VANTSHWA VA VUTISA
Yi Nga Ndzi Pfuna Njhani Bibele?—Xiyenge 2: Tiphine Hi Ku Hlaya Bibele
Muntshwa la vuriwaka Will u ri: “Bibele ya borha loko u nga swi tivi leswaku yi hlayiwa njhani.”
Xana u lava ku tiva ndlela leyi u nga tiphinaka ha yona loko u hlaya Bibele? Nhlokomhaka leyi yi ta ku pfuna.
Endla Matsalwa ma hanya
Tivone u ri kwalaho hi xiviri. U nga endla leswi:
Hlawula mhaka ya le Bibeleni leyi u lavaka ku dyondza hi yona. U nga hlaya rungula ra Bibele, ra Evhangeli, kumbe u hlawula yin’wana ya tidrama ta ku hlayiwa ka Bibele leti nga eka jw.org leswaku u ti yingisela.
Hlaya rungula ra kona. U nga tihlayela rona kumbe u ri hlayela ehenhla ni vanghana kumbe ni va ka n’wina. Un’wana a nga hlaya leswi vuriwaka hi muhlamuseri wa rungula rero ivi van’wana va hlaya leswi vuriwaka hi lava katsekaka eka rona.
Ringeta swin’wana swa swiringanyeto leswi landzelaka:
Dirowa swifaniso swa rungula leri u ri hlayaka. Kumbe u dirowa swifaniso leswi kombisaka rungula rero hi ku landzelelana ka swiendlakalo swa kona. Tsala marito yo karhi ku hlamusela xifaniso xin’wana ni xin’wana.
Dirowa tidayagiramu. Hi xikombiso, loko u hlaya hi munhu wo tshembeka, tsala ni mikateko leyi a yi kumeke hikwalaho ka leswi a a ri ni vumunhu lebyinene.
Endla mhaka yoleyo yi va onge ko va xitori lexa ha ku endlekaka. Vika rungula rero hi ku vutisa vanhu lava u va hlawuleke lava yimelaka lava katsekaka eka rungula rero.
Loko un’wana eka vona a endle xiboho lexi hoxeke, ehleketa leswaku a ku ta va ku endleke yini loko a lo endla xiboho lexinene. Hi xikombiso, ehleketa hiloko Petro a landzula Yesu. (Marka 14:66-72) Xana Petro a a ta va a endle yini leswaku a hlula ndzingo lowu?
Loko u ri munhu wo rhandza ku ringeta swilo leswintshwa, titsalele drama ya rungula ra le Bibeleni. Tsala ni leswi nga dyondziwaka eka drama yoleyo.—Varhoma 15:4.
Vona leswi u swi hlayaka eBibeleni hi tihlo ra mianakanyo!
Lavisisa!
Loko u kambisisa rungula leri u ri hlayaka u ta kuma tidyondzo ta nkoka. Rungula ro koma ra le Bibeleni ri nga hi dyondzisa mhaka ya nkoka swinene.
Hi xikombiso, pimanisa Matewu 28:7 na Marka 16:7.
Hikwalaho ka yini Marka a vule leswaku ku nga ri khale Yesu a a ta humelela eka vadyondzisiwa ‘ni le ka Petro’?
Lexi nga ku pfunaka ku kuma nhlamulo: Marka a nga xi vonanga hi ku kongoma xiendlakalo lexi; swi nga ha endleka leswaku u byeriwe hi Petro.
Tidyondzo ta nkoka: Hikwalaho ka yini Petro swi nga ha vaka swi n’wi khutazile ku twa leswaku Yesu u lava ku tlhela a n’wi vona? (Marka 14:66-72) Yesu u swi kombise njhani leswaku i munghana wa ntiyiso wa Petro? U nga n’wi tekelela njhani Yesu leswaku u va munghana wa ntiyiso eka van’wana?
Loko u endla leswaku Matsalwa ma hanya ni ku endla ndzavisiso, u ta tiphina swinene hi ku hlaya Bibele!