Xikhongelo

Nhlamuselo: I ku vulavula ni Xikwembu xa ntiyiso kumbe ni swikwembu swa mavunwa hi ndlela yo gandzela, hi laha ku twakalaka kumbe hi mbilu emiehleketweni ya munhu.

Xana u titwa hi ndlela leyi vo tala va titwaka ha yona, leswaku swikhongelo swa wena a swi hlamuriwi?

I swikhongelo swa vamani leswi Xikwembu xi tiyimiseleke ku swi twa?

Ps. 65:2; Mint. 10:34, 35: “Wena l’a yingisaka mikhongelo! V̌anhu hikwav̌o v̌a ta ta ka wena!” “Xikwembu a xi yi hi nghohe; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.” (Vutiko bya munhu, muvala wa nhlonge ya munhu kumbe swiyimo swakwe swa ikhonomi a swi vuli nchumu emhakeni leyi. Kambe swa nkoka i minsusumeto ya mbilu ya munhu ni ndlela leyi a hanyaka ha yona.)

Lk. 11:2: “Loko mi khongela, mi nge: ‘Tatana, vito ra wena a ri hlawuleke.’” (Xana swikhongelo swa wena swi yisiwa eka Tatana, loyi Bibele yi nge vito ra yena i Yehovha? Kumbe, ematshan’weni ya sweswo, u kongomisa swikhongelo swa wena eka “vakwetsimi”?)

Yoh. 14:6, 14: “Yesu a ku ka yena: ‘Hi mina ndlela, ni ntiyiso, ni vutomi; a ku na munhu loyi a taka eka Tatana, loko ku nga ri ha mina. Loko mi kombela ka mina xa nchumu hi vito ra mina, ndzi ta xi endla.’” (Xana u khongela hi vito ra Yesu Kreste, hi ku xiya leswaku tanihi munhu la dyohaka u fanele ku yimeriwa hi yena?)

1 Yoh. 5:14: “Kutani ku tshemba loku hi nga na kona emahlweni ka Xikwembu, hileswaku loko hi kombela xilo xihi na xihi [hi ku rhandza ka xona, NW], xa hi twa.” (Hambi swi ri tano, leswaku u ta va ni ntshembo wo tano, u fanele ku sungula hi ku tiva ku rhandza ka Xikwembu. Kutani u tiyiseka leswaku swikombelo swa wena swi pfumelelana na kona.)

1 Pet. 3:12: “Mahlo ya Hosi ma tsakela lavo lulama, ni tindleve ta yona ti pfulekele swikhongelo swa vona, kambe Hosi yi fularhela lava endlaka swo biha.” (Xana u tshama u tinyika nkarhi wo dyondza leswi Yehovha a swi vulaka hi Rito ra yena malunghana ni leswinene ni leswo biha?)

1 Yoh. 3:22: “Hi amukela eka xona hinkwaswo leswi hi swi kombelaka, hikuva hi hlayisa milawu ya xona ni ku endla leswi xi swi tsakelaka.” (Xana hakunene u navela ku tsakisa Xikwembu, naswona xana u endla matshalatshala yo hlayisa milawu ya xona leyi ana se u yi tivaka?)

Esa. 55:6, 7: “Lav̌ani Yehova loko a ha kumeka; huwelelani ka yena, loko a ha ri kusuhi! Lo’wo biha a a ṭhike ndlela ya yena, ni wa lunya e meehleketo ya yena; a a tlhelele ka Yehova, l’a nga ta ṅwi twela v̌usiwana; ni ka Šikwembu ša hina, le’ši riv̌alelaka, ku nga ri hi mpimo.” (Hi tintswalo, Yehovha u rhamba ni vanhu lava endleke leswo biha leswaku va ya eka yena hi xikhongelo. Kambe, leswaku va ta amukeriwa hi Xikwembu, va fanele ku hundzuka hi ku helela etindleleni ni le mianakanyweni ya vona yo biha kutani va cinca ndlela ya vona ya vutomi.)

I yini lexi nga endlaka leswaku swikhongelo swa munhu swi nga amukeleki eka Xikwembu?

Mt. 6:5: “Loko mi khongela, mi nga fani ni vakanganyisi; hikuva vona va rhandza ku khongela va yimile emasinagogeni ne mahlanganeni ya tindlela, leswaku va ta voniwa hi vanhu. Ndzi tiyisile ndzi ri ka n’wina: Hakelo ya vona va yi kumile.” (Na Luka 18:9-14)

Mt. 6:7: “Loko mi khongela, mi nga bokoxeli kukota vamatiko, hikuva va anakanya leswaku hi ku tata marito va ta yingisiwa.”

Swiv. 28:9: “L’a pfalaka tindlev̌e leŝaku a nga twi milawu [ya Xikwembu], šikhongelo ša yena i manyala.”

Mik. 3:4: “E nkarini lowo v̌a ta huwelela e ka Yehova, kambe a nga v̌a yingisi; o ta v̌a fihlela mombo wa yena e nkarini lowo, hikuv̌a v̌a onhile ku famba ka v̌ona.”

Yak. 4:3: “Naswona loko mi kombela, ma hoxa, hikuva mi tilavela ntsena swo titsakisa ha swona.”

Esa. 42:8; Mt. 4:10: “Hi mina Yehova, [“Yahweh,” JB] hi rona v̌ito ra mina, nḍi nga ka nḍi nga nyiki uṅwana e ku v̌onakala ka mina, ni ŝifaniso e ku v̌ongiwa ka mina.” “U ta gandzela Hosi, Xikwembu xa wena [“Yehovha Xikwembu xa wena,” NW], u tirhela xona ntsena.” (Na Pisalema 115:4-8, kumbe 113:4-8, tinomboro ta vumbirhi eka Dy) (Xikhongelo i ndlela yo gandzela. Loko u khongela emahlweni ka swilo leswi vatliweke kumbe swifaniso, xana sweswo swi ta xi tsakisa Xikwembu?)

Esa. 8:19: “Loko v̌a nga ku ka ṅwina: V̌utisisani la’v̌a humesaka mimoya ya v̌afi, ni v̌abvumbi la’v̌a hlev̌etelaka, la’v̌a ṅunuṅutaka, mi ta ku: Šana tiko a ri faneli ku v̌utisa Šikwembu ša rona šana? Šana ku nga v̌utisiwa v̌afi e timhaka ta la’v̌a hanyaka šana?”

Yak. 1:6, 7: “A a kombele hi ku pfumela, a nga kanakani, hikuva loyi a kanakanaka, ú fana ni gandlati ra lwandle leri biwaka ri yisiwa hala ni hala hi mheho. Munhu lowo tano a nga tshuki a ehleketa leswaku ú ta nyikiwa nchumu hi Xikwembu.”

Hi swihi swilo leswi faneleke ku khongeleriwa?

Mt. 6:9-13: “N’wina ke, khongelani hi mukhuva lowu, mi ku: ‘[1] Tata wa hina la nge matilweni, vito ra wena a ri hlawuleke; [2] a ku te ku fuma ka wena; [3] ku rhandza ka wena a ku endliwe misaveni, tanihi loko ku endliwa tilweni. [4] U hi nyika namuntlha vuswa bya hina bya siku rin’wana ni rin’wana; [5] u hi rivalela swidyoho swa hina, tanihi loko na hina hi rivalela lava hi dyohelaka; [6] u nga hi yisi emiringweni kambe u hi ponisa eka Lowo biha.” (Xiya leswaku vito ni xikongomelo xa Xikwembu swi fanele ku rhangisiwa.)

Ps. 25:4, 5: “Yehova! Nḍi kombe tindlela ta wena, u nḍi dyonḍisa mikhuv̌a ya wena. Nḍi fambise ntiyisweni wa wena, u ri kari u nḍi dyonḍisa; hikuv̌a hi wena Šikwembu ša ku hlayiseka ka mina.”

Lk. 11:13: “Kutani ke, leswi n’wina mi nga vanhu va tihanyi, mi tivaka ku nyika vana va n’wina swilo leswinene, xana Tatana wa le tilweni a nge tlurisi ngopfu ku nyika Moya lowo Kwetsima eka lava kombelaka ka yena xana?”

1 Tes. 5:17, 18: “Mi nga tshiki ku khongela. Eka hinkwaswo, nkhensani.”

Mt. 14:19, 20: “[Yesu] a teka swinkwa leswa ntlhanu ni tinhlampfi timbirhi, a languta henhla etilweni, a nkhensa. Kavaloko a phemelela swinkwa sweswo, a nyika vadyondzisiwa, vona va avela ntshungu. Hinkwavo va dya va xurha.”

Yak. 5:16: “Mi khongelelana.”

Mt. 26:41: “Hitekani mi khongela, leswaku mi nga weli emiringweni.”

Flp. 4:6: “Mi nga vileli ha nchumu; kambe etimhakeni hinkwato, khongelani, mi tivisa Xikwembu leswi mi swi pfumalaka, mi kombela mi ri karhi mi nkhensa.”

Loko Munhu A Ku—

‘A hi khongele ku sungula, ivi u ndzi rungulela mahungu ya wena’

U nga ha hlamula u ku: ‘Ndza tsaka ku tiva leswaku u munhu loyi a tlangelaka nkoka wa xikhongelo. Timbhoni ta Yehovha na tona ta khongela nkarhi na nkarhi. Kambe ku na leswi Yesu a swi vuleke malunghana ni leswaku ku fanele ku khongeriwa rini naswona njhani, leswi nga ha vaka leswintshwa eka wena. Xana a wu swi tiva leswaku u byele vadyondzisiwa va yena leswaku va nga khongeli erivaleni hi xikongomelo xo voniwa hi vanhu leswaku a va ri vanhu lava tinyiketeleke, lava khongelaka? . . . (Mt. 6:5)’ Kumbexana u nga engetela u ku: ‘Xiya leswi a yeke emahlweni a vula leswaku swi fanele swi va swa nkoka eka hina ni leswi hi faneleke ku swi veka emahlweni eswikhongelweni swa hina. Leswi hi swona leswi ndzi nga tela ku ta bula na wena ha swona. (Mt. 6:9, 10)’

Kumbexana u nga ha ku: ‘Ndza swi tiva leswaku vayimeri va mintlawa yin’wana ya vukhongeri va endla tano. Kambe Timbhoni ta Yehovha a ti endli tano, hikuva Yesu u letele vadyondzisiwa va yena leswaku va ya endla ntirho wa vona wo chumayela hi mukhuva wun’wana. Ematshan’weni yo vula leswaku, “Loko mi nghena emutini, sungulani hi ku khongela,” xiya leswi a swi vuleke, hi laha swi kumekaka ha kona eka Matewu 10:12, 13. . . . Naswona languta laha endzimaneni 7, leswi a va fanele ku vulavula ha swona. . . . Xana Mfumo wolowo wu nga va pfuna njhani vanhu vo fana na mina na wena? (Nhlav. 21:4)’