Moya Wa Misava

Nhlamuselo: I moya wa matimba lowu kucetelaka vanhu lava nga riki malandza ya Yehovha Xikwembu, lowu endlaka vanhu volavo va vula ni ku endla swilo hi ndlela yo karhi. Hambi leswi vanhu va endlaka swilo hi ku tirhandzela, lava va kombisaka moya wa misava va ni xiyimo xo karhi xa mianakanyo, tindlela to karhi ta ku endla swilo ni swikongomelo swo karhi evuton’wini leswi tolovelekeke eka mafambiselo lawa ya swilo lawa mufumi ni xikwembu xa wona a nga Sathana.

Ha yini ku thyakisiwa hi moya wa misava ku nga ri mhaka ya matlangwana?

1 Yoh. 5:19: “Misava hinkwayo yi le hansi ka matimba ya Lowo biha.” (Sathana u humesa moya lowu lawulaka mianakanyo ni mintirho ya vanhu lava nga riki malandza lama amukelekaka ya Yehovha. I moya wa vutianakanyi ni wa vutikukumuxi lowu hangalakeke ku fana ni moya lowu vanhu va wu hefemulaka. Hi fanele hi tivonela leswaku hi nga hluriwi hi matimba ya Sathana hi ku pfumelela moya wolowo wu cinca vutomi bya hina.)

Nhlav. 12:9: “Dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona na tona ti cukumetiwa kun’we na yona.” (Ku sukela loko leswi swi endlekile, endzhaku ka ku velekiwa ka Mfumo hi 1914, nkucetelo wa Sathana ni mademona yakwe wu andzile swinene exikarhi ka vanhu. Moya wa yena wu engetela vutianakanyi ni madzolonga exikarhi ka vanhu. Ngopfu-ngopfu lava rhandzaka ku tirhela Yehovha hi vona va vaka ehansi ka ntshikelelo lowukulu wo va xiphemu xa misava, wo endla leswi van’wana va swi endlaka, ni leswaku va tshika vugandzeri bya ntiyiso.)

Hi swihi swikombiso swin’wana swa moya wa misava leswi hi faneleke hi tivonela eka swona?

1 Kor. 2:12: “Hina a hi amukelanga moya wa misava leyi, kambe hi amukerile Moya lowu humaka eka Xikwembu, leswaku hi ta tiva hinkwaswo leswi hi nyikiweke swona hi Xikwembu.” (Loko moya wa misava wo mila emianakanyweni ni le ku naveleni ka munhu, mihandzu ya wona yi hatla yi vonaka hi swiendlo leswi kombisaka moya wa kona. Kutani ke, ku ntshunxeka eka moya wa misava a swi lavi ku papalata mintirho leyi nga riki ya Vukreste ni ku hundzeleta swilo ntsena, kambe swi lava u langutana ni nhloko ya mhaka hi vuenti, hi ku hlakulela langutelo leri kombisaka moya wa Xikwembu ni ku rhandza tindlela ta xona hi xiviri. Leswi u fanele u swi tsundzuka loko u ri karhi u kambisisa swikombiso leswi landzelaka swa moya wa misava.)

Ku endla leswi munhu a lavaka ku swi endla, a nga ri na mhaka ni leswaku ku rhandza ka Xikwembu hi kwihi

Sathana u khutaze Evha ku tihlawulela hi yexe leswi swi nga swinene ni leswi swi biheke. (Gen. 3:3-5; ringanisa na Swivuriso 3:5, 6.) Vanhu vo tala lava landzelelaka ndlela ya Evha a va swi tivi leswaku ku rhandza ka Xikwembu i yini, naswona a va tiyimiselanga ku swi tiva. Va “tiendlela swa vona,” hi laha va vulaka ha kona. Lava va swi tivaka swilaveko swa Xikwembu ivi va ringeta ku swi landzelela va fanele va tivonela leswaku moya wa misava wu nga va endli va honisa ndzayo ya Rito ra Xikwembu hi vomu, eka leswi vona va nga ha swi tekaka swi ri swilo “leswitsongo.”—Lk. 16:10; nakambe vona xihloko lexi nge “Vutilawuri.”

Ku angula hi ku lawuriwa hi vutikukumuxi eka swiyimo swo karhi

I Sathana loyi a rhangeke a pfumelela vutikukumuxi byi onha mbilu yakwe. (Ringanisa Ezekiyele 28:17; Swivuriso 16:5.) Vutikukumuxi i matimba lama vangaka ku avana emisaveni leyi a yi fumaka, byi endla vanhu va tivona va antswa ku tlula va rixaka rin’wana, tiko rin’wana, ririmi rin’wana ni hi tlhelo ra timali. Hambi lava va gandzelaka Xikwembu va nga ha boheka ku tsuvula masalela ya langutelo ro tano. Nakambe va fanele va tivonela leswaku vutikukumuxi byi nga va endli va teka mhaka leyitsongo va yi endla mhaka leyikulu, kumbe byi va endla va nga swi voni swihoxo swa vona vini ni ku amukela ndzayo, ivi xisweswo va vuyeriwa eka mpfuno wo tano wa rirhandzu lowu Yehovha a wu nyikelaka hi nhlengeletano yakwe.—Rhom. 12:3; 1 Pet. 5:5.

Ku kombisa langutelo ra ku xandzukela vulawuri

Ku xandzuka ku sungule hi Sathana, loyi vito rakwe ri vulaka “Mukaneti.” Hi ku tlhontlha kakwe Yehovha, Nimrodi, loyi vito rakwe ri nga ha vulaka leswaku “A Hi Xandzukeni,” u kombise leswaku a a ri n’wana wa Sathana. Ku papalata moya wolowo swi ta sivela vanhu lava chavaka Xikwembu leswaku va nga kanetani ni vafumi va tiko (Rhom. 13:1); swi ta pfuna vana leswaku va titsongahatela vulawuri lebyi Xikwembu xi byi nyikeke vatswari va vona (Kol. 3:20); swi va xisirhelelo leswaku hi nga pfumelelani ni vagwinehi, lava va sandzaka lava a va byarhiseke vutihlamuleri hi Yehovha enhlengeletanweni ya yena leyi vonakaka.—Yuda 11; Hev. 13:17.

Ku tipfumelela u hluriwa hi ku navela ka nyama leyi nga ni xidyoho

Nkucetelo wa leswi wa vonaka naswona wu nga twiwa kun’wana ni kun’wana. I swa nkoka ku tshama u ri karhi u tivonela eka wona. (1 Yoh. 2:16; Ef. 4:17, 19; Gal. 5:19-21) Mianakanyo ni ku navela loku ku nga ha vangaka munhu leswaku a swi endla hi ndlela yo chavisa, swi nga ha vonaka eka bulo ra munhu wa kona, misavu yakwe, marito ya vuyimbeleri lebyi a byi yingisaka, macinelo yakwe, kumbe hi ku hlalela minkombiso leyi kombisaka vuxaka bya rimbewu lebyi thyakeke. Muxaka lowu wa moya wa misava wu tikombisa hi ku tirhisa swidzidzirisi hi ndlela yo biha, vudakwa, vuoswi, vumbhisa ni vusodoma. Nakambe wu tikombisa loko munhu a dlaya vukati ni munghana wakwe ku nga ri hi ku ya hi matsalwa, kambe kumbexana hi mpfumelelo wa nawu, ivi a tekana ni un’wana.—Mal. 2:16.

Ku pfumelela vutomi bya wena byi lawuriwa hi ku navela ku va ni leswi u swi vonaka

A ku ri ku navela koloko loku Sathana a ku hlakuleleke eka Evha, a n’wi yenga leswaku a endla nchumu lowu onheke vuxaka byakwe ni Xikwembu. (Gen. 3:6; 1 Yoh. 2:16) Yesu u wu ale hi ku helela ndzingo wo tano. (Mt. 4:8-10) Lava va lavaka ku tsakisa Yehovha va fanele va tivonela leswaku va nga pfumeleli timhaka ta mabindzu ti byala moya wo tano eka vona. Lava va phasiwaka hi wona va va emahlomulweni naswona va fa emoyeni.—Mt. 13:22; 1 Tim. 6:7-10.

Ku tibombisa hi leswi munhu a nga na swona ni leswi a ehleketaka leswaku u swi fikelerile

Mukhuva lowu na wona, i ‘wa misava’ naswona lava vaka malandza ya Xikwembu va fanele va wu lahla. (1 Yoh. 2:16) Wu vangiwa hi ku tikukumuxa, naswona ematshan’weni yo aka van’wana hi tlhelo ra moya, wu va vekela mintlhamu ya swilo leswi vonakaka ni ku va kombisa ku humelela hi tlhelo ra misava.—Rhom. 15:2.

Ku phofula mintlhaveko ya wena hi ku rhuketela ni hi madzolonga

Leyi i “mintirho ya nyama” leyi vanhu vo tala va faneleke ku lwisana na yona hi matimba. Hi ripfumelo ra xiviri ni mpfuno wa moya wa Xikwembu va nga swi kota ku hlula misava ematshan’weni yo pfumelela moya wa yona wu va hlula.—Gal. 5:19, 20, 22, 23; Ef. 4:31; 1 Kor. 13:4-8; 1 Yoh. 5:4.

Ku pfumelela mintshembo ni minchavo ya wena swi lawuriwa hi leswi vanhu va kotaka ku swi endla

Munhu wa nyama u teka swilo leswi a swi kotaka ku swi vona ni ku swi khumba tanihi swona leswi fambaka emahlweni. Mintshembo ni minchavo yakwe swi lawuriwa hi switshembiso ni minxungeto ya vanhu van’wana. U lava mpfuno eka vafumi lava nga vanhu naswona wa karhateka loko va tsandzeka. (Ps. 146:3, 4; Esa. 8:12, 13) Eka yena, vutomi lebyi ko va byona ntsena. Rifu rona u ri chava ku tlula mpimo. (Ku hambana ni sweswo, vona Matewu 10:28; Vaheveru 2:14, 15.) Kambe matimba lamantshwa ma susumeta mianakanyo ya vanhu lava va dyondzaka ha Yehovha, lava va tataka mianakanyo ya vona ni timbilu ta vona hi switshembiso swa yena ni lava va dyondzaka ku kombela mpfuno eka yena nkarhi wun’wana ni wun’wana loko va wu lava.—Ef. 4:23, 24; Ps. 46:1; 68:19.

Ku yisa vugandzeri lebyi dzunekaka, lebyi nga bya Xikwembu, eka vanhu ni le ka swilo swin’wana

Sathana Diyavulosi, “xikwembu xa misava leyi,” u hlohlotela mikhuva yo hambana-hambana leyi hambukisaka mboyamelo wa vanhu, lowu va wu nyikiweke hi Xikwembu, wo lava ku gandzela. (2 Kor. 4:4) Vafumi van’wana va khomiwa onge i swikwembu. (Mint. 12:21-23) Timiliyoni ti khinsamela swifaniso. Timiliyoni tin’wana ti gandzela vatlangi ni switsutsumi leswi dumeke. Minkhuvo hakanyingi yi dzunisa vanhu hi ndlela leyi nga fanelangiki. Moya lowu wu tele swinene lerova lava hakunene va rhandzaka Yehovha naswona va lavaka ku gandzela yena ntsena, va fanele va tivonela swinene eka nkucetelo wa wona siku na siku.