Bokisi Ra Swivutiso

◼ Xana hi fanele hi dyondza nkarhi wo tanihi kwihi ni xichudeni xa Bibele lexi endlaka nhluvuko?

I swinene ku hambeta hi dyondza ni xichudeni xa Bibele lexi endlaka nhluvuko kukondza xi heta buku leyi nge Xana Bibele Yi Dyondzisa Yini Hakunene? ni leyi nge “Tihlayiseni eRirhandzwini Ra Xikwembu.” Hi fanele hi endla tano hambiloko xichudeni xi khuvuriwa emahlweni ko va xi heta tibuku leti hatimbirhi. Endzhaku ka loko xi khuvuriwile hi nga hambeta hi vika nkarhi, maendzo yo vuyela ni dyondzo. Loko muhuweleri loyi hi fambaka na yena a hoxa xandla loko hi ri karhi hi dyondza, na yena a nga ha vika nkarhi.—Vona Vutirheli Bya Hina Bya Mfumo bya March 2009, tluka 2.

I swa nkoka leswaku vahuweleri lavantshwa va va ni masungulo lamanene entiyisweni, emahlweni ko va hi tshika ku dyondza na vona. Va fanele va “dzima timitsu” eka Kreste naswona va “tiyisiwa eripfumelweni” leswaku va kota ku tiyisela swiphiqo leswi va nga ta langutana na swona. (Kol. 2:6, 7; 2 Tim. 3:12; 1 Pet. 5:8, 9) Ku engetela kwalaho, leswaku hi dyondzisa van’wana hi ndlela leyi humelelaka, va fanele va va ni “vutivi lebyi kongomeke bya ntiyiso.” (1 Tim. 2:4) Loko hi heta tibuku leti ni swichudeni swa hina, hi ta va hi swi pfuna leswaku swi famba ‘egondzweni leri yisaka evuton’wini.’—Mat. 7:14.

Emahlweni ko va vakulu va pfumelela munhu leswaku a khuvuriwa, va fanele va tiyiseka leswaku u ti twisise kahle tidyondzo ta xisekelo ta Bibele naswona u hanya hi ku pfumelelana na tona. Vakulu va fanele va va ni vuxiya-xiya ngopfu-ngopfu loko va kambela xichudeni lexi nga siki hetaka buku yo sungula. Loko xi nga si fanelekela ku khuvuriwa, vakulu va ta tiyisekisa leswaku xi kuma mpfuno ku endlela leswaku xi ta fanelekela ku khuvuriwa enkarhini lowu taka.—Vona buku leyi nge Ku Hleleriwa Ku Endla Ku Rhandza Ka Yehovha, matluka 217-218.

[Marito lama tshahiweke exihlokweni lama nga eka tluka 2]

I swa nkoka leswaku vahuweleri lavantshwa va va ni masungulo lamanene entiyisweni