Rungula Leri Hi Faneleke Hi Ri Twarisa

“CHAVA XIKWEMBU XA NTIYISO U HLAYISA SWILERISO SWA XONA”

KHALE ka khaleni ku nga si fika nguva ya Vukreste, Yehovha u byele Abrahama wo tshembeka hi lunghiselelo leri a ri endleleke “tinxaka hinkwato ta misava” leswaku ti tikatekisa. (Gen. 22:18) U tlhele a huhutela Solomoni leswaku a tsala malunghana ni xilaveko xa nkoka eka vanhu hinkwavo: “Chava Xikwembu xa ntiyiso u hlayisa swileriso swa xona. Hikuva leyi hi yona mfanelo hinkwayo ya munhu.” (Ekl. 12:13) Kambe, xana vanhu lava tshamaka ematikweni hinkwawo a va ta ti tiva njhani timhaka leti?

Hambileswi ku nga khale ku ri ni vanhu lava pfumelaka rito ra Xikwembu, Bibele yi komba leswaku misava hinkwayo a yi ta twa mahungu lamanene hi ‘siku ra Hosi.’ Siku rero ri sungule hi 1914. (Nhlav. 1:10) Malunghana ni nkarhi wolowo, Nhlavutelo 14:6, 7 yi vula leswaku ku twarisiwa ka mahungu lamanene a ku ta endliwa ehansi ka nkongomiso wa ntsumi eka “matiko hinkwawo ni tinyimba hinkwato ni tindzimi hinkwato ni vanhu hinkwavo.” A va ta khutaziwa leswi: “Chavani Xikwembu mi xi vangamisa, hikuva nkarhi wa ku avanyisiwa hi xona wu fikile, gandzelani Loyi a endleke tilo ni misava ni lwandle ni minseledyana ya mati.” I ku rhandza ka Xikwembu leswaku mahungu lawa ma twarisiwa. Hi ni lunghelo ra ku hlanganyela entirhweni lowu.

“Xikwembu Xa Ntiyiso.” Loko Yehovha a ku, “N’wina mi timbhoni ta mina,” a ku ri hi mhaka ya leswi ku tlhontlhiwaka Vukwembu bya yena. (Esa. 43:10) Rungula leri twarisiwaka a hi ra leswaku vanhu va va ni vukhongeri kumbe va pfumela eka xikwembu xo karhi. Ku ri na sweswo va fanele va nyikiwa nkarhi wo dyondza leswaku Muvumbi wa tilo ni misava hi yena ntsena Xikwembu xa ntiyiso. (Esa. 45:5, 18, 21, 22; Yoh. 17:3) I Xikwembu xin’we xa ntiyiso lexi nga kotaka ku profeta swa nkarhi lowu taka ivi swi endleka. Hi ni lunghelo ra ku komba van’wana leswaku ku hetiseka ka rito ra Yehovha enkarhini lowu hundzeke i xitiyisekiso xa leswaku ni leswin’wana hinkwaswo leswi a swi tshembiseke swi ta hetiseka.—Yox. 23:14; Esa. 55:10, 11.

Kunene, vo tala lava hi va chumayelaka va gandzela swikwembu swin’wana kumbe va vula leswaku a va gandzeli xikwembu na xin’we. Leswaku va hi yingisela, hi nga ha sungula hi ku bula hi leswi hi pfumelelanaka eka swona. Xikombiso lexi tsariweke eka Mintirho 17:22-31, xi nga hi pfuna. Xiya leswaku hambileswi muapostola Pawulo a a ri ni vuxiyaxiya, u swi veke erivaleni leswaku vanhu hinkwavo va tihlamulela eka Xikwembu lexi nga Muvumbi wa tilo ni misava.

Ku Tivisa Vito Ra Xikwembu. U nga tshiki ku twarisa Xikwembu xa ntiyiso hi vito. Yehovha wa ri rhandza vito ra yena. (Eks. 3:15; Esa. 42:8) U lava leswaku vanhu va tiva vito rero. U endle leswaku vito ra yena leri kwetsimaka ri tsariwa eBibeleni minkarhi yo tlula 7 000. I vutihlamuleri bya hina ku endla leswaku vanhu va ri tolovela vito leri.—Det. 4:35.

Vumundzuku hinkwabyo bya vanhu byi titshege hi ku tiva ka vona Yehovha ni ku va ni ripfumelo eka yena. (Yuw. 2:32; Mal. 3:16; 2 Tes. 1:8) Kambe, vanhu vo tala a va n’wi tivi Yehovha. Volavo va katsa ni ntshungu lowu tivulaka vagandzeri va Xikwembu xa Bibele. Hambiloko va ri na yona Bibele naswona va yi hlaya, swi nga endleka va nga ri tivi vito ra Xikwembu hikuva ri kwamuriwile eka vuhundzuluxeri byo tala bya manguva lawa. Vanhu van’wana va tive vito leri nge Yehovha loko vafundhisi va vona va va byela leswaku va nga ri tirhisi.

Xana vanhu hi nga va toloveta njhani vito ra Xikwembu? Lexi nga pfunaka swinene i ku va komba rona eBibeleni—eka ya vona loko va ri na yona. Eka vuhundzuluxeri byin’wana, vito rero ri humelela minkarhi ya magidi. Eka byin’wana, ri nga ha kumeka ntsena eka Pisalema 83:18 kumbe Eksoda 6:3-6, kumbe ri nga ha kumeka eka nhlamuselo ya le hansi ya Eksoda 3:14, 15 kumbe 6:3. Eka vuhundzuluxeri byo tala, ku tirhisiwe marito yo tanihi “Hosi” na “Xikwembu,” ma tsariwe hi ndlela yo hlawuleka laha ririmi ro sungula a ri tirhise vito ra Xikwembu kona. Laha vuhundzuluxeri bya manguva lawa byi kwamuleke vito ra Xikwembu hi ku helela, u nga ha tirhisa vuhundzuluxeri bya Bibele ya khale, leswaku u komba vanhu leswi swi endliweke ha rona. Ematikweni man’wana u nga ha komba vanhu vito ra Xikwembu etibukwini ta tinsimu ta vukhongeri bya vona kumbe eka marito lama tsariweke emiakweni ya kwalaho.

Hambi ku ri eka lava gandzelaka swikwembu swin’wana, Yeremiya 10:10-13, eka Vuhundzuluxeri Bya Misava Leyintshwa yi nga tirhisiwa hi ndlela leyi humelelaka. A yo boxa vito ra Xikwembu ntsena kambe yi tlhela yi swi veka erivaleni leswaku i mani.

U nga tumbeti vito ra Yehovha hi ku tirhisa marito yo fana na “Xikwembu” na “Hosi,” hilaha Vujagana byi endlaka hakona. Leswi a swi vuli swona leswaku vito ra xona u ta ri tirhisa eku sunguleni ka bulo rin’wana ni rin’wana. Hikwalaho ka leswi va kuceteriweke hi ndlela yo biha, vanhu van’wana va nga ha tsema bulo. Kambe loko u kote ku sungula bulo, u nga tshiki ku tirhisa vito ra Xikwembu.

Xiya leswaku Bibele yi tirhisa vito ra Xikwembu minkarhi yo tala ku tlula swithopo leswi nge “Hosi” na “Xikwembu.” Hambiswiritano, vatsari va Bibele a va nghenisanga vito ra Xikwembu eka xiga xin’wana ni xin’wana. Va ri nghenise hi ndlela ya ntolovelo, hi ku ntshunxeka ni hi xichavo. Yoleyo hi yona ndlela leyinene leyi hi nga yi landzelaka.

Munhu La Tiviwaka Hi Vito. Hambileswi ku tiva Xikwembu hi vito swi nga swa nkoka, ka ha ri ni swo tala leswi faneleke swi tiviwa ha xona.

Leswaku vanhu va rhandza Yehovha ni ku pfumela eka yena, va fanele va tiva leswaku Xikwembu i munhu wa njhani. Loko Yehovha a tivisa Muxe vito ra yena eNtshaveni ya Sinayi, A nga phindha-phindhanga rito leri nge “Yehovha” ntsena. U vulavule hi tin’wana ta timfanelo ta Yena leti hlamarisaka. (Eks. 34:6, 7) Yoleyo hi yona ndlela leyi hi faneleke hi yi landzelela.

Loko u chumayela vanhu lava ha ku tsakelaka kumbe u nyikela tinkulumo evandlheni, u vulavula hi mikateko ya Mfumo, hlamusela leswi mikateko yoleyo yi vulaka swona hi Xikwembu lexi yi tshembiseke. Loko u vulavula hi milawu ya xona, kandziyisa vutlhari ni rirhandzu leri yi ri tameleke. Swi veke erivaleni leswaku leswi Xikwembu xi lavaka swona a swi hi tikiseli vutomi, kambe swi pfuna hina. (Esa. 48:17, 18; Mik. 6:8) Kombisa ndlela leyi ha yona ku kombisa ka Yehovha matimba ya yena ku paluxaka swo karhi hi vumunhu bya yena, mimpimanyeto ya yena, ni xikongomelo xa yena. Kombisa ndlela leyi Yehovha a ti tirhisaka kahle ha yona timfanelo takwe. Vanhu a va ku twe na wena u ri karhi u phofula ndlela leyi u titwaka ha yona ha Yehovha. Rirhandzu ra wena ha Yehovha ri ta endla leswaku na vona va n’wi rhandza.

Rungula ra xihatla ra le sikwini ra hina ri khutaza vanhu hinkwavo leswaku va chava Xikwembu. Leswi hi swi vulaka swi fanele swi kombisa leswaku hi chava Xikwembu. Leswi swi vula ku va ni xichavo lexinene eka Yehovha. (Ps. 89:7) Swi katsa ni ku tiva leswaku Yehovha i Muavanyisi lonkulu ni leswaku vumundzuku bya hina byi titshege hi ku amukeriwa hi yena. (Luka 12:5; Rhom. 14:12) Hikwalaho, xichavo xo tano, xi fambisana ni ku n’wi rhandza swinene, ni ku navela ku n’wi tsakisa hi mbilu hinkwayo. (Det. 10:12, 13) Ku chava Xikwembu ku tlhela ku hi susumetela ku venga leswo homboloka, ku yingisa milawu ya Xikwembu, ni ku xi gandzela hi mbilu hinkwayo. (Det. 5:29; 1 Tikr. 28:9; Swiv. 8:13) Xichavo xexo xi hi pfuna leswaku hi tivonela leswaku hi nga ringeti ku tirhela Xikwembu hi hala tlhelo ha ha rhandza misava.—1 Yoh. 2:15-17.

Vito Ra Xikwembu—“Xihondzo Xo Tiya.” Vanhu lava tivaka Yehovha hakunene va kuma nsirhelelo wa yena lowukulu. A va wu kumi hileswi va tivaka vito ra yena ntsena kumbe hi ku tiva ntsena tin’wana ta timfanelo ta yena. Kambe swi vangiwa hileswi va tshembaka Yehovha. Malunghana na vona, Swivuriso 18:10 yi ri: “Vito ra Yehovha i xihondzo xo tiya. Lowo lulama u tsutsumela eka xona naswona u kuma nsirhelelo.”

Wu tirhise kahle nkarhi lowu u wu kumaka leswaku u khutaza van’wana leswaku va tshemba Yehovha. (Ps. 37:3; Swiv. 3:5, 6) Ku tshemba Yehovha swi komba ku va ni ripfumelo eka yena ni switshembiso swa yena. (Hev. 11:6) Loko vanhu va ‘vitana vito ra Yehovha’ hikwalaho ka leswi va swi tivaka leswaku i Hosi ya Vuako Hinkwabyo, va rhandza tindlela ta yena, naswona va pfumela hi mbilu hinkwayo leswaku ku ponisiwa ka xiviri ku huma eka yena ntsena—Rito ra Xikwembu ra hi tiyisekisa—leswaku va ta ponisiwa. (Rhom. 10:13, 14) Loko u ri karhi u dyondzisa van’wana, va pfune leswaku va aka ripfumelo ro tano eka hinkwaswo leswi va swi endlaka evuton’wini bya vona.

Vunyingi bya vanhu byi langutane ni swikarhato leswikulu swa munhu hi yexe. Swi nga ha endleka va nga swi tivi leswaku va ta swi lulamisa njhani. Va khutaze leswaku va dyondza tindlela ta Yehovha, va n’wi tshemba ni ku tirhisa leswi va swi dyondzaka. (Ps. 25:5) Va khutaze leswaku va khongela hi matimba leswaku Xikwembu xi va pfuna, ni ku nkhensa mikateko leyi xi va katekisaka ha yona. (Filp. 4:6, 7) Loko se va tiva Yehovha, ku nga ri ntsena hi ku hlaya marungula yo karhi eBibeleni kambe ni hi ku vona ku hetiseka ka switshembiso swa yena evuton’wini bya vona vini, va ta sungula ku vona nsirhelelo lowu tisiwaka hi ku twisisa leswi vito ra Yehovha ri vulaka swona.—Ps. 34:8; Yer. 17:7, 8.

Tirhisa nkarhi wun’wana ni wun’wana lowu u nga na wona leswaku u pfuna vanhu va twisisa leswaku i vutlharhi ku chava Yehovha Xikwembu xa ntiyiso, ni ku hlayisa milawu ya yena.

“KU NYIKELA VUMBHONI MAYELANA NA YESU”

ENDZHAKU ka ku pfuxiwa kakwe ni loko a nga si tlhelela etilweni, Yesu Kreste u byele vadyondzisiwa va yena, a ku: “Mi ta va timbhoni ta mina . . . ku ya fika endhawini ya le kule swinene ya misava.” (Mint. 1:8) Malandza ya Xikwembu yo tshembeka esikwini ra hina ma hlamuseriwa ma ri lama “nga ni ntirho wa ku nyikela vumbhoni mayelana na Yesu.” (Nhlav. 12:17) Xana wena u swi hisekela ku fikela kwihi ku nyikela vumbhoni byebyo?

Vanhu vo tala lava vulaka swi huma embilwini leswaku va pfumela eka Yesu a va tivi nchumu mayelana ni vutomi bya yena a nga si ta emisaveni. A va swi tivi leswaku a a ri munhu wa nyama loko a ri emisaveni. A va swi twisisi leswaku swi vula yini ku va ka yena N’wana wa Xikwembu. Va tiva switsongo mayelana ni vutihlamuleri lebyi a nga na byona eku hetisekeni ka xikongomelo xa Xikwembu. A va swi tivi leswi a swi endlaka sweswi, naswona a va yi xiyi ndlela leyi vutomi bya vona byi nga ta khumbeka ha yona hi leswi a nga ta swi endla enkarhini lowu taka. Hi ku hoxisa va nga ha ehleketa ni leswaku Timbhoni ta Yehovha a ti pfumeli eka Yesu. I lunghelo ra hina ku tikarhatela ku va tivisa ntiyiso wa timhaka leti.

Van’wana vona a va pfumeli leswaku u ve kona munhu loyi a hlamuseriwaka a ri Yesu eBibeleni. Van’wana va teka Yesu a ri munhu wa ndhuma ntsena. Vo tala va kaneta ntiyiso wa leswaku i N’wana wa Xikwembu. “Ku nyikela vumbhoni mayelana na Yesu” eka vanhu vo tano swi lava matshalatshala lamakulu, ku lehisa mbilu ni vutlhari.

Ku nga khathariseki leswaku vonelo ra vayingiseri va wena hi rihi, va fanele va kuma vutivi mayelana na Yesu Kreste loko va lava ku vuyeriwa ni lunghiselelo ra Xikwembu ra vutomi lebyi nga heriki. (Yoh. 17:3) Ku rhandza ka Xikwembu loku hlamuseriweke kahle hi leswaku hinkwavo lava hanyaka va fanele va “twarisa erivaleni leswaku Yesu Kreste i Hosi” naswona va fanele va titsongahatela vuhosi bya yena. (Filp. 2:9-11) Xisweswo, a hi nge papalati mhaka loko hi hlangana ni vanhu lava nga ni mavonelo lama hoxeke kumbe lava nga ni nkucetelo wo biha. Kasi minkarhi yin’wana hi nga vulavula hi ntshunxekile hi Yesu Kreste—hambi ku ri eka riendzo ra hina ro sungula—eka van’wana, swi nga ha lava leswaku hi hlamusela hi ndlela ya vutlharhi leyi nga ta pfuna vayingiseri leswaku va sungula ku anakanya kahle ha yena. Nakambe hi nga ha fanela ku anakanya hi tindlela to vula swin’wana leswi nga ta khumba mhaka leyi eka riendzo leri landzelaka. Hambiswiritano, a swi nge koteki ku bula hi timhaka hinkwato leti katsekaka kukondza hi fambisa dyondzo ya Bibele ya le kaya ni munhu wa kona.—1 Tim. 2:3-7.

Vutihlamuleri Bya Yesu Bya Nkoka Eka Xikongomelo Xa Xikwembu. Hi fanele hi pfuna vanhu leswaku va twisisa leswaku leswi Yesu a nga “ndlela” naswona ‘a nga riki kona loyi a taka eka Tatana handle ko ta ha yena,’ a swi koteki ku va ni vuxaka ni Xikwembu handle ka ku pfumela eka Yesu Kreste. (Yoh. 14:6) Handle ka loko munhu a tiva vutihlamuleri lebyi Yehovha a byi nyikeke N’wana wa yena wa mativula, a swi koteki ku twisisa Bibele. Ha yini? Hikuva Yehovha u endle N’wana loyi leswaku a va xilotlelo xa swikongomelo swa Yena hinkwaswo. (Kol. 1:17-20) Vuprofeta bya Bibele byi kandziyisa mhaka leyi. (Nhlav. 19:10) Yesu Kreste hi yena a nga ta tirhisiwa ku tlhantlha swiphiqo hinkwaswo leswi vangiweke hi ku xandzuka ka Sathana ni xidyoho xa Adamu.—Hev. 2:5-9, 14, 15.

Leswaku munhu a twisisa vutihlamuleri bya Kreste, u fanele a tiva leswaku vanhu va le ka xiyimo lexi hlomulaka mbilu, naswona a va nge swi koti ku tikutsula eka xona. Hinkwerhu ka hina hi velekeriwe exidyohweni. Leswi swi nga hi khumba hi tindlela to hambana-hambana evuton’wini bya hina. Hambiswiritano, xidyoho xexo xi hetelela xi hi nghenise endzhongweni. (Rhom. 3:23; 5:12) Hlamusela ntiyiso wa mhaka leyi eka lava u va chumayelaka. Kutani hlamusela leswaku Yehovha u kombise rirhandzu hi ku endla lunghiselelo ro kutsula vanhu exidyohweni ni rifu, a tirhisa gandzelo ra nkutsulo ra Yesu Kreste leri nga ta pfuna lava va nga ni ripfumelo eka lunghiselelo rero. (Mar. 10:45; Hev. 2:9) Leswi swi va pfulela ndlela yo kuma vutomi lebyi nga heriki va ri vanhu lava hetisekeke. (Yoh. 3:16, 36) I ndlela yin’we ntsena leyi nga endlaka leswaku u kuma vutomi lebyi nga heriki. (Mint. 4:12) Loko u dyondzisa xichudeni kumbe vandlha, u nga hlamuseli mhaka yoleyo ntsena. Hi musa ni hi ku lehisa mbilu endla leswaku vayingiseri va wena va tlangela vutihlamuleri bya Kreste loyi a nga Mukutsuri wa hina. Ku tlangela lunghiselelo leri swi nga ri khumba swinene langutelo ra munhu, mahanyelo ya yena ni tipakani ta yena evuton’wini.—2 Kor. 5:14, 15.

Entiyisweni, Yesu u nyikele hi vutomi bya yena tanihi gandzelo kan’we ntsena. (Hev. 9:28) Hambiswiritano, sweswi i Muprista Lonkulu. Pfuna van’wana leswaku va twisisa leswaku sweswo swi vula yini. Xana va ni ntshikilelo, va hele matimba, va xaniseka, kumbe va na swiphiqo hikwalaho ka tihanyi ta vanhu lava va akelaneke na vona? Loko Yesu a ha ri munhu wa nyama na yena swi n’wi humelerile swilo leswi hinkwaswo. Wa yi tiva ndlela leyi hi titwaka ha yona. Hikwalaho ka ku nga hetiseki, xana ha xi vona xilaveko xa tintswalo ta Xikwembu? Loko hi kombela Xikwembu leswaku xi hi rivalela swidyoho hi ku tirhisa gandzelo ra Yesu, Yesu u tirha tanihi “mupfuni eka Tatana.” Wa “hi kombelela,” hi musa. (1 Yoh. 2:1, 2; Rhom. 8:34) Hikwalaho ka gandzelo ra Yesu ni hi ntirho wa yena tanihi Muprista Lonkulu, ha swi kota ku tshinelela “xiluvelo xa musa lowu nga faneriwiki” xa Yehovha leswaku hi kuma mpfuno hi nkarhi lowu faneleke. (Hev. 4:15, 16) Hambileswi hi nga hetisekangiki, mpfuno lowu Yesu a hi nyikaka wona tanihi Muprista Lonkulu wu endla leswaku hi kota ku tirhela Xikwembu hi ripfalo leri baseke.—Hev. 9:13, 14.

Ku engetela kwalaho, Yesu u ni vulawuri lebyikulu tanihi la vekiweke hi Xikwembu leswaku a va Nhloko ya vandlha ra Vukreste. (Mat. 28:18; Efe. 1:22, 23) Hikwalaho, u nyikela nkongomiso lowu lavekaka hi ku pfumelelana ni ku rhandza ka Xikwembu. Loko u dyondzisa van’wana, va pfune ku twisisa leswaku Yesu Kreste hi yena ntsena Nhloko ya vandlha, a ku na un’wana. (Mat. 23:10) Ku sukela eka riendzo ro sungula, va rhambele eminhlanganweni ya vandlha ra ka n’wina, laha hi dyondzaka Bibele hi mpfuno wa tibuku leti ti lunghiseleriweke hi “hlonga ro tshembeka ni ro tlhariha.” U nga va hlamuseli ntsena leswaku “hlonga” i mani, kambe va hlamusele ni leswaku N’wini i mani, leswaku va tiva vunhloko bya Yesu. (Mat. 24:45-47) Va tivise eka vakulu, u tlhela u hlamusela timfanelo leti va faneleke va va na tona. (1 Tim. 3:1-7; Tito 1:5-9) Hlamusela leswaku vandlha a hi ra vakulu kambe vona vo pfuna hina leswaku hi famba eminkondzweni ya Yesu Kreste. (Mint. 20:28; Efe. 4:16; 1 Pet. 5:2, 3) Pfuna vanhu lava va ha ku tsakelaka va vona leswaku ku ni vanhu lava hlelekeke emisaveni hinkwayo lava tirhaka ehansi ka vunhloko bya Kreste.

Eka Tievhangeli hi dyondza leswaku loko Yesu a nghena eYerusalema a nga si dlayiwa, vadyondzisiwa va yena va n’wi ndhundhuzerile tanihi loyi a “taka a ri Hosi hi vito ra Yehovha!” (Luka 19:38) Loko vanhu va ri karhi va dyondza Bibele hi vuenti, va dyondza leswaku sweswi Yehovha u nyike Yesu matimba yo fuma lama khumbaka vanhu va matiko hinkwawo. (Dan. 7:13, 14) Loko u nyikela tinkulumo evandlheni kumbe u fambisa tidyondzo, pfuna vanhu leswaku va twisisa leswi ku fuma ka Yesu ku vulaka swona eka hina.

Kandziyisa leswaku ndlela leyi hi hanyaka ha yona yi kombisa loko hi pfumela hakunene leswaku Yesu Kreste i Hosi ni leswaku hi titsongahata hi ku swi rhandza eka vulawuri bya yena. Kandziyisa leswaku i ntirho muni lowu Yesu a wu aveleke valandzeri va yena endzhaku ka loko a totiwile tanihi Hosi. (Mat. 24:14; 28:18-20) Hlamusela leswi Yesu, Mutsundzuxi wo Hlamarisa, a swi vuleke mayelana ni leswi ku faneleke ku rhangisiwa swona evuton’wini. (Esa. 9:6, 7; Mat. 6:19-34) Hlamusela moya lowu Hosana ya ku Rhula yi vuleke leswaku valandzeri va yona va fanele va wu kombisa. (Mat. 20:25-27; Yoh. 13:35) U nga swi endli ntirho wa wena ku vula loko van’wana va endla leswi nga ematimbeni ya vona leswaku va ala vubihi, kambe va khutaze leswaku va tikambisisa loko mintirho ya vona yi va kombisa va ri lava titsongahatelaka vuhosi bya Kreste. Loko u ri karhi u va hlamusela tivutise loko na wena u endla leswi fanaka.

Ku Endla Kreste A Va Masungulo. Bibele yi teka ntirho wa ku endla mudyondzisiwa a va Mukreste yi wu fanisa ni ku aka yindlu leyi masungulo ya yona ya nga Yesu Kreste. (1 Kor. 3:10-15) Leswaku u endla sweswo, pfuna vanhu leswaku va tiva Yesu hilaha a hlamuseriweke hakona eBibeleni. U lemuka leswaku va nga ku teki u ri munhu loyi va faneleke va landzelela yena. (1 Kor. 3:4-7) Va kongomise leswaku va landzela Yesu Kreste.

Loko masungulo ma andlariwe kahle, swichudeni swi ta twisisa leswaku Kreste u hi siyele xikombiso leswaku ‘hi xi landzela.’ (1 Pet. 2:21) Leswaku u aka ehenhla ka masungulo wolawo, khutaza swichudeni leswaku swi hlaya Tievhangeli, ku nga ku hlaya onge hi loko swi hlaya matimu ya ntiyiso ntsena, kambe swi hlayela ku hanya hi ku pfumelelana na tona. Va pfune leswaku va anakanyisisa hi mavonelo ni timfanelo leti Yesu a ti kombiseke. Va khutaze ku lemuka ndlela leyi Yesu a titweke ha yona hi Tata wakwe, ni ndlela leyi a langutaneke ni miringo ha yona, ni ndlela leyi a titsongahateke ha yona eka Xikwembu, ni ndlela leyi a khomeke vanhu van’wana ha yona ehansi ka swiyimo swo hambana-hambana. Kandziyisa ntirho lowu Yesu a a khomeke swinene ha wona evuton’wini. Kutani loko xichudeni xi fanele xi endla swiboho kumbe xi langutane ni miringo evuton’wini, xi ta tivutisa: ‘Xana Yesu a a ta endla yini eka xiyimo lexi? Xana xiboho xa mina xi ta kombisa leswaku ndza swi tlangela leswi a ndzi endleleke swona?’

Loko u vulavula ni vandlha, u nga ehleketi leswaku leswi vamakwenu ana se va nga ni ripfumelo eka Yesu, a swi bohi leswaku u vulavula ngopfu ha yena. Leswi u swi vulaka swi ta pfuna swinene loko u aka ripfumelo ra vona. Loko u vulavula hi minhlangano, twananisa leswi u swi vulaka ni Vunhloko bya Yesu evandlheni. Loko u fambisa nhlangano wa ntirho wa nsimu, kombisa ndlela leyi Yesu a a ku hisekela ha yona ku chumayela, naswona kombisa leswi Kreste tanihi Hosi a swi endlaka sweswi leswaku a hlengeleta vanhu, va ta pona kutani va nghena emisaveni leyintshwa.

Swi le rivaleni leswaku ku laveka swo tala ku tlula ntsena ku dyondza mintiyiso ya xisekelo ha Yesu. Leswaku vanhu va va Vakreste va xiviri, va fanele va kombisa ripfumelo eka yena naswona va n’wi rhandza hakunene. Rirhandzu rolero ri ta va susumetela ku n’wi yingisa. (Yoh. 14:15, 21) Ri endla leswaku vanhu va kota ku yima va tiyile loko ripfumelo ra vona ri ringiwa, va hambeta va famba eminkondzweni ya Kreste vutomi bya vona hinkwabyo, va tikombisa va ri Vakreste lava vupfeke lava ‘dzimeke timitsu ni ku simekiwa emasungulweni.’ (Efe. 3:17) Sweswo swi yisa ku dzuneka eka Yehovha, Xikwembu ni Tata wa Yesu Kreste.

“MAHUNGU LAMANENE LAWA YA MFUMO”

LOKO a va byela vuxokoxoko malunghana ni xikombiso xa vukona bya yena ni xa ku hela ka mafambiselo lawa ya swilo, Yesu u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Mat. 24:14.

Kahle-kahle mahungu lawa ma faneleke ma chumayeriwa emisaveni hinkwayo i mahungu ya yini? I mahungu ya Mfumo lowu Yesu a hi dyondziseke leswaku hi wu khongelela eka Xikwembu hi ku: “Mfumo wa wena a wu te.” (Mat. 6:10) Nhlavutelo 11:15 yi wu hlamusela tanihi “mfumo wa Hosi ya hina [Yehovha] ni wa Kreste” hikuva vulawuri bya wona byi huma eka Yehovha naswona u byi nyike Kreste leswaku a va Hosi. Hambiswiritano, xiya leswaku mahungu lawa Yesu a vuleke leswaku ma twarisiwa esikwini ra hina, ma fikelele etindhawini ta le kule ku tlula leti valandzeri va yena va ti fikeleleke loko va chumayela eka lembe xidzana ro sungula. Va byele vanhu leswaku: “Mfumo wa Xikwembu wu tshinele eka n’wina.” (Luka 10:9) Yesu la totiweke ku va Hosi, hi nkarhi wolowo a ri na vona. Kambe eka Matewu 24:14, Yesu u profete hi ku tivisiwa ka xiendlakalo xin’wana xa nkoka, emisaveni hinkwayo, lexi a xi ta hetisisa xikongomelo xa Xikwembu.

Muprofeta Daniyele u kombiwe xivono xa ku hetiseka loku. U vone “Nkulukumba wa Masiku,” Yehovha Xikwembu, a teka “ku fuma ni xindzhuti ni mfumo,” a swi nyika “loyi a fanaka ni n’wana wa munhu,” Yesu Kreste, ‘leswaku vanhu va matiko ni tindzimi hinkwato va n’wi tirhela.’ (Dan. 7:13, 14) Xiendlakalo xexo xa nkoka swinene evuakweni hinkwabyo xi humelele hi 1914 etilweni. Endzhaku ka sweswo, Diyavulosi ni madimona yakwe va cukumeteriwe emisaveni. (Nhlav. 12:7-10) Mafambiselo lawa ya khale ma nghene emasikwini ya wona ya makumu. Kambe ma nga si simuriwa hi laha ku heleleke, sweswi emisaveni hinkwayo ku twarisiwa leswaku Hosi Mesiya la vekiweke hi Yehovha wa fuma a ri exiluvelweni etilweni. Vanhu va tivisiwa sweswo hinkwako-nkwako. Ku angula ka vona ku nyikela vumbhoni bya leswaku va ku tlangela ku Fuma ka La nge Henhla-henhla ‘la fumaka vanhu.’—Dan. 4:32.

Entiyisweni, swo tala swa ha ri endleleni! Ni sweswi ha ha khongela hi ku, “Mfumo wa wena a wu te,” kambe a swi vuli swona leswaku Mfumo wa Xikwembu wa ha ta simekiwa. Kambe swi vula leswaku Mfumo wa le tilweni wu ta tirha hi ndlela leyi hetisekeke leswaku wu hetisisa vuprofeta byo tanihi bya Daniyele 2:44 na Nhlavutelo 21:2-4. Wu ta hundzula misava yi va paradeyisi leyi nga tala hi vanhu lava va rhandzaka Xikwembu ni vanhu-kulobye. Loko hi ri karhi hi chumayela “mahungu lamanene ya mfumo,” hi va hi vulavula hi switshembiso leswa ha taka. Kambe hi twarisa hi ku tiyiseka leswaku Yehovha ana se u nyike N’wana wa yena vulawuri. Xana wa ma kandziyisa mahungu lawa lamanene loko u chumayela hi Mfumo?

Hlamusela Mfumo. Xana hi nga swi hetisisa njhani leswi hi lerisiweke swona leswaku hi twarisa Mfumo wa Xikwembu? Hi nga pfuxa ku tsakela hi ku sungula mabulo hi timhaka to hambana-hambana, kambe hi nga hlweli ku boxa leswaku rungula ra hina ri vulavula hi Mfumo wa Xikwembu.

Xa nkoka swinene eka ntirho lowu i ku hlaya kumbe ku tshaha matsalwa lawa ma vulavulaka hi Mfumo. Loko u vulavula hi Mfumo, tiyiseka leswaku lava u vulavulaka na vona va wu twisisa leswaku i yini. Ku nga ha laveka u hlamusela ku tlula ku vula ntsena leswaku Mfumo wa Xikwembu i hulumendhe. Vanhu van’wana swi nga ha va tikela ku anakanya hi hulumendhe leyi nga vonakiki. Hi nga ha hlamulana na vona hi tindlela to hambana-hambana. Hi xikombiso, nkoka-misava a wu vonaki, kambe matimba ya wona ma khumba vutomi bya hina. A hi nge n’wi voni Loyi a endleke milawu ya nkoka-misava, kambe swi le rivaleni leswaku u na matimba lamakulu. Bibele yi n’wi vula “Hosi leyi nga riki na makumu.” (1 Tim. 1:17) Kumbe u nga ha anakanya hi leswaku etikweni lerikulu, vanhu vo tala a va si tshama va ya eka doroba-nkulu ra kona kumbe a va si tshama va vona munhu loyi a va fumaka. Kambe va n’wi tiva hikwalaho ka swiviko swa mahungu. Hilaha ku fanaka, Bibele, leyi kandziyisiweke hi tindzimi to tlula 2 200, yi hi byela hi ta Mfumo wa Xikwembu; yi hi tivisa leswaku i mani loyi a nyikiweke vulawuri bya Mfumo ni leswaku wu tirha yini. Xihondzo xo Rindza, lexi humesiwaka hi tindzimi to tala ku tlula buku yihi na yihi leyi humaka nkarhi na nkarhi, xi endleriwe leswaku “Xi Huwelela Mfumo Wa Xikwembu,” hilaha swi tsariweke ha kona exifunengetweni xa xona.

Leswaku u pfuna vanhu va twisisa leswaku Mfumo i yini, u nga ha boxa swin’wana swa swilo leswi va lavaka leswaku tihulumendhe ti va nyika swona: nsirhelelo wa timali, ku rhula, ku herisa vugevenga, xihlawuhlawu ni ku lwa ka tinxaka, dyondzo ni rihanyo lerinene. Va kombise leswaku i Mfumo wa Xikwembu ntsena lowu nga ta enerisa swilaveko leswi ni hinkwaswo leswinene leswi naveriwaka hi vanhu.—Ps. 145:16.

Tikarhatele ku endla vanhu va navela ku fumiwa hi Mfumo lowu eka wona Yesu Kreste a fumaka tanihi Hosi. Hlamusela leswaku masingita lawa a ma endleke ko va swikombiso swa leswi a nga ta swi endla tanihi Hosi ya le tilweni. Hakanyingi vulavula hi timfanelo leti ku tsakisaka leti a ti kombiseke. (Mat. 8:2, 3; 11:28-30) Hlamusela leswaku u nyikele hi vutomi bya yena eka hina ni leswaku Xikwembu xi n’wi pfuxile xi n’wi nyika vutomi lebyi nga riki na ku fa ematilweni. Sweswi i Hosi leyi fumaka etilweni.—Mint. 2:29-35.

Kandziyisa leswaku sweswi Mfumo wa Xikwembu wu fuma wu ri etilweni. Hambiswiritano, xiya leswaku vanhu vo tala a va swi voni swiyimo leswi va ehleketaka leswaku hi swona swi nga vaka vumbhoni bya leswaku Mfumo wolowo se wa fuma. Kombisa leswaku wa va twisisa, kutani u va vutisa loko va swi tiva leswi Yesu Kreste a nga te hi ta vona ha swona leswaku se wa fuma. Hlamusela swin’wana swa leswi a nga te hi ta vona ha swona, leswi nga eka Matewu ndzima 24, Marka ndzima 13, kumbe eka Luka ndzima 21. Kutani vutisa leswaku ha yini ku vekiwa ka Kreste etilweni tanihi hosi ku endla leswaku ku va ni swiyimo leswi emisaveni. Vulavula hi Nhlavutelo 12:7-10, 12.

Boxa vumbhoni bya leswi Mfumo wa Xikwembu wu swi endlaka sweswi, hi ku hlaya Matewu 24:14, kutani u hlamusela nongonoko wo dyondzisa vanhu Bibele emisaveni hinkwayo, lowu nga kona sweswi. (Esa. 54:13) Byela vanhu hi swikolo swo hambana-hambana leswi pfunaka Timbhoni ta Yehovha—hinkwaswo swi sekeriwe eBibeleni naswona ku ngheniwa mahala eka swona. Hlamusela leswaku ku engetela eka vutirheli bya hina bya yindlu ni yindlu, hi tlhela hi dyondzisa Bibele mahala eka munhu ha un’we ni mindyangu, ematikweni yo tlula 230. Xana hi yihi hulumendhe ya vanhu leyi nga simekaka tsima ro tano ro dyondzisa vanhu va tiko ra yona ni va misava hinkwayo? Rhamba vanhu leswaku va ta eHolweni ya Mfumo, leswaku va ya etinhlengeletanweni ni le mintsombanweni ya Timbhoni ta Yehovha, va ta vona ndlela leyi dyondzo yoleyo yi byi khumbaka ha yona vutomi bya vanhu.—Esa. 2:2-4; 32:1, 17; Yoh. 13:35.

Kambe xana n’wini wa muti u ta yi xiya ndlela leyi vutomi bya yena byi khumbekaka ha yona? Hi vutlhari u nga ha vula leswaku xikongomelo xa ku endza ka wena i ku ta bula hi lunghiselelo leri pfulekeleke hinkwavo leswaku va hlawula ku hanya hi masiku va ri vafumiwa va Mfumo wa Xikwembu. Njhani? Hi ku dyondza leswi Xikwembu xi swi lavaka ni ku hanya hi ku pfumelelana na swona sweswi.—Det. 30:19, 20; Nhlav. 22:17.

Ku Pfuna Van’wana Leswaku Va Rhangisa Mfumo. Hambi ku ri endzhaku ka loko munhu a amukele rungula ra Mfumo, ku ni swiboho leswi a faneleke a swi endla. Xana u ta rhangisa Mfumo wa Xikwembu evuton’wini bya yena? Yesu u khutaze vadyondzisiwa va yena leswaku va ‘hambeta va lava mfumo ku sungula.’ (Mat. 6:33) Xana hi nga va pfuna njhani Vakreste-kulorhi leswaku va endla sweswo? Hi ku va vekela xikombiso lexinene ni hi ku va byela malunghelo lama va pfulekeleke. Minkarhi yin’wana, hi ku vutisa munhu wa kona loko a anakanyile hi leswi a nga kotaka ku swi endla ni ku n’wi rungulela mintokoto leyi nga ta n’wi endla a vona leswi van’wana va swi endlaka. Hi ku bula hi timhaka ta Bibele hi ndlela leyi nga ta endla leswaku munhu a ya a n’wi rhandza swinene Yehovha. Hi ku kandziyisa leswaku Mfumo i wa xiviri. Hi ku kandziyisa ndlela leyi ntirho wo twarisa Mfumo wu nga wa nkoka ha yona. Hakanyingi swa antswa ku khutaza vanhu leswaku va navela ku endla nchumu wo karhi ematshan’weni yo va sindzisa kunene.

Handle ko kanakana, rungula ra nkoka leri hinkwerhu ka hina hi faneleke hi ri twarisa ri vulavula ngopfu hi Yehovha Xikwembu, Yesu Kreste ni Mfumo. Hi fanele hi kandziyisa ntiyiso wa xiviri malunghana ni leswi, loko hi chumayela vanhu, emavandlheni ya hina, ni le vuton’wini bya hina. Loko hi endla tano, hi ta va hi kombisa leswaku ha vuyeriwa hakunene eka dyondzo ya Xikolo xa Vutirheli bya le Tilweni.