Tirhelani Yehova Hi Mbilu Yin’we
“Kutani ndzi ta tisa ririmi leri tengeke evanhwini, leswaku hinkwavo va ta vitana vito ra Yehova, ku n’wi tirhela hi mianakanyo yin’we.”—SOFONIA 3:9, American Standard Version.
1, 2. (a) Yehova u tisa ku hetiseka ka vuprofeta byihi sweswi? (b) Vuprofeta lebyi byi tlakusa swivutiso swihi?
YEHOVA XIKWEMBU namuntlha u endla nchumu lowu vanhu va ri voxe va nga swi kotiki ku wu fikelela. Kwalomu ka 3 000 wa tindzimi ta vulavuriwa emisaveni leyi yi avaneke, kambe Xikwembu sweswi xi tisa ku hetiseka ka vuprofeta lebyi: “Nḍi ta hunḍula milomu ya matiko, yi v̌a le’yi tengeke, ma ta v̌itana hikwawo e v̌ito ra Yehova, ma ṅwi tirela hi mbilu yi ri yiṅwe.”—Sofonia 3:9.
2 ‘Ririmi leri ri tengeke’ i yini xana? I vamani lava ri vulavulaka? Naswona swi vula yini ku ‘tirhela Xikwembu hi mbilu yin’we’?
Va Vulavula ‘Ririmi Leri Tengeke’
3. ‘Ririmi leri tengeke’ i yini naswona ha yini lava va ri vulavulaka va nga avananga?
3 Hi siku ra Pentekosta ya 33 C.E., moya lowo kwetsima wa Xikwembu wu cheriwe ehenhla ka vadyondzisiwa va Yesu Kriste, wu va nyika matimba ya ku vulavula hi tindzimi leti va nga ti dyondzangiki. Leswi swi endle leswaku va kota ku byela vanhu va tindzimi leto tala hi “mintirho leyikulu ya Xikwembu.” Yehova xisweswo u sungule ku hlanganisa vanhu va matshamelo ya tinxaka hinkwato. (Mintirho 2:1-21, 37-42) Loko endzhakunyana vamatiko lava pfumeleke va ve valandzeri va Yesu, malandza ya Xikwembu hakunene a ma ri vanhu va tindzimi leto tala, va tinxaka hinkwato. Hambi swi ri tano, a va hambanisiwanga hi mindzilakana ya misava, hikuva hinkwavo va vulavula ‘ririmi leri tengeke.’ Leri i ririmi lerikulu ra ntiyiso wa Matsalwa leri vhumbiweke eka Sofonia 3:9. (Vaefesa 4:25) Lava va vulavulaka ‘ririmi leri tengeke’ a va avananga kambe va ‘twanana eku vulavuleni,’ va va lava ‘hlanganeke va va van’we eku anakanyeni ne makungwini ya vona.’—1 Vakorinto 1:10.
4. Sofonia 3:9 yi kombetela eka ntirhisano wa tindzimi leto tala ni tinxaka hinkwato hi ndlela yihi, naswona wu kumeka kwihi namuntlha?
4 ‘Ririmi leri tengeke’ a ri ta pfuna vanhu va matiko ni va tinxaka hinkwato ku tirhela Yehova “hi mbilu yiṅwe,” hi xiviri, ‘hi mbilu hinkwayo.’ A va ta tirhela Xikwembu “hi mianakanyo yin’we” (The New English Bible); “hi ku twanana” (The New American Bible); kumbe “hi mianakanyo yin’we ni mbilu leyi hlanganeke.” (The Amplified Bible) Ku hundzuluxela kun’wana ku ri: “Kutani ndzi ta hundzula milomu ya vanhu hinkwavo yi va leyi baseke, leswaku hinkwavo va ta vitana vito ra Yehova ivi va tirhisana entirhweni wa yena.” (Byington) Ntirhisano wo tano wa tindzimi leto tala ni wa tinxaka hinkwato entirhweni wa Xikwembu wu kumeka exikarhi ka Timbhoni ta Yehova ntsena.
5. I ku tirhisiwa kwihi loku Timbhoni ta Yehova ti kotaka ku tirhisa ririmi rin’wana ni rin’wana ra vanhu ha kona?
5 Leswi Timbhoni ta Yehova hinkwato ti vulavulaka ‘ririmi leri tengeke’ ra ntiyiso wa Matsalwa, va swi kota ku tirhisa ririmi rin’wana ni rin’wana ra vanhu hi ku tirhisiwa loku tlakukeke swinene—ku dzunisa Xikwembu ni ku twarisa mahungu lamanene ya Mfumo. (Marka 13:10; Tito 2:7, 8; Vaheveru 13:15) A hi ku saseka ka swona leswi ‘ririmi leri tengeke’ xisweswo ri endlaka leswaku vanhu va matshamelo ya tinxaka hinkwato va kota ku tirhela Yehova hi ku twanana!
6. Xana Yehova u languta vanhu hi ndlela yihi, kambe i yini lexi nga pfunaka loko mpimo wa xihlawu-hlawu wa ha ri kona embilwini ya Mukriste wo karhi?
6 Loko Petro a ri karhi a veka vumbhoni eka Korneliyo ni Vamatiko van’wana, u te: “Ndzi swi twisisa swinene leswaku Xikwembu a xi hlawuli munhu, kambe ematikweni hinkwawo loyi a xi chavaka a vuya a endla leswinene wa amukeleka eka xona.” (Mintirho 10:34, 35, By) Hi ku ya hi ku hundzuluxela kun’wana, Yehova “a hi Muxiximi wa vanhu,” “a nga voni ku hambana exikarhi ka vanhu,” naswona “a nga kombi ku ya hi nghohe.” (The Emphatic Diaglott; Phillips; New International Version) Tanihi malandza ya Yehova, hi fanele ku languta vanhu va matshamelo ya tinxaka hinkwato tanihi leswi yena a va langutisaka swona. Kambe ku vuriwa yini loko mpimo wa xihlawu-hlawu wu ri kona embilwini ya Mukriste wo karhi? Kutani swi ta pfuna ku xiya ndlela leyi Xikwembu xa hina lexi nga hlawuriki munhu xi tirhisanaka ha yona ni malandza ya xona ya tiko rihi na rihi, rixaka, vanhu ni ririmi.—Nakambe vona Awake! ya Xinghezi ya November 8, 1984, matluka 3-11.
Va Rhandzeka
7. Malunghana ni vuxaka ni Xikwembu, Mukriste un’wana a nga hambani ni un’wana wa tiko kumbe rixaka rihi na rihi hi ndlela yihi?
7 Loko u ri mbhoni leyi khuvuriweke ya Yehova, hi nkarhi wun’wana hi ku fanana u ‘hlunamile ni ku rila hikwalaho ka manyala’ lama endlekaka emafambiselweni lama yo biha. (Ezekiel 9:4) A wu ‘file eswidyohweni swa wena,’ kambe Xikwembu hi tintswalo xi ku tshinete eka xona ha Yesu Kriste. (Vaefesa 2:1-5; Yohane 6:44) Etimhakeni leti, a wu nga hambananga ni van’wana lava sweswi va nga vapfumeri-kuloni. Na vona a va tshikileriwe hi vuhomboloki, a va ‘file eswidyohweni swa vona,’ ivi va va vaamukeri va tintswalo ta Xikwembu ha Yesu Kriste. Naswona ku nga khathariseki rixaka ra hina kumbe tiko, i mhaka ya ripfumelo ntsena leswi un’wana ni un’wana wa hina sweswi a nga ni xiyimo na Yehova Xikwembu tanihi timbhoni ta yena.—Varhoma 11:20.
8. Hagai 2:7 yi hetiseka hi ndlela yihi sweswi ke?
8 Marito ya vuprofeta ya Hagai 2:7 ma hi pfuna ku vona ndlela leyi hi fanelaka ku languta vapfumeri-kulorhi va matiko yo hambana-hambana ha yona. Kwalaho Yehova u te: “Nḍi ta ṭekaṭekisa ni matiko hikwawo, kutani le’ŝi ranḍekaka ŝa matiko hikwawo ŝi ta ta kwala, nḍi v̌a nḍi tata yindlu leyi hi ku kwetsima.” Ku kurisiwa loku ku vhumbiweke ka vukhongeri lebyi tengeke ka karhi ka humelela etempeleni ya ntiyiso ya Xikwembu, xivandla xa vugandzeri bya xona. (Yohane 4:23, 24) Kambe i yini “le’ŝi ranḍekaka ŝa matiko hikwawo”? I magidi ya varhandzi va leswo lulama lava amukelaka kahle ku chumayeriwa ka Mfumo. Va ri karhi va huma ematikweni hinkwawo ne tinxakeni hinkwato va khitikanela ‘entshaveni ya yindlu ya Yehova,’ va va timbhoni ta yena leti khuvuriweke na xiphemu xa “ntshungu lowukulu” wa matiko hinkwawo. (Esaya 2:2-4; Nhlavutelo 7:9) Lava va dzunisaka Yehova tanihi xiphemu xa nhlengeletano ya yena ya la misaveni i vanhu lava baseke, va mahanyelo lamanene, lava chavaka Xikwembu—hakunene va rhandzeka ngopfu. Manuku ke, entiyisweni, Mukriste un’wana ni un’wana wa ntiyiso u fanele a lava ku kombisa rirhandzu ra vamakwerhu eka hinkwavo lava va rhandzekaka lava amukelekaka eka Tata wa hina wa rirhandzu la nga etilweni.
Vumunhu Bya Vona I Byintshwa
9. Hambi loko nkarhi lowu hundzeke hi nga ehleketanga kahle hi vanhu vambe, ha yini swilo swi fanele ku hambana sweswi leswi hi nga Vakriste?
9 Vamakwerhu va xinuna ni va xisati va moya emisaveni hinkwayo na vona va rhandzeka hikuva va hlayise ndzayo ya ku ‘hluvula munhu wa khale na mintirho ya yena ivi va ambala munhu lontshwa.’ “Loyi a pfuxetiwaka kambe na kambe, leswaku mi kota ku tiva swinene Loyi a n’wi tumbuluxeke hi xifaniso xa yena. Laha a ku na Mugriki ni Muyuda, a ku na la yimbeke ni la nga yimbangiki, a ku na munhu wa matiko ni munhu wa hava, a ku na hlonga ni muntshunxeki, kambe Kriste ú hinkwaswo, ni ka hinkwavo.” (Vakolosa 3:9-11) Loko munhu eku sunguleni a a nga n’wi teki kahle Mugriki kumbe Muyuda, kumbe van’wana lava nga vambe eka yena, swilo sweswi swi fanele ku hambana leswi a nga Mukriste. Ku nga khathariseki rixaka, tiko, kumbe ndhavuko, lava nga ni “munhu lontshwa” va hlakulela ni ku kombisa mihandzu ya moya lowo kwetsima wa Xikwembu—rirhandzu, ku tsaka, ku rhula, ku tiyisela, vunene, ku hanana, ku tshembeka, musa ni ku tikhoma. (Vagalatiya 5:22, 23) Leswi swi va susumetela ku rhandza vagandzeri-kulobye va Yehova.
10. Loko hi ringiwa ku vulavula swo biha hi vapfumeri-kulorhi va rixaka kumbe tiko rin’wana, Tito 1:5-12 yi nga hi pfuna njhani?
10 Ku hambana ni malandza ya Yehova, vanhu van’wana va misava va vulavula hi ndlela yo biha hi vanhu va matshamelo ya tinxaka leti nga riki ta ka vona. Phela, ehenhleni ka vanhu va yena n’wini, muprofeta wa Mukreta u tshama a ku: “Vakreta i vanhu va mavunwa masiku hinkwawo; i swihari leswo biha, ni malolo lama nga ni makolo.” Muapostola Pawulo u tsundzuxiwe marito wolawo loko swi lavekile ku miyeta vadyondzisi va mavunwa lava nga exikarhi ka Vakriste lava nga exihlaleni xa Kreta. Kambe kahle-kahle Pawulo a a nga vuli swona ku: ‘Vakriste hinkwavo va Vakreta va hemba, va ni tihanyi, va loloha naswona va ni makolo.’ (Tito 1:5-12) E-e, hikuva Vakriste a va vulavuli hi ku tseketsela van’wana. Ku tlula kwalaho, vanyingi va Vakriste volavo va Vakreta a va ambele “munhu lontshwa,” naswona van’wana a va faneleka emoyeni ku hlawuriwa tanihi vakulu. Leswi swi lava miehleketo leyikulu loko hi tshuka hi ringeriwa ku vulavula swo biha hi vamakwerhu va xinuna ni va xisati va moya va rixaka kumbe tiko ro karhi.
Languta Van’wana Va Ri Lava Ku Tlulaka
11. Loko xihlawu-hlawu xa muxaka wun’wana ni wun’wana xi ri kona embilwini ya Mukriste, xana a nga endla yini?
11 Hi tlhelo rin’wana, loko Mukriste a ve ni ku ya hi nghohe eka rixaka rin’wana kumbe tiko, kumbexana a a ta kombisa leswi hi marito kumbe swiendlo. Hi ku fanana, leswi swi nga vanga mintlhaveko leyi vavisekeke, ngopfu-ngopfu ebandlheni leri vumbiweke hi tinxaka ta matshamelo lama hambana-hambaneke. Entiyisweni, a ku na Mukriste loyi a a ta lava ku veka xihinga xo tano evun’weni bya vanhu va Xikwembu. (Psalma 133:1-3) Kutani loko xihlawu-hlawu xin’wana ni xin’wana xi humelela embilwini ya Mukriste, a nga khongela khwatsi a ku: “Šikwembu, nḍi kambe, u tiv̌a mbilu ya nga! Nḍi ringe, u tiv̌a ku anakanya ka mina! Languta loko nḍi famba hi ndlela ya ku homboloka, kutani u nḍi fambisa e ndleleni ya v̌utomi le’byi nga heriki.”—Psalma 139:23, 24.
12. Ha yini hi nga fanelanga ku tidzunisa hi hexe kumbe hi van’wana va matshamelo ya tinxaka ta hina?
12 I swinene ku teka langutelo leri kongomeke ra leswaku hinkwerhu ka hina hi vanhu lava nga hetisekangiki lava a va nga ta va na xiyimo na Xikwembu hi laha ku heleleke loko a ku nga ri hi gandzelo ra Yesu Kriste. (1 Yohane 1:8–2:2) Manuku ke, i yini lexi endlaka leswaku hi hambana ni van’wana? Leswi hi nga hava lexi hi nga nyikiwangiki, ha yini hi tidzunisa hi hexe kumbe hi van’wana va matshamelo ya tinxaka ta hina?—Ringanisa 1 Vakorinto 4:6, 7.
13. Hi nga seketela vun’we bya bandlha hi ndlela yihi, naswona ku nga dyondziwa yini eka Vafilipiya 2:1-11?
13 Hi nga seketela vun’we bya bandlha loko hi amukela ni ku komba ku tlangela timfanelo letinene ta van’wana. Muapostola Pawulo wa Muyuda u nyike hinkwerhu ka hina swo ehleketa hi swona loko a byele Vafilipiya va Vamatiko a ku: “Hetisisani ku tsaka ka mina hi ku va ni miehleketo yo fana, ni rirhandzu ro fana, ni moya wun’we ni ku anakanya kun’we. Mi nga endli nchumu hi moya wa ku tirhandza, kumbe hi ku tidzunisa hi swa hava, kambe un’wana ni un’wana a a titsongahate eka van’wana, a nga anakanyi leswaku wa va tlula hi vunene.” Langutelo leri faneleke eka hina ku ri kombisa eka vanhu-kulorhi va rixaka rihi na rihi kumbe tiko ri kombisiwe eka Yesu Kriste. Hambi leswi a a ri xivumbiwa xa matimba xa moya, kute loko “a ri la fanaka ni vanhu” kutani a titsongahata ku fikela eku feni emhandzini ya nxaniso hikwalaho ka vanhu lava dyohaka na tinxaka ni matiko hinkwawo. (Vafilipiya 2:1-11) Tanihi valandzeri va Yesu, manuku, xana a hi fanelanga ku va ni rirhandzu, ku titsongahata ni ku va ni ntwelo-vusiwana, hi amukela leswaku van’wana va hi tlula?
Yingisa Ivi U Xiya-xiya
14. Xana hi nga ha pfuniwa hi ndlela yihi ku xiya van’wana tanihi lava hi tlulaka?
14 Hi nga ha pfuniwa ku xiya van’wana tanihi lava hi tlulaka loko hakunene hi yingisa loko va vulavula ivi hi xiya mahanyelo ya vona hi vukheta. Hi xikombiso, hi ku tshembeka hi nga ha pfumela leswaku nkulu-kulorhi—kumbexana wa rixaka rin’wana—wa hi tlula hi vutshila byo nyikela ndzayo leyi humelelaka eXikolweni xa Vutirheli bya le Tilweni. Hi nga ha swi vona leswaku i vumoya bya yena, ku nga ri mavekele ya yena ya marito kumbe mavulavulelo, leswi n’wi endlaka leswaku a kuma vuyelo lebyinene eku pfuneni ka vapfumeri-kulobye ku va vahuweleri lava fanelekaka va Mfumo. Naswona swi le rivaleni leswaku Yehova u katekisa matshalatshala ya yena.
15. I yini lexi hi nga ha xi xiyaka loko hi yingisela tinhlamuselo ta vagandzeri-kulorhi?
15 Loko hi vulavurisana ni vamakwerhu va xinuna ni va xisati kumbe ku yingisela tinhlamuselo ta vona eminhlanganweni, hi nga twisisa leswaku van’wana va vona va ni ku twisisa loku antswaka ka mintiyiso yo karhi ya Matsalwa ku tlula leswi hina hi yi twisisisaka swona. Hi nga ha xiya leswaku rirhandzu ra vona ra vamakwerhu ri vonaka ri tiyile, va vonaka va ri na ripfumelo leri engetelekeke, kumbe va nyika vumbhoni bya ntshembo lowukulu eka Yehova. Kutani hambi i va matshamelo ya rixaka ra hina kumbe e-e, va hi susumetela eku rhandzaneni ne mintirhweni leyinene, va hi pfuna ku tiyisa ripfumelo ra hina ni ku hi susumetela ku tshemba Tata wa hina wa le tilweni swinene. (Swivuriso 3:5, 6; Vaheveru 10:24, 25, 39) Yehova hakunene u titshinete kusuhi na vona, kutani na hina hi fanele ku endla tano.—Ringanisa Yakobo 4:8.
Va Katekisiwile Ni Ku Tiyisiwa
16, 17. Kombisa mhaka ya leswaku Yehova a nga yi hi nghohe eku katekiseni ka malandza yakwe ya tiko kumbe rixaka rihi na rihi.
16 Yehova a nga hlawuli munhu eku katekiseni ka malandza yakwe ya tiko kumbe rixaka rihi na rihi. Hi xikombiso, xiya tiko ra Brazil. A ku nga ri eka varhumiwa vambe kambe emilon’wini ya vatluti va nhungu va le Brazil laha vanhu eBrazil va tweke rungula ra Mfumo ro sungula kwalomu ka lembe ra 1920. Minkateko ya Xikwembu yi ve erivaleni, hikuva hi lembe ra ntirho ra 1987, kuve ni nhlohlorhi ya 216 216 wa vahuweleri va Mfumo etikweni rero ra vaaki va 141 302 000—ndzinganyeto wa muhuweleri un’we eka 654.
17 Xiya xikombiso xin’wana xa ku katekisa ka Xikwembu. Hi April 1923 timbhoni timbirhi ta vantima ta Yehova leti humaka exihlaleni xa Caribbean xa Trinidad ti rhumiwe ku ya twarisa rungula ra Mfumo eAfrika Vupela-dyambu. Kutani a ku ri Makwerhu wa xinuna ni wa xisati W. R. Brown lava tirheke kwalaho hi malembe yo tala, ivi a tiveka tanihi “Brown wa Bibele.” Va “byarile” ivi ‘Xikwembu xi mirisa’ tanihi leswi van’wana na vona va tirheke eka xivandla xexo lexikulu. (1 Vakorinto 3:5-9) Namuntlha, nhlayo ya vahuweleri va Mfumo yi tlula 32 600 eGhana naswona yi tlula 133 800 eNigeria ntsena.
18, 19. Nyika swikombiso swa ndlela leyi Xikwembu xa hina lexi nga hlawuriki munhu xi tiyisaka malandza ya xona ya tinxaka ni matiko hinkwawo ha yona.
18 Yehova a ngo katekisa malandza ya yena ya matiko ni tinxaka hinkwato ntsena kambe u tlhela a ma tiyisa. Hi xikombiso, xiya mhaka ya Timbhoni timbirhi ta Yehova ta Majapani. Hi June 21, 1939, Katsuo Miura ni nsati wakwe va khomiwile hi tihanyi, va pfaleriwa, ivi va hambanisiwa ni n’wana wa vona wa mufana wa malembe ya ntlhanu hi vukhale, loyi a a fanele ku hlayisiwa hi kokwa wa yena wa xisati. Makwerhu wa xisati Miura u ntshunxiwile endzhaku ka tin’hweti ta nhungu, kambe Makwerhu Miura u yimisiwe malembe lama tlulaka mambirhi a nga si sengisiwa. U xaniseke hi ku khomiwa hi tihanyi, a kumiwa a ri ni nandzu, ivi a gweviwa malembe ya ntlhanu. Ekhotsweni le Hiroshima, Xikwembu xi n’wi tiyisile hi Matsalwa, lama tiseke ku chavelela ni matimba lama nga hlulekiki. Hikwalaho ka lexi vonakeke xi ri hlori, Makwerhu Miura u ponile hi August 6, 1945 loko ku buluka ka bomo ya athomo ku mbundzuxe khotso rakwe. Tin’hweti timbirhi endzhakunyana, u kote ku hlangana nakambe ni nsati wa yena ni n’wana wakwe wa mufana en’walungu wa Japani.
19 Hi nkarhi wa Nyimpi ya Vumbirhi ya Misava, ku xanisiwa lokukulu ku tokotiwile hi Timbhoni ta Yehova ematikweni yo tala. Hi xikombiso, Robert A. Winkler a a ri makwerhu un’wana wa Mujarimani loyi a xanisekeke etikampeni ta nxaniso ta Vunazi eJarimani na le Netherlands. Hikuva a a nga ta xenga Timbhoni-kulobye, u biwe hi tihanyi lerova a nga ha tiveki. Kambe u tsarile: “Miehleketo ya switshembiso swa Yehova swa ku pfuna munhu etinxakeni hinkwato ta maxangu yi ndzi nyike ku chavelela ni matimba ya ku tiyisela hinkwaswo leswi. . . . Hi Mugqivela ndzi biwe hi Gestapo, naswona hi Musumbunuku lowu landzeleke a ndzi fanele ku konanisiwa hi vona nakambe. Xana a ku ta humelela yini sweswi naswona a ndzi ta endla yini? Ndzi ye eka Yehova hi xikhongelo, ndzi titshege hi switshembiso swa yena. Ndzi swi tivile leswaku leswi a swi vula ku tirhisiwa ka nyimpi leyi hlomeke ya le tilweni hikwalaho ka ntirho wa Mfumo ni nsirhelelo wa vamakwerhu va Vukriste. A ku ri ndzingo lowukulu eka mina ku wu tiyisela naswona hi siku ra vukhume-nkombo a ndzi hele matimba hi laha ku heleleke, kambe ndzi nkhense Yehova leswi hi matimba ya yena ndzi nga swi kota ku tiyisela ndzingo lowu ivi ndzi hlayisa vutshembeki bya mina.”—Psalma 18:35; 55:22; 94:18.
Ku Tlangela Vumakwerhu Bya Hina
20. Ku xixima ka hina ka vapfumeri-kulorhi va tinxaka ni matiko hinkwawo ku nga engeteleka hi ndlela yihi ke?
20 Handle ko tipfinyinga, Yehova u katekisa ni ku tiyisa timbhoni takwe ta matiko ni tinxaka hinkwato. A nga yi hi nghohe, naswona tanihi malandza ya yena lama tinyiketeleke, a hi na xisirhelelo kumbe xivangelo xa ku komba xihlawu-hlawu. Ku tlula kwalaho, ku xixima ka hina ka vamakwerhu va xinuna ni va xisati va tinxaka ni matiko hinkwawo ku ta engeteleka loko hi xiya tindlela leti va hi tlulaka ha tona. Na vona va tirhisa vutlhari bya le tilweni, lebyi nga endliki ku hambana ka xihlawu-hlawu naswona byi veka mihandzu leyinene. (Yakobo 3:13-18) Ina, naswona musa wa vona, ku hanana, rirhandzu ni timfanelo letin’wana hinkwato ta Xikwembu swi hi nyika swikombiso leswinene.
21. Xana hi fanele ku tiyimisela ku endla yini?
21 Manuku ke, i ku nkhensa muni konghasi loku hi faneleke ku va na kona, eka vamakwerhu va tinxaka hinkwato, va matiko hinkwawo! Hi mpfuno ni minkateko ya Tata wa hina wa le tilweni, a hi ‘n’wi tirheleni hi mbilu yin’we’ hi rirhandzu ra vamakwerhu na hi ku xixima ka xinghana. Hakunene, ku fanele ku va ku navela ka hina lokukulu ni ku tiyimisela loku tiyeke ka ku tirhela Yehova hi ku twanana.
Hi Tihi Tinhlamuselo Ta Wena Xana?
◻ Xana ‘ririmi leri tengeke’ ri pfuna malandza ya Yehova ya matshamelo ya tinxaka hinkwato ku endla yini?
◻ Hagai 2:7 yi hetiseka hi ndlela yihi namuntlha, naswona leswi swi fanele swi khumba langutelo ra hina ra malandza laman’wana ya Xikwembu hi ndlela yihi?
◻ Xana Vafilipiya 2:3 yi nga khumba vuxaka bya hina ni vanhu va tinxaka ni matiko hinkwawo hi ndlela yihi?
◻ Loko hi yingisela ni ku xiya-xiya, xana hi ta vona yini eka vapfumeri-kulorhi va matshamelo man’wana ya tiko?
[Swifaniso leswi nga eka tluka 17]
Vanhu va tinxaka ni va matiko hinkwawo va dzunisa Yehova hi ku twanana
[Xifaniso lexi nga eka tluka 18]
Yingisela khwatsi ivi u xiya-xiya. U ta susumetiwa hi rirhandzu ni ripfumelo leswi vonekaka emaritweni ni le swiendlweni swa timbhoni tin’wana ta Yehova