Xiviko Xa Vahuweleri Va Mfumo
Vutshembeki eHansi Ka Nsivelo
HI MALEMBE ya 11 ntirho wa ku chumayela etikweni rin’wana ra Dzonga-vuxa bya Asia wu ve ehansi ka nsivelo wa ximfumo wa hulumendhe. Hambi swi ri tano, eka malembe ya sweswinyana, vamakwerhu va ve ni xivangelo xo tshemba leswaku vanhu van’wana lava nga ni vutihlamuleri eka hulumendhe va ta tsakela ku herisa xiyimo. Nsivelo wu vonaka wu tlhontlhiwe hi nkucetelo wa matimba wa vukhongeri bya Vujagana eka hulumendhe.
Minkarhi yin’wana, vamakwerhu va ve lava rindziwaka, lava khomiwaka ni ku konanisiwa swinene. Lava tirhaka eka mavandla ya hulumendhe va xungetiwile hi ku ehlisiwa kumbe ku sindzisiwa ku tshika ntirho loko va nga joyini ntlawa wa Tiko wa politiki. Ntlawa wa vahuweleri wu biwe ngopfu.
Timbhoni nakambe ti tekeriwe malunghelo ya le nawini, tanihi mintirho ya tihuvo ta vanhu ni mpfumelelo wa ku fambisa minkosi. (Vafumi va hlawula mufundhisi leswaku a endla leswi.) Eka tindhawu tin’wana, Timbhoni ti siveriwa ni ku tsarisa vukati!
Kambe, lava va langutelaka ntirho kwalaho va vika: “Nkarhi na nkarhi, laha vamakwerhu va langutanaka ni mphikamakaneta hi xivindzi, va nyika vumbhoni lebyi humaka eBibeleni hi ku xiximeka, eku heteleleni minkonaniso ya yima naswona ku rindziwa ka hunguteka, ku pfumelela vamakwerhu ku ya emahlweni va chumayela ni ntirho wo endla vadyondzisiwa hi laha ku humelelaka.”—Matewu 28:19, 20.
Hi xikombiso, makwerhu wa xisati la konanisiweke u vutisiwile laha hi ri kumaka kona vito ra Yehova. Hi xivindzi u pfule Bibele ya yena eka Eksoda 15:3, laha vito ri humelelaka kona. Mukonanisi, ku nga ndhuna ya nyimpi, u landzelerile eBibeleni, a ku: “Ina, hakunene. Ri kona eBibeleni.” Manuku, u hundzulukele eka mufundhisi loyi na yena a a hlanganyela eku konaniseni, a vutisa a ku: “Ha yini mi nga tivisi vanhu mayelana ni vito leri?” Mufundhisi hi ku tsana u hlamurile a ku: “Ina, vito leri ri le ka Testamente ya khale. Kambe hikwalaho ka leswi tiko leri ri nga hava vuxaka byo kanerisana na Israyele, a hi ri tirhisi vito leri.” Hi ku hatlisa makwerhu wa xisati u ntshunxiwile!
Hi ku tirhisa xitsundzuxo xa munhu “la tsakelaka,” maphorisa ya herise wo sungula wa mintsombano minharhu ya muganga hi vusiku lebyi rhangelaka ku sungula ka wona! Hambi swi ri tano, vanhu vo hlayanyana lava nga ni mianakanyo leyinene entlaweni wa maphorisa wu pfunete ku yimisa minkonaniso leyi landzelaka. Hi xivindzi, vamakwerhu va khome mintsombano leyin’wana mimbirhi.
Ku nga khathariseki nkaneto lowukulu wa vukhongeri etikweni leri, ka ha ri na lava va rhandzaka ku lulama. Hi xikombiso, muthori un’wana loko a vone vutshembeki bya vamakwerhu eka misinya ya milawu ni ripfumelo ra vona, u kurise ntshembo lowu engetelekeke eka vamakwerhu. Va nyikiwa vutihlamuleri lebyi engetelekeke entirhweni.
Swilo leswi fanaka swa humelela eka vana va xikolo. Vadyondzisi va timbilu letinene va va nkhensa hikwalaho ka xiyimo xa vona lexi tiyeke lexi va xi tekeleke ripfumelo ra vona.
Hambi leswi xiyimo esin’wini xi veke lexi antswaka eka vamakwerhu, tikereke ta ha ya emahlweni ni ku karhata ka tona ni ku ringeta ndlela yin’wana ni yin’wana leyi kotekaka leswaku ti yimisa ntirho wa vumbhoni. Minkarhi yin’wana va ringeta ku vavisa lava dyondzaka Bibele ni Timbhoni enyameni. Hambi swi ri tano, vanhu lava tsakelaka va ha khitikanela enhlengeletanweni ya Yehova. Ntokoto wun’wana hi lowuya wa mukhegula la nga eka malembe ya va-70. Endzhaku ka loko rin’wana ra matihlo ya yena ri endliwe vuhandzuri, u phofule ku navela ka yena ku va phayona leri pfunaka. Hikwalaho ka malembe ya yena, eku sunguleni u vone onge xilaveko xa 60 wa maawara a xi ri xikulu eka yena, kambe endzhaku ka loko a byi ringetile, u tshubule leswaku a nga byi kota. Entiyisweni, eka masiku yo sungula ya khume, a a endle 38 wa maawara entirhweni wa nsimu, a fambisa tibuku timbirhi, swibukwana swinharhu ni timagazini timbirhi eka nsimu yo nonon’hwa, naswona a a sungule tidyondzo timbirhi ta Bibele. A a tsakile!
Kahle-kahle, xiyimo xa ntirho wa nsimu etikweni leri xi kahle ngopfu. Ngopfu-ngopfu endzhaku ka nhlawulo wa mani na mani, vamakwerhu va swi kotile ku landzelela tindlela to hambana-hambana to veka vumbhoni. Leswi entiyisweni swi hatlisise ntirho. Muhuweleri wa nkarhi hinkwawo wa swi kota ku va na nkombo ku ya eka khume wa tidyondzo ta Bibele. Eku sunguleni, vini va miti a va lava ku tiva leswaku a hi ri vamani, hi huma kwihi ni swin’wana. Sweswi vamakwerhu a va ha boheki ku titivisa. Vanhu va ni ndlala ya swakudya leswi enerisaka swa moya. Nsimu yi lulamele ku tshoveriwa.—Matewu 9:37, 38.
I ntiyiso, vamakwerhu etikweni leri va hlayise vutshembeki ehansi ka ndzingo, sweswinyana va tsakela ku andza ka 7 wa tiphesente eka vahuweleri! Va teka xiyimo lexi fanaka ni lexi mupisalema Davhida a xi tekeke loko a te: “Loko nḍi ri mina, nḍi famba hi ku lulama ka mina.”—Psalma 26:11.