Xana Hi Fanele Hi Va Na Yona Bibele?

OXANA, nhwana wa Murhaxiya, a a tsakile loko a kume Bibele leyi a yi xavisiwa hi muxavisi wa le xitarateni wa tibuku le Moscow. Munghana wa yena John, loyi a a huma etikweni leri Tibibele a ti kumeka hi ku olova, u nyanyuriwa hi ntsako wa Oxana. “Mina—la pfumelaka leswaku Xikwembu a xi kona—a ndzi lava ku n’wi xavela yona,” ku vula yena. Hambi leswi Oxana eku sunguleni a aleke ku amukela nyiko ya John, kambe u hetelele a yi tekile.

Ku fana na Oxana, vo tala va swi navela swinene ku va ni Bibele. Leswi swi tano, ngopfu-ngopfu ematikweni lawa a yi nga kumeki emalembeni yo tala lama hundzeke. Hi xikombiso, vakandziyisi va magazini lowu va tirha hi matimba leswaku va eneta xilaveko xa Tibibele eka riphabliki ra khale ka Soviet, ni le ka matiko man’wana ya misava. Vanhu vo tala eka tindhawu leti, va khangule ku kambisisa Bibele hi mfanelo—naswona lavanyingi va kokiwa hi rungula ra yona ra matimba.

Vaxopaxopi Ni Lava Kanakanaka

Eka tlhelo lerin’wana, ngopfu-ngopfu le Yuropa n’walungu, Bibele yi vekiwa yi kondza yi punyala hi ritshuri. Van’wana va ri, “i matimu ya khale!” va tlhandlekela va ku, “Yi tsaleriwe nguva yin’wana. A yi va tirheli nchumu vanhu va manguva lawa.” Hambi vafundhisi lava tlakukeke va sandze Bibele erivaleni. Bixopo lonkulu wa Anglican, Desmond Tutu, eka The Star, phepha-hungu ra le Afrika Dzonga, ku vikiwa leswaku u te: “Ku ni swiyenge swin’wana swa Bibele leswi swi nga tirhiki nkarhi wun’wana.” Marito yo fana ni lawa ma endle vo tala va tivutisa leswaku Bibele va fanele va yi tshemba hi ndlela yihi.

Xilaveko Xa Nkongomiso

Vaxopaxopi ni vapfumeri va fanele ku pfumela leswaku, ku tlula rini na rini, sweswi misava yi lava tindlela to ololoxa, leti tirhaka. Alvin Toffler, ebukwini yakwe leyi nge Future Shock, u tsarile a ku: “Handle ka loko munhu o dyondza ku lawula rivilo ra ku cinca ka vutomi byakwe swin’we ni bya vanhu hinkwavo, hi ta humeleriwa hi . . . khombo lerikulu.” Xitsundzuxo xexo xi humesiwe emalembeni ya 20 lama hundzeke. Khombo leri Toffler a nga vulavula ha rona ri kona sweswi.

Tanihi leswi lembe xidzana leri ri yaka eku heleni, mintirho ya thekinoloji ni tifilosofi ta vanhu swi tsandzekile ku tisa xiyimo lexinene emisaveni. Ematshan’wini ya mintshembo ya sweswinyana ya mafambiselo lamantshwa ya misava, vanhu va hele matimba, naswona vanhu vo tala va hanya hi ku nonon’hwa siku rin’wana ni rin’wana.

Tinhla ti komba leswaku ku hambana ka ikhonomi exikarhi ka lava fuweke ni swisiwana i kukulu. Dyondzo ya sweswinyana yi komba leswaku 82,7 wa tiphesente ta rifuwo ra misava i ra vanhu lava ringanaka 20 wa tiphesente ntsena. Xana swa hlamarisa leswi nyimpi, ndlala, mavabyi, madzolonga ni hasahasa swi nga andza ematikweni yo tala? Ntshikilelo wo langutana ni ntikelo wa vutomi lowu hohlokaka wu va karhata ngopfu swinene vanhu. Hikwalaho, hambi ku ri ndyangu, lowu wu nga xisekelo lexikulu xa vanhu, wa hohloka.

Hambi leswi lavo tala, vo tanihi Toffler, va ringanyetaka leswaku i vutihlamuleri bya munhu ku “tilavela tindlela letintshwa ta ku titiyisa,” vumbhoni byi komba leswaku vanhu a va nge swi koti ku ololoxa swilo hi voxe.

Ndlela Yin’we Leyi U Nga Yi Tekaka

Bibele yo Kwetsima, leyi yi sunguleke ku tsariwa emalembeni ya kwalomu ka 3 500 lama hundzeke, a yi hundzukanga eka malembe xidzana lama hundzeke. Milawu ya yona a yi hundzuki. Hi xikombiso, marito ya Yeremiya 10:23 ma tikombe ma ri ya ntiyiso namuntlha ku tlula rini na rini: “Munhu l’a fambaka a nga ka a nga lulamisi renḍo ra yena.” Loko vanhu va nga swi koti ku kongomisa ndlela ya vona, yi ta kongomisiwa hi mani? Bibele yi kombisa Xihlovo xa ntiyiso xa nkongomiso: “Hi mina Yehova, Šikwembu ša wena l’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona.”—Esaya 48:17.

Hi matluka ya Bibele, Yehovha Xikwembu u hi dyondzisa ndlela yo tipfuna ha yona. Ma tele hi switsundzuxo leswi hi kombaka ndlela leyi hi faneleke ku famba ha yona. Ndzayo ya yona i ya nkoka namuntlha ku fana ni siku leri yi nga tsariwa ha rona. Xihloko lexi landzelaka xi ta kambisisa mpfuno wa Bibele enkarhini wa hina. Hi timhaka to hambana-hambana, ku sukela eka rihanyo ni rifuwo, vutomi bya ndyangu ni mahanyelo ya hina, u ta kota ku vona leswaku Bibele hakunene i ribye leri tiyeke eka sava leri nga tiyangiki ra misava ya namuntlha.

[Xifaniso lexi nga eka tluka 4]

Bibele i mhingu leyi tiyeke emisaveni ya namuntlha leyi nga ni madzolonga