Xiviko Xa Vahuweleri Va Mfumo

‘Ku Tshovela’ Le Venezuela

Eka khamba rin’wana Yesu u fanise ntirho wo chumayela ni ntshovelo wa lembe na lembe. (Matewu 9:36-38) N’wini wa ntshovelo i Yehova Xikwembu naswona ntshovelo i wukulu hakunene emisaveni hinkwayo. Leswi swi katsa nsimu leyi nga tirhiwiki ko tala le Venezuela.

Hofisi ya rhavi ya le Venezuela ya Sosayiti ya Watch Tower yi vika leswi humeleleke loko ntlawa wa Timbhoni wu tirhile nsimu ya Sabana Grande, eTikweni ra Guárico. Timbhoni ta hlamusela: “Yindlu leyi a hi ta tshama eka yona a a yi ri ndhawu leyinene yo khomela minhlangano eka yona, kutani hi nkarhi wolowo hi sungule ku rhamba vanhu va ta eminhlanganweni kwalaho. Vanhu a va nga tivi nchumu hi Timbhoni ta Yehova. Hambi leswi a a ku ri na mintlawa ya mune ya vaevhangeli edorobeni rero, vanhu a va hisekela ku dyondza Bibele.

“A hi tirha tiawara tinharhu ni mixo hi tlhela hi tirha tiawara tinharhu ni ndzhenga, hi nghena hi yindlu na yindlu ni ku rhambela vanhu enhlanganweni wa madyambu lama landzeleke. A a hi nga ri na swona switulu, kutani hi va kombele leswaku va ta ni switulu swa vona vini. Loko nkarhi wa leswaku nhlangano wu sungula wu tshinerile, vanhu va sungule ku ta, un’wana ni un’wana a rhwale xitulu. Loko nhlangano wu herile, hi va byele leswaku hi tsakela ku tsala mavito ya lava tsakelaka ku va ni dyondzo ya le kaya ya Bibele ya mahala. Hinkwavo va 29 lava a va ri kona va lave leswaku mavito ya vona ma tsariwa.

“Loko hi pfala nyangwa endzhaku ka muendzi wo hetelela, hi vone vavanuna vanharhu va yime ekhonweni ya yindlu. Kwalomu ka awara ya kaye ehenhla ka nhloko, loko va gongondza enyangweni a hi lunghekele ku tshama ehansi hi dya. Va vutise swivutiso swo tanihi leswi: ‘I muxaka muni wa ku chumayela lowu mi wu endlaka edorobeni leri? Hikwalaho ka yini mi ve ni nhlangano laha madyambu lawa?’

“Hi vutisile loko hi tlule nawu wo karhi. Va hlamule va ku e-e, ivi va vula leswaku hi vona vafundhisi va tikereke tinharhu ta vaevhangeli ta le dorobeni rero. A va hlundzukile hikwalaho ka leswi tikereke ta vona a ti nga ri na munhu madyambu wolawo. Hi va nghenisile ivi hi va hlamusela ntirho wa hina. Hi tlhele hi va fambisela tibuku naswona hi va kombela leswaku va tlhela va vuya hi Ravumune leri landzelaka.

“Ravumune leri landzeleke vafundhisi va tlhele va ta naswona a va ri ni vanhu van’wana va 22 lava laveke ku twa leswi a hi ta swi vula. Vafundhisi va anakanye leswaku, leswi hi nga vavasati, hi nge swi koti ku vulavula ku fana na vona. Hambi swi ri tano, nhlangano wu humelerile hi ku ya hi langutelo ra hina. Emakun’wini hi hlamusele leswaku a hi endla nxaxamelo wa lava lavaka ku dyondza leswi engetelekeke eBibeleni. Nhlayo yo tala ya vanghana va vafundhisi va lave leswaku mavito ya vona ma nghenisiwa enxaxamelweni, naswona van’wana va vule ni leswaku va tsakela ku famba na hina entirhweni wo chumayela!

“Hi va hlamusele leswaku va ta lava vutivi ni ndzetelo lowu engetelekeke wa Bibele va nga si fambisana na hina entirhweni wo chumayela. Siku rin’wana ni rin’wana vanhu a va ta endlwini ya hina va kombela hi va hlamusela Bibele. Minkarhi yin’wana, loko hi vulavurile ku kondza ku va vusiku swinene, a hi fanele ku va kombela leswaku va muka. Loko eku heteleleni hi boheke ku suka ensin’wini yoleyo, a va hlunamile swinene naswona va hi byela leswaku loko hi tlhela hi vuya, va ta famba na hina entirhweni wo chumayela. Va tshembise leswaku hi nkarhi wolowo va ta va se va endle nhluvuko lowu lavekaka.”

Loko Timbhoni ti sukile ensin’wini yoleyo, a a ku ri na vanhu va 40 lava laveke ku dyondza Bibele. Mavito ya vanhu lava va tsakelaka ma yisiwile eka bandlha ra le kusuhi, leri nga eka mpfhuka wa 50 wa tikhilomitara. Endzhaku ka sweswo, Timbhoni to karhi leti humaka eka tiko rin’wana ti rhurhele edorobeni leri, kutani ntlawa lowu chivirikaka wa vahuweleri va mahungu lamanene wu vumbiwile.