Timhaka Ti Nga Ha Onhaka Kwihi?

A SWI endleki leswaku evukatini ku nga pfi ku va ni swiphiqo. Phela, hambi ku ri vanghana va vukati lava fanelanaka a va pfumelelani eka xin’wana ni xin’wana. Hikwalaho ku pfa ku va ni swiphiqo swin’wana. Tanihi leswi nsimbi leyi pendiweke yi nga ha kurhaka, ku ni swilo swo tala leswi nga dlayaka vukati. Leswaku hi twisisa leswi nga endliwaka leswaku ku antswisiwa vukati, a hi rhangeni hi kambisisa swilo swin’wana leswi nga ha onhakaka.

Minkarhi Ya Ntshikilelo Lowukulu

Bibele yi profete leswaku vanhu vo tala enkarhini wa hina va ta va “lava tirhandzaka, varhandzi va mali, lava titivaka, lava titlakusaka, . . . lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa.” (2 Timotiya 3:2-4) Swilo swoleswo swi nga nyanyisa ku nga twanani, ku nga vulavurisani kahle ni marito yo tlhava lawa vanhu lava nga hetisekangiki va ma vulaka.

Mukambisisi un’wana u te: “Mhaka leyi ya vukati a yi twisiseki. . . . Hi ni rungula ro tala leri vulavulaka hi ndlela leyi hi nga endlaka vukati bya hina byi tiya ha yona . . . Kambe hi langutane ni swiphiqo swo tala swa timali leswi endlaka swi hi tikela ku va ni vukati lebyinene.”

Ku Langutela Swilo Leswi Nga Twaliki

Dokodela wa ta vukati u hlamusele leswaku “ku langutela swilo leswi nga twaliki i nchumu wun’wana lowukulu lowu vangaka ku nga twanani evukatini.” Vanhu vo tala lava ngheneleke vukati va heleriwa hi ntshembo loko va fika va kuma leswaku swilo leswi endlekaka evukatini a hi swona leswi a va swi languterile, nileswaku munghana wa vona wa vukati a hi muxaka wa munhu loyi a va ehleketa leswaku u ta va yena. Va tikuma va hetiwe matimba hi swihoxo leswi a va nga swi voni kumbe leswi a va anakanya leswaku va nga swi honisa hi ku olova.

Hambiswiritano, Bibele yi vula hi ku tshembeka leswaku vukati byi nga vanga “xitlhavi ni gome.” (1 Vakorinto 7:28, The New English Bible) Ha yini? Xivangelo xin’wana hileswi swihoxo swa vanhu vambirhi lava nga hetisekangiki lava tiboheke swi nga paluxekaka hi ku famba ka nkarhi.

Ku engetela kwalaho, vanhu vo tala va langutela ku va ni vukati lebyi tsakisaka handle ko endla matshalatshala leswaku byi tsakisa. Leswi va anakanyaka leswaku vukati byi ta endla leswaku va tshama va tsakile, va byi tekela ehansi vutihlamuleri ni matshalatshala lama lavekaka leswaku va va ni vukati lebyi tsakisaka. Loko va ya kuma leswaku leswi endlekaka evukatini a hi swona leswi a va swi languterile, va hela matimba kutani va pfilunganyeka. Hakanyingi, loko ku nga twananiwi hi mavonelo evukatini, vanhu va ya va hela matimba.

Xiphiqo Xa Ku Vulavurisana

Hi yihi ndlela leyi hoxeke yo vulavurisana leyi vatekani va faneleke va yi papalata leswaku va va ni vukati lebyi tiyeke? Vatekani van’wana a va rhiyi ndleve loko un’wana a vulavula naswona a va ma phofuli mavonelo ya vona. Ku vulavurisana hi ndlela ya rirhandzu swi siviwa hi mabulo yo koma lama lavekaka leswaku vutomi byi ya emahlweni endyangwini. Ku vulavurisana lokunene ku siviwa hi timholovo, laha mpatswa wu holovaka hambiloko swi nga bohi. Loko un’wana o ka a nga swi twisisi kahle leswi un’wana a swi vulaka, ku nga pfuka mholovo; loko vo tlhavana hi marito va tshika ku vulavurisana.

Khombo ra kona, mimpatswa yo tala ya tsandzeka ku xiya mahanyelo lamanene ya vanghana va yona va vukati kumbe hambiloko yi ma xiya a yi vuli leswaku ya ma tlangela. Ku engetela kwalaho, leswi masiku lawa swi tolovelekeke leswaku mimpatswa yi tirha hinkwayo, vavasati vo tala lava tekiweke va hlundzukisiwa hileswi va siyeriwaka mintirho yo tala ekaya hambileswi va tirhaka mintirho ya ku tihanyisa. Tlhandlakambirhi, vavasati vo tala lava tekiweke va vona onge mintlhaveko ya vona ya honisiwa.

Xana u nga endla yini leswaku swilo swi ku fambela kahle evukatini? Xiya xitsundzuxo lexi pfunaka lexi humaka eBibeleni.

[Marito lama tshahiweke exihlokweni lama nga eka tluka 4]

Vatekani van’wana a va rhiyi ndleve loko un’wana a vulavula naswona a va ma phofuli mavonelo ya vona

[Marito lama tshahiweke exihlokweni lama nga eka tluka 5]

Vanhu vo tala va langutela ku va ni vukati lebyi tsakisaka handle ko endla matshalatshala leswaku byi tsakisa