Langutelo Ra Bibele

Xana U Fanele U Hakerisiwa Mali Loko U Endleriwa Mintirho Ya Vukhongeri?

EMATIKWENI yo tala, vafundhisi va vukhongeri bya Vukreste ni lebyi nga riki bya Vukreste va hakerisa vanhu mali loko va va endlela mintirho ya vukhongeri. Mintirho leyi yi nga ha katsa ku khuvula, ku catisa kumbe ku endla swilahlo. Va nga hakerisa madzana kumbe magidi ya tirhandi.

Vafundhisi van’wana va hakeriwa hi mfumo hileswi va fambisaka minhlangano ni mintirho ya vufundhisi ni leswi siku ni siku va pfulaka hi xikhongelo eka minhlangano ya tihulumendhe yo endla milawu. Vanhu va nga ha swi tsakela ku endleriwa mintirho yoleyo naswona tikereke ti ni swikoxo leswi ti faneleke ti swi hakela. Kambe, xana Bibele ya wu seketela mikhuva yo tano yo hakerisa vanhu mali loko va endleriwa mintirho ya vukhongeri hambi ku ri ku va endla va titwa va boheka ku hakela?

Xana Tempele A Yi Ri “Yindlu Ya Bindzu”?

Loko Yesu Kreste a ha ri laha misaveni, vafundhisi va vukhongeri bya Xiyuda ni van’wana a va tirhisa swiendlakalo swa vukhongeri leswaku va pindzula, ngopfu-ngopfu hi nkarhi wa Paseka. Xana Yesu a a teka mukhuva wolowo tanihi lowu amukelekaka? Nikatsongo! Entiyisweni, Bibele yi hi byela leswaku “[u chulule] timali ta nsimbi ta vacincisi va mali, a wisetela matafula ya vona.” U te: “Tshikani ku endla yindlu ya Tatana yi va yindlu ya bindzu!”—Yohane 2:14-16.

Ku endleke mhaka leyi fanaka hi nkarhi wa muprofeta Mikiya, loyi a hanyeke hi lembe-xidzana ra vunhungu B.C.E. Bibele yi vula leswaku vafundhisi va le Israyele a va ‘nyenya vululami’ naswona vaprista a va ‘letela hi nxavo ntsena.’ Kambe hi nkarhi lowu fanaka a va vula leswaku va seketeriwa hi Xikwembu va ku: “Xana Yehovha a nga kona exikarhi ka hina?” (Mikiya 3:9, 11) Kambe Yehovha Xikwembu a a nga swi amukeli leswi a va swi endla. Ematshan’weni ya sweswo, a a swi nyenya swiendlo swa vona naswona sweswo u swi vule hi ku kongoma hi ku tirhisa muprofeta wakwe.

Namuntlha vafundhisi vo tala va tirhisa marhengu lama fanaka ya makwanga, xisweswo va endla tikereke ta vona ti va ‘tiyindlu ta mabindzu.’ Entiyisweni, tikereke hinkwato ta vukhongeri ti nghenela mabindzu, hakanyingi ti xavisa swifaniso ni nhundzu yin’wana yo tala ya vukhongeri leyi ti ngheniselaka mali yo tala.a—1 Yohane 5:21.

“Mi Amukele Mahala, Nyikani Mahala”

Loko Yesu a lerisa vaapostola vakwe ku chumayela mahungu lamanene, ku horisa vavabyi hambi ku ri ku pfuxa vafi, u te: “Mi amukele mahala, nyikani mahala.” (Matewu 10:7, 8) Entiyisweni, valandzeri vakwe va ntiyiso a va nga fanelanga va hakerisa vanhu loko va va endlela mintirho. Ku tlula kwalaho, Yesu hi byakwe u veke xikombiso hi ku tirhela van’wana handle ko va hakerisa.

Hi ku landzela ntila lowu vekiweke hi Yesu, muapostola Pawulo u endle ntirho wakwe wo chumayela “handle ka nxavo.” (1 Vakorinto 9:18) Loko a lava mali, a a endla matende. (Mintirho 18:1-3) Hi yona mhaka leyi a vuleke leswi hi yena swin’we ni varhumiwa-kulobye a ku: “A hi vaxavisi va rito ra Xikwembu hilaha vanhu vo tala va nga hakona.” (2 Vakorinto 2:17) Kambe yi kumiwa njhani mali leyi tirhisiwaka hi vandlha, kumbexana leyi tirhiseriwaka ku xava ndhawu leyi ku hlanganyeriwaka eka yona kumbe ku yi rhenta?

“Xikwembu Xi Rhandza Munyiki La Tsakeke”

Mali leyi Timbhoni ta Yehovha ti yi kumaka yi huma eka minyikelo leyi humesiwaka hi vanhu hi ku tirhandzela. Ti tirhisa nawu lowu: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) Hikwalaho ka xivangelo xexo, Timbhoni a ti va hakerisi vanhu loko ti va nyika tibuku ta tona kumbe loko ti va endlela mintirho ya vukhongeri yo tanihi ku khuvula, ku catisa kumbe ku endla swilahlo. Naswona a ti kombeli vukhume kumbe ku fambisa xibya xa minyikelo eminhlanganweni ya tona. Un’wana ni un’wana la lavaka ku nyikela entirhweni wa tona wo chumayela emisaveni hinkwayo, a nga endla tano hi ku hoxa minyikelo yakwe exihundleni emabokisini lama nga etindhawini ta tona ta vugandzeri.

Emisaveni hinkwayo, Timbhoni ta Yehovha ti tirhisa minyikelo leyi humesiwaka hi vanhu hi ku tirhandzela leswaku ti hakelela swikoxo swa Tiholo ta Mfumo, Tiholo ta Tinhlengeletano, marhavi, tindhawu to gandlisela ni ku phalala lava weriweke hi timhangu. Ku fana ni noni leyi Yesu a yi bumabumeleke, van’wana va nga nyikela hi mali yitsongo. (Luka 21:2) Kasi van’wana va nga nyikela hi mali yo tala. Vanhu lava namarhelaka milawu leyi tsariweke eBibeleni ni ku nyikela hilaha va nga kotaka hakona, va kuma ku eneriseka, mikateko ya Xikwembu leyi fuwisaka ni ntsako wa xiviri, ku nga khathariseki leswaku va nyikela hi mali yo tala kumbe leyitsongo.—Mintirho 20:35; 2 Vakorinto 8:12.

[Nhlamuselo ya le hansi]

XANA U TSHAME U TIVUTISA?

● Xana Yesu u te yini eka lava a va xavisa etempeleni?—Yohane 2:14-16.

● Xana muapostola Pawulo la nga Mukreste a a pfumela ku hakeriwa loko a endla mintirho ya vukhongeri?—2 Vakorinto 2:17.

● Xana Yehovha u tsakisiwa hi munhu la nyikelaka hi ndlela yihi?—2 Vakorinto 9:7.

[Marito lama tshahiweke exihlokweni lama nga eka tluka 23]

“Tshikani ku endla yindlu ya Tatana yi va yindlu ya bindzu!”—Yohane 2:14-16.