Xana U Ta Tshemba Yini U Tshika Yini?

Mutsari wa switori wa Munghezi, William Shakespeare, u tsale a ku: “U nga ma tshembi mapulanga lama nga bola.” I ntiyiso, loko u lava ku khandziya xikepe lexi endliweke hi mapulanga, u ta lava ku rhanga u tiyiseka leswaku mapulanga ya xona a ma bolanga.

MARITO ya Shakespeare ma pfumelelana ni marito ya Hosi Solomoni wo tlhariha wa le Israyele wa khale, loyi eka malembe ya 3 000 lama hundzeke a tsaleke a ku: “Xiphukuphuku xi pfumela yini na yini; vanhu vo tlhariha va xiya lomu va kandziyaka kona.” (Swivuriso 14:15, Today’s English Version) Ina, i xiphukuphuku ntsena lexi pfumelelaka xin’wana ni xin’wana lexi xi byeriwaka xona, xi endla swiboho leswi sekeriweke eka swilo leswi nga pfuniki nchumu kumbe tidyondzo leti nga riki na xisekelo. Loko hi tshemba swilo leswi nga pfuniki nchumu hi ta nghena ekhombyeni, ku fana ni loko hi famba ehenhla ka mapulanga yo bola. U nga ha tivutisa, ‘Xana wu kona nkongomiso wa xisekelo lowu hi nga wu tshembaka?’

Vanhu va timiliyoni emisaveni hinkwayo va tshemba buku ya khale leyi vuriwaka Bibele yo Kwetsima. Va kongomisiwa hi yona evuton’wini. Va landzela ndzayo ya yona loko va endla swiboho kutani va endla leswi yi swi dyondzisaka. Xana vanhu volavo, hi ndlela yo fanekisela va kandziya emapulangweni lama nga bola? Ku kuma nhlamulo ya xivutiso lexi, hi fanele hi rhanga hi kuma nhlamulo ya xivutiso lexi nge, Xana ku ni swivangelo leswi twalaka swo tshemba Bibele? Nkandziyiso lowu wo hlawuleka wa Xalamuka! wu kambisisa vumbhoni bya kona.

Xikongomelo xa nkandziyiso lowu wa Xalamuka! a hi ku ku sindzisa leswaku u amukela tidyondzo kumbe mavonelo yo karhi ya vukhongeri. Ematshan’weni ya sweswo, xikongomelo xa wona i ku andlala swivangelo leswi nga endlaka leswaku vanhu va timiliyoni va tiyiseka leswaku Bibele yi fanele yi tshembiwa. Endzhaku ko hlaya swihloko leswi landzelaka, wena n’wini u ta tiendlela xiboho xa loko hakunene u fanele u yi tshemba kumbe u nga yi tshembi.

Mhaka leyi yi lava ku kambisisiwa hi vuenti. Phela, loko Bibele yi ri xihlovo lexi tshembekaka hakunene xa nkongomiso lowu humaka eka Muvumbi wa hina, kutani wena swin’we ni lava u va rhandzaka loko mi kambisisa leswi yi swi vulaka mi ta vuyeriwa.

Kambe, a hi rhangeni hi ku boxa tinhla ta nkoka malunghana ni Bibele hi yoxe. A swi kanakanisi leswaku i vanhu va nga ri vangani ntsena lava kanetaka leswaku i buku yo hlawuleka.