Ndlela Yo Kuma Ntshembo Hambi Ku Ri Ni Gome
TIANAKANYE u humeleriwe hi swilo leswi landzelaka: Nhundzu ya wena hinkwayo yi herisiwile, u sale u ri mupfumari. Vana va wena—ntsako wa vutomi bya wena—va file. Munghana wa wena wa vukati a nga ku khutazi. Rihanyo ra wena ri hohlokile hi xiviri. Siku rin’wana ni rin’wana ri ta ni maxangu.
Loko xexo a ku ri xiyimo lexi a wu ri eka xona, xana a wu ta vona ku ri ni xivangelo xo ya emahlweni u hanya? Kumbe a wu ta pfumelela gome?
Xiyimo lexi vavisaka lexa ha ku hlamuseriwaka i mhaka leyi humeleleke evuton’wini bya Yobo, wanuna la hanyeke eminkarhini ya Bibele. (Yobo, tindzima 1, 2) Loko a karhateke swinene, Yobo u ririle: “Mbilu ya mina yi phiriwile hi v̌utomi bya mina.” A ta va a pfumele ku fa leswaku a wisa. (Yobo 10:1; 14:13) Hambiswiritano, ku nga khathariseki ku xaniseka ka yena lokukulu, Yobo u hlayise vutshembeki bya yena eka Xikwembu. Hikwalaho, Yehovha u “katekis[e] mahetelelo ya Yobo e ku tlurisa ku sungula ka yena.” Xisweswo u fe hi ku rhula, “a talele hi masiku.”—Yobo 42:12, 17.
Yobo u veke xikombiso lexinene eku tiyiseleni lexi bumabumeriwaka ku fikela namuntlha. Miringo ya yena yi antswise vumunhu bya yena ni ku susumeta van’wana leswaku va endla mintirho leyinene. (Yakobo 5:10, 11) Xa nkoka ku tlula hinkwaswo, vutshembeki bya Yobo lebyi hetisekeke byi tsakise mbilu ya Yehovha. (Swivuriso 27:11) Xisweswo, khombo leri vavisaka eku heteleleni ri hundzuke ku hlula lokukulu ka ku chava Xikwembu, ripfumelo ni vutshembeki leswi tiseke mikateko eka Yobo ni le ka hinkwavo lava khumbiweke hi xikombiso xa yena.
Ku Va Ni Ntshembo Ku Nga Khathariseki Miringo Yo Hambana-hambana
U nga ha va u xanisiwa hi miringo leyi fanaka ni leyi tokotiweke hi Yobo. Ku lahlekeriwa hi murhandziwa wa wena ku nga ha va ku ku siye u karhatekile emintlhavekweni. Vuvabyi lebyikulu byi nga ha va byi endle vukona bya wena byi va maxangu lama hlomulaka mbilu. Vutomi bya wena hinkwabyo byi nga ha vonaka byi pfilunganyekile hikwalaho ka ku dlaya vukati loku vavisaka mbilu. Swiphiqo swa ikhonomi swi nga ha va swi ku siye u ri mupfumari. U nga ha xanisiwa hi ndlela ya tihanyi hi vakaneti va vugandzeri bya ntiyiso lava nga ni rivengo. Matshalatshala yo langutana ni miringo ya wena ma nga ha va ma ku siye u titwa onge vumundzuku bya wena a byi pfuni nchumu.—1 Petro 1:6.
Ematshan’weni yo pfumelela ku hluriwa hi gome, tivutise, ‘Ha yini ndzi xaniseka?’ Wa xaniseka hikuva u hanya emisaveni leyi nga “le hansi ka matimba ya Lowo biha,” Sathana Diyavulosi. (1 Yohane 5:19) Hikwalaho ka sweswo, un’wana ni un’wana wa xaniseka. Hinkwerhu ha khumbeka hi ndlela yo karhi hi rivengo leri hlohloteriwaka hi Diyavulosi ro venga rungula ra Mfumo, marito ya van’wana lama nga kombisiki rirhandzu, kumbe swiendlo leswi nyenyetsaka swa mahanyelo ya nkala-vukwembu lama tolovelekeke ‘eminkarhini leyi yo nonon’hwa.’—2 Timotiya 3:1-5.
Loko swin’wana leswi nga tsakisiki swi humelerile evuton’wini bya wena, u nga ha va u ve muhlaseriwa wa “nkari ni khombo.” (Eklesiasta 9:11) Hi hala tlhelo, swilo minkarhi yin’wana a swi fambi kahle evuton’wini hikwalaho ka vudyoho bya hina vini lebyi hi byi kumeke tanihi ndzhaka. (Varhoma 5:12) Hambiloko u endle xidyoho lexikulu kambe u hundzukile ni ku lava mpfuno wa moya, u nga titwi onge Xikwembu xi ku cukumetile. (Pisalema 103:10-14; Yakobo 5:13-15) Xa hi khathalela ku tlula munhu wihi na wihi. (1 Petro 5:6, 7) U nga tiyiseka leswaku “Yehova o kusuhi ni la’v̌a nga ni timbilu le’ti ṭhov̌ekeke, wa ponisa v̌a mimoya le’yi khinyekeke.” (Pisalema 34:18) Ku nga khathariseki vukulu kumbe ndlela leyi ndzingo wa wena wu vavisaka ha yona, Yehovha a nga ku nyika vutlhari byo langutana na wona. (Yakobo 1:5-8) Minkarhi hinkwayo tsundzuka leswaku Yehovha a nga horisa timbanga hinkwato. Loko a ku rhandza, ku hava lexi nga ku sivelaka ku kuma hakelo ya vutomi.—Varhoma 8:38, 39.
Xana Miringo Yi Nga Hi Vuyerisa?
Ku ni xivuriso xa khale lexi nge, “Hambi wu nga ringi nkuku, ri ta xa.” Yoleyo i ndlela yo olova yo vula leswaku ku nga khathariseki leswaku swilo swi bihe njhani, minkarhi hinkwayo u nga va ni xivangelo xo va ni ntshembo. Xikongomelo xa hinkwaswo leswi tsariweke eRitweni ra Xikwembu hileswaku “hi va ni ku langutela.” (Varhoma 15:4) Ku nga khathariseki ku nonon’hwa ka xiyimo xa wena, switshembiso ni misinya ya milawu leyi nga eBibeleni swi nga ku tisela ntsako ni ntshembo lowuntshwa.
Matsalwa ma kombisa leswaku ‘nhlomulo i wa nkarhinyana naswona wa vevuka’ loko wu ringanisiwa ni mikateko leyi nga riki na ku hela leyi vekeriweke lava rhandzaka Xikwembu. (2 Vakorinto 4:16-18) Bibele yi tlhela yi kombisa leswaku timfanelo to chava Xikwembu leti hlakuleriwaka hi nkarhi wa miringo i ta nkoka swinene ku tlula ndhuma kumbe rifuwo ra swilo leswi vonakaka. (1 Yohane 2:15-17) Xisweswo, ku xaniseka ku nga tisa mimbuyelo leyinene. (Vaheveru 5:8) Entiyisweni, ku tirhisa leswi dyondziwaka hi nkarhi wa miringo swi nga ku tisela mikateko leyi nga rindzeriwangiki.
Ndzingo lowu tikaka wu nga ha ku endla munhu wa mahanyelo lamanene. U nga ha pfumela leswaku enkarhini lowu hundzeke a wu ri ni vumunhu lebyi a byi khunguvanyisa van’wana naswona byi sivela nhluvuko wa wena wa moya. Kumbexana a ku ri ku titshemba ku tlula mpimo. Endzhaku ka ku va u hlaseriwe hi khombo ro karhi, hi xitshuketa u nga ha va u xiye ndlela leyi u tsaneke ha yona ni ndlela leyi u lavaka ku va ni vanhu van’wana ha yona. Loko ndzingo wa wena wu ku dyondzise dyondzo yoleyo naswona u endle mindzulamiso leyi lavekaka, wu ku pfunile.
Ku vuriwa yini hiloko enkarhini lowu hundzeke van’wana va swi kume swi tika ku tirhisana na wena hikwalaho ka leswi a swi ku tikela ku lawula vukarhi bya wena? Leswi swi nga ha va swi ku vangele ntshikilelo wo karhi erihanyweni ra wena. (Swivuriso 14:29, 30) Hambiswiritano, sweswi xiyimo xi nga ha va xi antswa hikuva u titshega hi moya wa Xikwembu leswaku wu ku pfuna ku tikhoma.—Vagalatiya 5:22, 23.
Ku fana ni van’wana, swi nga ha endleka nkarhi wun’wana u pfumale ntwela-vusiwana wo va ni tintswalo eka lava ku dyoheleke. Kambe loko wena hi wexe u wele exiyin’weni lexi laveke leswaku u kombiwa tintswalo, kumbexana sweswi u ni mboyamelo lowukulu wo kombisa tintswalo eka van’wana. Ntwela-vusiwana lowu khutazaka, ku khumbeka ni tintswalo leti u kombisiweke tona swi ku endle u xiya leswaku u fanele u kombisa timfanelo leti fanaka eka vadyohi lava hundzukaka. Loko nhlomulo wa wena wu ku susumetele ku lulamisa ku tsana loku eka vumunhu bya wena, lebyi i vuyelo byin’wana lebyi u byi kumeke eka leswi ku humeleleke. U swi vonile leswaku “loyi a tsetselelaka van’wana wa khana esikwini ra ku avanyisa.”—Yakobo 2:13; Matewu 5:7.
Ku vuriwa yini hiloko ndzayo leyi u yi kumeke evandlheni ra Vukreste yi vange leswaku u lahlekeriwa hi malunghelo lawa a wu ma rhandza swin’we ni ku lahlekeriwa hi xichavo xa van’wana? U nga pfumeleli ku hluriwa hi gome. Xiendlo xa ku laya xa pfuna leswaku vandlha ri tshama ri basile, kambe swikongomelo swa xona swi katsa ku kondletela ka vumoya bya mudyohi. Hakunene, “ku laya hinkwako, ku vonaka ku ri loku vavisaka enkarhinyana wolowo, loku nga tsakisiki, kambe endzhaku, ku veka mihandzu ya ku rhula ya vutomi lebyo lulama, eka lava va dyondzisiweke hi kona.” (Vaheveru 12:11, xiitaliki i xerhu.) Hambileswi ndzayo yi nga ha vaka nxupulo lowu vavaka, a yi siyi munhu la hundzukaka la titsongahataka a nga ri na ntshembo. Hosi Davhida wa le Israyele wa khale u layiwe hi ndlela yo vava hikwalaho ko dyoha, kambe u hundzukile naswona eku heteleleni u bumabumeriwile hi ndlela yo hlawuleka tanihi wanuna wa ripfumelo leri hlamarisaka.—2 Samuwele 12:7-12; Pisalema 32:5; Vaheveru 11:32-34.
Ndzingo wu nga ha va ni vuyelo lebyi enteke eka langutelo ra wena. Enkarhini lowu hundzeke, nyingiso wa wena wu nga ha va wu yisiwe eka tipakani ta swilo leswi vonakaka ni minhluvuko leyi ku endlaka u va ni ndhuma ni xikhundla emisaveni leyi. Kumbexana ndzingo lowu fambisanaka ni swa timali kumbe ku lahlekeriwa hi swilo leswi vonakaka wu yise mianakanyo ya wena eka swilo leswi nga swa nkoka ngopfu. (Ringanisa Vafilipiya 1:10.) Sweswi wa swi xiya leswaku mimpimanyeto ni tipakani ta moya entirhweni wo kwetsima hi swona ntsena swilo leswi tisaka ntsako wa xiviri ni ku eneriseka loku tekaka nkarhi wo leha.
Tshemba Yehovha
Ku nyikela ntirho wo kwetsima eka Yehovha ku nga ha vanga ku xanisiwa hi lava kanetaka tidyondzo ta wena ta Vukreste. U nga ha titwa u tshikilelekile hikwalaho ka ndzingo lowu, kambe u nga vuyeriwa swinene eka wona. Ndzingo lowu wu nga ha tiyisa ripfumelo ra wena. Ku tlula kwalaho, van’wana lava xanisiwaka va nga ha khutaziwa ni ku tiyisiwa hi ku xiya ku tiyisela ka wena. Lava vonaka mahanyelo ya wena lamanene va nga ha susumeteriwa ku dzunisa Xikwembu. Hambi ku ri lava lwisanaka na wena va nga ha khomiwa hi tingana ivi va bumabumela mintirho ya wena leyinene!—1 Petro 2:12; 3:16.
Leswaku u papalata ku hluriwa hi gome loko u xanisiwa, u fanele u tshemba Yehovha. Rito ra yena ri kombisa leswaku ku ntshunxeka eka miringo ku ta ta hakunene, kambe swi nga endleka ku nga fiki hi ku hatlisa hilaha u nga rhandzaka hakona. Hi nkarhi lowu fanaka, “loko [u] ri karhi [u] endla leswinene, [u] u nga karhal[i].” (2 Vatesalonika 3:13) Tshama u ri karhi [u] lava tindlela to langutana ni miringo ni ku yi tiyisela. Hambiloko swilo swi languteka swi nga tshembisi, “nyiketa Yehova e timhaka ta wena, o ta ku seketela; a nga ka a nga pfumeli ni siku riṅwe l’a lulameke a ṭekaṭekisiwa.” (Pisalema 55:22) Ematshan’weni yo tiputa, anakanya hi ndlela leyi u katekeke ha yona leswi u tivaka Yehovha, ku va ni ndhawu exikarhi ka vanhu va yena ni ku va ni ntshembo wa vutomi lebyi nga heriki.—Yohane 3:16, 36.
Hlayisa miehleketo ya wena yi langute swilo leswi nga swa nkoka. Yana eka Yehovha siku rin’wana ni rin’wana hi xikhongelo, u kombela matimba yo tiyisela. (Vafilipiya 4:6, 7, 13) Susa mianakanyo yihi na yihi yo rihisela lava endlaka leswaku u xaniseka. Tshikela timhaka emavokweni ya Yehovha. (Varhoma 12:19) Tshama u ri karhi u lava tindlela to antswisa vumunhu bya wena, u hlakulela timfanelo ta Vukreste. (2 Petro 1:5-8) Tlangela xin’wana ni xin’wana lexi u endleriwaka xona hi van’wana, ku katsa ni vakulu lava khathalelaka swilaveko swa wena swa moya hi rirhandzu. (Vaheveru 13:7, 17) Tshembeka eka Xikwembu, u hlayisa tihlo ra wena ri ri ehakelweni ya vutomi, u tiyiseka leswaku hambi ku ri rifu a ri nge ku tekeli yona.—Yohane 5:28, 29; 17:3.
Loko sweswi u ri ni gome lerikulu kumbe miringo leyikulu, “ṭhemba Yehova hi mbilu ya wena hikwayo,” naswona eku heteleleni ntsako lowukulu wu ta siva gome ni maxangu ya wena. (Swivuriso 3:5, 6; Yohane 16:20) Mbitsi yi ta siviwa hi ntsako loko Xikwembu xi ku katekisa hilaha xi endleke hakona eka Yobo. Swiphiqo swa namuntlha a swi ringani na nchumu loko swi ringanisiwa ni hakelo ya wena. (Ringanisa Varhoma 8:18.) Ku tiyisela ka wena hi ku tshembeka ku nga khutaza van’wana ni ku ku pfuna ku hlakulela timfanelo to saseka ta Vukreste leti fambisanaka ni “munhu lontshwa.” (Vaefesa 4:23, 24; Vakolosa 3:10, 12-14) Kutani ke, vana ni xivindzi xo tirhisa xitsundzuxo xa vutlhari xa muapostola Petro lexi nge: “Lava twisiwaka ku vava hilaha Xikwembu xi rhandzaka hakona, a va endle leswo lulama, kutani va veka mimoya ya vona emavokweni ya Muvumbi loyi a tshembekaka.”—1 Petro 4:19.
[Xifaniso lexi nga eka tluka 23]
Fana na Yobo. U nga lahlekeriwi hi ntshembo
[Xifaniso lexi nga eka tluka 24]
Tshemba Yehovha hi mbilu ya wena hinkwayo