Vumbhoni Bya Vayimburi Lebyi Kombisaka Leswaku Hosi Davhida A Ri Munhu Wa Xiviri

Hi ku ya hi Bibele, Hosi Davhida wa le Israyele u hanye eka lembexidzana ra vu-11 B.C.E. naswona vatukulu va yena va fume madzana ya malembe. Kambe vaxopaxopi van’wana va vula leswaku Davhida a nga ri munhu wa xiviri, ko va munhu wa le mitsheketweni. Xana Hosi Davhida a ri munhu wa xiviri?

Xipetlu xa ribye lexi kumiweke eTel Dan, en’walungwini wa Israyele xi tsariwe marito lama nge ‘Yindlu ya Davhida.’

Hi 1993, muyimburi Avraham Biran ni ntlawa wakwe, va tshubule xipetlu xa ribye eTel Dan, en’walungwini wa Israyele, xi tsariwe marito lama nge “Yindlu ya Davhida.” Marito wolawo a ma tsariwe hi matsalelo ya xikhale ya Xiyuda, naswona ma tsariwe hi lembexidzana ra vukaye B.C.E. Swi tikomba ku ri xipetlu xa ribye ra xitsundzuxo leri a ri vekiwe hi Maaramu loko ma tibuma leswi ma hluleke Vaisrayele.

Xihloko lexi nga eka Bible History Daily xi te: “Ku ni lava a va nga swi tshembi leswaku marito lama nge ‘Yindlu ya Davhida’ ma kombetela eka Hosi Davhida . . . Kambe, vakambisisi va Bibele ni vayimburi vo tala va pfumela leswaku xipetlu xa ribye lexi kumiweke, i vumbhoni byo sungula lebyi tiyeke bya leswaku Hosi Davhida a a ri munhu wa xiviri wa le minkarhini ya ku tsariwa ka Bibele, leswi endlaka xipetlu lexi xi va nchumu wa nkoka lowu tshuburiweke hi vayimburi va swilo swa le mikarhini ya ku tsariwa ka Bibele lowu vikiweke hi BAR [Biblical Archaeology Review].”