Langutelo Ra Bibele

Xana U Nga Tiphina Hi Ku Gandzela Xikwembu?

“NDZA xi tshemba Xikwembu naswona ndza xi rhandza. Kambe . . . ku ya ekerekeni swa ndzi phirha,” ku vule un’wana la tivulaka Mukreste. Xana na wena u titwa hi ndlela yoleyo? Mhaka-nkulu hi leswaku vanhu va sungule tindlela ta vona vini to gandzela Xikwembu hikwalaho ko phirheka, ku nga eneriseki ni ku pfilunganyeka hi timhaka ta vukhongeri.

Phepha-hungu rin’wana ri vule leswaku va tele vanhu lava namuntlha va gandzelaka hi tindlela ta vona vini. Kambe eka vanhu lava lavaka ku tiphina hi ku gandzela Xikwembu, sweswo a swi vuyerisi. Ha yini? Hikuva leswi nga va endla leswaku va phirheka etikerekeni swi nga ha tlhela swi vuya.

Leswi swi endla leswaku hi tivutisa leswi, Xana ku hanya hi milawu ya Bibele swa phirha? Doo! Hi xikombiso xiya marito ya mupisalema lama nge: “Tanani hi huwelela hi ku tsaka eka Yehovha! . . . Tanani, a hi gandzeleni, hi nkhinsama; a hi nkhinsameni emahlweni ka Yehovha Muendli wa hina.”—Pisalema 95:1, 6.

Mupisalema un’wana u yimbelelele Yehovha hi ntsako a ku: “Wena u ri wexe u La nge Henhla-henhla emisaveni hinkwayo.” Ematsalweni, Yehovha u vuriwa “Xikwembu lexi tsakeke,” naswona vagandzeri va xona va manguva lawa ni va khale va tshama va tsakile.—Pisalema 83:18; 1 Timotiya 1:11.

Lexi Endlaka Leswaku Hi Tsaka

Leswi Yehovha a swi endleke ku komba leswaku wa hi rhandza hi swona swi endlaka leswaku hi tsaka. U endle yini? “Hikuva Xikwembu xi rhandze misava [vanhu] swinene xi kala xi nyikela hi N’wana wa xona [Yesu Kreste] la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—Yohane 3:16.

Xisweswo, hilaha Bibele yi kombaka hakona, xikongomelo xa Xikwembu hi leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:3, 4) Swoleswo a swi vuli ku tiva matsalwa ma nga ri mangani ya Bibele ntsena. Kambe hi fanele hi “kuma mongo” wa leswi hi swi hlayaka, leswi vulaka leswaku hi fanele hi kambisisa mhaka ya kona. (Matewu 15:10) Vuyelo bya kona hi leswaku: “U ta kuma vutivi bya Xikwembu.” Swoleswo swa tsakisa hakunene!—Swivuriso 2:1-5.

Eka lembe-xidzana ro sungula vanhu va le Makedoniya emutini wa Beriya va wu vonile ntsako lowu. Loko muapostola Pawulo a va dyondzisa rito ra Xikwembu, “va amukele rito hi mapfundza lamakulu ya mianakanyo, va kambisisa Matsalwa hi vukheta siku ni siku ku vona loko swilo leswi swi ri tano.” A va nga ta va na wona mapfundza yo tano loko ku dyondza Matsalwa a swi va phirha.—Mintirho 17:11.

Yesu u te: “Va tsaka lava nga ni ndlala ni torha ra leswo lulama, hikuva va ta xurha.” (Matewu 5:6) Ku fana ni vanhu lava a va sika kutani va sunguleke ku kuma swakudya, vanhu vo tala namuntlha va tsaka loko va kuma swakudya swa moya. Xisweswo ku fana ni vanhu va le Beriya, “vo tala va vona va ve vapfumeri.”—Mintirho 17:12.

Ndlela Ya Vutomi

Vagandzeri va lembe-xidzana ro sungula va teke “Ndlela,” ku nga rito leri tirhisiweke eka Mintirho 9:2 leri vulaka mahanyelo lamantshwa lama Vakreste vo sungula va ma landzeleke. Ninamuntlha lava lavaka ku kuma ntsako loko va gandzela Xikwembu va fanele va endla tano. Va fanele va hanya hi ntiyiso wa Bibele siku ni siku.

Muapostola Pawulo u khutaze vanhu va le Efesa a ku: “Cukumetani vumunhu bya khale lebyi fambisanaka ni ndlela ya n’wina yo sungula ya ku tikhoma.” Kambe a swi heleli kwalaho hilaha Pawulo a kombisaka hakona a ku: ‘Ambalani vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.’—Vaefesa 4:22-24.a

Loko hi yingisa ndzayo yoleyo, hi cinca mahanyelo ya hina ma fambisana ni ku rhandza ka Xikwembu, hi ta kuma ntsako ni ku eneriseka lokukulu. Xana ntsako lowu i yini? Pawulo u tsalele Vakreste va le Kolosa a va byela leswaku va fanele ku cinca mahanyelo ya vona leswaku ‘va ta famba hi mukhuva lowu fanelaka eka Yehovha leswaku va n’wi tsakisa hi ku helela.’ (Vakolosa 1:10) I ntiyiso leswaku hi ta tsaka ku tiva leswaku Xikwembu xa ntiyiso xa tsaka hi hina! Ku tlula kwalaho, Xikwembu xi endla leswaku swi olova ku xi tsakisa “hi ku helela.” Njhani? Hikuva xa hi rivalela.

Hinkwerhu ha dyoha, naswona hi lava ku rivaleriwa hi Xikwembu. Pawulo eka 1 Timotiya 1:15 u te: “Kreste Yesu u tile emisaveni leswaku a ta ponisa vadyohi.” Loko Yesu a nyikela vutomi byakwe hikwalaho ka hina, u endle leswaku hi ta rivaleriwa swidyoho. Xisweswo, mugandzeri wa ntiyiso u titwa a ntshunxekile hikuva ripfalo ra yena ri beriwa hi moya. U ni ripfalo lerinene naswona wa tsaka hi ku tiva leswaku u ta rivaleriwa swidyoho swa yena ntsendze loko a endla ku rhandza ka Xikwembu.

Xivangelo Xin’wana Lexi Endlaka Leswaku Hi Tsaka

Loko munhu a sungula ku gandzela Xikwembu xa ntiyiso, a nga vi na xivundza. Mupisalema wa le Bibeleni Davhida u te: “Ndzi tsakile loko va ku eka mina: ‘A hi ye endlwini ya Yehovha.’” (Pisalema 122:1) Ku hlanganyela ni vagandzeri va ntiyiso nkarhi ni nkarhi swi endla leswaku hi tsaka.

Endzhaku ko ya eminhlanganweni ya Timbhoni ta Yehovha, wanuna un’wana u te: “Hi amukeriwe hi mandla mambirhi lerova a swi tikomba leswaku vanhu lava va ni ‘vun’we.’ Ndlela leyi vantshwa va kona va tikhomeke ha yona ni ma ambalelo ya vona swi fanele swi va tsakisa ni ku tsakisa vatswari va vona. Ndzi nkhensa ngopfu leswi ndzi rhambiweke ku ta vona moya wolowo.”

Na wena u nga tiphina hi ku gandzela Yehovha ku fana na Davhida wa khale. U khutazile, a ku: “Tirhelani Yehovha hi ku tsaka. Tanani emahlweni ka yena hi ku huwelela ka ku tsaka.” (Pisalema 100:2) Hinkwavo lava gandzelaka Xikwembu hikwalaho ka rirhandzu va ta kuma ntsako.

XANA U TSHAME U TIVUTISA?

◼ Hi xihi xisekelo xa vugandzeri bya ntiyiso?—1 Timotiya 2:3-6.

◼ Xana nkutsulo wa Kreste wu hi tisela ntsako hi ndlela yihi?—1 Timotiya 1:15.

◼ Xana minhlangano ya Vukreste yi nga ku tisela ntsako hi ndlela yihi?—Pisalema 100:1-5.

[Nhlamuselo ya le hansi]

[Xifaniso eka tluka 10]

Ku dyondza Bibele ni van’wana swa tsakisa