Leswi Ndzi Endleke Ndzi Tshika Ku Va Xiyimbeleri Lexi Dumeke

Hi ku vula ka Martha Teresa Márquez

LOKO ndza ha ri n’wana a ndzi rhandza ku yimbelela, hambi ku ri ku yimbelela eka xiya-ni-moya. Ndzi nghene xikolo malembe ma nga ri mangani ntsena, kambe endzhakunyana ndzi sungule ku dyondza ku yimbelela eDorobeni ra Mexico ndzi pfuniwa hi mukongomisi wa ntlawa lowu tlangaka vuyimbeleri bya okhestra etikweni.

Hi 1969, loko ndzi ri ni malembe ya 24, munghana wa mina loyi a ri mucini u ndzi rhambe leswaku ndzi ya kamberiwa ku vona loko ndzi swi kota kahle ku yimbelela erhesiturente ya La Rampa Azul leyi a yi xiximeka swinene hi nkarhi wolowo, leyi a yi ri ni ndhawu yo xavisa byala ni swiyimbeleri leswi a swi yimbelelela vanhu kwalaho. Ndzi yimbelele risimu leri dumeke leri nge Cucurrucucú Paloma leri tsariweke hi Tomás Méndez wa le Mexico, naswona vayingiseri va ri tsakerile. Ndzi sungule kwalaho ku va xiyimbeleri lexi dumeke. A ndzi yimbelela ndzi ri ndzexe ndzi tivitana Romelia Romel.

A ndzi tirhisana na Tomás Méndez swin’we ni vatsari va tinsimu ni vayimbeleri van’wana lava nga ni vuswikoti va le Mexico, ku katsa na Cuco Sánchez na Juan Gabriel. A swi ndzi tsakisa ku vona vito ra mina ri tsayitela emiakweni naswona ri tsariwe eka maphepha-hungu ni le ka timagazini. A ndzi yimbelela etindhawini to tihungasa nivusiku, eka xiya-ni-moya ni le ka tikhonsati eMexico ni le Belize. Nakambe ndzi tirhe na Leonorilda Ochoa, n’wamisavu la dumeke wa le Mexico hi nkarhi lowu nongonoko wakwe wa le ka thelevhixini a wa ha ku sungula eMexico.

Hi ku famba ka nkarhi, ndzi ve ni ndhuma naswona a ndzi kuma mali yo tala leyi a ndzi kota ku xava swilo swa vulovolovo swo fana ni swin’wetsin’wetsi, mabaji lama endliweke hi voya bya xihadyana xa mink ni ku tshama endlwini ya manyunyu. A swi tikomba onge a ndzi ri ni swilo hinkwaswo, kambe a ndzi nga tsakanga. A ndzi tivona ndzi nga pfuni nchumu. Hambileswi ndzi kurisiweke hi vatswari lava nga Makhatoliki, a ndzi khomiwa hi tingana ku ya ekerekeni. A ndzi tivona ndzi thyake ngopfu hileswi a ndzi ri ni mahanyelo yo biha.

Ndzi Sungula Ku Rhandza Yehovha

Loko ndzi ri karhi ndzi tilunghiselela ku rhekhoda khasete ya mina yo sungula, ndzi vulavule ni munghana wa mina la vuriwaka Lorena Wong, xiyimbeleri xa vuyimbeleri bya xintu lebyi vuriwaka ranchera, ndzi n’wi phofulela ta le mbilwini. Ndzi n’wi byele leswaku ndzi lava ku va nani leswaku ndzi ta pfuna swisiwana. U ndzi vutise hi ku hlamala a ku: “Xana u lava ku va nani? U hlangane nhloko!”

Kutani u ndzi vutise a ku: “Xana wa ri tiva vito ra Xikwembu?”

Ndzi hlamule ndzi ku: “I Hosi Yesu Kreste.”

U te: “A swi tano, vito ra xona i Yehovha. Yesu i N’wana wa xona.”

Ndzi n’wi vutise ndzi ku: “Xana u ri vito ra xona i Yehovha?” Vito rero a ndzi nga ri tivi nikatsongo. Lorena u ndzi nyike Bibele kutani a ndzi tshembisa leswaku u ta rhumela mudyondzisi wakwe loyi a a ri Mbhoni ya Yehovha leswaku a ndzi endzela.a

Minkarhi hinkwayo loko ndzi vona Lorena, a ndzi n’wi vutisa ndzi ku, “U ta n’wi rhumela rini mudyondzisi wa wena?” A ndzi lava ku dyondza leswi engetelekeke hi Xikwembu.

Hi nkarhi wolowo, ndzi sungule ku tihlayela Bibele naswona ndzi tivonele hi ya mina leswaku vito ra Xikwembu i Yehovha. (Pisalema 83:18) Sweswo swi ndzi hlamarisile. Nakambe ndzi tikume ndzi hlaya Milawu ya Khume naswona ndzi hlamarisiwe hi nawu lowu nge: “U nga tshuki u endla vuoswi.” (Eksoda 20:14) Hi nkarhi wolowo, a ndzi tshama ni wanuna loyi a a tekile, loyi a a ri tata wa xifanyetana xa mina lexi a xi ri ni tin’hweti ta nhungu. Xifanyetana xexo a ku ri n’wana wa mina wa vumbirhi. A ndzi ri ni xifanyetana xin’wana lexi ndzi xi kumeke ni nuna un’wana loyi na yena a hi nga tekananga.

Siku rin’wana loko ndzi ri karhi ndzi pfuxeta risimu leri a ndzi ta ri yimbelela eka nongonoko lowuntshwa, ndzi twe ku gongondziwa nyangwa wa yindlu ya mina. A ku ri mudyondzisi wa Lorena, Mauricio Linares ni nsati wakwe. Va ndzi hlamusele hi ta xikongomelo xa Xikwembu hi vanhu kutani va ndzi siyela buku leyi nge Ntiyiso Lowu Yisaka eVuton’wini Lebyi Nga Heriki.b Ndzi yi hlaye ndzi yi heta hi vusiku byin’we ntsena hambileswi a yi ri ni marito lawa a swi ndzi tikela ku ma hlaya. Ndzi sungule kwalaho ku rhandza Yehovha.

Ndzi Cinca Mahanyelo Ya Mina

Loko Timbhoni ti ri karhi ti ndzi pfuna ku dyondza Bibele ni ku antswisa vuswikoti bya mina byo hlaya, ndzi xiye leswaku ndzi fanele ndzi cinca vutomi bya mina leswaku ndzi tsakisa Yehovha. Ndzi sungule ku cukumeta swifaniso swa vukhongeri, timendlele ni switshungulo hambileswi a swi endliwe hi nsuku.

Swi ndzi tikele ngopfu ku tshika ku dzaha ni ku nwa byala ku tlula mpimo. Loko ndzi hundza exitolo xa byala a ndzi phoma ni marha. A ndzi fanele ndzi tihambanisa ni vanghana va mina hinkwavo hikuva a va ndzi nyika byala naswona a va ndzi rhambela ku ya dya swakudya swo xawula ni ku nwa byala eka tirhesiturente ta manyunyu. A ndzi swi tiva leswaku sweswo a swi ta endla leswaku ndzi nwa byala ku tlula mpimo.

Nakambe a swi ndzi tikela ku tshika ku ya eswinkhubyanini swa vanhu lava fuweke ni lava dumeke. Loko ndzi rhambiwe enkhubyeni wo tlangela siku ra ku velekiwa ra mubi wa swibakela la dumeke wa le Cuba, ndzi khongele ndzi ku: “Yehovha ndzi ya ro hetelela. A ndzi nge he pfuki ndzi ye eswinkhubyanini swo tano kumbe ku tikhoma hi ndlela leyi u nga yi tsakeriki.” Hakunene ndzi nambe ndzi ku swi thya!

Ndzi tshikane ni tata wa xifanyetana xa mina xa vumbirhi. Ndzi endle tano hambileswi a a fuwe ngopfu naswona a a ndzi tshembisa tilo ni misava loko ndzo ka ndzi nga n’wi tshiki. A swi ndzi tikela swinene ku n’wi tshika hikuva a ndzi n’wi rhandza ngopfu naswona a a swi tiva sweswo. U vule hi ku tikukumuxa a ku: “Hi mina Xikwembu xa wena! Hi mina Kreste wa wena!”

Ndzi n’wi hlamule ndzi ku: “Ndza pfumela leswaku a wu ri wa nkoka evuton’wini bya mina, kambe sweswi Yehovha i Xikwembu xa mina.” U ndzi xungete hileswaku u ta teka n’wana wa hina naswona a ndzi vavisa.

Hi nkarhi wolowo, vanhu van’wana va ndzi byele leswaku ku yimbelela ko va ntirho ntsena lowu fanaka ni yin’wana—a va vula leswaku ndzi nga va Mbhoni hi hala tlhelo ndzi va xiyimbeleri. Hambiswiritano, van’wana va ndzi tsundzuxe va ku, “Ku hava nchumu lowu nga ta ku sirhelela leswaku u nga dzahi, u nga nwi byala ni ku tikhoma hi ndlela yo biha loko vayingiseri va wena va ku yenga leswaku u endla tano.” Ndzi xiye leswaku marito wolawo a ma ri ntiyiso.

Loko ndza ha ri xiyimbeleri lexi dumeke, vanhu a va ringeta ku ndzi fumbarherisa leswaku ndzi va endlela swilo swo karhi. A ndzi tiyimisele ku nga ha tlheli ndzi tinghenisa eka miringo yo tano. Kutani hi 1975, ndzi herise ntwanano lowu a ndzi wu sayinile wo ya yimbelela eka tikhonsati to hambana-hambana eChayina naswona endzhaku ka tin’hweti ta tsevu ndzi khuvuriwile ndzi va Mbhoni ya Yehovha.

Mintlhontlho Ni Ntsako

Xana a ndzi ta yi kuma kwihi mali yo tikhathalela mina ni ndyangu wa mina? A ndzi nga dyondzekanga naswona ku hava nchumu lowu a ndzi kota ku wu endla handle ko yimbelela ntsena. Sesi wa mina Irma ni vana vakwe vanharhu swin’we ni swifanyetana swa mina swimbirhi a swi khathaleriwa hi mina. Hi boheke ku rhurha endlwini ya mina ya manyunyu hi ya tshama endlwini leyitsongo leyi nga ni makamara mambirhi. Swi ndzi tikele ngopfu ku tshika vutomi bya vulovolovo ivi ndzi hanya hi rikoko ra xilondza. Ku ringana nkarhi wo karhi sesi wa mina ni vana vakwe a va ndzi sola hikwalaho ka xiboho lexi ndzi xi tekeke naswona va ndzi kucetele leswaku ndzi hambeta ndzi va xiyimbeleri, kambe a ndzi tiyimisele ku endla leswi a ndzi lava ku swi endla leswaku ndzi tirhela Yehovha.

Ndzi sungule ku xavisa swilo swa mina swa risima—movha, swin’wetsin’wetsi ni mabaji lama endliweke hi voya—naswona a hi tihanyisa hi mali ya swilo sweswo. Hi ku famba ka nkarhi, mali yoleyo yi herile. Leswaku ndzi balekela ku karhatiwa hi tata wa n’wana wa hina wa vumbirhi, hi 1981 hi rhurhele edorobeni rin’wana leri nga etlhelo lerin’wana ra tiko, laha a a nga ta hi kuma.

Edorobeni rolero, Timbhoni ti ndzi dyondzise ku endla ti-tamale, magwinya ya tidonati ni swakudya swin’wana leswaku ndzi swi xavisa. Endzhakunyana ndzi kume ntirho efektri yin’wana naswona a ndzi tirha nivusiku. Kambe ntirho lowu a wu ndzi sivela ku ya eminhlanganweni ya Vukreste ni ku tirhela Xikwembu. Kutani ndzi hetelele ndzi wu tshika ivi ndzi sungula ku endla ti-tamale ekaya. A ndzi ti rhwala hi basikiti ivi ndzi ti xavisa exitarateni. Hi ndlela yoleyo, ndzi kote ku tikhathalela entirhweni wa nkarhi hinkwawo wo chumayela.

Xiboho Lexi Ndzi Nga Tisoliki Ha Xona

Loko vanhu va ndzi vutisa leswaku ndzi titwa njhani hileswi ndzi tshikeke ku yimbelela, ndzi va byela leswaku ku hava nchumu wun’wana lowu nga wa nkoka swinene eka mina ku tlula ku tiva Yehovha ni ku twisisa swikongomelo swakwe leswi hlamarisaka. Swi ndzi tsakise ngopfu ku vona majaha ya mina ma dyondza Bibele, ma nyiketela vutomi bya wona eka Yehovha naswona ma tekana ni vapfumeri-kulobye. Vana va mina havambirhi va khomisana ni vasati va vona ku kurisa vana va vona leswaku va tirhela Xikwembu xa hina, Yehovha.

Ndzi ve phayona ku ringana malembe ya kwalomu ka 30, hilaha Timbhoni ta Yehovha ti va vitanaka hakona vachumayeri va nkarhi hinkwawo. Hi mpfuno wa Xikwembu, ndzi kote ku pfuna vanhu vo tala ku katsa Irma ni n’wana wakwe leswaku va dyondza ntiyiso wa Bibele naswona va nyiketela vutomi bya vona eka Xikwembu. Hakunene i ntsako lowukulu ku hlangana ni vanhu volavo lava ndzi dyondzeke na vona Bibele naswona ndzi va tekeke ku fana ni vana va mina, lava ni sweswi va ha fambaka entiyisweni nakambe vo tala va vona va nga maphayona. (3 Yohane 4) Namuntlha ndzi ni malembe ya 64 naswona ndzi fambisa tidyondzo ta Bibele ta 18.

Ndlala leyi a ndzi ri na yona hi tlhelo ra moya loko ndza ha ri muyimbeleri la ha riki muntshwa ni ku navela ka mina ko lava ku pfuna van’wana ku enerisiwe hileswi ndzi yingiseke xileriso xa Yesu xa leswaku hi ‘famba hi ya endla vadyondzisiwa.’ (Matewu 28:19, 20) Hakunene ndza tsaka leswi Yehovha a ndzi seketeleke malembe lawa hinkwawo naswona a hambetaka a endla tano ni sweswi! Hakunene ndzi ‘nantswile kutani ndzi swi vona leswaku hi lonene.’—Pisalema 34:8.

[Tinhlamuselo ta le hansi]

[Xifaniso lexi nga eka tluka 25]

Ndzi ri ni vana va mina, vasati va vona ni sesi wa mina lonkulu loyi ni sweswi hi phayonaka swin’we

[Xifaniso lexi nga eka tluka 26]

Ndzi ye emahlweni ndzi endla ti-tamale ni ku tixavisa exitarateni leswaku ndzi tikhathalela entirhweni wa nkarhi hinkwawo