Xana U Lunghekele Ku Langutana Ni Xiyimo Xa Vutshunguri Lexi Tlhontlhaka Ripfumelo?
Hlayisa rungula leri laha u nga ri kumaka kona hi xihatla loko ri laveka
1 Ku hava loyi a anakanyaka leswaku swi nga ha endleka a va exibedlele namuntlha kumbe mundzuku. Kambe, ‘nkarhi ni xiendlakalo xa xitshuketa swi wela hinkwerhu.’ (Ekl. 9:11) Hambi loko u nga amukeli vutshunguri bya mirhi tanihi endlelo leri u ri rhandzaka ra nkhathalelo wa rihanyo, u nga endla yini leswaku u tisirhelela eka mpompelo wa ngati lowu nga lavekiki loko khombo ro ku titivata ivi u yisiwa exibedlhele? Ina, khombo kumbe xiyimo xa rihanyo leri ngo swi pfuketana ri chavisa ri nga ku vangela ku langutana ni ntlhontlho wa ripfumelo ra wena.
2 Loko u tikuma u ri exibedlhele hikwalaho ka xivangelo xo karhi, u nga endla yini leswaku u hlayisa vutshembeki bya wena loko un’wana a ku byela leswaku u ta fa loko u nga pomperiwi ngati? Xana u ta hatlisela ku pfumela leswaku hakunene mhaka leyi yi tano eka xiyimo xa wena? Xana u khorwiseke hi laha ku heleleke leswaku a wu lavi ngati? Xana u lunghekele ku langutana ni ntlhontlho lowu wa ripfumelo ra wena ivi ‘u papalata ngati’?—Mintirho 15:28, 29.
3 Ku ala hi laha ku humelelaka mpompelo wa ngati lowu nga lavekiki, lowu thyakisaka hi tlhelo ra moya, swi lava ripfumelo leri tiyeke. Ripfumelo rero ri fanele ri seketeriwe eka ku twisisa lokunene ka leswi Bibele yi vulaka swona hi ngati. Handle ka sweswo, hi nkarhinyana, u nga chavisiwa hi ku olova hi un’wana loyi a tiendlaka onge u tiva xiyimo xexo ku tlula wena. Xana u nga hambukisiwa hi ku ehleketa leswaku kumbexana madokodela ma tiva swo tala hi ta ngati ku tlula Xikwembu? Entiyisweni, eka swiyimo leswi u fanele u “tiya” leswaku u endla “leswo lulama” emahlweni ka Yehova, ku nga khathariseki leswi vanhu va nga vulaka swona.—Deut. 12:23-25.
MAGOZA YA NKOKA LAMA TEKIWAKA KA HA RI EMAHLWENI—XANA SE U MA TEKILE?
4 Xo sungula, tiyiseka leswaku hinkwavo endyangwini va tata matsalwa ya vona yo hlamusela timhaka ta vutshunguri hi vukheta—ma tsariwa siku, ma sayiniwa ni ku va ni vito ra loyi a nga ta nyikela vumbhoni. Vamakwerhu van’wana lava fikeke exibedlhele va ri ni matsalwa lama nga tsariwangiki siku ni/kumbe lama nga riki na vito ra mbhoni va kume njhekanjhekisano mayelana ni wa ku tirha ka wona. Naswona xana vana va hina hinkwavo lava nga khuvuriwangiki va ni makhadi ya vona yo titivisa lama tatiweke? Loko swi nga ri tano, eka khombo leri khumbaka n’wana wa wena, mutirhi wa le xibedlhele u ta xi tiva njhani xiyimo xa wena hi ta ngati kun’we ni loyi a nga ta n’wi vitana?
5 Kutani tiyiseka leswaku hinkwavo va tshama va ri ni matsalwa lawa MINKARHI HINKWAYO. Kamba vana va wena loko va ri na wona va nga si ya exikolweni siku rin’wana ni rin’wana, ina, hambi loko va nga si ya eku tlangeni kumbe endhawini yo hungasa. Hinkwerhu ka hina hi fanele hi tiyiseka leswaku hi ni matsalwa lawa entirhweni, loko hi ri eku wiseni, kumbe entsombanweni wa Vukriste. Hi nga tshuki hi tshama hi nga ri na wona!
6 Anakanya hi leswi swi nga humelelaka eka wena loko wo tikuma u vabya ngopfu u ri ekamareni ya le xibedlele, u titivarile naswona/kumbe u nga swi koti ku tivulavulela. Loko u ri hava tsalwa, naswona ku ri hava xaka kumbe nkulu la nga ku vulavulelaka exibedlhele hi nkarhi wolowo, kutani ku gimetiwa hi leswaku ‘u fanele ku pomperiwa ngati,’ u nga ha pomperiwa ngati. Khombo ra kona, leswi swi humelerile eka van’wana. Kambe loko hi ri ni tsalwa, ra hi vulavulela, ri hlamusela ku rhandza ka hina.
7 Hi yona mhaka leyi tsalwa ra vutshunguri ri tlulaka sindza ra vutshunguri kumbe xihakarho xa le nhan’wini ha yona. Sweswo a swi hlamuseri swivangelo swa hina leswi sekeriweke eBibeleni ni xiyimo xa hina naswona swi hava minsayino leyi tiyisaka leswi vuriwaka. Xiboho xa huvo ya le Canada xi vule leswi hi ta tsalwa ra makwerhu un’wana wa xisati: “[Muvabyi] u hlawule ndlela yin’we ntsena leyi kotekaka ku tivisa madokodela ni vaongori van’wana va rihanyo, leswaku loko a titivala kumbe hi ndlela yin’wana a nga swi koti ku vula leswi a swi rhandzaka, a nga pfumeli ku mpomperiwa ngati.” Kutani u nga tshuki u tshama u nga ri na rona!
8 Tanihi leswi xikongomelo-nkulu xa xikongomisi xa hina xa vutshunguri ku nga ku langutana ni swiyimo swa khombo, kutani eka vuhandzuri byo tihlawulela swi ta va leswinene ku tsala ka ha ri emahlweni xikongomisi xa wena lexi heleleke (hi ku ya hi xikongomisi xa vutshunguri bya hina) leswaku u kota ku katsa ni vuxokoxoko, byo tanihi muxaka wa vuhandzuri ni mavito ya madokodela ni vito ra xibedlhele. I mfanelo ya wena ku endla leswi, xisweswo u tiyisekisa vutshunguri lebyi u tihlawulelaka byona. Hambi leswi wena na dokodela mi nga taka mi nga rindzeli swiphiqo leswikulu, hlamusela leswaku xikongomisi lexi xi fanele ku landzeleriwa loko ku va ni swiendlakalo leswi nga languteriwangiki.—Swiv. 22:3.
9 Goza rin’wana ra nkoka i ku vulavula ni vatirhi va swa vutshunguri lava faneleke lava nga ta ku tshungula eka vutshunguri byo tihlawulela kumbe bya xihatla. Ngopfu-ngopfu u fanele u vulavula na mani?
VULAVULA NI VATIRHI VA SWA VUTSHUNGURI
10 NTLAWA WA SWA VUTSHUNGURI: Lowu i nkarhi lowu ku chava vanhu ku faneleke ku nyamalala ha wona. (Swiv. 29:25) Loko u tikomba u nga tiyiseki, un’wana a nga ha ehleketa leswaku a wu tiyimiselanga. Loko vuhandzuri byi laveka, byo tihlawulela kumbe bya xihatla, wena kumbe xirho xa ndyangu xa le kusuhi swinene xi fanele xi vutisa swin’wana swa swivutiso leswi kongomeke hi ku tiyimisela eka nhloko ya ntlawa wa vuhandzuri. Xivutiso xin’wana xa nkoka hi lexi, Xana ntlawa wa vatirhi wu ta swi xixima leswi swi rhandziwaka hi muvabyi ni ku tshungula handle ka ngati eka swiyimo hinkwaswo? Handle ka xitiyisekiso lexi u nga ka u nga sirheleteki kahle.
11 Boxa swilo leswi u rhandzaka swona, hi ripfumelo leri tiyeke. Swi veke erivaleni leswaku u lava swikhomela-ndhawu swa vutshunguri leswi nga hava ngati eka xiphiqo xa wena. Hi ku rhula na hi ku tiyiseka bula hi xikongomisi xa wena xa vutshunguri xa sweswi kun’we ni fomo ya timfanelo ta le xibedlhele. Loko muendli wa vuhandzuri a nga swi rhandzi ku endla leswi u swi rhandzaka, u nga ha kombela mulanguteri wa swa vutshunguri wa le xibedlhele leswaku a ku kumela dokodela un’wana. Lexi i xiphemu xa ntirho wa yena.
12 MUTIVI WA MIRHI YO TITIVATA: Eka ntlawa hinkwawo wa vutshunguri lowu u fanelaka ku vulavula na wona u nga si endla vuhandzuri, U NGA TSANDZEKI KU VULAVULA NI DOKODELA LOYI. Ú ni vutihlamuleri bya ku ku endla leswaku u tshama u hanya loko ku endliwa vuhandzuri, mutivi wa mirhi yo titivata hi yena loyi a endlaka swiboho swa timhaka to tanihi ku tirhisiwa ka ngati. Kutani a wu sirhelelekanga hi laha ku heleleke loko u vulavula ntsena ni muendli wa vuhandzuri. Hikokwalaho, u fanele u vulavula ni mutivi wa miri yo titivata kutani u n’wi khorwisa hi ku n’wi byela xiyimo xa wena, u tiyiseka loko leswi u nga ta swi vula swi ta xiximiwa kumbe e-e.—Ringanisa Luka 18:3-5.
13 Swi vonaka onge endlelo leri tolovelekeke hi leswaku vativi va mirhi yo titivata va endzela muvabyi nkarhinyana handle ka loko nkarhi se wu fambile, eka vusiku bya loko a nga si endliwa vuhandzuri—nkarhi wu ta va wu nga ha ri kona loko a kaneta xiyimo xa wena xa ngati. Sindzisa leswaku muendli wa vuhandzuri a hlawula mutivi wa mirhi yo titivata la nga ni ntirhisano loyi u nga ta vulavula na yena kahle ka ha ri emahlweni eka vuhandzuri byo tihlawulela. Kutani ku ta va ni nkarhi wo lava un’wana loko lowo sungula a nga swi rhandzi ku pfumelelana ni leswi u swi navelaka. U nga pfumeleli un’wana a ringeta ku ku xisa eka mfanelo leyinene leswaku u pfumelelana ni mutivi wa mirhi yo titivata eka vuhandzuri bya wena.
14 Eka hinkwaswo leswi, u fanele u veka erivaleni goza ra wena leri tiyeke: ALA NGATI. Kombela swikhomela-ndhawu swa vutshunguri leswi nga hava ngati exiyin’weni xa wena. Boxa swikhomela-ndhawu swihi na swihi leswi tivekaka swa ngati, leswi swi nga tirhisiwaka eka xiyimo xa wena. Loko ntlawa wa vutshunguri wu ehleketa leswaku leswi a swi tirhi exiyin’weni xa wena, wu kombele leswaku wu lavisisa ndlela yin’wana ebukwini ya swa vutshunguri. Va tiyisekise leswaku u nga va kumela vuxokoxoko byin’wana loko va swi rhandza hi ku kombela vakulu va wena leswaku va tihlanganisa ni Sosayiti.
KU TIRHISA TIMFANELO TA WENA
15 Kambisisa hi vukheta mpfumelelo lowu nga le ka fomo ya vutihlamuleri ni fomo yo amukela leyi xibedlhele xi ku kombelaka leswaku u yi sayina u nga si pfumeleriwa ku tshama. Minkarhi yin’wana endzhaku ko vula leswaku va ta xixima ku rhandza ka wena, ndzimana leyi landzelaka yi ta kombisa leswaku loyi a sayinaka wa pfumela leswaku xibedlhele xi nga nyikela vutshunguri lebyi “ponisaka vutomi” loko va hlangana ni swiphiqo. Sweswo swi nga ha katsa ni ngati. U ni mfanelo yo cinca swiga swo tano leswaku u papalata ngati kumbe u swi tima hi laha ku heleleke. Vaongori va nga ringeta ku ku byela leswaku a wu nge swi endli sweswo, kambe u nga swi kota! Hlamusela leswaku fomo yoleyo i yo twanana na vona naswona u nge sayini ntwanano lowu u nga pfumelelaniki na wona. Loko un’wana a ringeta ku ku sindzisa leswaku u yi sayina u nga swi rhandzi, kombela ku vulavula ni mulanguteri ni/kumbe muyimeri wa vavabyi wa xibedlhele xexo.
16 Xana u nga swi endla swilo swo tano? Ina, u nga swi endla. Kutani xiya timfanelo ta wena tanihi muvabyi. Timfanelo leti ta munhu a ti sali enyangweni loko u nghena exibedlhele. A wu fanelanga u ti tshika leswaku u tshunguriwa. U nga pfumeli un’wana a ku byela swin’wana.
17 Xo sungula, mfanelo yo tano yi vuriwa mfanelo yo pfumelelana, leswi vulaka leswaku ku hava vutshunguri bya muxaka wo karhi lebyi u nga nyikiwaka byona handle ka mpfumelelo wa wena. Loko u swi rhandza u nga ha ala vutshunguri hinkwabyo. Loko u pfumela ku tshunguriwa u fanele u va u hlamuseriwe kahle leswi ntlawa wa vutshunguri wu lavaka ku endla swona, ku katsa ni makhombo hinkwawo. Nakambe, va fanele va ku byela hi swikhomela-ndhawu swin’wana ni swin’wana leswi nga kona. Kutani, loko u byeriwile, u hlawula vutshunguri lebyi u byi lavaka.
18 Leswaku u tiyiseka hi leswi u swi pfumelelaka, u FANELE u vutisa swivutiso leswinene hi ta xin’wana ni xin’wana lexi u nga xi twisisiki, ngopfu-ngopfu loko mutirhi wa le xibedlhele a tirhisa marito yo leha kumbe ya vutshunguri. Hi xikombiso, loko dokodela a vula leswaku u ta lava ku tirhisa “pulasima,” u nga gimeta hi laha ku hoxeke leswaku u vula “xiengeteri xa pulasima vholumo,” kambe a swi tano. U nga si pfumela, vutisa: “Xana i xiaka-ngati?” Vutisa hi matirhele man’wana ni man’wana ya yena, u ku: “Xana vutshunguri byebyo byi katsa ku tirhisiwa ka leswi endliweke hi ngati?” Loko a hlamusela maendlelo man’wana lawa a nga lavaka ku ma tirhisa, vutisa: “Xana ku ni nkarhi lowu ngati ya mina yi yimisiwaka loko ku tirhisiwa endlelo leri?”
19 Kambe i yini lexi u faneleke u xi endla loko u endle hinkwaswo leswi nga laha henhla naswona u kuma leswaku na sweswi ku hava ntirhisano kumbe twanano hi xiyimo xa wena? U nga hlweli ku kombela mpfuno. Van’wana va rindze nkarhi wo leha swinene leswaku va kombela mpfuno kutani va nghenisa vutomi bya vona ekhombyeni.
MPFUNO WA NKOKA ENKARHINI WA XILAVEKO
20 Xiya endlelo leri landzelaka ro kuma mpfuno lowu lavekaka: (1) Loko wena kumbe murhandziwa wa wena a langutane ni vuhandzuri byo tihlawulela kumbe bya xihatla laha ku nga ni nkwetlembetano hikwalaho ka leswi xibedlhele xi lavaka ku tirhisa ngati; kumbe (2) loko xiyimo xa wena xa vutshunguri kumbe xa murhandziwa xi ya xi biha swinene; kumbe (3) loko ku ri emhakeni ya xihlangi (kumbe munhu-nkulu), dokodela, muongori, kumbe mulanguteri wa vutshunguri wa xibedlhele a vula leswaku u lava ku twa xileriso xa huvo, kutani:
21 VITANA VAKULU VA BANDLHA RA KA N’WINA loko u nga si swi endla. (Hakunene, hikwalaho ka xiyimo xa hina hi ngati, i ndlela ya vutlhari ku tivisa vakulu va hina nkarhi wun’wana ni wun’wana loko hi ya exibedlhele.) Nakambe, loko swi vonaka swi fanela, VAKULU VA TA VITANA SOSAYITI. Vakulu va nga ha ta exibedlhele ku ta ku pfuna.—Esa. 32:1, 2.
22 Sosayiti kun’we ni valanguteri va doroba etindhawini hinkwato letikulu va ni nxaxamelo wa madokodela lama nga ni ntirhisano endhawini ya ka n’wina leswaku wena kumbe vakulu va tihlanganisa na vona. Loko ni un’we a nga ri kona ekusuhi, vakulu va ta vulavurisana ni Sosayiti. Kavula, vakulu va nge ku endleli swiboho, kambe hakanyingi va nga ku pfuna leswaku u xiya langutelo ra Sosayiti ra timhaka ni ku ku tsundzuxa eku hlawuleni ka wena hi tlhelo ra vutshunguri ni ra nawu.
23 Loko ntlawa wa vutshunguri wa ha ala ku pfumelelana na wena, vulavula ni mulanguteri wa vutshunguri wa le xibedlhele leswaku a va siva hi vatirhi van’wana va yena lava nga ta xixima ku rhandza ka wena. Loko mulanguteri a kanakana ku endla sweswo naswona NTSENA loko entiyisweni ku ri ni mutivi un’wana wa vuhandzuri kun’wana, naswona swi koteka ku va u cinceriwa ka yena, kutani u nga ha hlawula ku nyika mulanguteri mhaka leyi tsariweke siku ni leyi yi sayiniweke leyi nga ni mavito ya madokodela lama nga pfumeriki ku tirhisana na wena ni leyi vulaka leswaku va tshikisiwile ku ku pfuna.
24 Xana u nga swi endla sweswo ke? Ina, u na yona mfanelo yoleyo. Kutani loko endzhakunyana mhaka yi yisiwa eka muavanyisi, nhlamuselo ya wena leyi tsariweke yi nga pfuna leswaku a xiya ku rhandza ka wena. Swi nga ha endleka swi ku pfulela ndlela leyinene leswaku vahandzuri van’wana va ku pfuna. Naswona, xa nkoka swinene, yi nga ha ku nyika nyingiso lowu faneleke wa vutshunguri xiyimo xa wena xi nga si biha ngopfu. U nga dyi nkarhi!
25 Hambi leswi hi nga byeliki munhu leswaku a kuma ndzindza-khombo wa rihanyo hi fanele hi ku tivisa leswaku hakanyingi hi na swiphiqo leswikulu swo kuma dokodela un’wana loyi ngopfu-ngopfu a nga ni ntirhisano leswaku a tshungula lava pfumalaka kumbe lava tsandzekaka ku hakela vutshunguri byihi na byihi.
SWIVUTISO SWO TALA LESWI U FANELEKE U SWI LANGUTELA
26 U fanele u swi tiva leswaku ku na swivutiso swin’wana leswi madokodela kun’we ni van’wana va swi vutisaka leswi hakanyingi swi nga vutisiwiki hi ndlela leyinene. Xin’wana lexi madokodela ma talaka ku xi vutisa ngopfu (kun’we ni vaavanyisi van’wana) hi lexi:
• “Xana u nga ha fa (kumbe u tshika n’wana wa wena a fa) ku ri ni ku amukela ‘mpompelo wa ngati lowu ponisaka vutomi’?”
27 Loko wo pfumela, swi ta va swi lulamile hi ndlela ya vukhongeri. Kambe nhlamulo yoleyo hakanyingi a yi twisiseki naswona minkarhi yin’wana yi pfuxa ni swiboho swa huvo leswi hoxeke. U fanele u tsundzuka leswaku a wu le vutirhelini hi nkarhi lowu. Kambe, u vulavula hi vutshunguri lebyi lavekaka. Hikokwalaho, u fanele u fambisana ni vayingiseri va wena, va vatshunguri kumbe va nawu.—Ps. 39:1; Vakol. 4:5, 6.
28 Eka dokodela, muavanyisi, kumbe mulanguteri wa vutshunguri, “ina” swi nga vula leswaku u fanele ku va mudlawela-ripfumelo kumbe u nyikela n’wana wa wena hikwalaho ka ripfumelo ra wena. Ku va byela hi ku tiya ka ripfumelo ra wena hi ta ku pfuxiwa ka vafi emhakeni leyi swi nge pfuni nchumu. Va ta ku vula muhisekeri wa vukhongeri, la tsandzekaka ku endla swiboho leswi twalaka loko vutomi byi ri ekhombyeni. Emhakeni ya n’wana, va ta ku teka tanihi mutswari la honisaka, la alaka leswi vuriwaka vutshunguri lebyi “ponisaka vutomi.”
29 Kambe A WU ali vutshunguri hi byoxe. Kambe u hambana ntsena ni madokodela hi ta MUXAKA wa vutshunguri. Xiyimo lexi hakanyingi xi ta hundzula langutelo ra vona ni ra wena. Handle ka sweswo, i vuxisi bya vona lebyi endlaka swi vonaka onge ngati i yinene ni leswaku hi yona NTSENA vutshunguri lebyi “ponisaka vutomi.” (Vona Xana Ngati Yi Nga Byi Ponisa Njhani Vutomi Bya Wena?, matluka 7-22.) Kutani u fanele u yi veka erivaleni yinhla yoleyo. U nga swi endlisa ku yini? U nga ha hlamula u ku:
• “A ndzi swi lavi ku fa (a ndzi lavi n’wana wa mina a fa). Loko a ndzi lava ku fa (kumbe leswaku n’wana wa mina a fa), a ndzi ta va ndzi tshame ekaya. Kambe ndzi te laha leswaku ndzi ta tshunguriwa leswaku ndzi hanya (leswaku n’wana wa mina a hanya). Leswi ndzi swi lavaka i swikhomela ndhawu swa vutshunguri leswi nga hava ngati emhakeni ya mina (eka n’wana wa mina). Swi kona swikhomela-ndhawu.”
30 Swin’wana swa swivutiso swo hambana-hambana leswi hakanyingi swi vutisiwaka hi madokodela kumbe vaavanyisi hi leswi:
• “Ku ta humelela yini loko mpompelo wu sindzisiwa hi xileriso xa huvo? Xana u ta byarha vutihlamuleri?”
• “Xana ku amukela mpompelo kumbe ku pomperiwa hi ku sindzisiwa, swi nga ku endla u hlongoriwa evukhongerini bya wena kumbe u nga kumi vutomi lebyi nga heriki? Xana u ta langutiwa njhani hi bandlha ra ka n’wina?”
31 Makwerhu un’wana wa xisati u angule muavanyisi leswaku emhakeni yo tano a nga ta va ni vutihlamuleri eka leswi muavanyisi a swi hlawuleke. Hambi leswi a a tiyisile hi ndlela yin’wana, muavanyisi u ehlekete leswaku tanihi leswi a nga ta va a ri hava vutihlamuleri, xisweswo swa fanela leswaku a n’wi tekela vutihlamuleri. Kutani u lerise leswaku a pomperiwa ngati.
32 U fanele u swi twisisa leswaku loko u vutisiwa swivutiso leswi, van’wana hi ntolovelo va lava xivangelo xa wena xo ala ku amukela ngati. U nga hatlisi u va humesela xona! Kutani hi nga yi papalata njhani mhaka yoleyo? U nga ha hlamula u ku:
• “Loko ndzo sindzisiwa ku cheriwa ngati hi ndlela yo karhi; eka mina swi ta fana ni ku pfinyiwa. Ndzi ta karhateka ngopfu hi vuyelo bya mintlhaveko ni bya moya bya ku hlaseriwa loku ndzi nga ku laviki evuton’wini bya mina hinkwabyo. Ndzi ta ala hi matimba ya mina hinkwawo ku onhiwa koloko ka miri wa mina handle ka mpfumelo wa mina. Ndzi ta endla matshalatshala hinkwawo yo xanisa vahlaseri va mina ku fana ni loko ndzi pfinyiwa.”
33 Nhlamuselo ya matimba, leyi kongomeke yi fanele yi endliwa leswaku mpompelo lowu hi sindzisiwaka wona i ku onhiwa lokukulu ka mimiri ya hina. A hi mhaka ya matlangwana. Yima u tiya. Swi veke erivaleni leswaku u lava swikhomela-ndhawu swa endlelo ra vutshunguri leri nga hava ngati.
U TA ENDLA YINI LESWAKU U LUNGHEKA?
34 Hi pfuxete swilo swin’wana leswi u faneleke u swi endla leswaku u tisirhelela wena ni ndyangu wa wena eka mpompelo wa ngati lowu nga lavekiki. (Endzhakunyana, hi tshemba leswaku hi ta nyikela vuxokoxoko byo tala byo tamela swiphiqo leswi tlhekekaka loko tincece ni vana va xungetiwa hi mimpompelo ya ngati.) Nakambe hi swi vonile leswi Sosayiti yi swi lunghiseleleke leswaku yi nyikela mpfuno hi ku swi rhandza hi nkarhi wa xilaveko. Xana u fanele u endla yini hi rungula leri leswaku u tiyiseka leswaku u lunghekele ku langutana ni xiyimo xa vutshunguri lexi tlhontlhaka ripfumelo ra wena?
• Xo sungula: Kanelani tanihi ndyangu ku pfuxeta timhaka leti ni ku hlela leswi mi nga ta swi vula ni ku swi endla, ngopfu-ngopfu loko ku ri ni khombo.
• Lexi landzelaka: Tiyisekani leswaku mi ni matsalwa hinkwawo lawa mi ma lavaka.
• Kutani: Khongela swinene eka Yehova leswaku a ku pfuna eka xiboho xa wena lexi tiyeke xa ku ‘hambeta u papalata ngati.’ Ku yingisa nawu wa yena emhakeni ya ngati swi hi tiyisekisa leswaku u ta hi nyika vutomi lebyi nga heriki.—Mintirho 15:29; Swiv. 27:11, 12.
Loko xiyimo xa vutshunguri xi biha swinene ku fikela laha ku nga lavekaka mpompelo wa ngati, languta bokisi leri ku vona leswi u nga swi endlaka:
[Bokisi leri nga eka tluka 5]
1. Vitana vakulu ebandlheni ra ka n’wina leswaku va ku pfuna.
2. Kombela vakulu leswaku va vitana Sosayiti loko swi laveka.
3. Vakulu va nga ku pfuna hi ku vulavula ni madokodela ni van’wana.
4. Vakulu va nga ku pfuna leswaku u vulavurisana ni madokodela man’wana leswaku va vonana ni vahandzuri lava nga kona, hi ta swikhomela-ndhawu.
5. Vakulu va nga ku pfuna leswaku u yisiwa endhawini yin’wana leyi xiximekaka leswaku u kuma vutshunguri lebyi lavekaka.