Swikombo Swa Minkandziyiso Leyi Nga Eka Xiyimiso Xa Minhlangano Xa Mahanyelo Ni Ntirho
SEPTEMBER 5-11
LESWI HI SWI DYONDZAKA EBIBELENI | PISALEMA 119
“Famba eNawini Wa Yehovha”
(Pisalema 119:1-8) Va tsaka lava pfumalaka xihoxo endleleni ya vona, Lava fambaka enawini wa Yehovha. 2 Va tsaka lava hlayisaka switsundzuxo swakwe; Va hambeta va n’wi lavisisa hi mbilu hinkwayo. 3 Kunene a va hanyanga hi leswi nga lulamangiki. Va fambe etindleleni takwe. 4 Wena u humese swileriso swa wena hi ndlela ya ku lerisa Leswaku swi hlayisiwa hi vukheta. 5 Mawaku loko tindlela ta mina a ti lo simekiwa hilaha ku tiyeke Leswaku ndzi hlayisa swileriso swa wena! 6 Loko swi ri tano a ndzi nge khomiwi hi tingana, Loko ndzi languta swileriso swa wena hinkwaswo. 7 Ndzi ta ku dzunisa hi ku lulama ka mbilu, Loko ndzi dyondza swiboho swa wena swo lulama swa vuavanyisi. 8 Ndzi hambeta ndzi hlayisa swileriso swa wena. U nga ndzi siyi hi ku helela.”
Tshemba Rito Ra Yehovha
Yingisa Rito Ra Xikwembu Kutani U Tsaka
Ntsako wa xiviri wu titshege hi ku va hi famba enawini wa Xikwembu. (Pisalema 119:1-8) Loko hi endla tano, Yehovha u ta hi teka ‘hi ri lava pfumalaka xihoxo endleleni ya hina.’ (Pisalema 119:1) Ku pfumala xihoxo a swi vuli swona leswaku hi hetisekile, kambe swi kombisa leswaku hi tikarhatela ku endla ku rhandza ka Yehovha Xikwembu. Nowa “u tikombise a pfumala xihoxo exikarhi ka lava a a hanya swin’we na vona” tanihi wanuna loyi a a “famba ni Xikwembu xa ntiyiso.” Mupatriyaka yoloye wo tshembeka ni ndyangu wakwe va pone Ndhambi hileswi va hanyeke hi ku pfumelelana ni milawu ya Yehovha. (Genesa 6:9; 1 Petro 3:20) Hilaha ku fanaka, leswaku hi pona makumu ya misava leyi swi titshege hi ku va hi ‘swi hlayisa hi vukheta swileriso swa Xikwembu,’ xisweswo hi endla ku rhandza ka xona.—Pisalema 119:4.
Yehovha a nge hi fularheli loko hi ‘n’wi dzunisa hi ku lulama ka mbilu kutani hi hambeta hi hlayisa swileriso swa yena.’ (Pisalema 119:7, 8) Xikwembu a xi n’wi lahlanga Yoxuwa murhangeri wa Vaisrayele, loyi a tirhiseke xitsundzuxo xa ku ‘hlaya buku ya nawu nhlikanhi ni vusiku leswaku a ta endla hinkwaswo leswi tsariweke eka yona.’ Sweswo swi n’wi endle a humelela naswona swi endle a kota ku endla swilo hi vutlhari. (Yoxuwa 1:8) Loko a ri kusuhi ni ku fa, Yoxuwa a a ha dzunisa Xikwembu naswona u tsundzuxe Vaisrayele a ku: “Mi swi tiva kahle hi timbilu ta n’wina hinkwato ni mimoya-xiviri ya n’wina hinkwayo leswaku a ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke.” (Yoxuwa 23:14) Ku fana na Yoxuwa ni mutsari wa Pisalema 119, hi nga kuma ntsako hi tlhela hi humelela loko hi dzunisa Yehovha ni ku tshemba rito rakwe.
(Pisalema 119:33-40) Oho Yehovha, ndzi letele hi ndlela ya swileriso swa wena, Leswaku ndzi ta swi hlayisa ku fika emakumu. 34 Ndzi endle ndzi twisisa, leswaku ndzi ta hlayisa nawu wa wena Leswaku ndzi ta wu hlayisa hi mbilu ya mina hinkwayo. 35 Ndzi endle ndzi famba endleleni ya swileriso swa wena, Hikuva ndzi yi tsakerile. 36 Voyamisela mbilu ya mina eswitsundzuxweni swa wena, Hayi empindzulweni. 37 Endla leswaku mahlo ya mina ma hundza ma nga swi voni swilo leswi nga pfuniki nchumu; Ndzi londzovote ndzi hanya endleleni ya wena. 38 Endla leswi u swi vuleke eka nandza wa wena Leswi endlaka leswaku u chaviwa. 39 Endla leswaku ndzhukano wa mina wu hundza, lowu a ndzi wu chava, Hikuva swiboho swa wena swa vuavanyisi i swinene. 40 Waswivo! Ndzi navele swileriso swa wena. Ndzi londzovote ndzi hanya eku lulameni ka wena.
Tshemba Rito Ra Yehovha
Rito Ra Yehovha Ri Nyikana Xivindzi
Ku landzela nkongomiso wa rito ra Xikwembu swi hi nyika xivindzi lexi hi xi lavaka leswaku hi langutana ni miringo ya vutomi. (Pisalema 119:33-40) Hi lava ndzetelo wa Yehovha hi ku titsongahata leswaku hi ta hlayisa nawu wakwe ‘hi mbilu hinkwayo.’ (Pisalema 119:33, 34) Ku fana ni mupisalema, hi kombela Xikwembu hi ku: “Voyamisela mbilu ya mina eswitsundzuxweni swa wena, hayi empindzulweni,” kumbe “mpindzulo wo homboloka.” (Pisalema 119:36) Ku fana ni muapostola Pawulo, hi “tikhoma hi ku tshembeka eka swilo hinkwaswo.” (Vaheveru 13:18) Loko muthori a lava hi endla nchumu lowu humeke endleleni, hi va ni xivindzi xo namarhela nkongomiso wa Xikwembu—naswona minkarhi hinkwayo Yehovha wa yi katekisa ndlela yoleyo. Entiyisweni, u hi pfuna leswaku hi kota ku lawula mimboyamelo hinkwayo yo biha. Hikwalaho a hi khongeleni hi ku: “Endla leswaku mahlo ya mina ma hundza ma nga swi voni swilo leswi nga pfuniki nchumu.” (Pisalema 119:37) A hi nge pfuki hi lave ku languta nchumu wihi na wihi lowu nga pfuniki nchumu lowu vengiwaka hi Xikwembu ivi hi wu navela. (Pisalema 97:10) Xa nkoka swinene, hi susumeteleka ku papalata swilo swo navetisa timhaka ta masangu ni swilo leswi fambisanaka ni vungoma.—1 Vakorinto 6:9, 10; Nhlavutelo 21:8.
(Pisalema 119:41-48) Onge musa wa wena wa rirhandzu wu nga ta eka mina, Wena Yehovha, Ku ponisa ka wena hi ku ya hi rito ra wena, 42 Leswaku ndzi ta n’wi hlamula hi rito loyi a ndzi rhukanaka, Hikuva ndzi tshembele eritweni ra wena. 43 U nga ri susi hi ku helela rito ra ntiyiso enon’wini wa mina, Hikuva ndzi rindzele xiboho xa wena xa vuavanyisi. 44 Ndzi ta hlayisa nawu wa wena nkarhi hinkwawo, Hilaha ku nga riki na makumu, hi masiku. 45 Ndzi ta famba-famba endhawini leyi pfulekeke, Hikuva ndzi lavisise ni swileriso swa wena. 46 Ndzi ta tlhela ndzi vulavula hi switsundzuxo swa wena emahlweni ka tihosi, A ndzi nge khomiwi hi tingana. 47 Ndzi ta tsakela swileriso swa wena Leswi ndzi swi rhandzeke. 48 Ndzi ta tlakusela swandla swa mina eswilerisweni swa wena leswi ndzi swi rhandzeke, Naswona ndzi ta anakanyisisa hi swileriso swa wena.
Tshemba Rito Ra Yehovha
Vutivi lebyi kongomeke bya rito ra Xikwembu byi hi nyika ku tiyiseka ka ku chumayela hi xivindzi. (Pisalema 119:41-48) Naswona hi lava xivindzi xa ku ‘hlamula loyi a hi rhukanaka.’ (Pisalema 119:42) Minkarhi yin’wana hi nga ha fana ni vadyondzisiwa va Yesu lava a va xanisiwa, lava khongeleke va ku: “Yehovha, . . . pfumelela mahlonga ya wena leswaku ma hambeta ma vula rito ra wena hi vurhena lebyi heleleke.” Vuyelo byi ve byihi? “Hinkwavo va tala moya lowo kwetsima va vula rito ra Xikwembu hi vurhena.” Hilaha ku fanaka Hosi leyi Lawulaka yi hi nyika xivindzi xa ku vula rito ra yona hi vurhena.—Mintirho 4:24-31.
Loko hi tlangela “rito ra ntiyiso” hi tlhela hi ‘hlayisa nawu wa Xikwembu nkarhi hinkwawo,’ hi ta va ni xivindzi lexi lavekaka xa ku nyikela vumbhoni handle ko chava ku khomisiwa tingana. (Pisalema 119:43, 44) Loko hi ri dyondza hi ku hiseka Rito ra Xikwembu leri tsariweke swi hi hlomisela ku ‘vulavula hi switsundzuxo swa xona emahlweni ka tihosi.’ (Pisalema 119:46) Xikhongelo ni moya wa Yehovha swi ta tlhela swi hi pfuna ku vula swilo leswi faneleke hi ndlela leyi faneleke. (Matewu 10:16-20; Vakolosa 4:6) Pawulo u byele vafumi va lembexidzana ro sungula hi switsundzuxo swa Xikwembu hi xivindzi. Hi xikombiso, u nyikele vumbhoni eka Felikisi Ndhunankulu ya Murhoma loyi “a n’wi yingis[eke] malunghana ni ku pfumela eka Kreste Yesu.” (Mintirho 24:24, 25) Pawulo u tlhele a nyikela vumbhoni emahlweni ka Ndhunankulu Festo na Hosi Agripa. (Mintirho 25:22–26:32) Hi ku pfuniwa hi Yehovha, na hina hi nga va timbhoni leti nga ni xivindzi, hi nga “khomiwi hi tingana hi mahungu lamanene.”—Varhoma 1:16.
Endla Ndzavisiso
(Pisalema 119:71) I swinene eka mina leswi ndzi xanisiweke, Leswaku ndzi ta dyondza swileriso swa wena.
Tinhlankulu Ta Buku Ya Vuntlhanu Ya Tipisalema
119:71—Ku xanisiwa swi va ni vuyelo byihi lebyinene? Maxangu ma nga hi dyondzisa ku titshega hi Yehovha swinene, ku khongela eka yena hi mbilu hinkwayo, ni ku hisekela ku dyondza Bibele kutani hi tirhisa leswi yi swi vulaka. Ku tlula kwalaho, ndlela leyi hi angulaka ha yona loko hi xaniseka yi nga paluxa ku tsana ka hina loku faneleke ku lulamisiwa. Ku xaniseka a ku nge hi dyisi mbitsi loko hi ku pfumelela leswaku ku antswisa vumunhu bya hina.
(Pisalema 119:96) Ndzi vone makumu ya ku hetiseka hinkwako. Xileriso xa wena xi aname ngopfu.
Tinhlankulu Ta Buku Ya Vuntlhanu Ya Tipisalema
119:96—Xana ma vula yini marito lama nge “makumu ya ku hetiseka hinkwako”? Mupisalema a a vulavula hi ku hetiseka hi ku ya hi vonelo ra munhu. Kumbexana a a vula leswaku matwisiselo ya munhu malunghana ni ku hetiseka ma kayivela. Ku hambana ni sweswo, xileriso xa Xikwembu a xi kayiveli helo. Nkongomiso wa xona wu tirha etimhakeni hinkwato ta vutomi. Bibele Ya Xitsonga yi ri: ‘Ndzi vonile ku hetelela ka swilo hinkwaswo leswi hetisekeke, kambe ku lerisa ka wena a ku na laha ku tlhelaka kona.’
SEPTEMBER 12-18
LESWI HI SWI DYONDZAKA EBIBELENI | PISALEMA 120-134
“Mpfuno Wa Mina Wu Huma Eka Yehovha”
(Pisalema 121:1, 2) Ndzi ta tlakusela mahlo ya mina etintshaveni. Xana mpfuno wa mina wu ta huma kwihi? 2 Mpfuno wa mina wu huma eka Yehovha, Muendli wa tilo ni misava.
Yehovha I Mupfuni Wa Hina
Xihlovo Xa Mpfuno Lowu Nga Heriki
Mupisalema u sungule hi ku vula leswaku leswi Yehovha a vumbeke swilo hinkwaswo, hi ni xivangelo xo n’wi tshemba: “Ndzi ta tlakusela mahlo ya mina etintshaveni. Xana mpfuno wa mina wu ta huma kwihi? Mpfuno wa mina wu huma eka Yehovha, Muendli wa tilo ni misava.” (Pisalema 121:1, 2) Mupisalema a nga tlakuselanga mahlo yakwe entshaveni hambi yi ri yihi. Loko marito lawa ma tsariwa, tempele ya Yehovha a yi ri eYerusalema. Muti wolowo, lowu a wu ri ehenhla ka tintshava ta Yuda, a wu ri ndhawu yo fanekisela leyi Yehovha a tshamaka eka yona. (Pisalema 135:21) Swi nga ha endleka mupisalema a tshame a tlakusela mahlo yakwe etintshaveni ta Yerusalema laha tempele ya Yehovha a yi akiwe kona, a swi tiva kahle leswaku Yehovha u ta n’wi pfuna. Ha yini mupisalema a a tiyiseka swonghasi leswaku Yehovha u ta n’wi pfuna? Hikuva hi Yena “Muendli wa tilo ni misava.” Entiyisweni, mupisalema a a ku, ‘A xi kona lexi nga sivelaka Muvumbi la nga ni matimba hinkwawo ku ndzi pfuna!’—Esaya 40:26.
(Pisalema 121:3, 4) A nge wu pfumeleli nenge wa wena leswaku wu tsekatseka. Loyi a ku rindzaka a nge khudzeheli. 4 Waswivo! A nge khudzeheli kumbe ku etlela, Loyi a rindzaka Israyele.
Yehovha I Mupfuni Wa Hina
Mupisalema u ya emahlweni a hlamusela leswaku Yehovha u tshama a swi xalamukerile swilaveko swa malandza yakwe: “A nge wu pfumeleli nenge wa wena leswaku wu tsekatseka. Loyi a ku rindzaka a nge khudzeheli. Waswivo! A nge khudzeheli kumbe ku etlela, loyi a rindzaka Israyele.” (Pisalema 121:3, 4) A swi nge endleki leswaku Xikwembu xi pfumela leswaku lava xi tshembaka va “tsekatseka” kumbe va wa va nga ha pfuki. (Swivuriso 24:16) Ha yini? Hikuva Yehovha u fana ni murisi la xalamukeke swinene, la rindzeke tinyimpfu takwe. Kunene swa chavelela ku tiva sweswo! A nge pfuki a honise swilaveko swa vanhu vakwe. U tshama a va rindzile vusiku ni nhlikanhi.
(Pisalema 121:5-8) Yehovha wa ku rindza. Yehovha i ndzhuti wa wena evokweni ra wena ra xinene. 6 Dyambu a ri nge ku tlhavi ninhlikanhi, Hambi n’weti nivusiku. 7 Yehovha u ta ku rindza emakhombyeni hinkwawo. U ta rindza moya-xiviri wa wena. 8 Yehovha u ta rindza ku huma ka wena ni ku nghena ka wena Ku sukela sweswi ku ya fika enkarhini lowu nga riki na makumu.
Yehovha I Mupfuni Wa Hina
Hi ku tiyiseka leswaku Yehovha i Musirheleri la tshembekeke wa vanhu vakwe, mupisalema u tsale a ku: “Yehovha wa ku rindza. Yehovha i ndzhuti wa wena evokweni ra wena ra xinene. Dyambu a ri nge ku tlhavi ninhlikanhi, hambi n’weti nivusiku.” (Pisalema 121:5, 6) Eka munhu loyi a a teka riendzo a famba hi milenge le Vuxa Xikarhi, ndzhuti a wu ri xisirhelelo lexikulu eka dyambu leri a ri humesa ni ngwenya ematini. Yehovha u fana ni ndzhuti eka vanhu vakwe, wa va sirhelela eka miringo leyi fanaka ni ku hisa ka dyambu. Xiya leswaku ku vuriwa leswaku Yehovha u le ‘vokweni ra xinene.’ Etinyimpini ta khale, xitlhangu a xi nga ri sirheleli ngopfu voko ra xinene ra socha, tanihi leswi socha a ri xi khoma hi voko ra ximatsi. Munghana lonene a nga ha sirhelela socha hi ku lwa a yime etlhelweni ra rona ra xinene. Ku fana ni munghana wo tano, Yehovha u yima etlhelo ka vagandzeri vakwe hi vutshembeki, a tshama a lunghekele ku va pfuna.
Xana Yehovha u ta kala a tshika ku pfuna vanhu vakwe? Sweswo swi nga fana niloko dyambu ro pela evuxeni. Mupisalema u gimetise xileswi: “Yehovha u ta ku rindza emakhombyeni hinkwawo. U ta rindza moya-xiviri wa wena. Yehovha u ta rindza ku huma ka wena ni ku nghena ka wena, ku sukela sweswi ku ya fika enkarhini lowu nga riki na makumu.” (Pisalema 121:7, 8) Xiya leswaku mutsari u kombisa leswaku u ta hi rindza ni le nkarhini lowu taka. Eku sunguleni, eka ndzimana 5, mupisalema u te: “Yehovha wa ku rindza.” Kambe eka tindzimana leti, mupisalema u tsale a ku: “Yehovha u ta ku rindza.” Xisweswo, vagandzeri va ntiyiso va tiyisekisiwa leswaku Yehovha u ta va pfuna ni le nkarhini lowu taka. Ku nga khathariseki leswaku va ya kwihi, ku nga khathariseki khombo leri va langutanaka na rona, a nge tsandzeki ku va pfuna.—Swivuriso 12:21.
Kunene, mutsari wa Pisalema 121 a a tiyiseka leswaku Muvumbi wa matimba hinkwawo u langutela malandza yakwe hi ndlela leyi murisi la khathalaka a langutelaka ntlhambi wakwe ha yona. Hi ni xivangelo lexi twalaka xo tshemba Yehovha hilaha mupisalema a a n’wi tshemba hakona, hikuva a nga cinci. (Malakiya 3:6) Xana leswi swi vula leswaku minkarhi hinkwayo hi ta rindzela leswaku a hi sirhelela hi tlhelo ra nyama? Doo, kambe loko hi n’wi tshemba tanihi Mupfuni wa hina, u ta hi sirhelela eka hinkwaswo leswi nga hi vavisaka hi tlhelo ra moya. Hikwalaho swi fanerile ku tivutisa xivutiso lexi nge, ‘Xana Yehovha u hi pfuna njhani?’ A hi kambisiseni tindlela ta mune leti a hi sirhelelaka ha tona. Exihlokweni lexi, hi ta bula hi ndlela leyi a ma pfuneke ha yona malandza yakwe eminkarhini ya Bibele. Exihlokweni lexi landzelaka, hi ta kambisisa ndlela leyi a pfunaka vanhu vakwe ha yona namuntlha.
Endla Ndzavisiso
(Pisalema 123:2) Waswivo! Leswi mahlo ya malandza ma nga le vokweni ra n’wini wa wona, Leswi mahlo ya nandza wa xisati ma nga le vokweni ra n’wini wa yena wa xisati, Hilaha ku fanaka mahlo ya hina ma le ka Yehovha Xikwembu xa hina Ku fikela loko a hi komba tintswalo.
Tinhlankulu Ta Buku Ya Vuntlhanu Ya Tipisalema
123:2—Hi yihi yinhla ya xifaniso xa mahlo ya malandza? Malandza ya xinuna ni ya xisati ma langute voko ra n’wini wa wona hi swivangelo swimbirhi: ku xiya leswi a swi lavaka ni ku kuma nsirhelelo ni swilaveko swa vutomi eka yena. Hilaha ku fanaka, na hina hi languta Yehovha leswaku hi kota ku twisisa ku rhandza ka yena ni ku kuma mikateko eka yena.
(Pisalema 133:1-3) Waswivo! Mawaku ndlela leyi swi nga swinene ha yona ni ku tsakisa ha yona Loko vamakwavo va tshama swin’we hi vun’we! 2 Swi fana ni mafurha lamanene enhlokweni, Lama xiririkaka emalepfini, Malepfu ya Aroni, Lama xiririkaka ku ya fika ekholorweni ya tinguvu takwe. 3 Swi fana ni mberha ya Herimoni Leyi welaka ehenhla ka tintshava ta Siyoni. Hikuva Yehovha u lerise leswaku nkateko wu va kwalaho, Ni vutomi hilaha ku nga riki na makumu.
Tinhlankulu Ta Buku Ya Vuntlhanu Ya Tipisalema
133:1-3. Vun’we bya vanhu va Yehovha byi rhulisa mbilu, i byinene naswona bya phyuphyisa. A hi fanelanga hi byi hahlula hi ku xopaxopa swihoxo, ku holova, kumbe ku tshama hi ri eku vileleni.
SEPTEMBER 19-25
LESWI HI SWI DYONDZAKA EBIBELENI | TIPISALEMA 135-141
“Hi Endliwe Hi Ndlela Yo Hlamarisa”
(Pisalema 139:14) Ndzi ta ku dzunisa hikuva ndzi endliwe hi ndlela yo hlamarisa, leyi chavisekaka. Mintirho ya wena ya hlamarisa, Hilaha moya-xiviri wa mina wu swi lemukaka kahle hakona.
Hi “Endliwe Hi Ndlela Yo Hlamarisa”
MISAVA yi tele hi swivumbiwa swo hlamarisa. Swi huma kwihi? Van’wana va anakanya leswaku nhlamulo yi nga kumiwa handle ko vulavula hi Muvumbi wo tlhariha. Van’wana va pfumela leswaku ku ala ku anakanya hi Muvumbi swi endla leswaku hi nga koti ku twisisa ntumbuluko. Va anakanya leswaku swivumbiwa swa laha misaveni swi rharhangane ngopfu, swi hambanahambane ngopfu naswona u nga ha vula leswaku swa hlamarisa swinene lerova a swi lo tiendlekela. Eka vanhu vo tala, ku katsa ni vativi van’wana va sayense, vumbhoni byi kombisa leswaku vuako byi endliwe hi Muvumbi wo tlhariha, la nga ni matimba ni musa.
Hosi Davhida wa le Israyele wa khale a a khorwiseka leswaku Muvumbi u fanele a dzunisiwa hikwalaho ka swilo swo hlamarisa leswi A swi vumbeke. Hambileswi Davhida a hanyeke enkarhini lowu sayense a yi nga si hluvuka ku fana ni namuntlha, a a swi vona leswaku u rhendzeriwe hi swikombiso leswi hlamarisaka swa swilo leswi tumbuluxiweke hi Xikwembu. Davhida u hlamarisiwe swinene hi vuswikoti bya Xikwembu byo tumbuluxa loko a langutise ntsena ndlela leyi miri wa yena a wu vumbiwe ha yona. U tsarile: “Ndzi ta ku dzunisa hikuva ndzi endliwe hi ndlela yo hlamarisa, leyi chavisekaka. Mintirho ya wena ya hlamarisa, hilaha moya-xiviri wa mina wu swi lemukaka kahle hakona.”—Pisalema 139:14.
Davhida u khorwiseke ngopfu hileswi a a anakanyisisa hi swilo. Namuntlha, swikolo ni swihaxamahungu swi dyondzisa tidyondzo ta mavunwa malunghana ni lomu munhu a humaka kona. Na hina loko hi lava ku va ni ripfumelo leri fanaka ni ra Davhida, hi fanele hi anakanyisisa hi swilo. Swi ni khombo ku kuceteriwa ku pfumela leswi van’wana va swi anakanyaka, ngopfungopfu etimhakeni ta nkoka to tanihi ku va kona ka Muvumbi ni ntirho wa yena.
Ku tlula kwalaho, ku anakanyisisa hi mintirho ya Yehovha swi antswisa ndlela leyi hi n’wi rhandzaka ha yona naswona swi endla hi tiyiseka hi switshembiso swa yena swa nkarhi lowu taka. Sweswo swi nga hi susumetela ku tiva Yehovha swinene ni ku n’wi tirhela. Hikwalaho, a hi kambisiseni ndlela leyi sayense ya manguva lawa yi xi tiyisekiseke ha yona xiboho lexi fikeleriweke hi Davhida xa leswaku hi “endliwe hi ndlela yo hlamarisa.”
(Pisalema 139:15, 16) Marhambu ya mina a ma nga fihlekanga eka wena Loko ndzi endliwa exihundleni, Loko ndzi lukiwa eswiphen’wini swa le hansi swa misava. 16 Mahlo ya wena ma vone ni xitumbulukwa xa mina, Naswona swiphemu swa xona hinkwaswo swi tsariwe ebukwini ya wena, Malunghana ni masiku lawa swi vumbiweke ha wona Ku nga si va ni xin’we xa swona.”
Hi “Endliwe Hi Ndlela Yo Hlamarisa”
“Marhambu ya mina a ma nga fihlekanga eka wena loko ndzi endliwa exihundleni, loko ndzi lukiwa eswiphen’wini swa le hansi swa misava.” (Pisalema 139:15) Sele yo sungula yi avanile, naswona tisele letintshwa ti hambete ti avana. Hi ku hatlisa tisele leti ti sungule ku hambana, ti va tisele ta misiha, tisele ta nhlonge ni tin’wana. Tisele ta muxaka lowu fanaka ti hlanganile kutani ti vumba swirho. Hi xikombiso, loko u ri na mavhiki manharhu u ri embelekweni, u sungule ku va ni kongotlo. Loko se u ri ni mavhiki ya nkombo ntsena u ri embelekweni naswona u lehe kwalomu ka 2,5 wa tisentimitara ntsena, marhambu hinkwawo ya 206 ma va se ma vumbekile, hambileswi ma ha riki matsongo naswona ma nga siki tiyelaka.
Swihlamariso sweswo swi endleka embelekweni wa mana wa wena, vanhu va nga swi voni. Hakunene, vanhu a va na vutivi byo tala malunghana ni ndlela leyi hi vumbekaka ha yona. Hi xikombiso, i yini leswi susumeteleke tisele to karhi ta switekela leswaku ti avana ti endla swirho swo hambanahambana swa miri? Vativi va sayense va nga ha hetelela va swi tiva, kambe hilaha Davhida a nga ta vula hakona, Muvumbi wa hina—Yehovha—a a swi tiva hi ku helela minkarhi hinkwayo.
“Mahlo ya wena ma vone ni xitumbulukwa xa mina, naswona swiphemu swa xona hinkwaswo swi tsariwe ebukwini ya wena, malunghana ni masiku lawa swi vumbiweke ha wona ku nga si va ni xin’we xa swona.” (Pisalema 139:16) Sele ya wena yo sungula a yi ri ni ntila lowu miri wa wena a wu ta kula hi ku landzela wona. Ntila wolowo wu kongomise ku kula ka wena embelekweni ku ringana tin’hweti ta kaye ni le ka malembe lama tlulaka 20 endzhaku ka loko u velekiwile. Hi nkarhi wolowo, miri wa wena wu hundze eka switeji swo tala, hinkwaswo swi kongomisiwa hi rungula leri a ri ri eka sele yo sungula.
Davhida a a nga ti tivi tisele kumbe swiaki swa switekela, naswona a a nga ri na wona muchini wa ku vona swilo leswitsongo. Kambe u swi twisise hi ndlela leyi faneleke leswaku ku kula ka miri wa yena a ku ri vumbhoni bya leswaku ku kunguhatiwe khale. Swi nga ha endleka Davhida a a ri ni vutivinyana bya ndlela leyi n’wana a kulaka ha yona loko a nga si velekiwa, hi yona mhaka a vuleke leswaku goza rin’wana ni rin’wana ri fanele ri endleka hi ku ya hi ntila ni nkarhi lowu vekiweke. Loko a tlhokovetsela, u hlamusele pulani leyi tanihi leyi ‘tsariweke’ “ebukwini” ya Xikwembu.
Namuntlha, swa tiviwa leswaku swilo leswi u swi tekeleleke eka vatswari va wena ni vakokwa wa wena—swo tanihi mpimo wa ku leha ka wena, ndlela leyi xikandza xa wena xi langutekaka ha yona, muvala wa mahlo ni wa misisi ni swilo swin’wana swa magidi—swi huma eka swiaki swa wena swa xitekela. Sele yin’wana ni yin’wana ya wena yi ni magidi ya swiaki swa xitekela, naswona xiaki xin’wana ni xin’wana xa xitekela i xiyenge xa nxaxamelo wo leha wa swiaki swa DNA (deoxyribonucleic acid). Ntila lowu miri wa wena wu faneleke wu landzela wona wu “tsariwe” eka tikhemikhali leti kumekaka eka DNA ya wena. Nkarhi hinkwawo loko tisele ta wena ti avana—leswaku ti vumba tisele letintshwa kumbe ti siva tisele ta khale—DNA ya wena yi hundzisa ntila wolowo, xisweswo yi endla leswaku u hambeta u hanya naswona ku languteka ka wena ku nga cinci. Mawaku xikombiso lexi hlamarisaka xa matimba ni vutlhari bya Muvumbi wa hina wa le tilweni!
(Pisalema 139:17, 18) Hikwalaho, miehleketo ya wena i ya risima swinene eka mina! Oho Xikwembu, hinkwaswo ka swona swi tele swinene! 18 Loko a ndzo sungula ku swi hlaya, a swi ta tala ku tlula ni swiribyana swa sava. Ndzi xalamukile, kambe ndza ha ri na wena.”
Hi “Endliwe Hi Ndlela Yo Hlamarisa”
Mianakanyo Ya Hina Yo Hlawuleka
“Hikwalaho, miehleketo ya wena i ya risima swinene eka mina! Oho Xikwembu, hinkwaswo ka swona swi tele swinene! Loko a ndzo sungula ku swi hlaya, a swi ta tala ku tlula ni swiribyana swa sava.” (Pisalema 139:17, 18a) Swiharhi na swona swi endliwe hi ndlela yo hlamarisa, naswona swin’wana swi ni switwi ni vuswikoti lebyi tlulaka bya vanhu. Kambe Xikwembu xi nyike vanhu vuswikoti byo anakanya lebyi tlulaka bya xiharhi xihi na xihi. Buku yin’wana ya sayense yi ri: “Hambileswi hina vanhu hi yelanaka hi tindlela to tala ni swivumbiwa swin’wana, hi hlawulekile exikarhi ka swilo leswi hanyaka emisaveni hikuva hi kota ku vulavula ni ku anakanya. Hi hlawulekile ni hi leswi hi navelaka ku tiva swo tala malunghana ni miri wa hina: Leswaku hi vumbiwe njhani? Xana hi tise ku yini?” Leswi i swivutiso leswi na Davhida a anakanyisiseke ha swona.
Xa nkoka swinene, ku hambana ni swiharhi, hi hlawulekile hileswi hi kotaka ku anakanyisisa hi mianakanyo ya Xikwembu. Nyiko leyi yo hlawuleka i yin’wana ya tindlela leti kombisaka leswaku hi endliwe “hi xifaniso xa Xikwembu.” (Genesa 1:27) Davhida u yi tirhise kahle nyiko leyi. U anakanyisise hi vumbhoni bya leswaku Xikwembu xi kona a tlhela a anakanyisisa hi swilo leswinene leswi xi swi endleke emisaveni. Nakambe Davhida a a ri ni tibuku to sungula ta Matsalwa yo Kwetsima, leti nga ni swilo leswi Xikwembu xi swi paluxeke malunghana na xona ni mintirho ya xona. Matsalwa lawa lama huhuteriweke ma pfune Davhida ku twisisa mianakanyo, vumunhu ni xikongomelo xa Xikwembu. Ku anakanyisisa hi Matsalwa, ntumbuluko ni ndlela leyi Xikwembu a xi tirhisana na yena ha yona swi susumetele Davhida ku dzunisa Muvumbi wa yena.
Tinhlankulu Ta Buku Ya Vuntlhanu Ya Tipisalema
139:17, 18. Xana vutivi bya Yehovha bya hi tsakisa? (Swivuriso 2:10) Loko swi ri tano, hi kume xihlovo xa ntsako lexi nga phyiki. Miehleketo ya Yehovha yi “[tale] ku tlula ni swiribyana swa sava.” Minkarhi hinkwayo ku ta va ni swo tala swo swi dyondza hi yena.
Endla Ndzavisiso
(Pisalema 136:15) La wiseke Faro ni vandla rakwe ra nyimpi eLwandle ro Tshwuka: Hikuva musa wakwe wa rirhandzu i wa hilaha ku nga riki na makumu.
it-1 783 ¶5
Eksoda
Hikwalaho ka leswi a kombiseke matimba lamakulu, Yehovha u kwetsimise vito rakwe kutani a ponisa Vaisrayele. Loko se va ri eribuweni ra Lwandle ro Tshwuka naswona va hlayisekile, Muxe u rhangele vana va Israyele hi risimu, loko sesi wakwe Meriyamu muprofeta wa xisati a ri karhi a khome xingomana naswona a rhangele vavasati hinkwavo lava a va ri ni swingomana va ri karhi va cina tinsimu leti a ti chaya hi vavanuna. (Ex 15:1, 20, 21) Ku hambana ka Vaisrayele ni valala va vona hilaha ku heleleke na kona a ku katseka. Loko va huma e-Egipta a va nga ta xanisiwa hi munhu hambi ku ri swiharhi swa nhova; hambi ku ri ku lumiwa hi mbyana kumbe yi va vukula. (Ex 11:7) Hambileswi mutsari wa buku ya Eksoda a nga swi vulangiki leswaku Faro u fambe ni vuthu rakwe ra masocha va ya elwandle ivi va herisiwa, Pisalema 136:15 yi vula leswaku Yehovha u ‘wise Faro ni vandla rakwe ra nyimpi eLwandle ro Tshwuka.’
(Pisalema 141:5) Loko lowo lulama a ndzi ba, ku ta va musa wa rirhandzu; Loko a ndzi tshinya, ku ta va mafurha ehenhla ka nhloko, Lawa nhloko yi nga ta ka yi nga ma ali. Hikuva ka ha ta va ni xikhongelo xa mina hi nkarhi wa makhombo ya vona.
Ha Yini Lunghiselelo Ra Ku Susa Munhu eVandlheni Ri Kombisa Rirhandzu?
Leswaku hi pfuna munhu la susiweke leswaku a tlhelela evandlheni, hi fanele hi n’wi kombisa rirhandzu hi ku va lava tiyisaka voko. Hi xikombiso, anakanya hi vavalangi vambirhi va tintshava lava yimeleke ku ta ponisiwa hi siku leri xirhami xi vuyisaka ni n’wana evukatini hi xixika. Leswi ku titimelaka ngopfu, muvalangi un’we wa karhala swinene ivi a lava ku etlela. Kambe loko a etlela endhawini yoleyo leyi nga ni gamboko, u ta fa. Munghana wakwe u n’wi ba hi mpama leswaku a ta tshama a xalamukile. Hambileswi ku biwa hi mpama swi vavaka, swi nga ponisa vutomi byakwe. Davhida u vulavule hi mhaka leyi fanaka loko a ku: “Loko lowo lulama a ndzi ba, ku ta va musa wa rirhandzu.” (Pisalema 141:5) Davhida u swi xiyile leswaku hambileswi ku layiwa swi vavaka, a swi ta n’wi pfuna.
SEPTEMBER 26–OCTOBER 2
LESWI HI SWI DYONDZAKA EBIBELENI | TIPISALEMA 142-150
“Yehovha Hi Lonkulu Naswona U Fanele A Dzunisiwa Swinene”
(Pisalema 145:1-9) Ndzi ta ku tlakusa, Wena Xikwembu xanga lexi nga Hosi, Ndzi ta dzunisa vito ra wena hilaha ku nga riki na makumu, hi masiku. 2 Ndzi ta ku dzunisa siku hinkwaro, Ndzi ta dzunisa vito ra wena hilaha ku nga riki na makumu, hi masiku. 3 Yehovha hi lonkulu naswona u fanele a dzunisiwa swinene, Naswona vukulu byakwe a byi lavisiseki. 4 Xitukulwana ni xitukulwana xi ta bumabumela mintirho ya wena, Naswona xi ta vulavula hi swiendlo swa wena swa matimba. 5 Ku vangama lokukulu ka xindzhuti xa wena Naswona ndzi ta anakanyisisa hi timhaka leti hlamarisaka ta mintirho ya wena. 6 Va ta vulavula hi ntamu wa swilo swa wena leswi chavisekaka; Loko ku ri vukulu bya wena, ndzi ta byi twarisa. 7 Va ta vulavula hi vunene bya wena byo tala, Naswona va ta huwelela hi ku tsaka hikwalaho ka ku lulama ka wena. 8 Yehovha u ni nsovo ni tintswalo, Wa hlwela ku hlundzuka naswona u ni musa lowukulu wa rirhandzu. 9 Yehovha hi lonene eka hinkwavo, Naswona tintswalo takwe ti le henhla ka mintirho yakwe hinkwayo.
Vukulu Bya Yehovha A Byi Lavisiseki
‘Ndzi Ta Tlakusa Xikwembu Hosi’
Hambileswi Davhida a a ri hosi leyi vekiweke hi Xikwembu, a a teka Yehovha a ri yena Hosi ya xiviri ya Israyele. Davhida u te: “Mfumo i wa wena, Wena Yehovha, Wena la tlakukeke la nga murhangeri wa hinkwavo.” (1 Tikronika 29:11) Nakambe Davhida a a swi tlangela swinene ku va Xikwembu xi ri xona Mufumi! U yimbelerile a ku: “Ndzi ta ku tlakusa, Wena Xikwembu xanga lexi nga Hosi, ndzi ta dzunisa vito ra wena hilaha ku nga riki na makumu, hi masiku. Ndzi ta ku dzunisa siku hinkwaro, ndzi ta dzunisa vito ra wena hilaha ku nga riki na makumu, hi masiku.” (Pisalema 145:1, 2) Davhida a a swi navela hi mbilu hinkwayo ku dzunisa Yehovha Xikwembu siku hinkwaro, hilaha ku nga heriki.
Pisalema 145 yi nyikela nhlamulo ya matimba eka ntlhontlho wa Sathana wa leswaku Xikwembu i mufumi la nga ni vutianakanyi, loyi a tsonaka swivumbiwa swakwe ntshunxeko. (Genesa 3:1-5) Pisalema leyi yi tlhela yi paluxa vunwa bya Sathana bya leswaku lava va yingisaka Xikwembu va xi yingisa hi xikongomelo xo lava ku kuma swilo leswi va swi lavaka, kambe a va yingisi Xikwembu hi ku va va xi rhandza. (Yobo 1:9-11; 2:4, 5) Ku fana na Davhida, Vakreste va ntiyiso namuntlha va nyikela nhlamulo eka swihehlo swa mavunwa swa Diyavulosi. Va tlangela ntshembo lowu va nga na wona wo hanya hi masiku ehansi ka vulawuri bya Mfumo tanihi leswi va navelaka ku dzunisa Yehovha hilaha ku nga heriki. Ana se vanhu va timiliyoni va sungule ku endla tano hi ku kombisa ripfumelo egandzelweni ra Yesu ra nkutsulo ni hi ku tirhela Yehovha hileswi va n’wi rhandzaka hi mbilu hinkwayo tanihi vagandzeri va yena lava tinyiketeleke ni ku khuvuriwa.—Varhoma 5:8; 1 Yohane 5:3.
Vukulu Bya Yehovha A Byi Lavisiseki
Swikombiso Swa Vukulu Bya Xikwembu
Pisalema 145:3 yi hi nyika xivangelonkulu xa ku dzunisa Yehovha. Davhida wa yimbelela a ku: “Yehovha hi lonkulu naswona u fanele a dzunisiwa swinene, naswona vukulu byakwe a byi lavisiseki.” Vukulu bya Yehovha a byi na mindzilikana. Vanhu a va nge swi koti ku byi kumisisa kahle, ku byi twisisa hi vuenti kumbe ku byi pima. Kambe ku sukela sweswi hi ta vuyeriwa swinene hi ku kambisisa swikombiso swa vukulu bya Yehovha lebyi nga lavisisekiki.
Ringeta ku anakanya hi siku leri u tshameke u ya endhawini leyi nga riki na mavoni ya gezi kutani u languta ehenhla exibakabakeni lexi nga riki na mapapa nivusiku. Xana a wu hlamarisiwanga hi vunyingi bya tinyeleti leti u ti voneke exibakabakeni xo dzwihala? Xana sweswo a swi ku susumetelanga ku dzunisa Yehovha hikwalaho ka vukulu lebyi a byi kombiseke hi ku vumba tinyeleti teto hinkwato ta le xibakabakeni? Kambe u va u vone xiphemu xitsongo swinene xa nhlayo ya tinyeleti ta xirimela lexi misava yi nga xiphemu xa xona. Ku tlula kwalaho, ku ringanyetiwa leswaku ku ni swirimela swo tlula dzana ra tibiliyoni, kasi leswi u kotaka ku swi vona u nga tirhisi theleskopu i swinharhu ntsena. Ina, tinyeleti leti nga hlayekiki kun’we ni swirimela leswi endlaka vuako lebyikulu i vumbhoni bya matimba ya Yehovha ya ku vumba ni ya vukulu byakwe lebyi nga lavisisekiki.—Esaya 40:26.
Vukulu Bya Yehovha A Byi Lavisiseki
Timfanelo Ta Xikwembu I Tikulu Hakunene!
Hilaha hi voneke hakona, tindzimana to sungula ta tsevu eka Pisalema 145 ti hi nyika swivangelo leswi twalaka swa ku dzunisa Yehovha hikwalaho ka swilo leswi fambisanaka ni vukulu byakwe lebyi nga lavisisekiki. Tindzimana 7 ku ya ka 9 ti kandziyisa vukulu bya Xikwembu hi ku hlamusela timfanelo ta xona. Davhida u yimbelerile a ku: “Va ta vulavula hi vunene bya wena byo tala, naswona va ta huwelela hi ku tsaka hikwalaho ka ku lulama ka wena. Yehovha u ni nsovo ni tintswalo, wa hlwela ku hlundzuka naswona u ni musa lowukulu wa rirhandzu. Yehovha hi lonene eka hinkwavo, naswona tintswalo takwe ti le henhla ka mintirho yakwe hinkwayo.”
Laha Davhida u sungula hi ku kandziyisa vunene bya Yehovha ni ku lulama ka yena—ku nga timfanelo leti Sathana Diyavulosi a ti tlhontlheke. Xana timfanelo leti ti va khumba njhani vanhu hinkwavo lava rhandzaka Xikwembu, lava tivekaka ehansi ka vulawuri bya xona? Entiyisweni vunene bya Yehovha ni mafumelo yakwe yo lulama swi tisa ntsako lowukulu eka vagandzeri va yena lerova a swi nge koteki leswaku va tshika ku n’wi dzunisa. Ku tlula kwalaho, Yehovha u komba vunene byakwe “eka hinkwavo.” Ha tshemba leswaku sweswo swi ta pfuna vo tala leswaku va hundzuka kutani va va vagandzeri va Xikwembu xa ntiyiso, nkarhi wu nga si va helela.—Mintirho 14:15-17.
Yehovha U Ni Rirhandzu Lerikulu Leri Nga Tsekatsekiki
Yehovha u kombisa rirhandzu eka vagandzeri vakwe va ntiyiso hi ndlela yo hlawuleka leyi nga hikiwangiki. Rirhandzu ro tano ri hlamuseriwa hi rito ra Xiheveru leri hundzuluxeriweke ri va “musa wa rirhandzu,” kumbe “rirhandzu leri nga tsekatsekiki.” Hosi Davhida wa le tikweni ra khale ra Israyele a a wu tlangela swinene musa wa Xikwembu wa rirhandzu. Hikwalaho ka leswi swi n’wi humeleleke ni leswi a a anakanyisisa hi ndlela leyi Xikwembu xi tirhisaneke ni van’wana ha yona, Davhida u yimbelele hi mahika a ku: “Yehovha u ni . . . musa lowukulu wa rirhandzu [kumbe “rirhandzu leri nga tsekatsekiki”].”—Pisalema 145:8.
(Pisalema 145:10-13) Mintirho ya wena hinkwayo yi ta ku dzunisa, Wena Yehovha, Naswona lava tshembekeke va wena va ta ku dzunisa. 11 Va ta vulavula hi ku vangama ka vuhosi bya wena, Naswona va ta vulavula hi matimba ya wena, 12 Leswaku va tivisa vana va vanhu swiendlo swakwe leswikulu Ni ku vangama lokukulu ka vuhosi byakwe. 13 Vuhosi bya wena i vuhosi bya minkarhi leyi nga riki na makumu, Naswona vulawuri bya wena i bya switukulwana hinkwaswo leswi tlhandlamanaka.
Yehovha U Ni Rirhandzu Lerikulu Leri Nga Tsekatsekiki
Ndlela Yo Lemuka Vanhu Va Xikwembu Lava Tshembekaka
Malunghana na Yehovha Xikwembu, Hana mana wa muprofeta Samuwele u vule leswi landzelaka: “U rindza milenge ya lava va tshembekaka vakwe.” (1 Samuwele 2:9) I vamani ‘vanhu vo tano lava tshembekaka’? Hosi Davhida u nyikela nhlamulo. Endzhaku ko bumabumela timfanelo ta Yehovha leti hlamarisaka, u te: “Lava tshembekeke va wena va ta ku [katekisa].” (Pisalema 145:10) U nga tivutisa leswaku vanhu va nga katekisa Xikwembu hi ndlela yihi. Ngopfu-ngopfu sweswo u swi endla hi ku xi dzunisa kumbe hi ku vulavula leswinene ha xona.
Vanhu va Yehovha lava tshembekaka hi lava va tirhisaka milomu ya vona ku vulavula leswinene hi yena. Loko va tidzumbela ni van’wana ni loko va ri eminhlanganweni ya Vukreste, i yini leswi va vulavulaka ngopfu ha swona? Ina, va vulavula ngopfu hi Mfumo wa Yehovha! Malandza ya Xikwembu lama tshembekaka ma titwa hilaha Davhida a titweke hakona loko a yimbelela a ku: “Va ta vulavula hi ku vangama ka vuhosi bya wena [Yehovha], naswona va ta vulavula hi matimba ya wena.”—Pisalema 145:11.
Xana Yehovha wa yingisela loko vanhu vakwe lava tshembekaka va n’wi dzunisa? Ina, wa yingisela. Eka vuprofeta lebyi vulavulaka hi vugandzeri bya ntiyiso bya le nkarhini wa hina, Malakiya u tsarile a ku: “Enkarhini wolowo lava va chavaka Yehovha va vulavurisanile, un’wana ni un’wana ni nakulobye, Yehovha a hambeta a rhiya ndleve, a yingisa. Kutani buku ya xitsundzuxo yi sungula ku tsariwa emahlweni ka yena yi tsaleriwa lava va chavaka Yehovha ni lava va anakanyaka hi vito ra yena.” (Malakiya 3:16) Yehovha wa tsaka swinene loko vanhu va yena lava tshembekaka va vulavula leswinene ha yena, naswona wa va tsundzuka.
Malandza ya Yehovha lama tshembekaka nakambe ma nga lemukiwa hi vurhena bya wona ni ku tirhisa tindlela tin’wana ni tin’wana leti ma pfulekelaka ma vulavula ni vanhu lava nga riki vagandzeri va Xikwembu xa ntiyiso. Kunene, vanhu va Xikwembu lava tshembekaka “va tivisa vana va vanhu swiendlo swakwe leswikulu ni ku vangama lokukulu ka vuhosi byakwe.” (Pisalema 145:12) Xana u lavisisa tindlela to vulavula hi vuhosi bya Yehovha ni vanhu lava nga riki vapfumeri kutani u ti tirhisa loko ti ku pfulekela? Ku hambana ni mimfumo ya vanhu leyi nga ta hundza ku nga ri khale, vuhosi bya yena byi ta va kona hilaha ku nga heriki. (1 Timotiya 1:17) I mhaka ya xihatla leswaku vanhu va dyondza hi vuhosi bya Yehovha lebyi nga heriki kutani va byi seketela. Davhida u yimbelerile a ku: “Vuhosi bya wena i vuhosi bya minkarhi leyi nga riki na makumu, naswona vulawuri bya wena i bya switukulwana hinkwaswo leswi tlhandlamanaka.”—Pisalema 145:13.
(Pisalema 145:14-16) Yehovha u seketela hinkwavo lava waka, Naswona u yimisa hinkwavo lava nkhinsamaka. 15 Mahlo hinkwawo ma languta eka wena ma ri ni ntshembo, Naswona u va nyika swakudya swa vona hi nguva ya kona. 16 U pfula voko ra wena U enerisa ku navela ka xilo xin’wana ni xin’wana lexi hanyaka.
Yehovha U Ni Rirhandzu Lerikulu Leri Nga Tsekatsekiki
Ina, vafumi van’wana va misava va karhateka swinene hi vuhlayiseki bya lava va va fumaka. Kambe hambi ku ri vafumi va xiyimo xa le henhla swinene a va va tivi kahle lava va va fumaka. Ina, hi nga tivutisa xivutiso lexi nge: Xana u kona mufumi loyi a khathalelaka vanhu hinkwavo lava nga ehansi ka yena lerova a hatlisa a pfuna un’wana ni un’wana wa vona loko a ri ekhombyeni? Ina, u kona. Davhida u tsarile a ku: “Yehovha u seketela hinkwavo lava waka, naswona u yimisa hinkwavo lava nkhinsamaka.”—Pisalema 145:14.
Vanhu va Yehovha Xikwembu lava tshembekaka va weriwa hi miringo ni makhombo yo tala hikwalaho ka ku nga hetiseki ka vona ni leswi va hanyaka emisaveni leyi lawuriwaka hi Sathana “lowo homboloka.” (1 Yohane 5:19; Pisalema 34:19) Vakreste va xanisiwa. Van’wana va karhatiwa hi mavabyi lama nga tshungulekiki kumbe hileswi va feriweke hi loyi va n’wi rhandzaka. Minkarhi yin’wana swihoxo swa vanhu va Yehovha lava tshembekaka swi nga va vangela ku ‘nkhinsama’ hikwalaho ko hela matimba. Kambe ku nga khathariseki miringo leyi un’wana ni un’wana wa vona a weriwaka ha yona, Yehovha u tshama a lunghekele ku va chavelela ni ku va tiyisa emoyeni. Hosi Yesu Kreste na yena u ma khathalela hi ndlela leyi fanaka malandza yakwe lama tshembekaka.—Pisalema 72:12-14.
Swakudya Leswi Enerisaka Leswi Fikaka Hi Nkarhi Wa Kona
Hikwalaho ka musa wakwe lowukulu wa rirhandzu, Yehovha u enerisa swilaveko hinkwaswo swa malandza yakwe. Sweswo swi katsa ku va enerisa hi swakudya leswinene. Hosi Davhida u tsarile a ku: “Mahlo hinkwawo ma languta eka wena [Yehovha] ma ri ni ntshembo, naswona u va nyika swakudya swa vona hi nguva ya kona. U pfula voko ra wena u enerisa ku navela ka xilo xin’wana ni xin’wana lexi hanyaka.” (Pisalema 145:15, 16) Ni le minkarhini yo nonon’hwa, Yehovha a nga kongomisa timhaka leswaku vanhu va yena lava tshembekaka va kuma ‘xinkwa xa siku.’—Luka 11:3; 12:29, 30.
Davhida u vule leswaku “xilo xin’wana ni xin’wana lexi hanyaka” xa enerisiwa. Sweswo swi katsa ni swiharhi. Loko emisaveni ni le lwandle a ku nga ri na swimilana swo tala, sweswo a swi ta endla leswaku swivumbiwa leswi hanyaka ematini, tinyenyana ni swiharhi swi nga kumi moya wo tenga ni swakudya. (Pisalema 104:14) Kambe Yehovha u endla leswaku swilaveko swa swona hinkwaswo swi enerisiwa.
Ku hambana ni swiharhi, vanhu va ni xilaveko xa moya. (Matewu 5:3) Yehovha wa swi enerisa hakunene swilaveko swa moya swa vanhu vakwe lava tshembekaka! Loko a nga si fa, Yesu u tshembise leswaku “hlonga ro tshembeka ni ro tlhariha” a ri ta phamela valandzeri vakwe “swakudya swa vona [swa moya] hi nkarhi lowu faneleke.” (Matewu 24:45) Namuntlha ntlawa wolowo wa hlonga wu vumbiwa hi masalela ya vatotiwa va 144 000. Hi ku tirhisa wona, hakunene Yehovha u lunghiselela swakudya swa moya hi xitalo.
Endla Ndzavisiso
(Pisalema 143:8) Ndzi twise musa wa wena wa rirhandzu nimixo, Hikuva ndzi tshembe wena. Ndzi tivise ndlela leyi ndzi faneleke ndzi famba ha yona, Hikuva moya-xiviri wa mina ndzi wu tlakusele eka wena.
Tirhisa Siku Rin’wana Ni Rin’wana Ku Vangamisa Xikwembu
MUPISALEMA DAVHIDA u khongele eka Yehovha a ku: “Ndzi twise musa wa wena wa rirhandzu nimixo . . . Ndzi tivise ndlela leyi ndzi faneleke ndzi famba ha yona.” (Ps. 143:8) Loko u pfuka nimixo kutani u nkhensa Yehovha hikwalaho ka siku lerintshwa, xana wa n’wi kombela leswaku a ku kongomisa loko u endla swiboho ni leswaku u endla swilo hi ndlela leyinene, ku fana na Davhida? A swi kanakanisi leswaku wa swi endla sweswo.
Tanihi malandza ya Yehovha lama tinyiketeleke, ‘hambi ha dya kumbe ha nwa kumbe hi endla yini na yini,’ hi tikarhatela ku ‘endla hinkwaswo leswaku hi vangamisa Xikwembu.’ (1 Kor. 10:31) Ha swi xiya leswaku ndlela leyi hi hanyaka ha yona siku ni siku yi nga ha dzunisa Yehovha kumbe yi n’wi sandza. Nakambe ha tsundzuka leswaku Rito ra Xikwembu ri vula leswaku Sathana u hehla vamakwavo va Kreste—entiyisweni malandza hinkwawo ya Xikwembu lama nga laha misaveni—“vusiku ni nhlikanhi.” (Nhlav. 12:10) Hikwalaho, hi tiyimiserile ku nyikela nhlamulo eka swihehlo swa Sathana naswona hi lava ku tsakisa mbilu ya Yehovha hi ku endlela Tata wa hina wa le tilweni ntirho wo kwetsima “nhlikanhi ni vusiku.”—Nhlav. 7:15; Swiv. 27:11.
(Pisalema 150:6) Hinkwaswo leswi hefemulaka—a swi dzunise Yah. Dzunisani Yah!
it-2 448
Nomu
Xirho lexi Xikwembu xi xi endleke leswaku xi tirhiseriwa ku dya naswona vanhu va xi tirhisela ni ku vulavula. Hinkwaswo leswi vulavuriwaka swi fanele swi yisa ku dzuneka eka Xona. (Ps 34:1; 51:15; 71:8; 145:21) Mupisalema u vule leswaku xilo xin’wana ni xin’wana lexi hefemulaka xi ta dzunisa Yehovha; hikwalaho vanhu va fanele va tirhisa milomu ya vona hi ndlela leyinene loko va tsakela ku hanya. Muapostola Pawulo u hlamusele leswaku ku pfumela hi mbilu ntsena eka Xikwembu ni le ka N’wana wa xona a swi enelanga. Munhu u fanele a swi kombisa erivaleni leswaku a ta ponisiwa.—Ps 150:6; Rhm 10:10.
Hi ku pfumelelana ni xikongomelo xakwe ni mfanelo leyi a nga na yona tanihi Muvumbi, Yehovha a nga endla leswaku nandza wakwe a vulavula marito lama faneleke. U endle tano hi singita eka vaprofeta vakwe hi ku va a va huhutela leswi va faneleke va swi vula. (Eks 4:11, 12, 15; Yr 1:9) Namuntlha malandza ya Xikwembu ma nga va ni marito ya xona emilon’wini ya wona, ku nga ri hi ku va ma huhuteriwe wona kambe hi ku va ma tirhisa Rito ra xona leri huhuteriweke leri ma hlomiselaka ntirho wun’wana ni wun’wana lowunene. (2Tm 3:16, 17) A swi lavi leswaku ma rindzela Kreste leswaku a ta vula mahungu lamanene kumbe ma ya endhawini yin’wana leswaku ma ta kuma leswi ma nga ta swi chumayela. Ma tshama ma ri na rona, ma lunghekele ku vulavula, hilaha ma byeriweke hakona: ‘Rito ri le kusuhi na n’wina, enon’wini wa n’wina, ni le mbilwini ya n’wini.’—Rhm 10:6-9; Dt 30:11-14.
Wu Nga Endla Leswaku Munhu A Hanya Kumbe A Fa. Yehovha u vula leswaku i swa nkoka leswaku munhu a tirhisa nomu wakwe hi ndlela leyinene. Rito rakwe ri ri: “Nomu wa munhu wo lulama i xihlovo xa vutomi.” (Swiv 10:11) Hikwalaho munhu u fanele a va ni vuxiyaxiya loko a vulavula (Ps 141:3; Swiv 13:3; 21:23) hikuva loko nomu wu tirhisiwa hi ndlela ya vuhunguki wu ta vangela n’wini wa wona swiphiqo. (Swiv 10:14; 18:7) Xikwembu xi sola munhu hikwalaho ka leswi a swi vulavulaka. (Mt 12:36, 37) Munhu a nga vulavula hi xihatla, ivi a hlambanya hi ku hatlisa. (Ekl 5:4-6) A nga bumabumela munhu un’wana swi nga fanelanga naswona munhu yoloye a nga hetelela a titshemba ku tlula mpimo. (Swiv 26:28) I swa nkoka ku xiyisisa leswi hi swi vulaka hikuva loko ho hambuka eka kongomisaka wa vuthlari lowu Xikwembu xi wu nyikaka malandza ya xona malunghana ni leswi ma faneleke ma swi vula, swi nga yisa xisandzu eka vito ra xona naswona swi nga endla leswaku munhu a fa. (Ps 39:1) Yesu u hi vekele xikombiso lexinene hi ku va a xixima nawu wa Xikwembu naswona a a nga gunguli kumbe ku rhukana lava a va n’wi kaneta.—Esa 53:7; Min 8:32; 1Pe 2:23.
Mukreste u fanele a tshama a xalamukile hikwalaho ka leswi a nga hetisekangiki; hikwalaho u fanele a kambela mbilu yakwe. Yesu u vule leswaku a hi leswi swi ngheneka enon’wini leswi nga nyamisaka munhu kambe, hi leswi swi humaka eka wona “hikuva nomu wu vulavula leswi mbilu yi taleke swona.” (Mt 12:34; 15:11) Xisweswo munhu u fanele a va ni vuxiyaxiya leswaku a nga vuli nchumu handle ko rhanga a anakanya hi vuyelo lebyi nga vaka kona. Leswi swi lava leswaku munhu a tirhisa mianakanyo yakwe leswaku a ta kota ku tirhisa swilo leswinene leswi a swi dyondzeke eRitweni ra Xikwembu.—Swiv 13:3; 21:23.