“Ntirho Wa N’wina A Hi Wa Hava”
1 Mawaku marito lama khutazaka swonghasi! Ntirho lowu u wu endlelaka Yehovha a hi nyuku wa mbyana. (1 Kor. 15:58) Ku hambana ni sweswo, anakanya ndlela leyi vanhu va tirhaka ha yona nkarhi wo leha hi matimba, va ringeta ku antswisa xiyimo xa vona xa vutomi kumbe xa timali. Va nga ha heta malembe yo tala va ri karhi va lwela ku kuma dyondzo ya le henhla kumbe va tirha tanihi mahlonga leswaku va tiendlela vito hi swilo leswi vonakaka. Kambe, hikwalaho ka “nkarhi ni xiendlakalo lexi nga languteriwangiki,” va nga ha hluleka ku tiendlela ndhuma leyi a va yi lava kumbe va nga ha boheka ku hanya hi swilo leswitsongo leswi vonakaka. Matshalatshala ya vona i ya hava, ma fana ni “ku hlongorisa mheho.” (Ekl. 1:14; 9:11) Kutani i swinene leswi hi nga ni swilo swo tala swo swi endla entirhweni wun’we ntsena lowu nga riki wa hava, tanihi leswi wu nga wa risima hilaha ku nga heriki!
2 Ntirho Lowu Nga Wa Nkoka Hakunene: Ntirho wa ku chumayela mahungu lamanene ya Mfumo wa Xikwembu i wa nkoka swinene emisaveni. I ntirho lowu faneleke wu endliwa ku nga khathariseki leswaku vanhu va yingisa kumbe e-e. Ku fana na Pawulo, hi lava ku vula hi ku: “Ndzi basile engatini ya vanhu hinkwavo, hikuva a ndzi tshikanga ku mi byela ndzayo hinkwayo ya Xikwembu.”—Min. 20:26, 27.
3 Mawaku ntsako lowu hi wu kumaka loko vanhu va yingisela ni ku amukela rungula ra Mfumo! Nhwanyana un’wana u loveriwe hi hahani wakwe. U tivutisile leswaku hahani wakwe u ye kwihi—etilweni kumbe etiheleni? U khongele Xikwembu a lava mpfuno, a tirhisa vito leri nge Yehovha, hilaha makwavo wa xisati a n’wi dyondziseke hakona. Ku nga ri khale, u sungule ku dyondza Bibele naswona a a va kona eminhlanganweni ya Vukreste. U ve ni langutelo lerintshwa hi vutomi kutani a tihambanisa ni ntlawa wa swigevenga. Nhwanyana loyi u tshike ku dzaha, ku tirhisa swidzidzirisi ni ku yiva. U ri: “Lexi endleke leswaku ndzi hambana ni mahanyelo lawa yo biha hileswi a ndzi rhandza Yehovha. Yehovha hi yena loyi a a ta hetisisa ntshembo wa mina wa vutomi lebyi nga heriki hi tintswalo takwe letikulu.” Sweswi a nga ha tlangi hi vutomi byakwe hi ku hlongorisa swilo swa hava.
4 Hambiloko vanhu va nga lavi ku yingisa, hi karhi hi endla ntirho wa nkoka. Va swi tiva leswaku Timbhoni ta Yehovha ti va endzerile. Vutshembeki ni rirhandzu ra wena swa tiyisekisiwa. Kutani ke, xana ntirho lowu u wu endlelaka Hosi i wa hava? Nikatsongo!