Xiviko Xa Vahuweleri Va Mfumo

“Ku Hiseka eMoyeni” eMexico

“TIKO hinkwaro ri vonaka ri hiseka no chivirika hi ntirho.” Ku tsale hofisi ya rhavi ra Sosayiti ya Watch Tower eMexico, naswona mawaku ntiyiso lowu marito lawa ma nga wona! Ku gingiritekela ntirho etikweni leri ku kombisiwe hi leswi ku fikela hi August, ku veke ni tinhlohlorhi ta 70 hi ku landzelelana n’hweti yin’wana ni yin’wana, ku fikeleriwa nhlohlorhi ya vahuweleri va 277 436. Ku engetela kwalaho, ku tlula 400 000 wa tidyondzo ta Bibele ti vikiwile, naswona nhlayo leyi veke kona eka Xitsundzuxo xa n’waxemu yi fikelele 1 046 291. Mawaku xisekelo lexinene swonghasi xa ku andza ka nkarhi lowu taka!

Mhaka yo tsakisa ya 1989 a ku ri ku cinca eka xiyimo xa Timbhoni ta Yehova eMexico. Hikokwalaho, Bibele a yi ta tirhisiwa ro sungula entirhweni wo chumayela hi yindlu na yindlu, naswona minhlangano a yi ta pfuriwa hi xikhongelo. Leswi swi ve ni vuyelo bya xihatla. Hi tin’hweti timbirhi, nhlayo ya vahuweleri yi engeteleke hi lava tlulaka 17 000.

Ntsako wa vamakwerhu eka ku cinca loku wu vonake eka marito ya vona. Un’wana u tsale a ku: “Loko papila ri hlayiwa ebandlheni, ri kavanyetiwe kambirhi hi ku phokotela ka ntsako. A swi nyanyula hakunene!” Un’wana u te: “A hi nga koti ku yi khoma mihloti ya ntsako. Mimbuyelo yi kombisiwe hi ku antswisa ku fika hi nkarhi. Un’wana ni un’wana u lava ku va kona eka xikhongelo xo pfula ntirho.”

Mbhoni yin’wana yi te: “Ensin’wini ya hina, wansati loyi a hisekelaka nongonoko wa dyondzo ya Bibele ya Kereke ya Khatoliki u te: ‘Leswi eku sunguleni hi marito ni timagazini ta vona, [Timbhoni] ti hi siyeke hi ri hava nomu, sweswi leswi va pfulaka Bibele emitini hi lahlekile hakunene!’”

Timbhoni ta Yehova eMexico nakambe ti kandziyise ku nyikela vumbhoni bya xitshuketa hi Bibele. Makwerhu un’wana wa xisati u kongome wansati loyi a n’wi vutiseke leswi a swi anakanyeke hi tlhelo ro xixa nyimba. Mbhoni yi hlamule yi ku: “Leswi ndzi swi anakanyaka a hi swa nkoka ku fana ni leswi Bibele yi swi vulaka.” Endzhaku ko hlaya matsalwa ma nga ri mangani, makwerhu u anakanyisisile a ku: “Eka Muvumbi vutomi i bya nkoka ngopfu, hambi ku ri vutomi bya lava va nga si velekiwaka.”

Kutani wansati u vule leswaku a a langutele n’wana wa yena wo sungula, kambe minkambisiso ya le tliliniki yi ringanyete leswaku n’wana yoloye u ta va xilema. Dokodela wa yena a a lave leswaku a xixa nyimba naswona nuna wa yena u pfumerile, kambe wansati yena a a nga tiyiseki. Muhuweleri u anakanyisise na yena swinene hi Bibele, a n’wi nyika vito ra yena kutani va hambana.

Endzhaku ka ntlhanu wa malembe eka ntsombano wa muganga, mpatswa ni n’wana wa mune wa malembe hi vukhale va lave ku vona makwerhu wa xisati ni nuna wa yena. A ku ri wansati yoloye! Xana ku humelele yini? Endzhaku ko vulavurisana ni Mbhoni, wansati u anakanye ku tivelekela n’wana wa yena. Dokodela wa yena u ale ku n’wi vona nakambe naswona hambi ku ri nuna wa yena u n’wi tshembise ku n’wi tshika loko n’wana o tswariwa a ri xigono. Loko nkarhi wa yena wo veleka wu fikile, u lo tiyela ntsena ku ya kuma mpfuno eka dokodela loyi a nga ta rhanga a n’wi kuma.

Xikan’we-kan’we endzhaku ka loko n’wana a velekiwile, dokodela u te: “Ndzi tsaka na wena, manana! U ni n’wana wo rhandzeka wa xinhwanyetana.” Hi ku ka a nga swi kholwi, u n’wi kombele ku kambela n’wana hi vukheta. Kutani u n’wi byele mhaka ya yena. Dokodela u vule ku: “Leswi i singita.” Wansati a a tsakile hikuva u ve ni xivindzi xo xixima langutelo ra Yehova ra ku kwetsima ka vutomi, kutani a thya n’wana wa yena wo saseka, la hanyeke kahle vito ra makwerhu loyi wa xisati. Endzhaku ka loko a tiyerilenyana, u lave Timbhoni kutani a sungula ku dyondza Bibele na tona. Ku nga si hela lembe, yena ni nuna wa yena va khuvuriwile.

Muapostola Pawulo u tsundzuxile a ku: “Kambe mi va ni ku hiseka emoyeni, mi tirhela [Yehova].” (Varhoma 12:11) Timbhoni ta Yehova eMexico, tanihi Vakriste va ntiyiso emisaveni hinkwayo, ti amukela xikhutazo lexi hi timbilu ta tona hinkwato. Hi yona mhaka leyi tiko leri hinkwaro ri hisekaka ni ku gingiriteka entirhweni wa moya. Vona ndlela leyi Yehova a katekisaka vanhu va yena vo tshembeka ha yona!