wa Yehovha wu humese app ya JW Library Sign Language leyi endlaka leswaku vamakwerhu va kota ku dawuniloda ni ku tlanga tivhidiyo ta ririmi ra mavoko eka tifoni kumbe ti-tablet ta vona. App yi rhange yi humesiwa hi ririmi ra mavoko ra le Amerika. Kutani hi 2017 yi antswisiwile leswaku yi kota ku va ni tindzimi hinkwato ta mavoko. Vamakwerhu emisaveni hinkwayo a va tsakile swinene. Makwerhu loyi a vuriwaka Juscelino wa le Brazil u ri: “A ndzi tshembanga! A ndzi tshamela ku ehleketa hi ndlela leyi Huvo leyi Fumaka yi hi rhandzaka hayona hina vanhu lava nga vulavuriki ni leswi yi lavaka leswaku hi va ni vuxaka ni Xikwembu ku fana ni vanhu lava vulavulaka. A ndzi tsake ni swikunwana naswona app leyi yi endle leswaku ndzi ya ndzi swi tsakela swinene ku dyondza Bibele.”

Namuntlha hi endla tivhidiyo hinkwato ta ririmi ra mavoko ni ku endla ti kumeka eka website ya hina ni le ka app ya JW Library Sign Language. Hikwalaho ka sweswo, ku hundzuluxeriwa mikandziyiso ya ririmi ra mavoko, yi rhekhodiwa ni ku tlhela yi humesiwa endzhaku ka masiku ma nga ri mangani ku ri ni ku rindza tin’hweti kumbe malembe. Kahlekahle, mikandziyiso yo tala ya tindzimi ta mavoko yi humesiwa nkarhi wun’we ni mikandziyiso ya lava vulavulaka.

Twana swin’wana leswi vamakwerhu lava nga vulavuriki va swi vulaka. Makwerhu wa xisati loyi a vuriwaka Klízia u ri: “Nhlangano wa khathala swinene hi vanhu lava nga vulavuriki, lerova wu tiyimisela ku va phamela swakudya hi ndlela yo olova yo fana ni leyi. A wu kona nchumu emisaveni lowu nga pimanisiwaka ni leswi nhlangano wa Yehovha wu hi endlelaka swona.” Vladimir u ri: “Tivhidiyo ti ndzi kombe leswaku Yehovha wa khathala swinene hi vanhu lava nga vulavuriki ku fana ni ndlela leyi a khathalaka hayona hi vanhu lava vulavulaka.”

Tivhidiyo ta hina ta ririmi ra mavoko mikarhi yo tala ti ni rungula leri landzelaka: “Nkandziyiso lowu i xiphemu xa ntirho wa misava hinkwayo wa ku dyondzisa Bibele, lowu seketeriwaka hi minyikelo ya ku tirhandzela.” Ha yi tlangela swinene minyikelo ya wena leyi yo tala yi endliwaka hi ku tirhisa donate.jw.org. Minyikelo leyi, yi endla leswaku hi kota ku humesa Tibibele ni switirhisiwa swo yi dyondza swa vanhu hinkwavo ku katsa ni swa lava tirhisaka ririmi ra mavoko.