Langutelo Ra Bibele

I Yini Leswi Endlaka Leswaku Hi Endla Leswinene Kumbe Swo Biha?

MATIMU ya vanhu ma tele hi swiviko swa rivengo ni ku halata ngati. Kambe, hakanyingi vanhu va kombisa musa lowukulu ni ku titsona swo karhi loko ku humelela swiendlakalo leswi nga tsakisiki. Ha yini munhu un’wana a va mudlayi la nga ni nsele kambe un’wanyana a va ni ntwela-vusiwana swinene eka vanhu lava xanisekaka? Ha yini minkarhi yin’wana vanhu van’wana va pfa va ngheniwa hi moya wa vuharhi?

Ku Nga Hetiseki Ni Ripfalo

Bibele yi vula hi ku kongoma yi ku: ‘Munhu u ehleketa swo biha ku sukela evuhlangini bya yena.’ (Genesa 8:21, Bibele—Mahungu Lamanene) Xisweswo, vana va voyamele eku endleni ka miharihari. (Swivuriso 22:15) Ku sukela loko hi velekiwa, hinkwerhu ka hina hi voyamele eku endleni ka swilo swo biha. (Pisalema 51:5) Ku endla leswinene swi lava ku tikarhata ku fana ni ku tlutisa xikwekwetsu xi kongoma laha mati ya nambu ma khulukaka ma huma kona.

Hambiswiritano, hi tlhele hi nyikiwa ripfalo. Nyiko leyi leyi hi velekiweke na yona, leyi hi byelaka loko nchumu wu ri wunene ni loko wu ri wo biha yi susumetela vo tala va hina leswaku hi hanya hi ndlela leyi vanhu vo tala va yi tekaka yi ri leyi lulameke. Hikwalaho ka sweswo, hambi vanhu lava nga dyondzisiwangiki mahanyelo lamanene va nga ha tiviwa hi swiendlo swa vona leswinene. (Varhoma 2:14, 15) Hambiswiritano, hilaha swi vuriweke hakona laha henhla, mboyamelo wa hina wo endla swo biha wu nga pfuxa ntlhontlho lowukulu eka hina exikarhi ko endla swilo leswinene kumbe swilo swo biha. Hi swihi swilo swin’wana leswi nga ha hi kucetelaka ku endla leswinene kumbe leswo biha?

Ku Kuceteriwa Hi Ndhawu Leyi Hi Tshamaka Eka Yona

Lumpfana ri cinca muvala leswaku ri fana ni ndhawu leyi ri nga eka yona. Hilaha ku fanaka, lava va vaka vanghana ni swigevenga, va tala ku tekelela mahanyelo ya vugevenga. Bibele ya lemukisa yi ku: “U nga tshuki u landzelela ntshungu lowu nga ni swikongomelo swo biha.” (Eksoda 23:2) Hi hala tlhelo, loko munhu a tshama a ri ni vanhu lava tshembekeke, lava lulameke ni lava nga ni mahanyelo lamanene, va nga n’wi susumetela ku endla swilo leswinene.—Swivuriso 13:20.

Hambiswiritano, a hi nge vuli leswaku hi sirhelekile eka nkucetelo wo biha hileswi ntsena hi nga tihlanganisiki ni lava hanyaka hi swilo swo biha. Hikwalaho ka leswi hi nga hetisekangiki, swilo swo biha swi nga ha tumbela emianakanyweni ya hina, swi yimela nkarhi lowunene leswaku swi humelela. (Genesa 4:7) Ku tlula kwalaho, swilo swo biha swi nga ha nghena emakaya ya hina hi thelevhixini, xiya-ni-moya ni maphepha-hungu. Mintlangu ya tivhidiyo, minongonoko ya thelevhixini ni tifilimi hakanyingi swi khutaza madzolonga ni ku rihisela. Hambi ku ri ku tshamela ku hlalela mahungu ya misava kumbe ya tiko ra rikwerhu swi nga ha hi tlanyata timbilu lerova hi nga ha vi na mhaka ni ku xaniseka ka vanhu.

I mani la endlaka leswaku ndhawu leyi hi tshamaka eka yona yi va ni nkucetelo wo tano eka hina? Bibele ya hlamula: “Misava hinkwayo yi le hansi ka matimba ya lowo homboloka.” (1 Yohane 5:19) “Lowo homboloka,” Sathana Diyavulosi, u hlamuseriwa eMatsalweni tanihi muhembi ni mudlayi. (Yohane 8:44) U hangalasa vubihi hi ku tirhisa nkucetelo wa misava yakwe.

Hikwalaho ka swilo leswi hinkwaswo leswi kucetelaka langutelo ni swiendlo swa hina, van’wana va nga ha vula leswaku a va fanelanga va voniwa nandzu loko va endla swiendlo swo biha. Kambe, xana swi tano hakunene? Tanihi leswi xidirayivhele xi kongomisaka laha movha wu yaka kona ni nsimbi ya xiphepherhele leyi nga ehansi ka xikepe yi lawulaka laha xi yaka kona, miehleketo yi lawula miri.

Swi Le Ka Wena Leswaku U Hlawula Ku Endla Leswinene Kumbe Swo Biha

Munhu u rhanga a anakanya a nga si endla xiendlo xihi na xihi, ku nga khathariseki leswaku i xo lulama kumbe i xo biha. Ku byala swilo leswinene ni ku ehleketisisa hi swilo swo tenga swi tswala mihandzu leyinene. Entiyisweni, loko timbewu ta ku navela ka vutianakanyi ti tshikiwa ti mila emianakanyweni, ti nga ha kula ti va ximilana lexikulu xa vubihi. (Luka 6:43-45; Yakobo 1:14, 15) Xisweswo, ku nga vuriwa leswaku munhu wa hlawula ku va wo lulama kumbe wo homboloka.

Lexi tsakisaka, Bibele yi kombisa leswaku vanhu va nga dyondza ku endla leswo lulama. (Esaya 1:16, 17) Rirhandzu hi rona leri susumetelaka vanhu ku endla leswinene, tanihi leswi “rirhandzu ri nga endliki leswo biha eka warikwavo.” (Varhoma 13:10) Loko hi tikarhatela ku rhandza vanhu, a hi nge va endli swo biha.

Ray wa le Pennsylvania eU.S.A. u tivonele hi yakwe mhaka yoleyo. Leswi a dyondzeke ku lwa a ha ri ntsongo, hi ku hatlisa u dume hileswaku u rhandza ku lwa. Naswona a a karhatiwa hi ximbilwambilwana. Hambiswiritano, u sungule ku tirhisa milawu ya Bibele naswona hakatsongo-tsongo u hundzule vutomi byakwe. Kambe a hi minkarhi hinkwayo a swi olova ku endla tano. Minkarhi yin’wana a a titwa hilaha Pawulo, mutsari wa buku yin’wana ya Bibele, a titweke ha yona: “Loko ndzi navela ku endla leswi lulameke, leswo biha swi kona eka mina.” (Varhoma 7:21) Kutani endzhaku ko tikarhata hi matimba ku ringana malembe yo tala, Ray u kote ku ‘hlula swo biha hi leswinene.’—Varhoma 12:21.

Ha yini ku tikarhatela ku “famba hi ndlela ya vanhu lavanene” ku nga ri ku tlanga hi nkarhi? (Swivuriso 2:20-22) Hikuva eku heteleleni, leswinene swi ta hlula leswo biha. Bibele yi ri: “Lava endlaka swo biha va ta herisiwa . . . Hi nkarhinyana, lowo homboloka a nge he vi kona . . . Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” (Pisalema 37:9-11) Xikwembu xi ta herisa vubihi hinkwabyo. Mawaku vumundzuku lebyinene lebyi nga ta kumiwa hi lava va tikarhatelaka ku endla leswinene!

XANA U TSHAME U TIVUTISA?

● I mani la faneleke a soriwa hi swiendlo swa hina?—Yakobo 1:14.

● Xana swa koteka ku cinca mahanyelo ya hina?—Esaya 1:16, 17.

● Xana vubihi byi ta kala byi hela?—Pisalema 37:9, 10; Swivuriso 2:20-22.

[Swifaniso leswi nga eka tluka 21]

Munhu wa hlawula ku va wo lulama kumbe wo homboloka