Paradeyisi Yi Tshinele!

Swilo swo biha leswi humelelaka sweswi emisaveni swi kombisa leswaku Paradeyisi yi tshinele. Bibele yi vule leswaku hi ta vona minkarhi yo biha emahlweninyana ka ku va Paradeyisi yi fika. Sweswi hi hanya eminkarhini yoleyo! Hi leswi swin’wana swa swilo leswi Bibele yi vuleke leswaku swi ta humelela:

Tinyimpi letikulu. “Tiko ri ta pfukela tiko rin’wana ni mfumo wu ta pfukela mfumo wun’wana.” (Matewu 24:⁠7) Vuprofeta lebyi byi hetisekile. Ku sukela hi lembe ra 1914, ku ve ni tinyimpi timbirhi ta misava ni tinyimpi tin’wana to tala letitsongo. Vanhu va timiliyoni va file eka tona.

Vuvabyi lebyi hangalakeke hinkwako. Ku ta va ni “mintungu.” (Luka 21:​11) Xana leswi swi humelerile? Ina. Vuvabyi bya khensa, vuvabyi bya mbilu, rifuva, dari, AIDS (SIDA) ni mavabyi man’wana ma dlaye timiliyoni ta vanhu.

Ku kayivela ka swakudya. Emisaveni hinkwayo ku ni vanhu lava nga riki na swakudya leswi eneleke. Timiliyoni ta vanhu ta fa lembe na lembe hikwalaho ka ndlala. Lexi i xin’wana lexi kombisaka leswaku Paradeyisi yi ta fika ku nga ri khale. Bibele yi ri: “Ku ta va ni ku kayivela ka swakudya.”​—⁠Marka 13:⁠8.

Ku tsekatseka ka misava. “Ku ta va ni . . . ku tsekatseka ka misava ku suka endhawini yin’wana ku ya eka yin’wanyana.” (Matewu 24:⁠7) Leswi na swona swi humelerile enkarhini wa hina. Vanhu vo tlula miliyoni va dlayiwile hikwalaho ka ku tsekatseka ka misava ku sukela hi 1914.

Vanhu vo biha. Vanhu va ta va “varhandzi va mali” ni “lava tirhandzaka.” Va ta va “lava rhandzaka mintsako ku ri ni ku rhandza Xikwembu.” Vana va ta va “lava nga yingisiki vatswari.” (2 Timotiya 3:​1-⁠5) Xana a hi swona leswaku va tele vanhu vo tano namuntlha? A va xi xiximi Xikwembu, naswona va karhata lava ringetaka ku dyondza hi Xikwembu.

Vugevenga. Ku ta va ni “ku engeteleka ka ku kala nawu.” (Matewu 24:​12) Kumbexana wa swi xiya leswaku vugevenga byi nyanyile ku tlula emalembeni lama hundzeke. Vanhu kun’wana ni kun’wana va le khombyeni ra ku tekeriwa swilo swa vona, ku kanganyisiwa kumbe ku vavisiwa.

Hinkwaswo swilo leswi swi kombisa leswaku Mfumo wa Xikwembu wu tshinele. Bibele yi ri: “Loko mi vona swilo leswi swi humelela, tivani leswaku mfumo wa Xikwembu wu kusuhi.” (Luka 21:​31) Xana Mfumo wa Xikwembu i yini? I hulumendhe ya Xikwembu ya le tilweni leyi yi nga ta tisa Paradeyisi emisaveni leyi. Mfumo wa Xikwembu wu ta siva tihulumendhe ta vanhu.​—⁠Daniyele 2:​44.