Yobo U Tshame A Tshembekile

XANA u kona munhu la nga tshamaka a tshembekile eka Xikwembu hambiloko a ringiwa niloko swi tikomba onge ku yingisa a swi vuyerisi? Xivutiso xexo xi tlakukile—xi tlhela xi hlamuriwa—naswona a xi khumba wanuna la vuriwaka Yobo.

Loko Vaisrayele va ha tshama aEgipta, Yobo loyi a a ri xaka ra Abrahama, a a tshama etikweni leri namuntlha ri vuriwaka tiko ra le Arabiya. Hi nkarhi wolowo, loko tintsumi ta Xikwembu ti hlangana etilweni emahlweni ka Xikwembu, Sathana loyi a a xandzukile a a ri kona na yena. Emahlweni ka tintsumi teto, Yehovha u vule leswaku wa n’wi tshemba Yobo nandza wa yena wo tshembeka. Entiyisweni, Yehovha u vule leswaku a nga kona munhu wo tshembeka ku fana na Yobo. Kambe Sathana u vule leswaku Yobo u gandzela Xikwembu hileswi xi nga n’wi katekisa xi tlhela xi n’wi sirhelela. Nakambe Sathana u vule leswaku loko Yobo o tekeriwa swilo hinkwaswo leswi a nga na swona, u ta rhukana Xikwembu.

Xikwembu xi pfumelele Sathana leswaku a sungula a tekela Yobo rifuwo ra yena a tlhela a dlaya vana va yena ni ku n’wi endla leswaku a vabya. Tanihi leswi Yobo a a nga swi tivi leswaku u ringiwa hi Sathana, a a nga swi twisisi leswaku ha yini Xikwembu xi pfumelela leswaku a weriwa hi miringo yoleyo. Hambiswiritano, Yobo a nga xi rhukananga Xikwembu.

Vanghana va Yobo vanharhu va mavunwa va n’wi endzerile. Eka marito yo tala lawa ma tsariweke ebukwini ya Yobo lawa vavanuna volavo va ma vuleke, va ringete hi matimba ku khorwisa Yobo leswaku Xikwembu a xi n’wi xupulela swidyoho swa yena leswi a nga swi endla exihundleni. Va kale va vula leswaku Xikwembu a xi ma tsakeli malandza ya xona nileswaku a xi ma tshembi. Yobo a nga pfumelelananga ni mavonelo ya vona lama hoxeke. Kambe hi ku tiyiseka, u vule leswaku u ta tama a tshembekile kukondza a fa!

Kambe Yobo u endle xihoxo hi ku karhateka ngopfu hi ku tiyimelela. Jaha rin’wana leri vuriwaka Elihu, leri a ri yingiserile loko va vulavula, ri sungule ku vulavula. Elihu u tshinye Yobo hileswi a nga tsandzeka ku vona leswaku ku lwela vuhosi bya Yehovha Xikwembu i swa nkoka ku tlula ku lwela munhu un’wana ni un’wana. Nakambe Elihu u va tshinye ngopfu vanghana va Yobo va mavunwa.

Yehovha Xikwembu u vulavule na Yobo, a lulamisa ndlela leyi a a anakanyaka ha yona. Yehovha u kombe Yobo swilo swo tala leswi hlamarisaka swa ntumbuluko hiloko a n’wi dyondzisa leswaku munhu a hi nchumu loko a ringanisiwa ni vukulu bya Xikwembu. Hi ku titsongahata, Yobo u amukele ku lulamisiwa hi Xikwembu. Tanihi leswi Yehovha a nga ni “xinakulobye lexikulu swinene ni tintswalo,” u endle leswaku Yobo a hlakarhela, a n’wi nyika rifuwo ra yena leri andzisiweke kambirhi a tlhela a n’wi katekisa hi vana va khume. (Yakobo 5:11) Hi ku tshama a tshembekile eka Yehovha loko a ringiwa swinene, Yobo u swi veke erivaleni leswaku Sathana a a hemba loko a vula leswaku vanhu a va nge tshembeki eka Xikwembu loko va ringiwa.

—Xi sekeriwe eka buku ya Yobo.