Goza Lerinene Ro Endla Nhluvuko Lowu Engetelekeke

¹ Vo tala va hina sweswi se hi hetile ku hlaya 1992 Yearbook. Ku twa hi nhlohlorhi ya misava hinkwayo ya 1991 ya vahuweleri va Mfumo vo tlula timiliyoni ta mune ni kotara ematikweni ya 211—ku engeteleka ka 6,5 wa tiphesente—swi nyanyule timbilu ta hina! Entiyisweni, ku andza ka Mfumo loku endlekaka sweswi emisaveni i vumbhoni lebyi hlamarisaka bya ku hetiseka ka Esaya 2:2-4 na Mikiya 4:1-4.

² Hambi leswi xiviko xa lembe ra ntirho ra 1992 xi nga helelangiki, vumbhoni bya leswaku Yehovha u katekisa lembe leri ra ntirho hi ku engeteleka loku xiyekaka byi le rivaleni. Xirhambo xa ku hlanganyela ni vumakwerhu lebyikulu bya misava hinkwayo xi hambeta xi ya emahlweni. Nhlayo ya lava veke kona eXitsundzuxweni ni le mintsombanweni ya muganga yi komba leswaku timiliyoni ta vanhu ta ri yingisela rungula ra Mfumo. Ematikweni hinkwawo, va amukela xirhambo lexi huhuteriweke lexi nge: “Tanani, hi ta tlhandlukela nṭhav̌eni ya Yehova, e ndlwini ya Šikwembu ša Yakob; ši ta hi dyonḍisa tindlela ta šona.”

³ Tiyimisele Ku Endla Nhluvuko: Nhlengeletano ya Yehovha yi ya emahlweni. Leswi lava khitikanelaka entshaveni ya Yehovha ya vugandzeri bya ntiyiso va nga tala, i swa nkoka leswaku un’wana ni un’wana a teka goza lerinene ro endla nhluvuko lowu engetelekeke wa moya ivi a fanelekela ku pfuna van’wana lavantshwa ku endla leswi fanaka. Xilaveko xa nhluvuko wo tano xi kombisiwa hi marito lawa vanhu lava amukelaka xirhambo xa ku tlhandlukela entshaveni ya Yehovha va ma byelaka van’wana, “Tanani.” Muapostola Yohane u vike swin’wana leswi fanaka eka Nhlavutelo 22:17: “Moya ni Mutekiwa va ri: ‘Tana!’ Ni loyi a swi twaka a a vule a ku: ‘Tana!’”

⁴ Yesu u kombise ndlela leyi xirhambo lexi a xi fanele ku vuriwa ha yona. Loko vanhu va amukela dyondzo yakwe, u va rhambele ku hlanganyela evutirhelini byakwe, a va dyondzisa ku byi endla. (Mt. 4:19; 10:5-7, 11-14) Vadyondzisiwa vakwe va dyondze tindlela leti humelelaka leti a ti tirhiseke hi ku famba na yena ni ku xiya ndlela leyi a a endla swilo ha yona. Kutani va endle vutirheli bya vona ku fana ni bya yena. Va dyondze tindlela ta yena kahle lerova ku nyikela ka vona vumbhoni hi xivindzi ku koke nyingiso wa vakaneti lava swi voneke kahle leswaku a va ri vadyondzisiwa va Yesu. Mintirho 4:13 ya vika: “Loko va vona ku tiya ka Petro na Yohane, . . . va swi vonile leswaku hi leswi a va ri vanakulobye va khale va Yesu.”

⁵ A nga si tlhelela etilweni, Yesu u lerise leswaku vadyondzisiwa vakwe va fanele va landzela vutirheli bya Vukreste hi ku endla vadyondzisiwa lavantshwa, va va dyondzisa hi laha vona va dyondzisiweke ha kona. Eka Matewu 28:19, 20, Yesu u lerisile: “Hikokwalaho, yanani eka vamatiko hinkwavo, mi va endla vadyondzisiwa va mina, . . . mi va dyondzisa ku hlayisa hinkwaswo leswi ndzi mi leriseke swona.” Naswona loko a kombisa leswaku a a lava leswaku xi hambeta ku ta fika esikwini ra hina, u nyike xitiyisekiso lexi nge: “Vonani, ndzi na n’wina masiku hinkwawo, ku ko ku hela misava.”

⁶ Vadyondzisiwa va ntiyiso va Yesu Kreste a va hlulekanga ku yingisa swiletelo swakwe swo dyondzisa vadyondzisiwa lavantshwa swilo hinkwaswo leswi a va leriseke swona. Hambi swi ri tano, ku andza loku xiyekaka evandlheni ra misava hinkwayo ra Timbhoni ta Yehovha ku lava leswaku hi xiya swilaveko leswi hlawulekeke swa swirho leswa ha ku khuvuriwaka swa vandlha ni vahuweleri lava nga khuvuriwangiki kun’we ni vanhu lava dyondzaka Bibele na hina ni lava kumbexana va sungulaka ku ta eminhlanganweni ya vandlha, kambe va nga ti nkarhi hinkwawo.

⁷ Eku sunguleni ka lembe ra ntirho ra 1992, kwalomu ka muhuweleri un’we eka va kaye, u ni lembe a ri karhi a hiseka evutirhelini. Tlhandla-kambirhi, wun’we eka va tsevu u ni malembe manharhu kumbe ehansi ka wona a ri karhi a huwelela; kasi wun’we eka va mune u ni malembe manharhu kumbe ntlhanu a ri karhi a hlanganyela evutirhelini. Hambi leswi vo tala lavantshwa va nga endla nhluvuko lowunene ku sukela loko va ve swirho swa vandlha, handle ko kanakana mpfuno lowu engetelekeke eka swivumbeko swin’wana wu nga pfuna ku hatlisisa nhluvuko wa vona wa moya.

⁸ Vaheveru 6:1 yi khutaza hinkwerhu leswaku hi ‘kongoma eku kuleni.’ Ku kula ka Vukreste a hi ku endla xiviko xa ntirho ntsena. Ku katsa ku endla nhluvuko eka dyondzo ya munhu hi yexe ni ku ya eminhlanganweni nkarhi na nkarhi swin’we ni ku hlanganyela hi ku hiseka evutirhelini bya nsimu. Ku pfuna van’wana ku kuma vutivi bya ntiyiso leswaku va ponisiwa ka katseka na kona. Hi fanele hi tirhela ku lota vutshila bya hina hi ‘ku kombisana hi Matsalwa.’ (Mint. 17:2) Leswaku hi kula hi tiya swi lava nkarhi, naswona swi titshege ngopfu hi ku tinyikela ka hina eka Xikwembu ni ku kuma ka hina ntokoto lowu tirhaka ensin’wini. Hambi leswi hi swi kotaka ku lawula vuenti bya ku tinyikela ka hina eka Xikwembu, i vutlharhi ku pfumelela vamakwerhu van’wana va xinuna ni va xisati lava kuleke leswaku va hi pfuna hi kuma ntokoto lowu tirhaka. Hi nga dyondza eka mintokoto ya vona, ngopfu-ngopfu evutirhelini bya nsimu. A hi fanelanga hi tidyondzela xin’wana ni xin’wana hi ku ringetela.

⁹ Mpfuno Eka Lava Kalaka Ntokoto: Ntila wa ku pfuna wu boxiwe eku sunguleni ka vandlha ra Vukreste. Yesu u letele vadyondzisiwa vakwe. (Mar. 3:14; Lk. 9:1; 10:1) Na vona va dyondzise van’wana. Timotiya u kume xikhutazo ni mpfuno wo hlawuleka eka muapostola Pawulo, naswona mudyondzisiwa Apolosi u endle nhluvuko hi mpfuno wa Akwila na Prisila lava a va ri ni ntokoto lowukulu. (Mint. 18:24-27; 1 Kor. 4:17) Swirho leswi vupfeke swa vandlha ra Vukreste swi landzela swikombiso sweswo namuntlha, swi dyondzisa ni ku khutaza lava nga riki na ntokoto lowukulu, ngopfu-ngopfu lavantshwa ni lavatsongo. Hi laha Varhoma 15:1, 2 yi vulaka ha kona, “Hina lava nga ni matimba, hi fanele ku rhwala ku hluleka ka lava tsaneke.”

¹⁰ Vatswari va ni vutihlamuleri byo teka goza lerinene ro pfuna vana va vona va endla nhluvuko emoyeni. Leswi swi katsa dyondzo ya ndyangu, ku dyondzisa vana ndlela yo tidyondzela hi voxe, ku va kona eminhlanganweni nkarhi na nkarhi ni ku va ni xiphemu, ni ntokoto wo tirhisa leswi va swi dyondzaka. (Ef. 6:4; 1 Tim. 5:8) Vafambisi va Dyondzo ya Buku ya Vandlha, hi laha ku hlawulekeke, va fanele va rhangela eku endleni ka malunghiselelo yo pfuna hinkwavo eka mintlawa ya vona ya dyondzo ya buku ni ya ntirho wa nsimu leswaku va endla nhluvuko hi ndlela ya moya. Mulanguteri wa ntirho ni vakulu van’wana kun’we ni malandza ya vutirheli ni swirho swin’wana swa vandlha va nga pfuna na vona.

¹¹ Nyikela Mpfuno Lowu Lavekaka: Xilaveko xi nga ha va xa ku pfuna hi xivumbeko xin’wana xa mintirho ya Vukreste, tanihi dyondzo ya munhu hi yexe. Munhu a nga ha lava swiringanyeto swo endla xiyimiso lexinene xa dyondzo. Un’wana a nga ha lava ku pfuniwa ku lunghiselela tinhlamulo kumbe swiavelo. Van’wana kumbexana va nga lava ku dyondza ndlela yo lavisisa timhaka ta Bibele.

¹² Vanhu vo tala lavantshwa va lava ku pfuniwa evutirhelini bya nsimu. Muhuweleri a nga ha lava ku humelela entirhweni wa yindlu ni yindlu, ku endla maendzo yo vuyela kumbe ku sungula ni ku fambisa dyondzo ya Bibele. Minongonoko yi nga ri yingani yo titoloveta hi ku tirhisa swingheniso leswi ringanyetiweke ni marungula lama humaka ebukwini leyi nge Reasoning kumbe eka Vutirheli Bya Hina Bya Mfumo swi nga ha pfuna. Minkarhi yin’wana, swiringanyeto swo endla xiyimiso lexinene xa ntirho wa nsimu ni mpfuno wa ku swi namarhela swi nga ha humelela. Ku endla malunghiselelo lama tiyeke yo tirha ni munhu la lavaka mpfuno swi ta n’wi pfuna leswaku a tivekela tipakani to karhi to endla nhluvuko eka tona.

¹³ Rito ra Xikwembu ri hi khutaza leswaku hi endla nhluvuko wa hina wa moya wu vonaka eka van’wana. Lexi i xitsundzuxo lexi Pawulo a xi tsaleleke mutirhi-kulobye Timotiya. (1 Tim. 4:15) Hi ku pfumelelana ni xikhutazo xexo, muapostola u kandziyise xilaveko xa ku tiletela onge hi loko hi ya emphikizanweni wo tsutsuma kumbe leswaku hi lwa nyimpi ya moya hi laha ku humelelaka. (1 Kor. 9:24-27; 2 Kor. 10:5, 6) Hi fanele hi hatlisa ku tirhisa hinkwaswo leswi hi swi dyondzaka mayelana ni ku rhandza ka Xikwembu leswaku vahlaleri va hi vona hi ri swikombiso leswinene swa ripfumelo ra ntiyiso ra Vukreste. Hi ku fanana, hi fanele hi antswisa vutshila bya hina bya ku dyondzisa van’wana leswaku va va vadyondzisiwa lava tinyiketeleke va Yesu Kreste.—Yak. 1:22-25; 1 Tim. 4:12-16.

¹⁴ Nhluvuko Wu Katsa Ku Tiyisela Miringo: Hambi ku ri Yesu Kreste u dyondze tidyondzo ta nkoka eka swilo leswi a xanisekeke ha swona. (Hev. 5:8) Na hina hi nga endla tano. Entiyisweni, nhluvuko wa moya wa kula loko hi va ni langutelo lerinene leri hlamuseriwaka eka Yakobo 1:2, 3: “Yi tekeni yi ri mhaka ya ku tsakisa swinene, vamakwerhu, loko mi hlangana ni miringo ya tinxaka-xaka, hikuva ma swi tiva leswaku loko ku pfumela ka n’wina ku tiya eku ringiweni, swi humesa ku tiyisela.” Xisweswo, hambi loko hi boheka ku langutana ni ntlhontlho wa vuvabyi byo chavisa, swiphiqo swa ikhonomi, ku hanya endyangwini lowu avaneke, ku kanetiwa ensin’wini, kumbe nhlayo yihi ni yihi ya swiyimo swo biha, hi ni xitiyisekiso xa Yehovha, leswaku hi ku pfuniwa hi yena hi nga hlula ivi hi hambeta hi endla nhluvuko eku n’wi gandzeleni ka hina. (1 Kor. 10:13; 2 Kor. 12:9; 1 Pet. 5:8-11) Ku humelela ku va kona loko hi yima hi tiyile ehansi ka swiyimo hinkwaswo, ‘hi vulavula marito yo kwetsima ya Xikwembu ni ku tirha hi tshembele eka matimba lawa Xikwembu xi hi nyikaka wona, leswaku eka swilo hinkwaswo ku dzunisiwa Xikwembu ha Yesu Kreste.’—1 Pet. 4:11.

¹⁵ Amukela Mpfuno Wo Endla Nhluvuko Lowu Engetelekeke: Loko u ri loyi a lavaka ku pfuniwa leswaku u endla nhluvuko lowu engetelekeke wa moya, tiyimisele ku amukela mpfuno wa xirho xa vandlha lexi nga ni ntokoto lowukulu. Hambi loko ku nga si ta munhu a kombela ku ku pfuna, a wu fanelanga u pfumelela tingana ti ku sivela ku kuma nkarhi wa ku pfuniwa. Kombela ku pfuniwa. Titwe u ntshunxekile ku lava ku pfuniwa hi un’wana ni un’wana la nga ni ntokoto evandlheni. Kumbexana u nga ha kombela mufambisi wa wena wa Dyondzo ya Buku ya Vandlha, mulanguteri wa ntirho kumbe wihi na wihi wa vakulu lavan’wana leswaku va ku pfuna.—Ringanisa Genesa 32:26; Matewu 7:7, 8.

¹⁶ Hakunene, i lunghelo leri tsakisaka ku va un’wana wa “ntshungu lowukulu” wa matiko hinkwawo lowu yaka emahlweni wu andza, lowu khitikanelaka entshaveni ya Yehovha ya vugandzeri lebyi tengeke. (Nhlav. 7:9) Nakambe i lunghelo ku rhamba van’wana leswaku va tlhandluka na hina. Hi ku tlangela loku humaka embilwini, onge hi nga hambeta hi teka goza lerinene ro endla nhluvuko lowu engetelekeke, hi aka vumoya bya hina ni ku endla leswi hi nga swi kotaka leswaku hi pfuna van’wana va endla nhluvuko kun’we na hina entirhweni wa Yehovha.