Hambeta U Twarisa Mfumo

“Kutani Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—MATEWU 24:14.

1, 2. (a) Ntirho wa nkoka swinene wa lembe xidzana leri hi wihi, naswona wu endliwa ku fikela kwihi? (b) Hi byihi vumbhoni lebyi nga kona bya leswaku Yehova u katekisa ntirho lowu?

KU TWARISA mahungu lamanene ya Mfumo wa Xikwembu i ntirho wa nkoka swinene wa lembe xidzana leri. Hi leswi Xikwembu xa Matimba Hinkwawo xi lavaka leswaku swi endliwa sweswi, kutani swi karhi swa endliwa leswaku ku hetiseka Rito ra xona ra vuprofeta. Endlelo ra wena eka wona ri ta khumba mikateko ya wena leyi nga riki na ku hela.—1 Vakorinto 9:16, 23.

² Swa nyanyula ku vona leswaku nhlayo leyi nga ni xiphemu entirhweni lowu wo chumayela yi hambeta yi tlakuka, sweswi ku na lava tlulaka timiliyoni tinharhu lava hlanganyelaka. Tinhlayo letikulu ku tlula hambi ku ri rini ti nghenela vutirheli bya nkarhi hinkwawo. Naswona vanhu vo tala swinene lava tsakelaka va amukela dyondzo ya Bibele naswona va endla matshalatshala yo dyondza ku endla ku rhandza ka Xikwembu.

3. Xana i yini lexi van’wana va nga ha xi vulaka mayelana ni xilaveko xa ku ya emahlweni ni ku chumayela mahungu lamanene?

³ Hambi swi ri tano, minkarhi yin’wana, van’wana va nga ha ‘karhala ku endla leswinene’ naswona ‘va karhala’ loko ku tiwa entirhweni wa ku chumayela. (Vagalatiya 6:9; Vaheveru 12:3) Va nga ha vula leswaku mahungu lamanene ana se ma chumayeriwe swinene ensin’wini ya ka vona ni leswaku vanhu se va tihlawulerile naswona sweswi va siringeka loko hi nghena emakaya ya vona. Lava endlaka ntirho wo chumayela kwalaho va kuma mimbuyelo yintsongo kumbe va nga kumi nchumu. Kutani ke, va vona onge kumbexana ntirho wu endliwile, naswona ku nga ri na xilaveko xo ya emahlweni. Xana i yini lexi hoxeke hi ndlela leyi ya ku ehleketa?

Ha Yini Hi Phikelela?

4. I yini lexi faneleke ku hi susumetela ku hambeta hi chumayela hambi ku ri ensin’wini leyi nga na ku tsakela kuntsongo?

⁴ Xo sungula, ku tiyisela ka hina hi ku tshembeka entirhweni wo chumayela a ku fanelanga ku titshega hi leswaku vanhu va hi yingisa kumbe e-e. Yeremia u chumayele malembe ya 40 eYerusalema hambi leswi ku veke vanhu vantsongo lava yingiseke ni leswi vo tala va n’wi kaneteke hi matimba. Ha yini a phikelerile? Hikuva a a endla ntirho lowu Yehova a wu leriseke naswona hi leswi vutivi bya yena bya vuprofeta bya leswi a swi ta humelela eYerusalema byi n’wi susumeteleke ku hambeta a vulavula. (Yeremia 1:17-19) U te: “E ka mina ŝi fana ni nḍilo lo’wu hisaka e mbilwini ya mina, lo’wu nghenisiweke marambyini ya mina; kutani nḍi endla hi matimba e ku wu hlayisa, kambe nḍa ṭanḍeka.” (Yeremia 20:7-10) Xiyimo xa hina xi tano. I Yehova, ha Yesu Kriste, loyi a leriseke leswaku “Evangeli” yi fanele ku chumayeriwa emisaveni hinkwayo. (Matewu 24:14) Loko vanhu va ala ku yingisa, leswi swi hi nyika nkarhi wo kombisa ku enta ka rirhandzu ra hina ni ku gandzela Yehova hi ku phikelela eku endleni ka leswi lulameke. (1 Yohane 5:3) Handle ka sweswo, loko hi ehleketisisa hi leswi vumundzuku lebyi nga le kusuhi byi swi khomeleke vanhu, hi nga tshikisa ku yini ku ringeta ku tsundzuxa vaakelani va hina?—2 Timotiya 4:2.

5. (a) Hikwalaho ka xivangelo xihi xin’wana hi nga tiyiselaka entirhweni wa ku chumayela? (b) Ntirho wo chumayela i xisekelo xa ku avanyisa hi ndlela yihi?

⁵ Ku tlula kwalaho, ku chumayela ka Yeremia a ku ri ntirho wo avanyisa hakunene. Hi 607 B.C.E., ku hava ni un’we wa lava xanisiweke hi rifu kumbe vuhlonga loko Yerusalema yi wa a va ta vula leswaku a va nga swi tivi leswaku ha yini leswi a swi va humelela. Hi malembe ya 40 emahlweninyana, Yeremia a a ri karhi a va tsundzuxa hi mbuyelo wo fana ni wolowo loko va ya emahlweni ni ku xandzukela Yehova. (Ringanisa Ezekiel 2:5.) Hi ku fanana namuntlha, ku chumayeriwa ka mahungu lamanene tanihi “vumbhoni eka vanhu va matiko hinkwawo” i xisekelo xa ku avanyisa. Muapostola Pawulo u swi veka kahle loko a vula leswaku Yesu Kriste u ta tirihisela eka “lava nga tiviki Xikwembu, ni ka lava nga yingisiki Evangeli ya Hosi ya hina Yesu.” (2 Vatesalonika 1:8, 9) Vanhu va ta avanyisiwa hi leswi va ma tekisaka swona mahungu lamanene. Hikwalaho ke, ntirho wo chumayela wu fanele ku ya emahlweni wu twarisiwa ku fikela emakun’wini. (Nhlavutelo 14:6, 7) Ku nga vi na nchumu lowu sivelaka rungula leri ra nkoka leswaku ri yisiwa evanhwini hi ku phindha-phindha loko swi koteka. Leswi swi veka vutihlamuleri lebyikulu ehenhla ka malandza hinkwawo lama tinyiketeke ya Yehova.

6. Hambi leswi rungula ra hina ri nga ha vaka leri tiviwaka hi ku anama, ha yini hi fanele ku hambeta hi chumayela?

⁶ I ntiyiso, hi nga ha va se hi chumayerile mahungu lamanene swinene endhawini ya ka hina. Kambe ku na swilo swo tala leswi humelelaka emisaveni lerova hambi loko vanhu vo tala va ri twile rungula ra hina, va nga hatla va ri rivala loko hi tshika ku chumayela. Ehleketa hi mindzhundzuluko, swiendlo swa vuhehli, switereko, ku onhiwa ka nhundzu ni swiendlakalo swin’wana leswi vikiwaka hi xitalo. Manuku ku na swivumbeko swo tala leswi tolovelekeke swa ku titsakisa ni swihinga swin’wana. Hi fanele ku hambeta hi chumayela leswaku rungula ra hina ri tshama ri ri evanhwini ku nga khathariseki swilo leswi swin’wana hinkwaswo leswi va tikarhatelaka swona.

7. Endlelo ra vo tala namuntlha ri fana njhani ni leriya ra Vaisrayele eku profeteni ka Esaya, kambe ha yini leswi swi nga fanelanga ku hi sivela ku chumayela?

⁷ Loko van’wana va ringeta ku hi honisa, hi fanele hi tsundzuka leswaku i vanhu va njhani lava muprofeta Esaya a a fanele ku chumayela eka vona. Yehova u te eka yena: “Hikuv̌a i tiko le’ri tiarisaka, i v̌ana v̌a mav̌unwa, v̌ana la’v̌a alaka ku yingisa milawu ya Yehova; v̌a ri e ka v̌av̌oni: Mi nga v̌oni! ni ka v̌aprofeta: Mi nga hi profeteli ŝinene, hi byeleni timhaka le’ti ṭakisaka, mi hi bvumbela le’ti šisaka! Hambukani ndlela hi le tlhelweni, ṭhikani ku v̌eka Mukwetsimi wa Israel e mahlweni ka hina!” Hambi swi ri tano, Esaya hi ku tshembeka u byele vanhu a ku: “Yehova i Šikwembu le’ši lulameke, ši katekisa hikwav̌o la’v̌a ši ṭhembaka!” (Esaya 30:9-11, 18) Hi fanele hi endla leswi fanaka. Ntsendze loko hi phikelela, rungula ra hina ri ta dzika ku fikela eka mpimo wo karhi. Van’wana va ta yingisa kasi van’wana a va nga yingisi. Kambe hinkwavo va ta va na wona nkarhi wo twa.

‘Va Ta Ti Twisa Ku Yini?’

8. Hambi leswi vanhu va nga ha vonakaka va hlawule ku ala ntiyiso, i swilo swihi swi nga cincaka miehleketo ya vona?

⁸ Kumbexana hi nga vona ongi vanhu ensin’wini yo karhi va endle xiboho lexi tiyeke naswona va tiyimisele ku ala rungula ra hina kumbe hambi ku ri ku ri kaneta. Kambe tsundzuka, xiyimo evuton’wini bya vanhu xi ya emahlweni xi cinca. Va nga ha kongomana na swiphiqo swintshwa kumbe swiyimo leswintshwa mundzuku, vhiki leri landzelaka, kumbe n’hweti leyi taka leswi swi nga va endlaka lava amukelaka ntiyiso. Va nga ha twa hi swiendlakalo leswi kavanyetaka emisaveni kumbexana va tokota ku wa ka ikhonomi, ku vabya, kumbe rifu endyangwini. Swilo swo tano swi nga va endla va phaphama kutani va lava ku tiva xivangelo xa nhlomulo wa vona. Loko hi hambeta hi chumayela, va ta ku tiva laha va nga ta hundzukela kona.

9. Ntirho wa hina wa ku chumayela wu nga fanisiwa njhani ni lowuya wa vatirhi va ku ponisa endhawini leyi ku nga ni khombo?

⁹ Xiyimo xa hina xi nga ha fanisiwa ni xa vatirhi va ku ponisa endhawini leyi nga ni khombo, yo tanihi le ndzhaku ka ku tsekatseka ka misava. Van’wana va nga ha va va tirha endhawini leyi ku kumiweke vaponi vantsongo, kambe mhaka ya leswaku vatirhi-kulobye a va kuma vaponi vo tala endhawini yin’wana a yi nge va endli va loloha kutani va tshika. Kambe, vatirhi va ku ponisa hinkwavo handle ko karhala va tiyisela hambi va vona onge a ka ha ri na vaponi exiphen’wini lexi va averiweke xona. Xisweswo, nkarhi wun’wana va n’wi kuma muponi un’wana nakambe. Ku lava ku yimisiwa ntsena loko nkarhi lowu se wu hundzeke wu kombisa leswaku a ka ha ri na ntshembo. Phela, ku lava ka hina a ku si yimisiwa, naswona ha ha kuma magidi ehenhla ka magidi ya lava lavaka ku ponisiwa emisaveni leyi ya khale ivi va pona “eku xanisekeni lokukulu.” (Nhlavutelo 7:9, 14) Hambi etindhawini leti tirhiweke kahle ni laha vanhu vo tala va nga yingisiki, ka ha ri na mimbuyelo yo karhi. Naswona ku na swivangelo swo engeteleka swa leswaku hi ya emahlweni hi chumayela.

10. Vanhu va ta tiva laha va nga ta hundzukela kona loko va lava ntiyiso hi ndlela yihi ntsena, hi ku ya hi Varhoma 10:13, 14?

¹⁰ Vanhu va lava ku tsundzuxiwa hi minkarhi hinkwayo leswaku “un’wana ni un’wana la khongelaka hi vito ra [Yehova] ú ta ponisiwa.” Hambi swi ri tano, tanihi leswi Pawulo a yaka emahlweni epapileni rakwe eka Varhoma a ku, “kambe va ta khongerisa ku yini eka loyi va nga pfumelangiki ka yena xana? Va ta pfumerisa ku yini eka loyi va nga twangiki ta yena ke? Va ta ti twisa ku yini, loko va nga ri na mudyondzisi xana?” (Varhoma 10:13, 14) Marito lama ma fanele ku nghenisa eka un’wana ni un’wana wa hina xilaveko xa ku phikelela eku chumayeleni ka mahungu lamanene ya Mfumo wa Xikwembu.

11. I vutihlamuleri byihi lebyi hi nga na byona eka vantshwa lava kulelaka evukulwini?

¹¹ Tanihi leswi nkarhi wa makumu wu yeke emahlweni, vana va tswariwile naswona va kurile va kulela evukulwini kumbe emalembeni ya vutihlamuleri. Hakanyingi vantshwa lava a va si tshama va veka nyingiso eka ntiyiso. Vatswari va vona va nga ha va va ale rungula leri hambi ku ri ku ri sola. Kambe vantshwa lava sweswi va kule ku ringana ku ehleketisisa swinene hi swiyimo swa misava, hi vumundzuku na hi xikongomelo xa vona evuton’wini. Na vona va lava ku khongela vito ra Yehova loko va ta ponisiwa. Kambe “va ta pfumerisa ku yini eka loyi va nga twangiki ta yena ke?” (Varhoma 10:14) Hakanyingi vantshwa lava ni lava kulekenyana va wu amukela ntiyiso, hikwalaho hi fanele ku va lavisisa kutani hi va chumayela.

12. Ku ya ka hina emahlweni na ntirho wo chumayela ku xi tiyisisa ku yini xikombiso xa tintswalo ta Yehova?

¹² Mhaka ya leswaku ndlela ya ha pfulekele ku chumayela i xikombiso xa tintswalo ta Yehova. Muapostola Petro u ri: “Hosi a yi hlweli ku endla leswi yi nga tshembisa swona, hi laha van’wana va twisisaka ‘ku hlwela’ ha kona, kambe yi lehisa mbilu hikwalaho ka n’wina; a yi lavi leswaku ni un’we wa n’wina a lova, kambe yi lava leswaku hinkwavo va ta eku hundzukeni. Kutani, twisisani leswaku loko Hosi ya hina yi lehisa mbilu, yi endlela ku hi ponisa.” (2 Petro 3:9, 15) Ku navela ka Yehova ka leswaku tinxaka hinkwato ta vanhu ti ponisiwa a ku kombisiwi ntsena hi ku lehisa ka yena mbilu a lehisa nkarhi a nga si tisa ku avanyisa kambe ku tlhela ku kombisiwa hi ku ya ka yena emahlweni a kombela vanhu ku hundzukela eka yena leswaku va ponisiwa. (1 Timotiya 2:4) Loko hi hambeta hi chumayela mahungu lamanene, hi tiyisa tintswalo ta Xikwembu, kutani hi ndlela leyi ha xi dzunisa.

Ku Papalata Nandzu Wa Ngati

13, 14. (a) Ntirho wa hina wa ku chumayela wu nga fanisiwa njhani ni ntirho wa murindzi, hi laha wu vuriweke ha kona eka vuprofeta bya Ezekiyele? (b) Ha yini Pawulo a swi kotile ku vula leswaku a a ri ‘hava nandzu wa ngati ya vanhu hinkwavo,’ naswona Timbhoni ta Yehova namuntlha ti nga vula leswi hi ndlela yihi ntsena?

¹³ Vutihlamuleri bya Timbhoni leti tinyiketeke ta Yehova byo tsundzuxa vanhu hi ku avanyisa loku taka byi nga fanisiwa ni lebyiya bya Ezekiyele enkarhini wa yena. A a hlawuriwe ku va murindzi wa yindlu ya Israyele. Ntirho wa yena a ku ri ku tsundzuxa Vaisrayele leswaku ndzoviso wa ta loko va nga tifularheli tindlela ta vona leto biha. Loko yena tanihi murindzi a tsandzeka ku tivisa xitsundzuxo, ndzoviso a wu ta ta eka vanhu lavo biha, kambe ngati ya vona a yi ta va ehenhla ka murindzi loyi wo honisa. Eka leswi Yehova u kombisa langutelo ra yena hi ta ku avanyisa loko a ku: “A nḍi ṭakeri rifu ra mudyohi, kambe hi leŝaku a hunḍuka e ndleleni ya yena kutani a hanya; hunḍukani, mi hunḍuka e tindleleni ta ṅwina le’to biha, hikuv̌a mi ranḍa e ku fa hikwalaho ka yini, ṅwina yindlu ya Israel?”—Ezekiel 33:1-11.

¹⁴ Muapostola Pawulo u byi pfumerile vutihlamuleri bya yena tanihi murindzi, loko a byela vakulu va le Efesa a ku: “Hikokwalaho, namuntlha, ndzi tiyisa emahlweni ka n’wina leswaku a ndzi nga vi ni nandzu loko un’wana wa n’wina a ya eku loveni.” Ha yini a swi kotile ku vula sweswo? U ya emahlweni: “Hikuva a ndzi mi fihlelanga makungu ya Xikwembu kambe ndzi mi tivisile wona hinkwawo.” (Mintirho 20:26, 27) Swi tano hi ntlawa wa varindzi namuntlha, masalela lama totiweke ya valandzeri va Yesu Kriste. Hinkwavo lava, kun’we ni vanghana va vona lava tlulaka timiliyoni tinharhu lava nga ni ntshembo wa ku pona ku hela ka mafambiselo lawa ya swilo kutani va amukela vutomi lebyi nga heriki emisaveni, a va fanelanga ku loloha ku chumayela mahungu lamanene ya Mfumo wa Xikwembu ni ku tsundzuxa hi ta ndzoviso lowu taka wa ku avanyisa ka xona. Hi ndlela leyi va papalata nandzu wa ngati.

15. Hi ku ya hi ndzima ya 9 ya Ezekiel, i mani loyi a a funghiwa, naswona i mani loyi a a fungha?

¹⁵ Ntirho wa ku chumayela namuntlha wu hlamuseriwa hi vuprofeta eka Ezekiel ndzima ya 9. Laha, ku xupula ka Yehova a ku kongomisiwe emutini wa Yerusalema. Emahlweni ka ku tisiwa ka ku avanyisa, wanuna loyi a ambaleke nguvu ya line a ri na nkotloto wa mutsari exisutini xa yena u byeriwe ku tsemakanya exikarhi ka muti kutani a fungha emimombyeni hinkwayo ya lava hlunameke hikwalaho ka swilo leswi endliwaka kwalaho. Loko ntirho lowu wo fungha wu herile, hinkwavo emutini handle ka lava va fungheriweke ku pona a va ta herisiwa. Eku heleni loku humeleleke ka ntirho wa yena wa ku fungha, wanuna u vikile a ku: “Nḍi endlile hi laha u nḍi leriseke ha kona.” (Ezekiel 9:11) U endle ntirho wa yena hi ku tshembeka ku kondza wu hela.

16. (a) Wanuna la ambaleke nguvu ya line u fanekisela vamani namuntlha? (b) Mphikamaneta ya ku lweriwa ka vuhosi bya Yehova yi hi susumetela ku ya emahlweni hi chumayela hi ndlela yihi?

¹⁶ Wanuna loyi a ambaleke nguvu ya line u fanekisela masalela lama totiweke ya valandzeri va Kriste, naswona va joyiniwe hi “ntshungu lowukulu” wa “tinyimpfu tin’wana.” Mphikamakaneta leyikulu namuntlha, tanihi le nkarhini wa Ezekiyele, i ku lwela vuhosi bya Yehova. Malunghana ni ku hela ka mafambiselo lawa ya swilo yo biha ya namuntlha enyimpini ya siku lerikulu ra Xikwembu xa Matimba Hinkwawo, Yehova u ri: “Matiko ma ta tiv̌a leŝaku hi mina Yehova.” (Nhlavutelo 7:9; Yohane 10:16; Ezekiel 39:7) Leswaku matiko ma ta tiva leswi, i swa nkoka leswaku malandza ya Yehova emisaveni ma ya emahlweni ma chumayela vito ra yena ni xikongomelo xa yena tanihi vumbhoni ematikweni hinkwawo.

17, 18. (a) Ku ya ka hina emahlweni hi chumayela ku hi pfunisa ku yini leswaku hi tshama hi rindzile? (b) I xiviko xihi lexi hinkwerhu hi lavaka ku xi yisa eka Yehova loko a tisa ntirho wa ku chumayela eku heleni ka wona, naswona leswi hi nga swi endla hi ndlela yihi ntsena?

¹⁷ Hi ku hambeta hi chumayela mahungu lamanene ya Mfumo, hi hlayisa ku phaphama ka hina. Hi tshama hi phaphamele swilo swa nkoka swa vito ra Yehova ni xikongomelo xa yena. Loko ho kokela endzhaku, ntshembo wa hina wa Mfumo wu ta tsana, kutani hi nga khukhuriwa hi “mivilelo, ni rifuwo, ni ku titsakisa hi swa vutomi lebyi . . . kutani [hi] nga ha veki mihandzu leyi vupfaka.” (Luka 8:14) Loko hi ku hiseka hi tiyisela eku twariseni ka “mahungu lamanene,” hi ku tshembeka hi landzelela swileriso swa Hosi ya hina, Yesu Kriste loko a ku: “Tlharihani mi hiteka, hikuva a mi tivi leswaku nkarhi wu ta va rini. Kutani leswi ndzi mi byelaka swona, ndzi byela hinkwavo, ndzi ri: Hitekani!”—Marka 13:10, 33, 37.

¹⁸ Manuku, hinkwerhu, a hi phikeleleni eku laveni ka ‘lava hlunameke’ ntsendze loko Yehova a swi pfumelela. Onge hinkwerhu ka hina, hambi hi va masalela lama totiweke kumbe va “tinyimpfu tin’wana,” hi nga tshembeka eku endleni ka ntirho wa hina wo chumayela mahungu lamanene ya Mfumo emisaveni hinkwayo leswaku byi va vumbhoni ematikweni hinkwawo. (Matewu 24:14) Loko Yehova hi yexe a tisa ntirho lowu eku heleni ka wona hi ku sungula “nhlomulo lowukulu,” onge un’wana ni un’wana wa hina a nga swi kota ku byela Yehova a ku, ‘Hi endle hi laha u hi leriseke ha kona.’

Wa Tsundzuka Xana?

◻ Mimbuyelo yi komba yini hi ntirho wa hina?

◻ Hi swihi swivangelo swin’wana swo va hi fanele ku ya emahlweni hi chumayela?

◻ Ntirho wa hina wo chumayela i xikombiso xa tintswalo ta Yehova hi ndlela yihi?

◻ Hi nga tshama njhani hi nga ri na nandzu wa ngati ya vanhu hinkwavo?

◻ Ntirho wa hina wo chumayela wu hi pfuna ku tshama hi rindzile hi ndlela yihi?

[Chati leyi nga eka tluka 28]

MIMBUYELO YA KU CHUMAYELA HI MALEMBE YA NKOMBO

1981 119 836 5 987 893 1 475 177

1982 138 540 6 252 787 1 586 293

1983 161 896 6 767 707 1 797 112

1984 179 421 7 416 974 2 047 113

1985 189 800 7 792 109 2 379 146

1986 225 868 8 160 597 2 726 252

1987 230 843 8 965 221 3 005 048