Xikhutazo

Nhlamuselo: I nchumu lowu nyikaka xivindzi kumbe lowu nyikaka ntshembo. Un’wana ni un’wana wa xi lava xikhutazo. Ku xi nyikela swi nga ha lava leswaku u pfuna hi xiviri kumbe u kombisa ku tlangela. Hakanyingi swi katsa ku pfuna un’wana leswaku a vona ndlela yo langutana ni xiyimo xo karhi xo nonon’hwa kumbe ku bula hi swivangelo swo tshembela eka vumundzuku lebyi antswaka. Bibele yi nyika xisekelo lexinene xa xikhutazo xo tano, naswona tindzimana leti tshahiweke laha hansi ti nga pfuna swinene ku khutaza vanhu lava langutaneke ni swiyimo swo hambana-hambana. Minkarhi yin’wana u nga nyikela mpfuno lowukulu hi ku kombisa ntwela-vusiwana ntsena.—Rhom. 12:15.

Eka lava xanisekaka hikwalaho ka VUVABYI—

Nhlav. 21:4, 5: “‘[Xikwembu] xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.’ Kutani loyi a tshameke exiluvelweni a ku: ‘Vonani, ndzi endla swilo hinkwaswo swi va leswintshwa.’ A engeta a ku: ‘Tsala, hikuva marito lawa ma tshembekile, ma ni ntiyiso.’”

Mt. 9:35: “Yesu a rhendzeleka ni miti hinkwayo ni swimitana hinkwaswo, a ri karhi a dyondzisa . . . a twarisa Evhangeli ya Mfumo, a hanyisa hinkwavo lava xanisiwaka hi mavabyi ya tinxaka-xaka.” (Hi ku hlanganisa ku hanyisa koloko ni ku chumayela ka yena hi Mfumo, Yesu u swi kombise kahle leswi a nga ta swi endlela vanhu eMfun’weni wakwe wa Gidi ra Malembe.)

2 Kor. 4:13, 16: “Na hina ha pfumela, . . . Hikokwalaho a hi heli mbilu; hambileswi hi hlakalaka hi tlhelo ra munhu wa hina wa le handle [miri wa hina wa nyama], hi tlhelo ra munhu wa hina wa le ndzeni, hi hundzuka lavantshwa [kumbe hi nyikiwa matimba lamantshwa] siku rin’wana ni rin’wana.” (Hi nga ha va hi hlakala enyameni. Kambe emoyeni hi nga endliwa lavantshwa loko hi hambeta hi tiwundla hi switshembiso swa Xikwembu swa risima.)

Nakambe vona Luka 7:20-23.

Eka vanhu lava lahlekeriweke hi varhandziwa va vona hi RIFU—

Esa. 25:8, 9: “O ta lov̌isa rifu hi laha ku nga heriki: Hosi, Yehova o ta hlangula mihloti e mimombyeni hikwayo; . . . Hi siku lero v̌a ta ku: V̌onani, hi šona Šikwembu ša hina; hi ṭhembile šona, kutani ši hi ponisile! Hi yena Yehova loyi hi ṅwi ṭhembeke; a hi ṭakisiseni hi ṭakela ku ponisa ka yena!”

Yoh. 5:28, 29: “Mi nga hlamaleni hi mhaka leyi, hikuva nkarhi wa ta lowu hinkwavo lava nge masirheni va nga ta twa rito ra yena, kutani va ta huma. Lava endleke leswinene va ta pfuka va ya evutomini lebyi nga heriki, lava endleke leswo biha va ta pfuka va ya eku avanyisiweni.”

Yoh. 11:25, 26: “Yesu a ku ka yena: ‘Hi mina ku pfuka ni vutomi; la pfumelaka ka mina, hambi a nga fa, ú ta hanya, kutani un’wana ni un’wana la hanyaka, a va a pfumela ka mina, a nga ka a nga fi ni siku ni rin’we. Xana wa swi pfumela sweswo xana?’”

Ps. 146:5, 9: “Ku katekile loyi . . . ku ṭhemba ka yena ku nga ka Yehova, Šikwembu ša yena. . . . O hlayisa šisiwana ni noni.” (Ni sweswi Xikwembu xi va khathalela hi ndlela yoleyo lava rilaka.)

Nakambe vona Luka 7:11-16; 8:49-56.

Eka vanhu lava XANISIWAKA hikwalaho ka ku endla ku rhandza ka Xikwembu—

Ps. 27:10: “Hambi loko tatana na manana v̌a nga nḍi ṭhika, Yehova o ta nḍi rola.”

1 Pet. 4:16: “Loko munhu a twisiwa ku vava hikwalaho ka leswi a nga Mukriste, a nga tshuki a khomiwa hi tingana, kambe a a dzunise Xikwembu hi mhaka ya vito leri.”

Swiv. 27:11: “Ṅwana nga, tlhariha, u ṭakisa mbilu ya mina, nḍi ta kuma rito e ku hlamula la’v̌a nḍi rukanaka.” (Loko hi tshembeka, hi nyikela nhlamulo eka xihehlo xa Sathana xa leswaku ku hava munhu loyi a nga xanisekaka ngopfu a tlhela a hambeta a tirhela Xikwembu.)

Mt. 5:10-12: “Ku katekile lava xanisiwaka hikwalaho ka leswo lulama, hikuva Mfumo wa matilo i wa vona. ‘Mi ta kateka loko va mi rhuketela, loko va mi xanisa ni ku mi lumbeta hi mavunwa layo tala hikwalaho ka mina. Tsakani, mi tsakisisa, hikuva hakelo ya n’wina i yikulu ematilweni; naswona va xanisise sweswo vaprofeta lava a va ri kona, n’wina mi nga si va kona.’”

Mint. 5:41, 42: “[Vaapostola], va huma ehubyeni va tsakile, hikuva a va kumiwile va ri lava fanelaka ku soriwa hikwalaho ka vito ra Yesu. Kutani masiku hinkwawo, a va nga rhuteli ku dyondzisa ni ku twarisa Evhangeli eTempeleni ne mindyangwini ya vanhu, va ku: ‘Mesiya, hi yena Yesu.’”

Flp. 1:27-29: “Ntsena, mahanyelo ya n’wina ma fanele ku fambelana ni Evhangeli ya Kriste . . . Naswona mi nga chavisiwi nikutsongo hi lava lwaka na n’wina; hi ndlela leyi va ta swi vona leswaku va tsandzeka, ni leswaku n’wina ma hlula, kutani sweswo swi huma eka Xikwembu. Hikuva mi nyikiwile nkateko wo tirhela Kriste, ku nga ri ntsena hileswi mi pfumeleke eka yena, kambe hileswi mi xanisekaka hikwalaho ka yena.”

Eka lava heleke matimba hikwalaho ka VUHOMBOLOKI—

Ps. 37:10, 11: “Ku sele nkarinyana, kutani lo’wo biha a nga ka a nga ha v̌i kona; u ta lav̌isisa šiv̌andla ša yena, kutani a ta v̌a a nga ha ri kona. V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.”

Esa. 9:6, 7: “Hi v̌elekeriwe ṅwana, hi nyikiwe ṅwana wa wanḍisanyana, v̌uhosi byi v̌ekiwile khatleni ra yena. O ta tšhyiwa Muhlamarisi, Muṭunḍuši, Šikwembu ša matimba, Tatana l’a nga riki na ku hela, Hosi ya ku rula; e ku kurisa ku fuma, ni ku nyika šiluv̌elo ša Davida ni ku fuma ka yena e ku rula lo’ku nga heriki, ni ku ši tiyisa, ni ku ši seketela hi ku av̌anyisa ni ku lulama, ŝeŝi ni laha ku nga heriki; ku hiseka ka Yehova wa tinyimpi ku ta endla ŝeŝo!”—Xiitaliki i xerhu.

Dan. 2:44: “E mikarini ya tihosi leti, Šikwembu ša matilo ši ta pfuša ku fuma lo’ku nga taka ku nga onhaki, ni siku riṅwe, kutani v̌uhosi bya kona byi nga ka byi nga hunḍeli ka tiko riṅwana; ku ta seletela ni ku herisa ku fuma kuloku hikwako, kambe kona ku ta v̌a kona hi laha ku nga riki na makumu.”

Nakambe vona Esaya 32:1, 2; 2 Petro 3:13.

Eka lava tshikileriwaka hi SWIPHIQO SWA TIMALI—

Esa. 65:21, 22: “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona. V̌a nga ka v̌a nga ha aki tindlu, leŝaku uṅwana a ta ṭhama kona, v̌a nga ka v̌a nga ha byari leŝaku uṅwana a ta dya, . . . v̌ahlawuriwa v̌a mina v̌a ta ṭakela ntiro wa mav̌oko ya v̌ona.”

Ps. 72:8, 16: “[Hosi ya Vumesiya] yi ta fuma e ku sukela lwandle riṅwana ku ya fika e ka riṅwana, ni ku sukela nambyini, ku ya fika makuṅweni ya misav̌a. Ku ta v̌a ni nḍalo ya koro la misav̌eni ni le tinhlohlorini ta tinṭhav̌a.”

Mt. 6:33: “Rhangani mi tilavela Mfumo wa yena ni ku lulama ka yena, kutani sweswo hinkwaswo [swilaveko leswi vonakaka evuton’wini] mi ta engeteleriwa swona.”

Rhom. 8:35, 38, 39: “I mani loyi a nga ta hi hambanisa ni rirhandzu ra Kriste? Xana ma nga va maxangu kumbe nhlomulo, kumbe ku xanisiwa, kumbe ndlala, kumbe vusweti, kumbe makhombo, kumbe fumu xana? Hikuva ndzi kholwa swinene ngopfu leswaku, hambi ri nga va rifu kumbe vutomi, hambi ti nga va tintsumi kumbe matimba ya mademona, hambi swi nga va leswi nga kona sweswi kumbe leswi nga ta ta, hambi yi nga va mimoya ya matimba leyi nge henhla mpfhukeni kumbe leyi nge hansi ka misava, hambi xi nga va xivumbiwa xihi na xihi, ndzi ri: Ku hava lexi nga ta kota ku hi hambanisa ni rirhandzu ra Xikwembu leri nga kombisiwa ha Kriste Yesu, Hosi ya hina.”

Nakambe vona Vaheveru 13:5, 6.

Eka vanhu lava heleke matimba hikwalaho ka KU TSANA ka vona vini—

Ps. 34:18: “Yehova o kusuhi ni la’v̌a nga ni timbilu le’ti ṭhov̌ekeke, wa ponisa v̌a mimoya le’yi khinyekeke.”

Ps. 103:13, 14: “Hi laha tatana a nga ni tintŝalo e ka v̌ana v̌a yena, hi ŝeŝo Yehova o ni tintŝalo e ka la’v̌a ṅwi tšhavaka. Hikuv̌a wa tiv̌a leši hi endliweke ha šona, wa ṭunḍuka leŝaku hi nṭhuri ntsena.”

Neh. 9:17: “Wena u Šikwembu leši teleke ku riv̌alela ni tintŝalo ni vunene, u hlwela ku kariha, u tele ku ṭeṭelela.”

2 Pet. 3:9, 15: “[Yehovha a nga] hlweli ku endla leswi [a] nga tshembisa swona, hilaha van’wana va twisisaka ‘ku hlwela’ hakona, kambe [u] lehisa mbilu hikwalaho ka n’wina; a [nga] lavi leswaku ni un’we wa n’wina a lova, kambe [u] lava leswaku hinkwavo va ta eku hundzukeni. Kutani twisisani leswaku loko Hosi ya hina yi lehisa mbilu, yi endlela ku hi ponisa.”