Vatswari—Fikelelani Mbilu Ya N’wana Wa N’wina Ku Sukela eVuhlangini
“Mi va kurisa [vana va n’wina], hi ku laya ni ku va dyondzisa ta [Yehova].”—VAEFESA 6:4.
1. I yini lexi humeleleke ngopfu-ngopfu hi nkarhi lowu ringaka evuton’wini bya Yesu?
YESU KRISTE ni vadyondzisiwa va yena a va ri eriendzweni ra vona ro ya eYerusalema. Ku nga ri khale emahlweni ka kwalaho, hi makhamba mambirhi lama hambaneke, Yesu u byele vadyondzisiwa va yena leswaku u ta xanisiwa swinene naswona u ta dlayeriwa emutini wolowo. (Marka 8:31; 9:31) Enkarhini lowu wu ringaka ngopfu eka Yesu, mhaka ya Bibele yi ri: “Kutani va tisa vana lavantsongo eka Yesu leswaku a va khumba.”—Luka 18:15.
2. (a) Ha yini vadyondzisiwa va nga ha vaka va ringete ku tlherisa vanhu? (b) Xana Yesu u xi tamele njhani xiyimo lexi?
2 I nhlamulo yihi leyi a yi ri kona eka leswi? Ina, vadyondzisiwa va holovele vanhu ni ku ringeta ku va hlongola, handle ko kanakana hi ku pfumela leswaku a va endlela Yesu tintswalo hi ku n’wi sirhelela eka xihinga ni ntshikilelo leswi nga fanelangiki. Yesu a holovela vadyondzisiwa, a ku: “Tshikani vana va ta eka mina, mi nga tshuki mi va sivela . . . Kute loko a vukarhile vana, a va tlhandleka mavoko, a va katekisa.” (Marka 10:13-16) Ina, ku nga khathariseki hinkwaswo leswi swi faneleke swi ve emianakanyweni ni le mbilwini ya yena, Yesu u tinyike nkarhi wa vana.
I Dyondzo Yihi Eka Vatswari Ke?
3. I dyondzo yihi leyi vatswari va faneleke ku yi dyondza eka xiendlakalo lexi?
3 Dyondzo ya vatswari eka leswi ku fanele ku va leyi: Ku nga khathariseki mindzhwalo yihi na yihi yin’wana leyi mi nga na yona kumbe makhombo lama mi kongomanaka na wona, ku heta nkarhi ni vana va n’wina ku fanele ku va swo sungula. Nkarhi lowu hetiweke swin’we wu ta mi pfumelela ku byala nkoka wa swa moya lowu nga ta sirhelela timbilu ta vana va n’wina ivi wu va nghenisa endleleni leyinene. (Deuteronoma 6:4-9; Swivuriso 4:23-27) Yunika na Luwisa, manana ni kokwa wa xisati va Timotiya hi ku kongoma, va tinyike nkarhi wo n’wi nyika xiletelo lexi khumbeke mbilu yakwe leyintsongo ivi xi lulamisa vutomi bya yena leswaku a kula a va nandza la tinyiketeleke wa Xikwembu.—2 Timotiya 1:5; 3:15.
4. Xana vana va ni nkoka wo tanihi kwihi, naswona i ndlela yihi leyi vatswari va faneleke ku kombisa ha yona leswaku va va tlangela?
4 Vatswari va Vukriste va nge swi koti ku honisa vana lava Yehova Xikwembu a va nyikeke vona. Ina, vana i nyiko leyi vangamaka leyi humaka eka Yehova. (Psalma 127:3) Kutani hetani nkarhi na vona—fikelelani timbilu ta vona—tanihi laha manana na kokwa wa xisati wa Timotiya va vekeke xikombiso ha kona. A mi fanelanga ku heta nkarhi mi vulavula na vana va n’wina malunghana ni mahanyelo ya vona ni ku va laya ntsena kambe mi fanele ku tlhela mi dya swakudya na vona, mi hlaya na vona, mi tlanga na vona, mi va pfuna ku tilulamisela ku ya eku etleleni nivusiku. Nkarhi lowu hinkwawo lowu hetiweke ni vana va n’wina i wa risima.
5. Nyika xikombiso xa tatana un’wana loyi a kombiseke ku tlangela vutihlamuleri bya yena bya vutswari.
5 N’wamabindzu la dumeke wa Mujapani loyi a veke un’wana wa Timbhoni ta Yehova u xiye mhaka leyi. Ehansi ka nhloko-mhaka leyi nge, “Muyimeri La Tlakukeke wa JNR U Tshika Ntirho Leswaku A Va Ni Ndyangu,” Mainichi Daily News ya February 10, 1986, yi vikile yi ku: “Muyimeri la tlakukeke wa Japanese National Railways (JNR) u hlawule ku tshika ntirho ematshan’wini yo hambana ni ndyangu wa yena . . . ku vula Tamura, ‘Ntirho wa mulawuri-jenerala wu nga tekiwa hi un’wana na un’wana. Kambe ndzi tatana a ri swakwe wa vana va mina.’” Xana mi teka vutihlamuleri bya vutswari tanihi hi lebyi nga bya nkoka?
Mhaka Leyi Ha Yona Matshalatshala Lama Hlawulekeke Ma Lavekaka Sweswi
6. Ha yini swi nonon’hwa ngopfu ku wundla vana kahle namuntlha?
6 Kumbexana a ku si tshama ku va ni ku nonon’hwa konghasi ka ku wundla vana hi ndlela leyi Rito ra Xikwembu ri letelaka ha yona evurungurwini bya vanhu, “Hi ku va laya ni ku va dyondzisa ta [Yehova].” (Vaefesa 6:4) Xivangelo xa leswi i mhaka ya leswi hi hanyaka “emasikwini ya makumu,” naswona Sathana ni mademona yakwe va tisa nhlomulo lowukulu hikuva va hlundzukile, va swi tiva leswaku va saleriwe hi nkarhi wuntsongo. (2 Timotiya 3:1-5; Nhlavutelo 12:7-12) Xisweswo, matshalatshala ya vatswari yo wundla vana va vona hi ndlela yo chava Xikwembu ya karhi ya hlaseriwa hi “moya” wo fanekisela lowu Sathana a wu fumaka. “Moya” [“air”] wolowo, kumbe moya [spirit] wa vutianakanyi ni ku tiarisa, wu hangalake ku fana ni moya wa xiviri lowu hi wu hefemulaka.—Vaefesa 2:2.
7, 8. (a) Thelevhixini yi nga tisa yini ekaya, kambe hambi swi ri tano vatswari vo tala va endla yini? (b) Ha yini ku tirhisa thelevhixini tanihi xihungasi xa vana ku ri ku honisa loku vavisaka ka vutihlamuleri bya vutswari?
7 Ngopfu-ngopfu thelevhixini yi tisa “moya wa misava leyi” ekaya, “moya” lowu wu nga ni chefu. (1 Vakorinto 2:12) Entiyisweni leswi humelelaka eka thelevhixini hakanyingi swi susumetiwa hi xiphemu xa vunghwavava ni xa vusodoma lexi nga ni matimba xa xivandla xo tirivatisa. (Varhoma 1:24-32) Vana va n’wina ngopfu-ngopfu va wela hi ku olova eka mianakanyo ni thyaka ra vunghwavava leswi nga tsakisiki Xikwembu leswi kombisiwaka, hi laha swi nga tano ha kona eku thyakiseni ka xiviri ka moya. Kambe xana vatswari vo tala va endla yini ke?
8 Va tirhisa thelevhixini tanihi xihungasi xa n’wana. Va byela vana va vona va ku: “Hayi sweswi, murhandziwa. Ndzi khomekile. Famba u ya hlalela thelevhixini.” Muhaxi la dumeke wa thelevhixini u vula leswaku lama i “marito lama toloveleke ku vuriwa eka miti yo tala ya Maamerika.” Kutani hambi swi ri tano ku rhuma vana ku ya hlalela xin’wana ni xin’wana lexi nga vaka eka thelevhixini entiyisweni ku hetelela hi ku va pfumelela ku ntshunxeka. (Swivuriso 29:15) Swi katsa ku honisa loku vavisaka ka vutihlamuleri bya vutswari. Tanihi laha muhaxi loyi a xiyeke ha kona malunghana ni ku kurisa vana: “Mhaka leyi ya vutswari yi dya nkarhi ni vutihlamuleri lebyikulu naswona a yi fanelanga ku yimeleriwa, entiyisweni hayi eka sete ya thelevhixini.”
9. I nthyakiso wihi lowu vana ngopfu-ngopfu va lavaka nsirhelelo eka wona?
9 Hambi swi ri tano, hikwalaho ka ntshikilelo wa minkarhi leyi hi hanyaka eka yona, mi nga ha voyamela, hi laha vadyondzisiwa a va ri tano ha kona, eku fularheleni ka vana leswaku mi ta khathalela leswi swi nga ha ehleketeriwaka swi ri timhaka ta nkoka. Kambe i yini lexi nga xa nkoka ngopfu ku tlula vana va n’wina vini? Vutomi bya vona bya moya byi le khombyeni! Mi nga ha tsundzuka leswaku loko mhangu ya nyutliya ya Chernobyl yi humelerile eSoviet Union hi 1986, vana va susiwile eka ndhawu yoleyo leswaku va va sirheleta eka nthyakiso. Hi ku fanana, loko mi lava ku sirheleta rihanyo ra moya ra vana va n’wina, mi fanele ku va sirheleta eka “moya” lowu nga ni chefu wa misava, lowu hakanyingi wu humesiwaka eseteni ya thelevhixini.—Swivuriso 13:20.
10. Hi swihi swihlovo swin’wana swa “moya” wa chefu leswi nga khombo eka vana, naswona i xikombiso xihi xa Bibele lexi faniselaka leswi?
10 Hambi swi ri tano, ku ni swihlovo swin’wana swa “moya” wa chefu, leswi nga herisaka nkoka wa mahanyelo naswona swi nga nonon’hwisa mianakanyo ya lavantsongo. Xikwelekwele lexi nga fanelangiki ni vana va vaakelani na le xikolweni na xona xi nga phimphela mintiyiso ya Bibele leyi byariweke etimbilwini letinene. (1 Vakorinto 15:33) Dyondzo yi nga kumiwa eka Dina nhwanyana lontsongo wa Yakobo, loyi a a ‘tolovele ku huma a ya vona vanhwanyana va tiko’ naswona, hikwalaho, u onhiwile hi un’wana wa majaha. (Genesa 34:1, 2) Vana va fanele ku leteriwa kahle ni ku dyondzisiwa ku papalata swirimbana swa vunghwavava swa misava leswi thyakeke ngopfu namuntlha ku tlula leswi a swi ri xiswona nkarhi wolowo.
Ha Yini Va Dyondzisiwa Ku Sukela eVuhlangani?
11. (a) Ku dyondzisa ka vatswari ku fanele ku sungula rini? (b) I vuyelo byihi lebyinene lebyi nga languteriwaka?
11 Kambe xana ku dyondzisa ka vatswari ku fanele ku sungula rini? Bibele yi vula leswaku Timotiya u kume ku dyondzisiwa ka yena “ku sukela evuhlangini.” (2 Timotiya 3:15) Lexi tsakisaka, laha rito ra Xigriki breʹphos, hakanyingi ri tirhiseriwa n’wana la nga si velekiwaka, ku fana na le ka Luka 1:41, 44. Kwalaho ricece Yohane ri vuriwe leri a ri tshukuvanya endzeni ka khwiri ra mana wa rona. Kambe breʹphos ri tlhela ri tirhiseriwa swihlangi leswa ha ku velekiwaka swa Vaisrayele leswi vutomi bya swona a byi xungetiwa aEgipta enkarhini lowu Muxe a velekiweke ha wona. (Mintirho 7:19, 20) Emhakeni ya Timotiya, rito leri ri kombetela kahle eka ricece ntsena, kumbe n’wana, ku nga ri eka xihlangi lexintsongo. Timotiya u kume vuleteri lebyi humaka ematsalweni layo kwetsima ku sukela le ndzhaku laha mianakanyo ya yena a yi ta fikelela kona; ku sukela enkarhini lowu a a ha ri xihlangi. Naswona mawaku vuyelo byonghasi lebyinene lebyi a veke na byona! (Vafilipiya 2:19-22) Kambe, xana vana lava ha ku velekiwaka hakunene va nga pfuneka eka dyondzo yo tano ya le vuhlangini?
12. (a) Hi rini laha vana va nga sungulaka ku tswonga switsundzuxo ni mahungu? (b) Hi rini naswona hi ndlela yihi laha vatswari va faneleke ku sungula ku nyikela vuleteri bya moya eka vana va vona?
12 “Wun’wana wa minhluvuko leyi nyanyulaka ngopfu exivandleni hinkwaxo xa ntivo-miehleketo i ku twisisa ka hina lokuntshwa ka vuswikoti lebyikulu bya xihlangi byo dyondza,” ku vike Dr. Edward Zigler, profesa wa Yunivhesiti ya Yale hi 1984. Entiyisweni, magazini lowu nge Health wu ri: “Vana lava ha riki ekhwirini va nga kota ku vona, ku twa, ku nantswa—ni ku ‘twa’ minsusumeto, mindzinganyeto leyintshwa ya ndzavisiso.” Swi le rivaleni ke, vatswari va nga ka va nga sunguli evuhlangini ku tlula mpimo ku letela vana va vona. (Deuteronoma 31:12) Va nga sungula hi ku kombisa vana va vona swifaniso swa le tibukwini ni ku avelana na vona switori. “Malembe yo nonon’hwa,” ku vula Masaru Ibuka, mutsari wa buku leyi nge Kindergarten Is Too Late, “i malembe yo sukela eku velekiweni ku ya eka manharhu.” Leswi swi hikwalaho ka leswi miehleketo leyintshwa ngopfu-ngopfu yi olovaka, yi tswongaka mahungu hi ku olova swinene, hi laha swi kombisiwaka hi ku khoma ka xihatla ka ririmi lerintshwa ka n’wana. Profesa eka dyondzo ya le vuhlangini eYunivhesiti ya New York u tlhele a vula leswaku “vatswari va fanele ku sungula ku dyondzisa vana ku hlaya nkarhi lowu va va vuyisaka ekaya loko va huma exibedlhele”!
13. I yini lexi kombisaka vuswikoti bya vana byo dyondza?
13 Manana wa le Canada wa tsala malunghana ni vuswikoti bya n’wana wa yena bya ku dyondza: “Siku rin’wana a ndzi hlayela Shaun n’wana wa mina wa mufana wa malembe ya mune na hafu hi vukhale mhaka leyi humaka eka Buku Yanga Ya Timhaka Ta Bibele. Loko ndzi wisanyana eka yinhla yin’wana, lexi ndzi hlamariseke ndzi kume leswaku a a sungule ku yisa mhaka leyi emahlweni, rito hi rito, hi laha yi humelelaka ha kona ebukwini ya Timhaka Ta Bibele. . . . Ndzi ringete yin’wana ndzi tlhandlekela hi yin’wana, naswona a a nhlokohate yin’wana na yin’wana. . . . Entiyisweni a a nhlokohate rito hi rito, timhaka to sungula ta 33, ku katsa ni mavito yo tika ya tindhawu ni vanhu.”a
14. (a) I vamani lava nga hlamarisiwiki hi leswi vana va swi endlaka? (b) Ku fanele ku va yihi pakani ya vatswari va Vukriste? (c) Vana va fanele ku lunghiseleriwa yini, naswona hikwalaho ka yini?
14 Lava va tolovelaneke kahle ni vuswikoti bya vana byo dyondza a va hlamarisiwi hi mintirho yo tano. “Misava ingi yi tele hi swihontlovila swa vutlhari swo tanihi Einstein, Shakespeare, Beethoven na Leonardo da Vinci, loko a hi lo dyondzisa swihlangi ematshan’wini ya vana,” ku vula Dr. Glenn Doman, mukongomisi wa The Institutes for the Achievement of Human Potential. Kavula, pakani ya vatswari va Vukriste, a hi ku humesa swihontlovila leswi tlhariheke kambe i ku fikelela timbilu ta vana va vona leswaku vana va nga tshuki va hambuka eku tirheleni ka Xikwembu. (Swivuriso 22:6) Matshalatshala yo tano ya fanele ya va ya lehisiwile emahlweni ka ku va n’wana a nghena xikolo, leswaku mi n’wi lunghiselela miringo leyi a nga ta kongomana na yona kona. Hi xikombiso, Xikolo xa tindzumulo kumbe minongonoko ya nkhathalelo wa siku na siku, swi kombisa minkhuvo ya masiku ya ku velekiwa ni ya tiholideyi leswi nga vaka leswinene eka vana. Kutani n’wana u fanele ku twisisa mhaka leyi ha yona malandza ya Yehova ya nga hlanganyeriki. Handle ka swona a nga ha kula a ri karhi a venga vukhongeri bya vatswari va yena.
Ndlela Yo Fikelela Mbilu Ya N’wana
15, 16. Vatswari va nga tirhisa yini ku va pfuna ku fikelela mbilu ya n’wana wa vona, naswona xana malunghiselelo lawa ya nga tirhisiwa hi laha ku humelelaka hi ndlela yihi?
15 Ku pfuna vatswari ku fikelela mbilu ya n’wana wa vona, tibuku to tanihi Listening to the Great Teacher ti lunghiseleriwile hi Timbhoni ta Yehova. Buku leyi yi vulavula hi minkhuvo ni ndlela leyi nga vaka ni ku “tsakisa lokukulu” ha yona eka ndzima ya yona leyi nge “Vavanuna Vambirhi Lava Tlangeleke Masiku Ya Ku Velekiwa.” Hambi swi ri tano ndzima leyi yi hlamusela leswaku minkhuvo mimbirhi ntsena ya masiku ya ku velekiwa leyi boxiweke eBibeleni yi tlangeriwe hi vahedeni, lava a va nga gandzeli Yehova, ni leswaku eka nkhuvo wun’wana ni wun’wana ‘nhloko ya munhu yi tsemiwile.’ (Marka 6:17-29; Genesa 40:20-22) Xana mi nga yi tirhisisa ku yini mhaka leyi ku fikelela mbilu ya n’wana wa n’wina?
16 Mi nga tirhisa endlelo leri humelelaka ra buku ya Great Teacher hi ku: “Sweswi, ha swi tiva leswaku xin’wana ni xin’wana lexi nga eBibeleni xi le ka yona hi xivangelo.” Manuku vutisa u ku: “Kutani, a wu ta vula leswaku i yini lexi Xikwembu xi hi byelaka xona ehenhleni ka minkhuvo ya masiku ya ku velekiwa?” N’wana wa n’wina xisweswo u pfuniwa ku anakanyisisa emhakeni leyi ivi a fikelela makumu lamanene. Handle ka buku ya Great Teacher, tibuku tin’wana ti lunghiseleriwile ku tirhisiwa hi vatswari, ku katsa ni Buku Yanga Ya Timhaka Ta Bibele ni nxaxamelo wa “Vutomi ni Vutirheli bya Yesu” lowu humeleleke eka nkandziyiso wun’wana ni wun’wana wa Xihondzo xo Rindza ku sukela hi April 1985. Xana a mi ri karhi mi tirhisa swihloko leswi eku dyondziseni ka vana va n’wina xikan’we na ku tidyondzisa?
17. I swiringanyeto swihi leswi tirhaka leswi nyikeriwaka eka vatswari laha?
17 Mi fanele ku dyondza ni n’wana wa n’wina buku yin’wana ni yin’wana leyi hlanganisaka mimphikamakaneta ni swiyimo leswi a nga ta kongomana na swona exikolweni. Byelani n’wana wa n’wina leswaku hinkwenu ka n’wina hi ku fanana ma tihlamulela eka Yehova. (Varhoma 14:12) Kandziyisani swilo leswinene leswi Yehova a hi endlelaka swona, xisweswo mi susumetela mbilu leyintsongo ya n’wana ku lava ku tsakisa Yehova. (Mintirho 14:17) Endlani minkarhi ya ku dyondza yi va nkarhi lowu tsakisaka. Vana va rhandza switori, manuku tirhelani swinene eku nyikeleni ka dyondzo hi ndlela ya vutlhari leyi nga ta fikelela mbilu ya n’wana wa n’wina. Mindyangu yo tala yi lahlekeriwa hi nkarhi lowu hlamarisaka wa minongonoko yo tano hi ku hluleka ku dya swakudya swin’we nkarhi na nkarhi. Xana mi dya kun’we tanihi ndyangu? Loko mi nga swi endli, xana mi nga lulamisa xiyimo?—Ringanisa Mintirho 2:42, 46, 47.
18, 19. (a) Xana vatswari va fanele ku lunghiselela ku dyondzisa vana va vona hi ndlela yihi, naswona i yini lexi nga xa nkoka ngopfu? (b) I vuyelo byihi bya xikombiso xa manguva lawa xa ku dyondzisa ka vatswari lexi ku hlamarisaka, naswona u ehleketa leswaku vuyelo a ku ta va byihi loko mutswari a byi tirhisa?
18 Nkarhi wo dyondza wu fanele ku twananisiwa ni malembe ya n’wana. Kutani eka n’wana loyi nyingiso wa yena wu hikiweke, vanani ni nhlayo ya tidyondzo leti komeke ta siku na siku. Manuku ke, ku ya emahlweni, ti lehiseni ivi mi ndlandlamuxa vuxokoxoko bya tona. Ntikelo wo va ni minkarhi yo dyondzisa vana va n’wina nkarhi na nkarhi i wa nkoka ngopfu. (Genesa 18:19; Deuteronoma 11:18-21) Tatana un’wana, loyi sweswi a nga ni malembe ya le ka vumakume-nkombo, u veke xikombiso lexinene eku wundleni ka n’wana wa yena wa xinuna, loyi sweswi a nga nkulu wa Vukriste. Malembe lama hundzeke u hlamusele nongonoko wakwe, a ku:
19 “Loko mufana wa hina a ri na kwalomu ka lembe rin’we ndzi sungule ku n’wi hlayela switori swa Bibele swa nkarhi wo etlela, leswi hlamuseriweke ni ndlela leyi kurisiweke, ya mihlovo-hlovo ku endla ku tsundzukeka lokunene. Loko a ha ku sungula ku vulavula elembeni rakwe ra vumbirhi a hi nkhinsama etlhelo ka mubedo wakwe naswona a hi n’wi phindhisa ‘xikhongelo xa Hosi’ endzhaku ka xa mina, xiga hi xiga . . . Loko a ri ni malembe manharhu ndzi sungule ku va ni dyondzo ya Bibele ya nkarhi na nkarhi na yena. . . . A a ta landzelela ebukwini yakwe, a ri karhi a phindha hi marito hi ku vulavula endzhaku ka mina. Xisweswo u sungule ku vula marito kahle naswona u dyondze ku vitana hambi ku ri marito lamakulu kahle. . . . Ku n’wi pfuna eku endleni leswaku mintiyiso ya Bibele yi dzika swinene embilwini yakwe, loko a ri ni malembe manharhu hi sungule ku n’wi nhlokohatisa tindzimana ta Bibele leti olovaka. Hi nkarhi lowu a ngheneke xikolo xa tindzumulo a a tiva kwalomu ka tindzimana ta makume manharhu, naswona September leyi hundzeke loko a sungula ntlawa wo sungula a a nhlokohate matsalwa ya makume-nkombo. . . . Emahlweni ka ku va mufana wa hina a ya eku etleleni ndzi n’wi phindhisa man’wana ya matsalwa ya yena. Hi ku fanana loko a pfuka nimixo hakanyingi a a nhlokohata tindzimana ti nga ri tingani ta Bibele tanihi xiphemu xa ku xeweta ka yena ka siku.”
20. I yini lexi faneleke ku katsiwa enongonokweni wo dyondzisa, naswona n’wana a nga tiphina hi vutirheli bya yindlu na yindlu hi ndlela yihi ke?
20 Nongonoko wo tano wo dyondzisa lowu yaka emahlweni, ku katsa ni xikombiso lexinene xa vatswari ni ku tirhisiwa ka ndzayo leyinene, swi ta lunghiselela n’wana wa n’wina masungulo evuton’wini lama a nga ta ma nkhensa hi laha ku nga heriki. (Swivuriso 22:15; 23:13, 14) Xiphemu xa nkoka xa nongonoko ku fanele ku va ku dyondzisiwa evutirhelini bya le rivaleni ku sukela emalembeni ya vuhlangi. Swi endli ntokoto lowu tsakisaka hi ku lunghiselela n’wana wa wena ku va ni ku hlanganyela lokunene. Tatana loyi a boxiweke laha henhla nakambe u hlamuserile malunghana ni n’wana wakwe a ku: “Vuswikoti bya yena byo tshaha matsalwa byi endla leswaku a humelela swinene evutirhelini bya yindlu na yindlu, tanihi leswi vini vo tala va tindlu va hlamalaka naswona va nga swi kotiki ku ala nyiko ya timagazini ta Bibele leti a ti nyikelaka. U hlanganyerile entirhweni lowu wa Vukriste ku sukela loko a ri na malembe manharhu hi vukhale, naswona sweswi [eka malembe ya 6] hakanyingi u humelela swinene eku fambiseni ka tibuku ta Bibele ni vanhu vo tanihi mina na nsati wa mina.”—Awake!, January 22, 1965, matluka 3-4.
21. (a) Hi yihi nyiko leyinene swinene leyi vatswari va nga yi siyelaka vana va vona? (b) I xitsundzuxo xihi lexi nyikiwaka vatswari, naswona xana vatswari hinkwavo lava nga ni vana lavantsongo va fanele ku va na yini?
21 Entiyisweni, vatswari va Vakriste va ni ndzhaka leyi hlamarisaka, vutivi bya Yehova, leyi va fanelaka ku yi siyela vana va vona naswona kun’we na yona ku langutela ka vutomi bya ku rhula ni ntsako leswi nga heriki emisaveni leyintshwa leyi vangamaka. (Swivuriso 3:1-6, 13-18; 13:22) Ehenhla ka hinkwaswo, vumbani ku tiyiseka eku hetisekeni ka vumundzuku byolebyo byinene etimbilwini ta vana va n’wina, kun’we ni ku navela ku tirhela Yehova. Endlani leswaku vugandzeri bya ntiyiso byi va ntokoto wa ntumbuluko ni lowu tsakisaka eka vona. (1 Timotiya 1:11) Byalani ku tshemba Yehova ku sukela evuhlangini. Naswona mi nga tshuki mi honisa minkarhi yo dyondza na vona ya nkarhi na nkarhi! Rhangisani leswi emahlweni, mi hambeta mi kambisisa mhaka leyi vana va n’wina va yi lavaka ni ndlela leyi mi nga fikelelaka timbilu ta vona ku antswa ha yona. Mi khomekile ni ku va ehansi ka ntshikilelo; Sathana ni misava ya yena va lava sweswo. Kambe tsundzukani xikombiso xa Yesu! Mi nga tshuki mi va lava khomekeke ngopfu lerova mi nga vi na dyondzo ya nkarhi na nkarhi na vana va n’wina!
[Nhlamuselo ya le hansi]
a Emahlweni swinene ka loko a nga si kota ku hlaya, a a dyondze timhaka teto hi ku yingisela tikhasete leti rhekhodiweke ta buku leyi.
A Wu Ta Hlamurisa Ku Yini Ke?
□ I vumbhoni byihi bya Bibele lebyi kombisaka leswaku vatswari va fanele ku rhangisa swilaveko swa vana va vona emahlweni?
□ Ha yini matshalatshala lama hlawulekeke ya vatswari ma laveka sweswi eku sirheleteni ka vana va vona?
□ Ha yini swi ri swa nkoka swinene leswaku vana va dyondzisiwa ku sukela evuhlangini?
□ Hi swihi swiringanyeto swin’wana leswi tirhaka swa vatswari eku fikeleleni mbilu ya n’wana wa vona?
□ I yini lexi vatswari va Vukriste va nga fanelangiki ku xi honisa?
[Xifaniso lexi nga eka tluka 12]
Ku dyondzisa vana ku nge sunguli evuhlangini ku tlula mpimo