Dyondzo 17

Ndlela Yo Tsala Mapapila

1, 2. Mapapila ma nga hetisisa swikongomelo swihi leswinene?

¹ Ebandlheni ro sungula ra Vukriste mapapila a ma tirhisiwa kahle hi tindlela to tala. A ma ri ndlela yo tihlanganisa ni mabandlha nkarhi na nkarhi. (Vafil. 1:1) A ma tirhisiwa ku khutaza lava va byarheke vutihlamuleri lebyi hlawulekeke. (2 Tim. 1:1, 2, 6) Mapapila a ma aka lava a va ha ku va vapfumeri kumbe lava a va langutane ni ku nonon’hwa. (1 Vates. 1:1-7; 3:1-7) Naswona Vakriste vo sungula a va tirhisa mapapila leswaku va tihlanganisa nkarhi na nkarhi ni lava va nga va swin’we na vona entirhweni wa Hosi.—3 Yoh. 1, 14.

² Vatirheli va namuntlha va swa le tilweni na vona va ni swivangelo swo tala swa ku tsala mapapila, naswona mapapila lawa ma nga hetisisa swilo swo tala leswinene. Mapapila ya mabindzu ma nga laveka minkarhi yin’wana. Swi nga ha boha leswaku ku tsaleriwa vatirheli va tiko malunghana ni ntirho wa Mfumo. Vaaki lava tshamaka emiakweni leyi hirhiweke leyi hlawulekeke, kun’we ni lava va tshamaka etindhawini leti nga toxe, hakanyingi ku nga tihlanganisiwa na vona hi ‘mahungu lamanene’ hi ku tirhisa mapapila ntsena. Vahuweleri van’wana ebandlheni ra ka n’wina va nga ha va va rhurhele ekule, kumbe maxaka ma nga ha va ma tshama ekule swinene, kutani u nga ha tsakela ku kombisa nkhathalelo wa wena wa rirhandzu eka vona hi ku tsala papila. Nakambe, ku ni minkarhi leyi u rhumelaka papila leswaku u phofula minkhenso kumbe ku chavelela.

3. Leswaku ma fanelekela vutirheli bya hina, mapapila ya hina ma fanele ku va ni timfanelo tihi?

³ Mapapila ya hina ma fanele ku fanelekela vutirheli bya hina lebyi hi nyikiweke hi Xikwembu. Ma fanele ku va ya xinghana, ya vuxiyaxiya ni ku kombisa ku ehleketelela ka rirhandzu ka lava va ma hlayaka. Ma fanele ku va lama tsakisaka ni lama akaka, ematshan’wini yo heta matimba ni ku phofula moya wa ku vilela, lowu tsanisaka ripfumelo ni ku vangela muhlayi gome. “Rirhandzu ra aka,” ku vula Rito ra Xikwembu. (1 Vakor. 8:1) Nakambe, xiya xivumbeko ni ntlhaveko lowu tolovelekeke lowu papila ri nga ta wu nyikela. Leswaku ri languteka, swa pfuna ku va ni majini leyi lulameke ematlhelo ni le hansi ka papila. Ku chukucha a ku nyiki ntlhaveko lowunene. Nakambe, mapeletelo ni mavekelo ya swiga lamanene swi lava ku endliwa hi vukheta. Hambi swi ri tano, loko u nga ri na vutshila eka leswi, swi nga ku siveli ku tsalela vanghana. Rirhandzu, ku tsakela ni ku hiseka hakanyingi i swa nkoka ku tlula ku endla swihoxo swa mapeletelo ni mavekelo ya swiga. Kambe mapeletelo ya nga antswisiwa hi ku tirhisa dikixinari, naswona mavekelo ya swiga ma nga antswa loko hi xiya ndlela leyi van’wana va hlanganisaka marito ni swiga ha yona. Hi ri karhi hi tsundzuka tinhla leti, se a hi languteni swinene tinxaka to hambana-hambana ta mapapila lama hi nga ha vaka ni nkarhi wo ma tsala malunghana ni vutirheli bya hina.

4. Andlala xivumbeko lexi faneleke xa papila ra bindzu.

⁴ Mapapila ya mabindzu. Loko u tsala papila ra bindzu, swa fanela ku tsala vito ra wena, adirese ni siku ehenhla ka papila. Leswi swi vuriwa nhloko-mhaka naswona swi humelela etlhelweni ra xinene ra papila. (Eka mapapila lama yaka eka Sosayiti ya Watch Tower, nhloko-mhaka yi fanele ku tlhela yi va ni vito ra bandlha ra murhumeli, loko ri fambelana ni timhaka ta bandlha.) “Adirese ya le ndzeni” yi le tlhelweni ra ximatsi ra phepha kambe yi ri ehansinyana ka nhloko-mhaka. Laha u tsala vito ni adirese ya nhlangano kumbe munhu loyi u n’wi tsalelaka. Lexi landzelaka i xiloso. Loko u tsalela minhlangano kumbe vanhu vo karhi lava nga fambelaniki na Timbhoni ta Yehova, swiloso swo tanihi leswi nge “Eka Nkulukumba,” “Vachaviseki,” “Nkul.——La Rhandzekaka” ni leswi fanaka na sweswo swi fanerile. Loko u tsalela Sosayiti ni van’wana lava nga Timbhoni ta Yehova, swi tolovelekile ku tirhisa swiloso swo tanihi “Eka Vamakwerhu” kumbe “Makwerhu——La Rhandzekaka.” Eku heteleleni ku na xiga xo gimeta xo tanihi lexi nge “La tshembekaka” kumbe “La titsongahataka.” Loko u tsalela lava va nga enhlengeletanweni ya Yehova, swiga swo gimeta swo tanihi lexi nge “Makwenu” kumbe “Mutirhi-kuloni” swi fanerile. Xona xi sungula exikarhi ka phepha naswona xi landzeriwa hi hefemulo. Ehansinyana, sayina vito ra wena. Loko papila ri tsaleriwa Sosayiti ku yimela bandlha kumbe xifundza, mutsari a nga ha tlhela a kombisa ntirho wa yena, tanihi “Mulanguteri la Ungamelaka” kumbe “Mulanguteri wa Xifundza,” ehansinyana ka laha a sayineke kona.

5, 6. I yini lexi fanelaka ku rhanga xi nyikiwa nyingiso epapileni, naswona i yini lexi hakanyingi xi pfunaka ku nyikela nhlamulo leyinene?

⁵ Eku sunguleni ka papila ra wena, hlamusela xikongomelo xa rona. Kutani loyi a ri amukeleke hi ku hatlisa u ta swi tiva leswaku ha yini u tsala. Loko papila ra kona ri landzela papila rin’wana leri hundzeke, swi ta va swinene ku boxa papila rero leri hundzeke ni nhloko-mhaka leyi kongomeke leyi a ri ri malunghana na yona. Naswona loko mapapila ma tsalelaniwa ni nhlengeletano leyikulu leyi nga ni tindzawulo to tala, nakambe swa pfuna ku kombisa mimfungho yihi ni yihi leyi kombisaka leyi humelelaka eka papila ro hetelela leri u ri amukeleke ri huma enhlengeletanweni ya kona. Loko swi ta eka miri wa papila, u ta kuma leswaku vuyelo lebyinene byi va kona hi ku tirhisa ndzimana leyi hambaneke eka mhaka kumbe nxaxamelo wihi na wihi wa mianakanyo lowu kongomeke. Leswi swi pfuna ku endla leswaku tinhla to hambana-hambana epapileni ra wena ti vonaka hi laha ku hlawulekeke naswona hakanyingi swi endla leswaku ku va ni ntirho lowunene. Loko xiyenge xin’wana xa papila xi ri xa bindzu naswona lexin’wana xi ri xa xinghana, swa antswa ku yisa nyingiso eka timhaka ta bindzu ku sungula.

⁶ Ku komisa mhaka hi minkarhi hinkwayo i swa nkoka eku tsaleni ka papila, kambe rungula leri u lavaka ku ri hundzisa ri fanele ku twisiseka ni ku hetiseka. Kambe loko marito lama nga fanelangiki kumbe mianakanyo yo phindha-phindha swi tshikiwa, papila ra wena ri ta va leri humelelaka swinene. Swi pfuna ku aneka xikongomelo xa papila ra wena erivaleni loko u tshika mhaka leyi nga khumbiki nhloko-mhaka ya wena. Nakambe, ku phofula loku tshembekaka ka ku tlangela matshalatshala ya van’wana hakanyingi ka fanela. Hambi ku ri eka papila ra bindzu leri hlamuselaka xiphiqo xo karhi hi vuxokoxoko, nhlamulo hakanyingi ya antswa loko u tirhisa xiga xo karhi xo tanihi lexi nge, “Ndzi swi tlangela swinene leswi mi ndzi endlelaka swona (kumbe leswi mi nga kotaka ku ndzi endlela swona) emhakeni leyi.”

7-9. Ku nga vuriwa yini eka papila leri kunguhateriweke ku nyikela vumbhoni?

⁷ Ku nyikela vumbhoni. Ku tsala papila nakambe ku tikombe ku ri ka nkoka eku chumayeleni ka rungula ra Mfumo. Etindhawini tin’wana ku na miako leyikulu leyi hirhiweke kumbe tihotela to tshama eka tona leti ti nga tirhiwiki hi ku olova, kambe hi nga tsalela lava tshamaka eka tona mapapila. Nakambe, vanhu van’wana hi ku phindha-phindha a va kumeki ekaya loko ku endliwa ntirho wa yindlu na yindlu, kambe poso ya vona va yi kuma. Naswona eka muhuweleri loyi a nga humiki ekaya ka yena, ku tsalela vanhu lava mapapila ku nga va ndlela yi ri yoxe leyi a nga na yona ya ku avelana rungula ra Mfumo ni van’wana.

⁸ Loko u tsala papila leswaku u nyikela vumbhoni malunghana ni Mfumo wa Xikwembu, i swinene ku titivisa ku sungula. U nga ha tlhela u lava ku vula leswaku ha yini u tsala kunene ematshan’wini yo endla riendzo ra munhu hi xiyexe. Ku tiyimisela ka wena ku ta khumba muamukeri. Kutani andlala leswi a wu lava ku n’wi byela swona hi wexe loko a wu lo swi kota ku endza. A swi nonon’hwi ku swi endla loko u tirhisa misinya ya milawu leyi a wu ri karhi u yi dyondza exikolweni xa vutirheli. U nga tirhisa mhaka ya Matsalwa leyi humaka eka kopi ya Vutirheli Bya Hina Bya Mfumo bya sweswinyana kumbe u veka hi marito ya wena xiyenge lexi humaka eka nkandziyiso wa Xihondzo xo Rindza kumbe Awake! ya sweswinyana kumbe buku leyi nge U Nga Hanya Hi Masiku aParadeyisini eMisaveni. U nga ha tlhela u nghenisa ni xiphephana, magazini kumbe xibukwana, kutani u khutaza munhu wa kona leswaku a xi hlaya. Hlamusela leswaku ha yini rungula leri ri ri ra nkoka swinene. Hi laha u endlaka ha kona entirhweni wa yindlu na yindlu, u nga ha ringanyeta leswaku a languta matsalwa eBibeleni ya yena n’wini. Kutani ke, hi mianakanyo ya ku hlakulela ka wena ku tsakela loku ku nga ha vaka ku pfuxiwile, n’wi byele leswaku a nga tihlanganisa njhani na wena kutani u n’wi khutaza ku endla tano. Nyikela vito ni adirese ya wena kahle leswaku loko a navela ku ku nkhensa kumbe ku endla xikhokhelo xa Xihondzo xo Rindza kumbe Awake! a ta swi tiva leswaku u fanele ku tsalela kwihi.

⁹ Ehandle ka vhilopo, nkarhi na nkarhi kombisa adirese ya wena n’wini leyi yi nga vuyiseriwaka eka yona. Kambisisa leswaku u ta tiyiseka loko u tirhise mali leyi ringaneke ya xitempe, ngopfu-ngopfu loko u nghenise ni buku. Loko mali ya xitempe yi nga ringananga, n’wini wa muti a nga ha chajiwa ntsengo lowu faneleke, naswona leswi swi nga kavanyeta matshalatshala ya wena yo nyikela vumbhoni lebyinene.

10, 11. Ha yini mapapila lama yaka eka swirho swa ndyangu ni vanghana ma pfuna, naswona ma nga katsa na yini?

¹⁰ Lama yaka eka swirho swa ndyangu ni vanghana lavakulu. Evuton’wini bya siku na siku hi nyikela nkarhi ni nyingiso wa hina eka mintirho leyi hi yi xiyaka yi ri ya nkoka swinene. Kambe xana hi teka nkarhi leswaku hi tihlanganisa ni maxaka lama rhandzekaka ni vanghana lavakulu hi poso nkarhi na nkarhi? Vatswari va ma tlangela swinene mapapila lama humaka eka vana va vona, naswona vana va vuyeriwa eka mapapila lama tsariweke hi vatswari va vona. Ku “vulavurisana” hi ku tirhisa mapapila ku endla xiphemu lexikulu eku hlanganiseni ka swirho swa ndyangu, hambi loko swona hi swoxe swi ri ekule ni le kule swinene. Vanghana ni maxaka ya wena a va ta akiwa hakunene hi ku kuma vumbhoni byo karhi bya vuhlayiseki bya wena, papila leri tsariweke kumbe ku thayipiwa hi wena leri tsakisaka, leri nga ni mahungu. Xana wa swi kanakana ke? Kutani ehleketa hi ntokoto wa wena n’wini. A hi swilo swingani leswi amukeriwaka hi ntsako tanihi papila lerinene. Hakanyingi ku na ku nyanyuka lokukulu ehenhleni ka rona. Swa ku tsakisa leswi munhu un’wana a ku tsundzukeke, a swi tano ke? Tsundzuka, mfanelo leyi hlawulekeke ya Vakriste hi leswaku va rhandzana; naswona ndlela yin’wana yo kombisa leswi i ku tihlanganisa nkarhi na nkarhi hambi loko va ri ekule ni le kule swinene.

¹¹ Kambe xana u ta tsala ha yini ke? Xana u na mintokoto leyi tsakisaka? Leyi yi ku tsakisaka hakanyingi yi ta tsakeriwa hi van’wana. Ku nga ha va ntokoto wa munhu hi xiyexe lowu u veke na wona evutirhelini, kumbe ntokoto lowu u wu tweke eka van’wana. (Kambe a hi vutlhari ku hundzisa timhaka leti kanakanisaka.) Minkarhi yin’wana u nga ha lava ku pfuxeta mintokoto leyi tsakisaka leyi u hlanganyeleke eka yona ni loyi u n’wi tsalelaka. Leswi swi hlanganisa vanghana kun’we. U nga tlhela u tsala hi swilo leswintshwa leswi u swi dyondzeke. Naswona ku vuriwa yini hi swilo leswi wena hi wexe a wu ri karhi u swi endla nkarhinyana lowu hundzeke, kumbexana tindhawu leti u ti endzeleke? Timhaka to tano nkarhi na nkarhi hi leti tsakisaka eka vanghana. Xana munhu loyi u n’wi tsalelaka wa vabya? Nyikela marito yo karhi ya xikhutazo. Kombisa ku khumbeka kutani u phofula ntshembo wa leswaku ú ta hlakarhela ku nga ri kungani. U nga ha tlhela u boxa nchumu wo karhi lowu tsakisaka hi laha ku hlawulekeke lowu humeleleke enhlanganweni ebandlheni, nchumu lowu a wu khutaza ni lowu wu nga ta pfuna ku nyika loyi a vabyaka ntshembo. Naswona malunghana ni swilo leswi swi fanelaka ku tsariwa, loko u ri ni ku nonon’hweriwa hi ku tsundzuka vuxokoxoko bya leswi humeleleke sweswinyana kumbe leswi a wu anakanya ha swona, ha yini u nga tsali swilo ephepheni ra xitsundzuxo loko swi ta emianakanyweni? Kutani loko u tshama ehansi leswaku u tsala, rungula ri ta kumeka hi ku olova.

12, 13. Mapapila ya hina ma nga khutaza van’wana endleleni ya ntiyiso hi ndlela yihi?

¹² Nakambe, malunghana ni leswi swi fanelaka ku tsariwa, xana u nga ehleketa hi nchumu wun’wana wa ntikelo swinene ku tlula ku khutaza loyi a amukelaka papila hi ndlela ya ntiyiso? Kumbexana un’wana loyi a wu dyondza na yena Bibele u rhurhele edorobeni rin’wana. Loko u tsala papila u phofula ku khathalela ka wena n’wini ni ku nyika xikhutazo, xana leswi a swi nga pfuni ku endla leswaku ku tsakela ka yena ntiyiso ku tshama ku ri loku hanyaka? Nakambe, ehleketa ndlela leyi vatswari va titwaka ha yona loko n’wana wa xinuna kumbe wa xisati loyi a nga ekule ni le kaya a tsala, a kombisa ku tlangela ku tshembeka ka vatswari eka Yehova hi malembe layo tala ni ku kurisa vana leswaku va tlangela tindlela ta Yehova. Nakambe, ku vuriwa yini hi lava va rhurheleke etindhawini leti xilaveko xa Timbhoni xi nga xikulu swinene eka tona, kumbe lava va amukeleke swiavelo entirhweni wa vurhumiwa kumbe emakaya ya Bethele? I xikhutazo xonghasi eka vona ku amukela mapapila lama va bumabumelaka hikwalaho ka ntirho wa vona lowu tshembekaka eka Yehova! (Vaav. 11:40) Naswona va ta swi tlangela loko u katsa ni timhaka leti hlamuselaka leswi humelelaka ebandlheni leri a va ri eka rona eka mapapila ya wena.

¹³ Engetela ntikelo wa mapapila ya wena hi ku ka u nga yisi nyingiso hinkwawo eka wena. Kombisa nkhathalelo eka loyi u n’wi tsalelaka hi ku katsa ni swivutiso ehenhleni ka vuhlayiseki bya yena, makungu ya yena, laha timhaka leti a tsaleke ha tona eku sunguleni ti heleleke kona, vanghana va n’wina havambirhi ni nhluvuko wa lava a dyondzaka Bibele na vona. Nkhathalelo wo tano eka munhu un’wana wu na vuyelo lebyinene, lebyi akaka, naswona wu vanga ku byelana mahungu man’wana.

14, 15. Ku nga endliwa yini leswaku makumu ya papila ra wena ma va ya nkoka?

¹⁴ Loko u heta miri wa papila ra wena, xana u ta ri gimeta hi ndlela yihi? Makumu lama nga ni ntikelo ma laveka hakunene. Loko ho vula ntsena ku, “Sweswi ndzi fanele ku gimeta tanihi leswi ndzi nga ha riki na xivandla,” a swi nyikeli mianakanyo leyinene hi mutsari. Ha yini u nga ehleketi hi swin’wana leswi nga ni nkoka swinene? Muapostola Pawulo u tirhise tindlela to hambana-hambana leti tsakisaka leswaku a gimeta mapapila ya yena. Hi xikombiso: “Tintswalo [leti nga fanelangiki, NW] ta Hosi ya hina Yesu Kriste a ti ve ni mimoya ya n’wina vamakwerhu.” (Vagal. 6:18; 2 Vakor. 13:13) Muapostola Yohane u gimete rin’wana ra mapapila ya yena hi ndlela leyi: “Ku rhula a ku ve na wena. Vanakuloni hinkwavo va ku rungula. Rungula vanakulorhi hinkwavo; a hi siyanga munhu.” (3 Yoh. 15) Tirhisa makumu hi ku fambisana ni mhaka hinkwayo ya papila ra wena naswona ma byi fanela vuxaka bya wena ni munhu wa kona.

¹⁵ Ku tsala papila a swi nonon’hwi loko u xiya swilo leswi humelelaka etlhelo ka wena siku na siku. Ku endleka swo tala leswi hetisisaka vuprofeta bya Bibele. Fambiselo leri ra khale ra swilo, ku katsa ni xiyenge xa rona xa vukhongeri, ri nyanya ku biha hi xihatla. Kambe ntirho wa Yehova wu humelela hi laha ku hlamarisaka hikwalaho ka nkateko wa yena ehenhla ka wona. Vamakwenu va tsaka loko va twa mahungu ya ku ndlandlamuka ka swa le tilweni endhawini ya ka n’wina. Ku nga khathariseki leswaku u mani, ku na vanhu van’wana lava a va ta tsaka ku kuma marito ya wena ya nkhathalelo, ya rirhandzu, ya munhu hi xiyexe, hi papila ra wena. Naswona ku kombisa nkhathalelo lowu eka van’wana entiyisweni i xiphemu xa vutirheli bya hina, hikuva rirhandzu ra hina ra vumakwerhu a ri fanelanga ku hela hi mhaka ya leswi hi hambaneke hi mpfhuka. Hakunene, ri nga kurisiwa hi ku tsala papila.