Xana Xikwembu Xi Ku Vitanele Eku Rhuleni?

“Loko loyi a nga riki mupfumeri a lava ku hambana ni loyi a nga mupfumeri, a a hambane na yena; Mukriste wa xinuna kumbe wa xisati, a nga bohekanga loko timhaka ti famba hi ndlela yoleyo. Kambe loko mi ri n’wina, Xikwembu xi mi vitanile ku hanya hi ku rhula.”—1 VAKORINTO 7:15.

1. Hi ku ya hi Matsalwa, vukati byi fanele ku langutisisiwa ku yini?

YEHOVA a nga kalanga a kunguhata leswaku xiboho xa vukati xi fanele ku yisa eku hambaneni loku vavisaka mbilu kumbe ku dlaya vukati. Vukati a byi fanele byi va xiboho lexi nga heriki xa ‘nyama yin’we,’ lexi tisaka ntsako, ku wisa ni ku rhula. (Genesa 2:24; Ruti 1:9) Hi ntolovelo, Matsalwa ya tsundzuxa vanhu lava tekaneke ku tshama kun’we, hambi loko munghana un’we a ri Mukriste kutani loyi un’wana a nga ri mupfumeri. (1 Vakorinto 7:12-16) Ku tlula kwalaho, ku hanyisana loku kanganyisaka loku vaka kona eswibohweni leswi karhatekaka swa vukati swi endla leswaku munhu a tihlamulela hi tlhelo ra mahanyelo eka Xikwembu, lexi ‘vengaka ku dlaya vukati.’—Malakia 2:13-16.

2. Vakriste va langutisa ku hambana ni ku dlaya vukati hi ndlela yihi?

² Ku nga hetiseki ka vanhu ni timhaka tin’wana minkarhi yin’wana swi yise eku hambaneni kumbe eku dlayeni ka vukati hambi ku ri exikarhi ka malandza lama khuvuriweke ya Xikwembu. Hambi swi ri tano, hikwalaho ka langutelo leri tlakukeke leri Vakriste va nga na rona exibohweni xa vukati, hi ntolovelo magoza lawa ya tekiwa ntsena endzhaku ka matshalatshala lama phikelelaka yo hlayisa vukati kun’we. Emhakeni leyi, Xikwembu hi xoxe xi veke xikombiso lexikulu. Tanihi ‘wanuna loyi a nga n’wini’ wa Israyele wa khale, u tiyisele malembe xidzana ya ku tiomisa nhloko, ku xandzuka ni vuoswi bya moya eka vanhu va yena. (Esaya 54:1-5; Yeremia 3:14-17; Hosea 1:10, 11; 3:1-5) Hi le ndzhaku ka loko va ye eyinhleni leyi nga kondletelekiki laha Yehova a va tshikeke tanihi tiko.—Matewu 23:37, 38.

3. (a) Hi swihi swivangelo leswi pfumeleriwaka hi ku ya hi Matsalwa leswi ha swona Mukriste a nga ha hambanaka ni munghana wa vukati? (b) Xana ku dlaya vukati ka Matsalwa ku koteka ehansi ka swiyimo swihi ke?

³ Minkarhi yin’wana, vakulu va bandlha va tshineleriwa hi vapfumeri-kulobye lava navelaka mpfuno hi swiphiqo swa vona leswikulu swa vukati. Vakulu a va nyikiwanga matimba yo byela un’wana ni un’wana ku tshika munghana wa vukati kumbe ku dlaya vukati, kambe va nga kombetela eka leswi Rito ra Xikwembu ri swi vulaka ehenhleni ka timhaka leti. Hi laha swi kombiweke ha kona exihlokweni lexi hundzeke, ku hambana ka pfumeleleka hi ku ya hi Bibele emhakeni yo ala ku singila hi ku tirhandzela, ku khomiwa loko biha ka miri ku tlula mpimo, kumbe ku veka vumoya ekhombyeni hi laha ku heleleke. Nakambe swi xiyiwile leswaku ku dlaya vukati ka Matsalwa loku nga ni ku koteka ka ku tlhela u teka eka nkarhi lowu taka eka munghana un’wana ka koteka loko munghana a endle “vuoswi,” leswi katsaka swivumbeko swo hlayanyana swa vuxaka lebyo biha bya rimbewu. (Matewu 19:9) Hi ntumbuluko, ku hambana kumbe ku dlaya vukati a ku fanelanga ku va xiboho lexi kunguhatiweke, tanihi leswi swi nga ha kotekaka ku kondletela ku rhula ka vukati, naswona hambi byi ri vuoswi kumbe swivumbeko swin’wana swa vumbhisa swi nga rivaleriwa hi munghana la nga riki na nandzu wa vukati.—Matewu 5:31, 32; ringanisa Hosea 3:1-3.

4. (a) Katsakanya leswi Pawulo a swi byeleke Vakriste lava ngheneke evukatini eka 1 Vakorinto 7:10-16 hi ku komisa. (b) Ku nga vuriwa rini ku: “Xikwembu xi mi vitanile ku hanya hi ku rhula”?

⁴ Hi laha hi xiyeke ha kona exihlokweni lexi hundzeke, muapostola Pawulo u khutaze Vakriste lava tekeke leswaku va nga tshiki vanghana va vona. (1 Vakorinto 7:10-16) Hikwalaho ka marito ya Pawulo, loko munghana la nga pfumeriki a hlawula ku tshama ni munghana wakwe wa vukati wa Mukriste, mupfumeri u fanele ku ringeta ku n’wi pfuna emoyeni. (1 Petro 3:1-4) Ku hundzuka kakwe a ku ta endla swo tala ku endla kaya ri va ndhawu yo wisa ni ku rhula. Kambe ke, loko la nga riki mupfumeri a ala ripfumelo ra munghana wakwe la pfumelaka hi ku tiyisa lerova a hlawula ku hambana, i yini lexi Mukriste a nga xi endlaka? Loko mupfumeri a ringete ku n’wi sindzisa ku tshama, la nga pfumeriki a nga ha endla leswaku xiyimo xi nga amukeleki lerova Mukriste a nga tekeriwa ku rhula hi laha ku heleleke. Kutani etimhakeni ta ku rhula, mupfumeri a nga pfumelela la nga pfumeriki ku famba. (Matewu 5:9) Hi loko munghana wa vukati la nga pfumeriki a suka ntsena laha ku nga vuriwaka ku: “Xikwembu xi mi vitanile ku hanya hi ku rhula.” Marito lawa ma nga ka ma nga tirhisiwi hi mfanelo ku yimelela ku hambana ka vanghana vambirhi va Vukriste eswisekelweni leswi nga riki swa matsalwa kumbe leswi nga riki swa ntikelo.

5. I swivutiso swihi leswi sweswi swi faneriweke hi ku anakanyela ka hina?

⁵ Ku hambana kun’wana ni kun’wana kumbe ku dlaya vukati ku na timhaka ta kona ha yin’we-yin’we, naswona ku hava ‘endlelo’ leri hlanganisaka mhaka yin’wana ni yin’wana. Kambe i swirhalanganya swihi leswi Mukriste la tihambaniseke kumbe la dlayeke vukati a nga langutanaka na swona? I yini lexi nga endliwaka ha swona? Naswona van’wana va nga va mpfuno hi ndlela yihi?

Swilaveko Swa Minsusumeto Kumbe Swa Rimbewu

6. Malunghana ni swirhalanganya, i yini lexi nga vuriwaka ehenhleni ka ku hambana kumbe ku dlaya vukati?

⁶ Ku hambana loku pfumeleriwaka hi ku ya hi Matsalwa kumbe ku dlaya vukati ku ta tlhantlha swiphiqo swin’wana. Kambe entiyisweni magoza yo tano ma vula ku cincisa ntlawa wun’wana wa swiphiqo hi wun’wana. Hi xikombiso, Mukriste un’wana la dlayeke vukati u te: “Swa ndzi boha ku nkhensa Yehova leswi sweswi ndzi nga na ku rhula.” Kambe u pfumerile a ku: “A swi olovi ku kurisa vana tanihi mutswari un’we. Naswona minkarhi yin’wana munhu a nga ha va ni xivundza lexikulu ni gome. Hambi ku ri hi tlhelo ra rimbewu a swi olovi. Munhu u fanele ku titoloveta vutomi lebyi hambaneke hi laha ku heleleke.”a

7. Ha yini Mukriste a fanele ku ehleketisisa hi rixaladza ehenhleni ka vuyelo byo hambana kumbe ku dlaya vukati?

⁷ Hikwalaho ke, loko Mukriste a ri na lexi a nga xi hlawulaka, u fanele ku ehleketa hi vukheta ehenhleni ka vuyelo lebyi nga vaka kona bya ku hambana kumbe ku dlaya vukati. Hi xikombiso, anakanya hi swilaveko swa minsusumeto, kumbexana ku navela ka wansati ka vunakulobye bya xinuna. (Ringanisa Genesa 3:16.) Wansati la dlayeke vukati a nga ha va ni mintshemho leyikulu ya ku tlhela a tekiwa. Van’wana va navela ku ntshunxeka evukatini lebyi tlhontlhaka, kambe xana va tiyimisele ku amukela ku koteka ka leswaku va nga ha pfumala nkarhi wo nghena evukatini nakambe?

8. (a) Hikwalaho ka 1 Vakorinto 7:11, i yini lexi vanghana lava hambaneke va Vukriste va faneleke ku xi ehleketa hi xikhongelo? (b) I swilaveko swihi leswi nga fanelangiki ku tekeriwa ehansi loko ku xiyisisiwa ku hambana kumbe ku dlaya vukati?

⁸ Pawulo u tsarile a ku: “Loko a tshuka a hambanile ni nuna, a a yimise sweswo a nga ha tekiwi, kumbe a a tlhele a vuyelelana ni nuna wa yena.” (1 Vakorinto 7:11) Hi matshalatshala yo karhi, swi nga ha koteka leswaku wansati ‘a tlhelelana’ ni nuna wa yena kumbe ‘a vuyelelana’ na yena. Manuku ke, loko vanghana va Vukriste va hambanile, va fanele ku anakanya hi ku vuyelelana swinene, hi xikhongelo. Ku tlula kwalaho, a va fanelanga ku honisa ntiyiso wa leswaku ku navela ka rimbewu ku nga ha vanga khombo. Xikwembu xi nga ha va langutisisa ku yini loko ku hluleka ka vona ku vuyelelana ko vanga ku wela evunghwavaveni? Lowu wu kombisaka khomho leri i ntokoto wa wansati un’wana la khuvuriweke. Endzhaku ka ku dlaya vukati, u sungule ku gangisana ni wanuna wa misava, ku nga ri khale u tikile, naswona u susiwile. Hambi leswi endzhakunyana a tlheriseriweke, ntokoto wakwe wu kandziyisa xilaveko xo tivonela ni ku tiseketela hi Yehova hi xikhongelo leswaku hi papalata ku ‘dyohela Xikwembu.’ (Genesa 39:7-12) Nakambe swi le rivaleni leswaku swilaveko swa minsusumeto ni swa rimbewu a swi fanelanga ku tekeriwa ehansi loko ku hambana kumbe ku dlaya vukati ku anakanyisisiwa ro sungula.

Xivundza Xi Nga Hungutiwa

9. Hi nga ha va pfunisa ku yini Vakriste lava hambaneke kumbe lava dlayeke vukati ku lwisana ni xivundza?

⁹ Loko ku hambana kumbe ku dlaya vukati swi nga papalateki, swiphiqo leswi vaka kona ku fanele ku kongomaniwa na swona. Hi xikombiso, xivundza i xiphiqo lexikulu xa Vakriste van’wana lava hambaneke kumbe lava dlayeke vukati. I yini lexi van’wana va nga xi endlaka hi leswi? Kunene, vakulu va bandlha ni van’wana va nga kombisa ku tsakela ka moya eka vanhu vo tano, va lava ku va khutaza. (Ringanisa 1 Vatesalonika 5:14.) Exikarhi ka swilo swin’wana, nkarhi na nkarhi hi nga ha rhambela vanhu lava ni vana va vona ekaya ka hina eswakudyeni leswinene ni bulo leri akaka ni ndyangu wa hina. A swi kali swi lava ku endla nkhuvo, hikuva “ku dya matsav̌u nṭena laha ku nga ni rirhanḍu, ku tlula homu ya ku nona laha ku nga ni ku v̌engana.” (Swivuriso 15:17) Madyambu ya kona ya nga ha katsa ku hlamusela mintokoto leyi tsakeriweke evutirhelini kumbe dyondzo ya ntlawa eku lunghiseleleni ka nhlangano wa Vukriste.

10, 11. (a) Hi yihi ndlela yin’wana leyi Mukriste la tihambaniseke kumbe la dlayeke vukati a nga pfuniwaka ha yona? (b) Hi xihi xivangelo lexi nga kona xo tivonela?

¹⁰ Ku endla leswaku mutswari la dlayeke vukati kumbe la tihambaniseke ni vana vakwe va tihlanganisa ni ndyangu wa wena evutirhelini bya nsimu naswona swi nga va pfuna ku hlangavetana ni xivundza. Kavula, van’wana va nge xi pfali xivandla xa mutswari la nga riki kona, kambe wansati un’wana wa Mukriste la dlayeke vukati u te: “Swihinga swo kurisa vana va mina handle ka nuna endlwini swi hungutiwile swinene hi mpfuno wa vakulu ni malandza ebandlheni lava ringeteke ku pfuna hi tindlela leti tirhaka.”

¹¹ Kambe ke, ku na xivangelo xo tivonela. Makwerhu un’wana wa xisati u pfumerile a ku: “Tanihi leswi n’wana wa mina wa mufana a nga hava tatana, makwerhu wa xinuna hi musa u ve la n’wi tsakelaka. . . . Ndzi sungule ku vona ndlela leyi a a ri ni musa ni ku hanana eka n’wana wa mina wa mufana ha yona, naswona ku navela loku hoxeke ku sungule ku kula exikarhi ka mina. A swi fana ni loko Davhida a kurisa ku navela loko biha ka nchumu lowu a wu nga ri wa yena.” (2 Samuel 11:1-4) Hambi leswi rigangugangu ri nga humelelangiki, wansati loyi u sungule ku khomiwa hi tingana hi mianakanyo yakwe ni swiendlo swa rirhandzu, a lava ku rivaleriwa hi Yehova, naswona u tseme xinakulobye ni makwerhu loyi wa xinuna. Leswi swi xi kombisa kahle swonghasi xilaveko xo alela ku navela loku hoxeke ni “ku papalata xikombiso xihi na xihi xa vubihi”!—1 Vatesalonika 5:22, The New American Bible; Vagalatiya 5:24.

12. Munhu a nga ha hunguta xivundza xakwe hi ku teka goza rihi lerinene?

¹² Xivundza xi nga ha hungutiwa hi ku endlela van’wana swilo. Makwerhu un’wana wa xisati loyi swiboho swa yena swa vukati swi karhatekeke u te: “Loko u khomekile hi ku faneleka ni ku pfuna van’wana, ku hava xivandla xo titwela-vusiwana ni xivundza.” ‘Ku faneleka ko tano’ ka munhu la tihambaniseke kumbe la dlayeke vukati ku nga ha katsa ku rhamba ndyangu ekaya ra munhu eka madyambu ya xinakulobye lexi akaka emoyeni. Loko leswi swi nga koteki ngopfu hikwalaho ka swivangelo swa timali kumbe swin’wana, u nga ha endzela ni ku khutaza lava vabyaka kumbe van’wana. Nakambe u nga ha swi kota ku pfuna lava dyuhaleke hi ku va yela exitolo ni mintirho yo hambana-hambana. Tinyiketeli hi tindlela to tano, naswona u ta va ni vumbhoni lebyi engetelekeke bya leswaku “ku nyika i nkateko lowu tlulaka ku nyikiwa.”—Mintirho 20:35.

13. Hi wihi mpfuno wun’wana wo hlula xivundza?

¹³ Mpfuno wun’wana wo hlula xivundza i ku va wo sungula minkarhi hinkwayo ku tihlanganisa ni vapfumeri-kuloni entirhweni wo chumayela hi ta Mfumo. “Minkarhi yin’wana, ndzi titwa ndzi ri ni xivundza xa wanuna,” ku pfumele makwerhu un’wana wa xisati, “kambe hi ntirho wa mina wa nsimu lowu andzisiweke ni ntshunxeko lowuntshwa wo va ni xinakulobye ni vamakwerhu va xinuna ni va xisati, minkarhi leyi i ya xiwelo swinene na kona a yi yi kwihi.” Ku veka vumbhoni nkarhi na nkarhi hi yindlu na yindlu swi nga ha yisa emaendzweni yo vuyela ni tidyondzo ta le kaya ta Bibele ni vanhu lava tsakelaka, lava van’wana va vona va nga ha vaka malandza lama tinyiketeke ya Yehova. Kavula, ku hlula xivundza a hi xivangelo xa hina xo nghenela vutirheIi, kambe byebyo byi nga ha va vuyelo byin’wana bya ntirho lowu wo tsakisa ni lowu katekisiweke.—Swivuriso 10:22.

14. I mintirho yihi leyi faneleke ku va ni vuyelo lebyinene eka Vakriste lava hambaneke, kumbe lava dlayeke vukati?

¹⁴ Vanhu va Yehova hinkwavo va nga pfuneka emoyeni hi ku hlanganyela evutirhelini, va hlanganyela eminhlanganweni ya Vukriste, naswona va ‘lava Mfumo ku sungula.’ (Matewu 6:33) Tanihi leswi mintirho leyi yinene yi nga ni vuyelo lebyinene eka malandza ya Yehova hinkwawo, timhaka to tano ti nga aka ni Vakriste lava tihambaniseke kumbe lava dlayeke vukati. E-e, mintirho leyi yi nge swi tlhantlhi hinkwaswo swiphiqo swa vona, kambe yi fanele ku antswisa langutelo ra vona.

Xikhongelo Xi Endla Ntirho Wa Nkoka

15. Xikhongelo xi nga endla ntirho wihi evuton’wini bya lava va faneleke ku tixaxameta eka ku titshamela-wexe nakambe?

¹⁵ Makwerhu un’wana wa xisati wa Mukriste loyi a bohekeke ku tixaxameta eka ku titshamela wexe nakambe u pfuniwe hi “ku tshama a khomekile entirhweni wa nsimu . . . ni ku endzela vavabyi, vadyuhari ni vanhu lava tsaneke.” Kambe u tlhandlekerile a ku: “Nkarhi na nkarhi loko ndzi ri na xivundza, ndza endza ivi ndzi khongelela matimba, hi ku tiva leswaku Sathana u bizi swinene.” Ina, xikhongelo lexi humaka embilwini i xa nkoka loko vutshembeki eka Xikwembu byi ta hlayisiwa. Swikhongelo swa Vakriste lava tihambaniseke kumbe lava dlayeke vukati swi nga katsa swikombelo swa moya wa Yehova ni muhandzu wa wona wa ku tikhoma leswaku va ta tshama va ri karhi va kambisisa minyanyuko ya rimbewu. (Luka 11:13; Vagalatiya 5:22, 23; Vakolosa 3:5, 6) Ku tlula kwalaho, tanihi leswi ku boha makungu lama tshameke ma endliwa hi wanuna swi nga tisaka xiphiqo eka vavasati van’wana lava tihambaniseke kumbe lava dlayeke vukati, va nga ha tlhela va lava ku khongelela mpfuno wa Xikwembu eku kunguhateni ka timhaka hi vutlhari ni ku kongomana ni miringo yo hambana-hambana.—Yakobo 1:2-8.

16. Malunghana ni ku hambana kumbe ku dlaya vukati, ku nga vuriwa yini ehenhleni ka ku tivona nandzu?

¹⁶ Ku tivona nandzu ku nga ha tikomba ku ri ndzingo. Mukriste un’wana u pfumerile a ku: “Nandzu lowu u wu twaka hi nkarhi wa ku dlaya vukati, hambi loko u nga ri munghana loyi a nga na nandzu, wu nga ha va lowukulu.” Kavula, ku tivona nandzu ka twisiseka loko ku hambana kumbe ku dlaya vukati ku humelerile hikwalaho ka loko un’wana a ale ku hetisisa mindzhwalo ya vukati hi laha ku nga yimelelekiki. (1 Vakorinto 7:3-5) Kambe loko ku hambana kumbe ku dlaya vukati ku humelele hikwalaho ka xivangelo xa Matsalwa endzhaku ka ku anakanyisisa hi xikhongelo, a swi ta va leswi fanelaka ku khongelela mpfuno wa Yehova ku hlula ku tivona nandzu loku nga hava xisekelo. Ku nga ha tlhandlekeriwa leswaku vakulu va bandlha va fanele ku va ni vukheta leswaku va nyika ndzayo leyi sekeriweke eBibeleni naswona va nga tikisi xitsundzuxo xa vona hi ndlela leyi Mukriste a endliwaka leswaku a tivona nandzu ehenhleni ko kuma kumbe ku pfumelela ku hambana kumbe ku dlaya vukati loku pfumeleriwaka hi ku ya hi Bibele.

Ku Hlayisiwa Hi “Ku Rhula Ka Xikwembu”

17. I yini lexi nga pfunaka Vakriste hinkwavo ku tsaka ni ku tiya emisaveni leyi yi karhatekeke?

¹⁷ Vakriste lava hambaneke kumbe lava dlayeke vukati hakanyingi va ni swirhalanganya leswi hlawulekeke. Kambe ke, ku fika eka mpimo wo karhi, “vamakwerhu emisaveni hinkwayo va hlangana ni maxangu yo fanana ni lawa mi nga na wona.” (1 Petro 5:6-11) Hi xikombiso, nxaniso wu khumba hinkwavo lava tirhelaka Yehova, naswona Vakriste vo tala va kongomana ni swirhalanganya swa timali kumbe swa rihanyo, ku khomisiwa tingana, miringo ni swin’wana. Hikwalaho ke, ku fana ni timbhoni tin’wana ta Yehova, Mukriste la tihambaniseke kumbe la dlayeke vukati u fanele ku hambeta a hlangavetana ni swilaveko swa moya hi dyondzo ya Bibele, ku va kona nkarhi na nkarhi eminhlanganweni, vutirheli lebyi gingiritekaka bya nsimu, vutomi lebyi taleleke entirhweni wo hlawuleka ni xikhongelo xa nkarhi na nkarhi leswaku u tshama kusuhi na Yehova. (Matewu 5:3) Ku hluleka ku endla tano a swi ta veka vumoya bya Mukriste wihi na wihi ekhombyeni, kasi ‘ku lava Mfumo ku sungula’ ku nyika mbhoni yin’wana ni yin’wana leyi tshembekaka ya Yehova mpimo lowu xiyekaka wa ntsako ni ku tiya emisaveni leyi yi karhatekeke.

18. Hi swihi swivutiso ni magoza leswi faneleke ku ehleketiwa swinene hi vanghana va Vukriste lava hambaneke?

¹⁸ Ku tiya ka hina ka moya ku tiseketele hi ku tirhisa ka munhu hi xiyexe ka Rito ra Xikwembu. Hikwalaho ke, loko u ri Mukriste la hambaneke ni munghana wa vukati loyi na yena a tinyiketeleke eka Xikwembu, xana u nghenise ndzayo ya Pawulo leyi nga eka 1 Vakorinto 7:10-16 embilwini ke? Ngopfu-ngopfu loko ku hambana ku ye emahlweni nkarhi wo leha, a wu ta endla kahle ku endla ku vuyelelana yi va mhaka ya xikhongelo lexi humaka embilwini. U nga ha tlhela u tivutisa u ku: I yini lexi Yehova a xi languteleke eka mina tanihi munhu la ngheneke evukatini? Xana vanghana va Vukriste a va fanelanga ku twananisa vutomi bya vona ni swilaveko swa Xikwembu swa lava va ngheneleke xiboho xa vukati? Xana swi nga endleka leswaku a hi tokoti nkateko wa Yehova hikwalaho ka leswi hi hlulekeke ku xixima ku hlambanya ka hina ka vukati? Ehleketa hi leswinene leswi nga ha endliwaka loko a mo vulavula hi timhaka hi ku titsongahata, mi khongela hi mbilu hinkwayo ni ku tirha hi matimba leswaku mi tirhisa Rito ra Xikwembu evuton’wini. A swi ta va swinene swonghasi loko havambirhi ka n’wina a mo lulamisa swiphiqo swa n’wina swa vukati ivi mi tlhela mi tiphina hi vutomi kun’we ekaya ro wisa ni ku rhula!

19. Hi ku ya hi Vafilipiya 4:6, 7, hi wihi nchumu wo vangama lowu malandza hinkwawo ya Yehova ya nga tiphinaka hi wona?

¹⁹ Malandza hinkwawo lama tshembekaka ya Yehova ya fanele naswona ma nga swi kota ku tiphina hi nchumu wo vangama—“ku rhula ka Xikwembu loku tlulaka ku twisisa hinkwako.” Tanihi Vakriste, hi nga va na kona ku rhula loku fuweke loko hi hlayisa marito ya Pawulo lama nge: “Mi nga vileli ha nchumu; kambe etimhakeni hinkwato, tivisani eka Xikwembu, hi ku khongela, leswi mi swi pfumalaka, mi kombela mi ri karhi mi nkhensa; kutani ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.”—Vafilipiya 4:6, 7.

20. (a) “Ku rhula ka Xikwembu” i yini? (b) Ku nga khathariseki xiyimo xa hina xa vukati, hi fanele ku endla yini?

²⁰ Ku rhula koloko i ku rhula loku nyikiweke hi Xikwembu ni ku hola, hambi ku ri exikarhi ka swiyimo leswi ringaka swinene. Ku huma evuxakeni lebyikulu na Yehova ni vutivi bya leswaku hi endla leswi swi tsakisaka emahlweni ya yena. Lava va nga ni “ku rhula ka Xikwembu” va pfumelela moya wa xona wu va susumeta, naswona a va hluriwi hi ku vilela. Ha yini? Hikuva va swi tiva leswaku ku hava lexi pfumeleriweke ku humelela eka vona lexi xi nga pfumeleriwangiki hi Xikwembu. (Vaefesa 4:30; ringanisa Mintirho 11:26.) Kutani hambi hi titshamele hexe kumbe hi nghene evukatini, hi hambanile kumbe hi dlaye vukati, a hi tlangeleni “ku rhula ka Xikwembu.” Naswona onge hi nga va ni ku tshemba loku Davhida a veke na kona, loyi a nga te: “Nḍi siv̌ama, nḍi etlela hi ku rhula, hikuv̌a hi wena Yehova u ri ŝaku l’a nḍi akisaka e ku sasekeni.”—Psalma 4:8.

[Nhlamuselo ya le hansi]

A Wu Ta Hlamurisa Ku Yini?

◻ Hi le hansi ka swiyimo swihi laha ku nga vuriwa ku: “Xikwembu xi mi vitanile ku hanya hi ku rhula”?

◻ Xivundza xi nga hungutisisiwa ku yini?

◻ I ntirho wihi lowu xikhongelo xi faneleke ku wu endla evuton’wini bya Mukriste la tihambaniseke kumbe la dlayeke vukati?

◻ A wu ta ku hlamuserisa ku yini “ku rhula ka Xikwembu” loku hlayisaka timbilu ta malandza ya Yehova lama titshameleke woxe, lama ngheneke evukatini, lama tihambaniseke kumbe ku dlaya vukati?

[Xifaniso lexi nga eka tluka 29]

Xikhongelo xi nga tisela Vakriste hinkwavo lava tshembekaka “ku rhula ka Xikwembu” loku nga ta hlayisa timbilu ni matimba ya vona yo anakanya