Swikombo Swa Minkandziyiso Leyi Nga Eka Xiyimiso Xa Minhlangano Xa Mahanyelo Ni Ntirho
AUGUST 1-7
LESWI HI SWI DYONDZAKA EBIBELENI | TIPISALEMA 87–91
“Tshama eNdhawini Ya Le Xihundleni Ya La Nge Henhla-Henhla”
(Pisalema 91:1, 2) Mani na mani la tshamaka endhawini ya le xihundleni ya La nge Henhla-henhla U ta kuma vutshamo endzhutini wa Lowa Matimba Hinkwawo. 2 Ndzi ta vula eka Yehovha ndzi ku: “U vutumbelo bya mina ni khokholo ra mina, Xikwembu xanga, lexi ndzi nga ta tshembela eka xona.”
Hambeta U Landzela Ndlela Leyinene Yo Hanya Ha Yona!
Ku Sirheleleka “eNdhawini Ya Le Xihundleni”
10 Ku tinyiketela ni ku khuvuriwa swi endla leswaku munhu a kuma nkateko wun’wana lowukulu—lunghelo ra ku tshama “endhawini ya le xihundleni ya La nge Henhla-henhla.” (Hlaya Pisalema 91:1.) Leyi i ndhawu yo fanekisela leyi sirhelelekeke ni leyi hlayisekeke—xiyimo xa ku sirheleleka eka khombo ra moya. I ‘ndhawu ya le xihundleni’ hikuva yi kumiwa ntsena hi vanhu lava vonaka timhaka hi ndlela leyi Xikwembu xi ti vonaka ha yona va tlhela va xi tshemba. Loko hi hanya hi ku pfumelelana ni ku tinyiketela ka hina hi tlhela hi kombisa leswaku hi n’wi tshemba hi ku helela Yehovha, entiyisweni hi ri eka yena: “U vutumbelo bya mina ni khokholo ra mina, Xikwembu xanga, lexi ndzi nga ta tshembela eka xona.” (Ps. 91:2) Yehovha Xikwembu u va ndhawu ya hina yo tshama eka yona leyi sirhelelekeke. (Ps. 91:9) A ku na ndhawu yin’wana leyi sirhelelekeke ku tlula ndhawu yoleyo.
11 Ku kota ku nghena “endhawini ya le xihundleni” ya Yehovha swi tlhela swi vula leswaku hi katekisiwe hi lunghelo ra ku va ni vuxaka na yena. Vuxaka byebyo byi sungula loko hi tinyiketela kutani hi khuvuriwa. Endzhaku ka sweswo, hi kurisa vuxaka bya hina na Xikwembu hi ku tshinela eka xona hi ku dyondza Bibele, ku khongela swi huma embilwini ni ku xi yingisa hi ku helela. (Yak. 4:8) A nga kona munhu loyi a tshameke a va ekusuhi swinene na Yehovha ku tlula Yesu, loyi a tshembeke Muvumbi minkarhi hinkwayo. (Yoh. 8:29) Hikwalaho, hi nga tshuki hi kanakana Yehovha kumbe ku navela ka yena ni vuswikoti bya yena bya ku hi pfuna leswaku hi hetisisa xihlambanyo xa hina xa ku tinyiketela eka yena. (Ekl. 5:4) Malunghiselelo ya moya lawa Xikwembu xi ma lunghiseleleke vanhu va xona i vumbhoni lebyi tiyeke bya leswaku xa hi rhandza hakunene naswona xi lava leswaku swilo swi hi fambela kahle loko hi xi tirhela.
(Pisalema 91:3) Hikuva yena u ta ku kutsula exirimbaneni xa muphasi wa tinyenyana, Eka ntungu lowu vangaka maxangu.
Ku Kutsuriwa eSwirimbanini Swa Muphasi Wa Tinyenyana
VAKRESTE hinkwavo va ntiyiso va langutane ni muhloti la nga ni vuxisi ni vutlhari byo tlula bya munhu. Eka Pisalema 91:3 u vuriwa “muphasi wa tinyenyana.” Xana i mani nala wa kona? Ku sukela eka nkandziyiso wa June 1, 1883, magazini lowu wu vule leswaku a ku na un’wana handle ka Sathana Diyavulosi. Nala loyi wa matimba u endla matshalatshala ya vukanganyisi leswaku a hambukisa vanhu va Yehovha ni ku va phasa ku fana ni muphasi wa tinyenyana loko a ringeta ku phasa xinyenyana.
2 Eminkarhini ya khale swinyenyana a swi phasiwa hikwalaho ka vuxongi bya vuyimbeleri bya swona, mivalavala ya tinsiva ta swona leswaku swi ta dyiwa ni ku endla magandzelo. Hambiswiritano, hi ntumbuluko swinyenyana i swivumbiwa leswi tshamaka swi xalamukile ni ku hatla swi vona khombo, naswona a swi olovi ku swi phasa. Hikwalaho, muphasi wa tinyenyana wa le minkarhini ya ku tsariwa ka Bibele a a rhanga a dyondza vutomi ni mikhuva ya muxaka wa tinyenyana leti a navelaka ku ti phasa. Kutani a ehleketa hi tindlela ta vutlhari to ti phasa. Loko Bibele yi fanisa Sathana ni muphasi wa tinyenyana yi hi pfuna leswaku hi tiva tindlela ta yena. Diyavulosi wa hi dyondza ha un’we wa hina. U xiya mikhuva ya hina kutani a rhiya mintlhamu ya yena a yi tumbeta leswaku a ringeta ku hi phasa hi ri karhi hi hanya. (2 Timotiya 2:26) Ku phasiwa hi yena swi ta onha vumoya bya hina naswona swi ta endla leswaku hi loviseriwa makumu. Hikwalaho, leswaku hi sirheleleka hi fanele hi tiva vukanganyisi bya “muphasi wa tinyenyana.”
3 Mupisalema u tlhele a fanisa marhengu ya Sathana ni ya xinghalana kumbe nyoka ya xivatlankombe. (Pisalema 91:13) Ku fana ni nghala, minkarhi yin’wana Sathana u hlasela hi ku kongoma hi ku tirhisa nxaniso kumbe hulumendhe leswaku yi lwisana ni vanhu va Yehovha. (Pisalema 94:20) Ku hlasela ka yena ku fana ni nghala swi nga ha tshikisa vanhu va nga ri vangani ku tirhela Yehovha. Kambe, hakanyingi minhlaselo yoleyo leyi nga erivaleni a yi va wisi vanhu va Xikwembu kambe yo ya yi tiyisa vun’we bya vona. Kambe, xana Sathana u hlasela njhani ku fana ni nyoka ya xivatlankombe?
4 Diyavulosi u tirhisa vutlhari lebyi tlulaka bya munhu leswaku a kanganyisa ni ku hlasela hi ndlela yo vava ku fana ni nyoka ya vuxungu leyi tumbeleke. Hi ku tirhisa ndlela leyi, u kote ku onha mianakanyo ya vanhu van’wana va Xikwembu, a va kanganyisa leswaku va endla ku rhandza ka yena ematshan’weni ya ku endla ku rhandza ka Yehovha, ivi va wela ekhombyeni. Lexi tsakisaka hileswaku ha ma tiva makungu ya Sathana. (2 Vakorinto 2:11) Sweswi a hi kambisiseni mintlhamu leyi tirhisiwaka hi “muphasi wa tinyenyana.”
Ku Chava Vanhu
5 “Muphasi wa tinyenyana” u tiva leswi munhu hi ntolovelo a swi navelaka leswaku a ta amukeleka ni ku tsakeriwa hi vanhu van’wana. A swi vuli leswaku Vakreste a va na mhaka ni leswi vanhu lava hanyaka na vona va swi ehleketaka ni ndlela leyi va titwaka ha yona. Leswi Diyavulosi a yi tivaka mhaka yoleyo, u ta lava ku endla Vakreste va karhateka ngopfu hi leswi vanhu van’wana va swi ehleketaka ha vona. Hi xikombiso, u phasa vanhu va Xikwembu hi ku tirhisa ntlhamu wa ku “chava vanhu.” (Swivuriso 29:25) Loko malandza ya Xikwembu ma joyina van’wana leswaku ma endla leswi Yehovha a nga swi laviki kumbe va ala ku endla leswi Rito ra Xikwembu ri va lerisaka swona, va va se va phasiwe hi “muphasi wa tinyenyana.”—Ezekiyele 33:8; Yakobo 4:17.
6 Hi xikombiso, muntshwa a nga ha endla leswi tintangha takwe exikolweni ti n’wi kucetelaka ku swi endla kutani a dzaha fole. Swi nga ha endleka siku rero loko a ya exikolweni a a nga ehleketi nikatsongo hi ku dzaha fole. Kambe hi xitshuketa u tikuma a endla nchumu lowu onhaka rihanyo rakwe ni lowu hlundzukisaka Xikwembu. (2 Vakorinto 7:1) Xana u ringiwe njhani? Kumbexana u fambe ni vanghana vo biha naswona u chave leswaku va nga n’wi endla xihlekiso. Vantshwa, mi nga pfumeleli “muphasi wa tinyenyana” a mi yenga kutani a mi phasa! Leswaku u papalata ku phasiwa u ri karhi u hanya, tivonele leswaku u nga endli hambi ku ri xilo xitsongo xo biha. Yingisa ndzayo ya Bibele ya ku papalata vanghana vo biha.—1 Vakorinto 15:33.
7 Vatswari lava nga Vakreste lava xalamukeke va byi tekela enhlokweni vutihlamuleri bya vona bya Matsalwa bya ku phamela mindyangu ya vona hi tlhelo ra nyama. (1 Timotiya 5:8) Hambiswiritano, xikongomelo xa Sathana i ku endla leswaku Vakreste va hundzeleta emhakeni leyi. Kumbexana va xwa eminhlanganweni hikwalaho ka leswi vathori va vona va va sindzisaka ku endla ntirho lowu engetelekeke. Va nga ha chava ku kombela ku xwa entirhweni leswaku va ta va kona eka swiyimiso hinkwaswo swa nhlengeletano ya xifundzha, va kota ku gandzela Yehovha swin’we ni vamakwavo. Lexi nga hi sirhelelaka eka ntlhamu lowu i ku “tshemba Yehovha.” (Swivuriso 3:5, 6) Ku engetela kwalaho, ku tsundzuka leswaku hinkwerhu hi swirho swa ndyangu wa Yehovha nileswaku u tiyimisele ku hi khathalela, swi ta hi pfuna leswaku hi tshama hi tiyile. Vatswari, xana mi na rona ripfumelo ra leswaku Yehovha u ta mi khathalela hi ndlela yo karhi swin’we ni mindyangu ya n’wina loko mi endla ku rhandza ka yena? Kumbe, xana Diyavulosi u ta mi phasa mi ri karhi mi hanya kutani mi endla ku rhandza ka yena hikwalaho ko chava vanhu? Ha mi khutaza leswaku mi anakanyisisa hi swivutiso leswi hi xikhongelo.
Ntlhamu Wa Ku Hlongorisa Rifuwo
8 Nakambe Sathana u tirhisa ntlhamu wa ku hlongorisa rifuwo leswaku a hi phasa. Fambiselo ra swa mabindzu ra misava leyi, hakanyingi ri kucetela ku nghenela swikimi swa ku kuma rifuwo hi ku hatlisa, leswi nga ha kanganyisaka vanhu van’wana va Xikwembu. Minkarhi yin’wana, vanhu va nga ha khutaziwa leswi: “Kulula u n’watseka. Loko se u ri ni timali ta wena, u nga tshama ehansi u wisa kutani u tiphina hi vutomi. U nga ha phayona loko u swi lava.” Marito lawa, ma nga ha vuriwa hi van’wana lava lavaka ku dyelela vamakwavo evandlheni ra Vukreste. Anakanya kahle hi mhaka leyi ya ku va ni mali yo tala. Xana a yi kombisi ku va ni mianakanyo yo fana ni ya munhu la fuweke wa le xifanisweni xa Yesu, ya ku va la nga “anakanyiki”?—Luka 12:16-21.
9 Sathana u lawula mafambiselo ya yena yo homboloka lerova ma kucetela vanhu leswaku va navela swilo. Ku navela koloko ku nga hetelela ku kavanyete vutomi bya Mukreste, ku kamanyeta rito kutani ri “nga ha veki mihandzu.” (Marka 4:19) Bibele yi hi khutaza leswaku hi eneriseka hi swakudya ni swo funengela. (1 Timotiya 6:8) Hambiswiritano, vo tala va phasiwa hi “muphasi wa tinyenyana” hikuva ndzayo leyi a va yi tirhisi eka vona vini. Xana ku nga ha va ku ri leswaku manyunyu ma va endla va vona onge va fanele va hanya hi ndlela yo karhi? Xana ku vuriwa yini hi un’wana ni un’wana wa hina? Xana ku navela ku va ni swilo swi endla leswaku timhaka ta vugandzeri bya ntiyiso hi ti teka ti nga ri ta nkoka ngopfu? (Hagayi 1:2-8) Lexi twisaka ku vava eminkarhini leyi ya ku pfumaleka ka timali, van’wana va honise vuxaka bya vona ni Xikwembu leswaku va kota ku hambeta va hanya hi ndlela leyi se va yi toloveleke. Langutelo rolero ro hlongorisa rifuwo ri tsakisa “muphasi wa tinyenyana”!
Ntlhamu Wa Vuhungasi Lebyi Nga Riki Byinene
10 Ntlhamu wun’wana wa “muphasi wa tinyenyana” i ku onha mapfalo ya vanhu yo tiva leswi nga swinene ni leswo biha. Langutelo ro fana ni leri a ri ri eSodoma ni le Gomora hi rona ri lawulaka vuhungasi byo tala. Hambi ku ri swiviko swa mahungu swa le ka thelevhixini ni swa timagazini swi vulavula hi madzolonga ni ku endla leswaku vanhu va tsakela swilo swo chavisa ni timhaka ta masangu. Swo tala leswi kombisiwaka eka thelevhixini leswi vuriwaka vuhungasi swi onha vuswikoti bya vanhu byo “hambanisa leswi lulameke ni leswi hoxeke.” (Vaheveru 5:14) Hambiswiritano, tsundzuka marito ya Yehovha lawa a ma vuleke hi nomu wa Esaya a ku: “Khombo eka lava vulaka leswaku leswinene swi bihile nileswaku leswo biha i swinene!” (Esaya 5:20) Xana “muphasi wa tinyenyana” se u onhe mianakanyo ya wena hi mano yakwe emhakeni ya vuhungasi byo tano byo biha? I swa nkoka leswaku u tikambisisa wena n’wini.—2 Vakorinto 13:5.
11 Kwalomu ka malembe ya 25 lama hundzeke, Xihondzo xo Rindza xi lemukise vagandzeri va Xikwembu hi ndlela ya rirhandzu malunghana ni minongonoko ya TV. Loko xi hlamusela ndlela leyi switori leswi rhandziwaka ngopfu swi nga n’wi kucetelaka ha yona munhu, xi te: “Matshalatshala yo lava ku rhandziwa ma tirhiseriwa ku yimelela mahanyelo wahi ni wahi yo biha. Hi xikombiso, eka ntlango wun’wana, muntshwa un’wana la nga tika kambe a nga tekiwangiki u byela munghana wakwe a ku: ‘Phela ndza n’wi rhandza Victor. A ndzi na mhaka. . . . Mhaka yikulu eka mina i ku va ndzi tswala n’wana loyi a nga ta ku tatana eka yena!’ Vuyimbeleri byo hola lebyi chayelaka ehansi byi pfala munhu mahlo a nga swi voni leswaku ndlela leyi a yi tekaka yi bihile. Na wena muhlaleri wa ntlango lowu u twa u n’wi rhandza Victor wa kona. U tikuma u twelana ni nhwanyana yoloye. Na wena u swi twisisa kahle leswi a swi vulaka. Endzhakunyana ka loko muhlaleri un’wana a ehleketisisile u te, ‘Ya hlamarisa ndlela leyi u tiyimelelaka ha yona loko wa ha endla leswi humeke endleleni. Ha swi tiva leswaku ku tikhoma loko biha swi hoxile. . . . Kambe ndzi xiye leswaku emianakanyweni ya mina a ndzi n’wi twela vusiwana munhu la tikhomaka hi ndlela yo biha.’”
12 Hi mpfhuka swihloko sweswo swi kandziyisiwa, muxaka lowu wa minongonoko leyi onhaka mianakanyo wu ya wu kumeka hi xitalo. Etindhawini to tala, minongonoko yo tano yi tlanga vusiku ninhlikanhi. Vavanuna ni vavasati ni vantshwa vo tala hakanyingi va wundla mianakanyo ya vona ni timbilu ta vona hi vuhungasi byo tano. Kambe hina a hi fanelanga hi tixisa. Swi hoxile ku ehleketa leswaku vuhungasi byo biha a byi onhi ku fana ni swilo leswi endlekaka hi xiviri hi swi vona. Xana Mukreste a nga hlawula ku hungasiwa hi vanhu vo karhi lava a nga lorhiki nikatsongo ku va rhamba ekaya rakwe?
13 Vo tala va vuyeriwile loko va yingisa xitsundzuxo lexi vuriweke hi “hlonga ro tshembeka ni ro tlhariha.” (Matewu 24:45-47) Endzhaku ko hlaya ndzayo leyi nga erivaleni leyi sekeriweke eBibeleni, van’wana va tsarile va hlamusela ndlela leyi swihloko swa timagazini swi va pfuneke ha yona. Un’wana u te: “Ku ringana malembe ya 13 a ndzi godzomberiwe hi switori swa thelevhixini. A ndzi ehleketa leswaku vuxaka bya mina na Xikwembu a byi sirhelelekile loko ntsena ndzi ya eminhlanganweni ya Vukreste naswona ndzi pfa ndzi huma nsimu. Kambe ndzi tikume ndzi ngheniwe hi moya wa vatlangi va switori sweswo wa leswaku loko nuna wa wena a ku karhata kumbe u vona a nga ku rhandzi, loko wo oswa a hi nandzu wa wena—i nandzu wa yena. Leswi a ndzi tiyimelela ndzi teke ndlela leyi yo biha kutani ndzi dyohela Yehovha ni nuna wa mina.” Wansati loyi u susiwile evandlheni. Eku heteleleni, u tianakanyile kutani a hundzuka ivi a vuyiseriwa eku hlanganyeleni. Swihloko leswi lemukiseke hi ta switori swa TV swi n’wi nyike matimba yo papalata ku hungasiwa hi swilo leswi vengiwaka hi Yehovha.—Amosi 5:14, 15.
14 Muhlayi un’wana loyi vutomi bya yena a byi onhiwe hi switori u te: “Ndzi ririle loko ndzi ri karhi ndzi hlaya swihloko sweswo, hikuva ndzi xiye leswaku mbilu ya mina a yi nga ha ri eka Yehovha hi ku helela. Ndzi tshembise Xikwembu xanga leswaku a ndzi nge he pfuki ndzi ve hlonga ra switori leswi.” Wansati un’wana wa Mukreste, endzhaku ko phofula ndlela leyi a swi tlangelaka ha yona swihloko leswi a swi hlayeke, la pfumeleke leswaku switori se a swi n’wi godzomberile, u tsale a ku: “A ndzi tivutisa . . . loko vuxaka bya mina na Yehovha byi khumbeka. Xana ndzi nga va munghana wa vatlangi va switori hala tlhelo ndzi va munghana wa Yehovha?” Loko switori sweswo swa TV swi onhe timbilu ta vanhu eka malembe ya kwalomu ka 25 lama hundzeke, sweswi swi fanele swi nyanye ku tlula mpimo. (2 Timotiya 3:13) Hi fanele hi tivonela eka ntlhamu wa Sathana wa mixaka hinkwayo ya vuhungasi lebyi nga tengangiki, hambi i switori swa TV, mintlangu ya vhidiyo ya madzolonga kumbe i tivhidiyo ta vuyimbeleri bya manyala.
Ntlhamu Wa Timholovo
15 Sathana u tirhisa timholovo tanihi ntlhamu leswaku a vanga ku avana exikarhi ka vanhu va Yehovha. Hi nga ha phasiwa hi ntlhamu lowu ku nga khathariseki malunghelo lawa hi nga na wona entirhweni wa Mfumo. Van’wana Diyavulosi u va phasile va ri karhi va hanya hikwalaho ko pfumelela timholovo ti kavanyeta ku rhula ni vun’we leswi Yehovha a hi nyikeke swona.—Pisalema 133:1-3.
16 Hi nkarhi wa Nyimpi yo Sungula ya Misava, Sathana u ringete ku lovisa nhlengeletano ya Yehovha ya laha misaveni hi ku yi hlasela hi ku kongoma kambe u hlulekile. (Nhlavutelo 11:7-13) Ku sukela enkarhini wolowo, u tirhise mano leswaku a hahlula vun’we bya hina. Loko hi pfumelela timholovo ti onha vun’we bya hina, hi va hi nyike “muphasi wa tinyenyana” nkarhi wo hi phasa. Xisweswo hi nga sivela ku tirha ka moya lowo kwetsima evuton’wini bya hina vini ni le vandlheni. Loko sweswo swo humelela, Sathana u ta tsaka hikuva xin’wana ni xin’wana lexi kavanyetaka vun’we bya vandlha xi kavanyeta ni ntirho wo chumayela.—Vaefesa 4:27, 30-32.
17 Xana u nga endla yini loko u nga twanani ni Mukrestekuloni? Entiyisweni, swiyimo swa hambana. Kambe hambileswi ku nga ni swivangelo swo tala leswi tumbuluxaka swiphiqo, a xi kona xivangelo xa leswaku timholovo ti tshama ti nga tlhantlhiwanga. (Matewu 5:23, 24; 18:15-17) Xitsundzuxo lexi nga eRitweni ra Xikwembu xi huhuteriwile naswona xi hetisekile. Minkarhi hinkwayo loko misinya ya milawu ya Bibele yi tirhisiwa ya pfuna.
18 Yehovha u “lunghekele ku rivalela,” naswona u ni “ndzivalelo wa ntiyiso.” (Pisalema 86:5; 130:4) Loko hi n’wi tekelela, hi kombisa leswaku hi vana va yena lava rhandzekaka. (Vaefesa 5:1) Hinkwerhu hi vadyohi naswona ha wu lava ndzivalelo wa Yehovha. Xisweswo, hi fanele hi tivonela loko hi titwa hi ri ni mboyamelo wa ku ka hi nga rivaleli munhu un’wana. Hi nga ha fana ni nandza wa le xifanisweni xa Yesu loyi a aleke ku rivalela nandzakulobye xikweleti lexi a xi nga nyawuli loko xi ringanisiwa ni lexi n’wini wa yena ana se a n’wi rivaleleke xona. Loko n’wini wa yena a tivisiwa mhaka leyi, u lerise leswaku nandza loyi a nga rivaleliki a hoxiwa ekhotsweni. Yesu u gimete xifaniso xa yena hi marito lawa: “Ni Tata wa mina la nge matilweni u ta endla hi mukhuva lowu fanaka eka n’wina loko mi nga rivaleli vamakwenu ku suka etimbilwini ta n’wina.” (Matewu 18:21-35) Ku anakanyisisa hi xifaniso lexi ni ndlela leyi Yehovha a hi rivalelaka ha yona ko tala a nga ri na xikhomela, sweswo swi ta hi pfuna loko hi ringeta ku lunghisa timholovo ni vamakwerhu!—Pisalema 19:14
(Pisalema 91:9-14) Hikuva u te: “Yehovha i vutumbelo bya mina,” La nge Henhla-henhla u n’wi endle vutshamo bya wena; 10 Ku hava khombo leri nga ta ku wela, Hambi ku ri ku xaniseka a ku nge tshineli entsongeni wa wena. 11 Hikuva u ta lerisa tintsumi takwe malunghana na wena, Leswaku ti ku rindza etindleleni ta wena hinkwato. 12 Ti ta ku rhwala hi mavoko ya tona, Leswaku nenge wa wena wu nga tshuki wu hima ribye. 13 U ta kandziyela xinghalana ni xivatlankombe; U ta pyanya xinghalana xa ntshiva ni nyoka leyikulu. 14 Hikuva u veke xinakulobye xakwe eka mina, Ndzi ta tlhela ndzi n’wi ponisa. Ndzi ta n’wi sirhelela hikuva u tiva vito ra mina.”
Ku Va Vanhu Va Yehovha I Musa Lowu Nga Faneriwiki
13 Yehovha u va sirhelela njhani vanhu va yena eka makhombo lawa ya moya? Pisalema leyi yi ri: “U ta lerisa tintsumi takwe malunghana na wena, leswaku ti ku rindza etindleleni ta wena hinkwato.” (Ps. 91:11) Tintsumi ta le tilweni ta hi kongomisa ti tlhela ti hi sirhelela leswaku hi kota ku chumayela mahungu lamanene. (Nhlav. 14:6) Ku engetela eka tintsumi, loko vakulu lava nga Vakreste va namarhela Matsalwa swinene loko va dyondzisa, va hi sirhelela leswaku hi nga kanganyisiwi hi mianakanyo ya mavunwa. Va nga pfuna munhu un’wana ni un’wana loyi a lwaka hi matimba leswaku a hlula mavonelo ya misava. (Tito 1:9; 1 Pet. 5:2) Nakambe “hlonga ro tshembeka ni ro tlhariha” ri hi nyika swakudya swa moya leswaku ri hi sirhelela eka dyondzo ya ku tiendlekela ka swilo, ndzingo wa ku navela ko biha, ku lava rifuwo ni ndhuma ni ku navela ni minkucetelo yin’wana yo tala leyi nga ni khombo. (Mat. 24:45) I yini lexi ku pfuneke leswaku u lwisana ni man’wana ya makhombo wolawo?
14 Hi fanele hi endla yini leswaku hi hambeta hi tshama “endhawini ya le xihundleni” leyi sirhelelekeke ya Xikwembu? Tanihi leswi hi tshamelaka ku tisirhelela eka makhombo ya nyama, yo tanihi timhangu, swigevenga, kumbe ku tluleriwa hi mavabyi, hi fanele ku hambeta hi tisirhelela eka makhombo ya moya. Hikwalaho, hi fanele hi tshama hi ri karhi hi tirhisa nkongomiso lowu Yehovha a hi nyikaka wona etibukwini ta hina ni le minhlanganweni ya vandlha ni le tinhlengeletanweni. Hi fanele hi tlhela hi lava xitsundzuxo xa vakulu. Naswona ha vuyeriwa eka timfanelo to hambanahambana leti kombisiwaka hi vamakwerhu lava nga Vakreste. Hakunene, ku hlanganyela ka hina ni vandlha ku hi pfuna leswaku hi tlhariha.—Swiv. 13:20; hlaya 1 Petro 4:10.
Yehovha I Vutumbelo Bya Hina
‘Ku Hava Khombo Leri Nga Ta Hi Wela’
13 Hambileswi nsirhelelo wa misava leyi wu hohlokaka, hi rhangisa Xikwembu kutani hi amukela xikhutazo xa marito lawa ya mupisalema: “Hikuva u te: ‘Yehovha i vutumbelo bya mina,’ La nge Henhla-henhla u n’wi endle vutshamo bya wena; ku hava khombo leri nga ta ku wela, hambi ku ri [ntungu a wu] nge tshineli entsongeni wa wena.” (Pisalema 91:9, 10) Ina, Yehovha i vutumbelo bya hina. Hambiswiritano, hi tlhela hi endla La nge Henhla-henhla a va ‘vutshamo bya hina,’ laha hi sirheleriwaka kona. Hi dzunisa Yehovha tanihi Hosi ya Vuako Hinkwabyo, hi ‘tshama’ eka yena tanihi Xihlovo xa nsirhelelo wa hina, hi tlhela hi twarisa mahungu lamanene ya Mfumo wa yena. (Matewu 24:14) Hikwalaho, ‘ku hava khombo leri nga ta hi wela’—ni rin’we ra makhombo lama hlamuseriweke eku sunguleni ka pisalema leyi. Hambiloko na hina hi weriwa hi makhombo yo tanihi ku tsekatseka ka misava, swidzedze, tindhambhi, tindlala ni tinyimpi, leswi a swi ri dlayi ripfumelo ra hina kumbe nsirhelelo wa hina wa moya.
14 Vakreste lava totiweke va fana ni valuveri lava tshamaka emintsongeni leyi nga riki ya mafambiselo lawa ya swilo. (1 Petro 2:11) ‘Hambi ku ri ku ntungu a wu tshineli entsongeni wa vona.’ Ku nga khathariseki leswaku ntshembo wa hina i wa ku hanya etilweni kumbe emisaveni, a hi xiphemu xa misava, naswona a hi tluleriwi hi ntungu wa moya lowu dlayaka wo tanihi mahanyelo layo biha, ku hlongorisa rifuwo, vukhongeri bya mavunwa ni ku gandzela “xivandzana” swin’we ni “xifaniso” xa xona, ku nga Nhlangano wa Matiko.—Nhlavutelo 9:20, 21; 13:1-18; Yohane 17:16.
15 Mupisalema u engeterile malunghana ni nsirhelelo lowu hi nga na wona: “[Yehovha] u ta lerisa tintsumi takwe malunghana na wena, leswaku ti ku rindza etindleleni ta wena hinkwato. Ti ta ku rhwala hi mavoko ya tona, leswaku nenge wa wena wu nga tshuki wu hima ribye.” (Pisalema 91:11, 12) Tintsumi ti nyikiwe matimba ya ku hi sirhelela. (2 Tihosi 6:17; Pisalema 34:7-9; 104:4; Matewu 26:53; Luka 1:19) Ta hi rindza ‘etindleleni ta hina hinkwato.’ (Matewu 18:10) Hi kongomisiwa hi tintsumi hi tlhela hi rindziwa tanihi vahuweleri va Mfumo naswona a hi khunguvanyeki hi tlhelo ra moya. (Nhlavutelo 14:6, 7) Hambi ku ri ‘maribye’ yo tanihi ku siveriwa ka ntirho wa hina a ma hi wisanga hi nga ha tsakeriwi hi Xikwembu
16 Mupisalema u ye emahlweni: “U ta kandziyela xinghalana ni xivatlankombe; u ta pyanya xinghalana xa ntshiva ni nyoka leyikulu.” (Pisalema 91:13) Ku fana ni xinghalana lexi hlaselaka hi ku kongoma, van’wana va valala va hina va hi kaneta erivaleni hi ku veka milawu leyi endleriweke ku yimisa ntirho wa hina wo chumayela. Kambe hi tlhela hi hlaseriwa hi minhlaselo leyi nga languteriwangiki ku fana ni ya ku lumiwa hi xivatlankombe lexi tumbeleke. Minkarhi yin’wana vafundhisi va nga ha hi hlasela hi ku tirhisa vanhu lava vekaka milawu, vaavanyisi ni van’wana. Kambe hi ku seketeriwa hi Yehovha, hi lava ntshunxeko hi ku rhula etihubyeni, xisweswo ‘hi lwela hi tlhela hi simeka mahungu lamanene hi nawu.’—Vafilipiya 1:7; Pisalema 94:14, 20-22.
17 Mupisalema u vulavula hi ku kandziyela “xinghalana xa ntshiva ni nyoka leyikulu.” Xinghalana xa ntshiva xi nga ha leva, naswona nyoka leyikulu yi nga ha va xikokovi lexikulu. (Esaya 31:4) Kambe, ku nga khathariseki leswaku xinghalana xa ntshiva xi leva ku fikela kwihi loko xi hlasela, ha xi kandziyela hi ndlela yo fanekisela loko hi yingisa Xikwembu ku tlula vanhu kumbe minhlangano leyi fanaka ni nghala. (Mintirho 5:29) Hikwalaho “nghala” leyi levaka a yi nge hi vavisi hi tlhelo ra moya.
18 Eka Septuagint ya Xigriki, “nyoka leyikulu” yi vitaniwa “dragona.” Leswi swi nga ha hi tsundzuxa “dragona leyikulu . . . , nyoka ya khale, leyi vuriwaka Diyavulosi na Sathana.” (Nhlavutelo 12:7-9; Genesa 3:15) U fana ni xikokovi lexikulu lexi kotaka ku pyanyetela ni ku mita nchumu lowu xi wu hlaseleke. (Yeremiya 51:34) Loko Sathana a ringeta ku hi phasa, a hi pyanyetela hi mintshikilelo ya misava leyi ni ku hi mita, a hi lweni hi matimba hi tintshunxa kutani hi kandziyela “nyoka [leyi] leyikulu.” (1 Petro 5:8) Masalela lama totiweke ma fanele ma endla leswi loko ma lava ku hlanganyela eku hetisekeni ka Varhoma 16:20.
Yehovha—Xihlovo Xa Hina Xa Ku Ponisiwa
19 Mupisalema u vula leswaku Xikwembu xi vula leswi landzelaka malunghana ni mugandzeri wa ntiyiso: “Hikuva u veke xinakulobye xakwe eka mina, ndzi ta tlhela ndzi n’wi ponisa. Ndzi ta n’wi sirhelela hikuva u tiva vito ra mina.” (Pisalema 91:14) Xiga lexi nge “ndzi ta n’wi sirhelela,” hi ku kongoma xi vula leswaku “ndzi ta n’wi tlakusela ehenhla,” hileswaku laha a nga ta ka a nga fikeleriwi hi munhu. Hi tumbela eka Yehovha tanihi vagandzeri va yena ngopfungopfu hileswi ‘hi veke ni xinakulobye na yena.’ (Marka 12:29, 30; 1 Yohane 4:19) Kutani Xikwembu ‘xa hi ponisa’ eka valala va hina. A hi nge pfuki hi lovisiwile emisaveni. Ku ri na sweswo, hi ta ponisiwa hikuva ha ri tiva vito ra Xikwembu naswona hi ri vitana hi ripfumelo. (Varhoma 10:11-13) Naswona hi tiyimisele ku ‘famba hi vito ra Yehovha hilaha ku nga riki na makumu.’—Mikiya 4:5; Esaya 43:10-12.
Endla Ndzavisiso
(Pisalema 89:34-37) A ndzi nge wu nyamisi ntwanano wa mina, Ni rito leri humaka enon’wini wa mina a ndzi nge ri hundzuli. 35 Loko se ndzi hlambanyile hi vukwetsimi bya mina, Davhida a ndzi nge n’wi byeli mavunwa. 36 Mbewu ya yena yi ta tshama hilaha ku nga riki na makumu, Ni xiluvelo xakwe xi ta fana ni dyambu emahlweni ka mina. 37 Xi ta simekiwa xi tiya hilaha ku nga riki na makumu, Ku fana ni mbhoni yo tshembeka exibakabakeni.” (Selah)
Mi Va Ni Ripfumelo Leri Tiyeke Eka Mfumo Wa Xikwembu
14 Anakanya hi leswi Yehovha a swi tshembiseke Hosi Davhida wa le Israyele wa khale hi ku tirhisa ntwanano wa Davhida. (Hlaya 2 Samuwele 7:12, 16.) Yehovha u endle ntwanano lowu na Davhida hi nkarhi lowu Davhida a a fuma eYerusalema, a n’wi tshembisa leswaku Mesiya a a ta va ntukulu wakwe. (Luka 1:30-33) Xisweswo, Yehovha u nyikele rungula leri kongomeke malunghana ni ndyangu lowu Mesiya a a ta huma eka wona a tlhela a vula leswaku mudyandzhaka wa Davhida a a ta va ni “mfanelo” yo va Hosi eMfun’weni wa Mesiya. (Ezek. 21:25-27) Hi ku tirhisa Yesu, vuhosi bya Davhida byi ‘ta simekiwa byi tiya hilaha ku nga riki na makumu.’ Entiyisweni, mbewu ya Davhida “yi ta tshama hilaha ku nga riki na makumu, ni xiluvelo xakwe xi ta fana ni dyambu.” (Ps. 89:34-37) Mfumo wa Mesiya a wu nge pfuki wu ve ni vukanganyisi naswona leswi wu nga ta swi endla swi ta tshama hilaha ku nga riki na makumu!
“Mbhoni yo Tshembeka eXibakabakeni”
Emalembeni lama tlulaka 3 000 lama hundzeke, Yehovha Xikwembu u endle ntwanano wa Mfumo na Hosi Davhida wa le Israyele wa khale. (2 Samuwele 7:12-16) Xikongomelo xa ntwanano wolowo a ku ri ku simeka xisekelo xa le nawini xa Yesu Kreste, tanihi mudyandzhaka wa Davhida leswaku a ta tshama exiluvelweni hilaha ku nga heriki. (Esaya 9:7; Luka 1:32, 33) Loko mupisalema a vulavula hi xiluvelo xa “mbewu” ya Davhida, u yimbelerile a ku: “Minkarhi hinkwayo u ta yima a tiyile a kota n’weti, yona mbhoni yo tshembeka ya le henhla etilweni.”—Pisalema 89:36, 37, Bibele—Mahungu Lamanene.
‘Rivoni leri fumaka vusiku,’ ku nga n’weti—i xitsundzuxo lexi faneleke xa leswaku ku fuma ka Kreste ku ta tshama hi masiku. (Genesa 1:16) Malunghana ni Mfumo wakwe, Daniyele 7:14 yi ri: “Ku fuma ka yena i ku fuma loku tshamaka hilaha ku nga heriki loku ku nga ta ka ku nga hundzi, mfumo wakwe a wu nge lovisiwi.” N’weti i mbhoni leyi hi tsundzuxaka hi Mfumo wolowo ni mikateko leyi wu nga ta yi tisela vanhu.
(Pisalema 90:10) Masiku ya malembe ya hina i malembe ya 70; Loko ku ri hikwalaho ka matimba yo hlawuleka i malembe ya 80, Kambe eka wona ku tshama ku ri ni ku karhateka ni swilo swo biha; Hikuva ma hundza hi ku hatlisa, kutani hi haha.
(Pisalema 90:12) Hi dyondzise ku hlaya masiku ya hina hi ndlela leyi Hi nga tisaka mbilu ya vutlhari ha yona.
Tinhlankulu Ta Buku Ya Vunharhu Ni Ya Vumune Ya Tipisalema
90:10, 12. Leswi vutomi byi komeke, hi fanele hi “hlaya masiku ya hina.” Njhani? Hi ku tisa “mbilu ya vutlhari” kumbe hi ku tirhisa vutlhari leswaku hi nga tlangi hi masiku ya hina lama seleke kambe hi ma tirhisa hi ndlela leyi nga ta tsakisa Yehovha. Leswi swi lava leswaku hi rhangisa swilo swa moya naswona hi tirhisa nkarhi wa hina hi vutlhari.—Vaefesa 5:15, 16; Vafilipiya 1:10.
Yehovha U Hi Dyondzisa Ku Hlayela Masiku Ya Hina
19 Marito ya mupisalema i xikhongelo xa leswaku Yehovha a dyondzisa vanhu va yena ndlela yo kombisa vutlhari eku tirhiseni ka masiku ya vona lama seleke hi ndlela leyi amukelekaka eka Xikwembu. Malembe ya 70 i masiku ya kwalomu ka 25 500. Kambe ku nga khathariseki leswaku hi ni malembe mangani, ‘a hi swi tivi leswaku vutomi bya hina byi ta va byi ri yini mundzuku, hikuva hi hunguva leyi humelelaka nkarhinyana kutani yi nyamalala.’ (Yakobo 4:13-15) Tanihi leswi ‘nkarhi ni xiendlakalo lexi nga languteriwangiki swi hi welaka hinkwerhu,’ a hi nge vuli leswaku hi ta hanya nkarhi wo tanihi kwihi. Hikwalaho a hi khongeleni hi kombela vutlhari byo langutana ni miringo, byo khoma van’wana kahle ni ku tlhela hi endla leswi nga ematimbeni ya hina entirhweni lowu hi wu endlelaka Yehovha sweswi—namuntlha! (Eklesiasta 9:11; Yakobo 1:5-8) Yehovha wa hi kongomisa hi Rito ra yena, moya wa yena ni nhlengeletano ya yena. (Matewu 24:45-47; 1 Vakorinto 2:10; 2 Timotiya 3:16, 17) Loko hi tirhisa vutlhari hi ta susumeteleka ku ‘lava Mfumo wa Xikwembu ku sungula’ ni ku tirhisa masiku ya hina hi ndlela leyi tisaka ku dzuneka eka Yehovha yi tlhela yi tsakisa mbilu ya yena. (Matewu 6:25-33; Swivuriso 27:11) Ina, ku n’wi gandzela hi mbilu hinkwayo a swi nge herisi swiphiqo swa hina hinkwaswo, kambe entiyisweni swi tisa ntsako lowukulu.
AUGUST 8-14
LESWI HI SWI DYONDZAKA EBIBELENI | TIPISALEMA 92-101
“Ku Kula Hi Tlhelo Ra Moya Hi Nkarhi Wa Vudyuhari”
(Pisalema 92:12) Lowo lulama u ta rhumbuka ku fana ni murhi wa ncindzu; U ta kula ku fana ni mukedari eLebanoni.
“Va Humelela Niloko Va Ri Timpunga”
VANHU vo tala va le matikweni lama nga le kusuhi ni Lwandle ra Mediteraniya va byala mirhi ya mincindzu leyi tswalaka mihandzu leyi vuriwaka ti-date, eswivaveni swa vona. Mirhi leyi yi dume hi vuxongi bya yona ni mihandzu ya yona yo nandziha. Ku tlula kwalaho, mirhi leyi yi hambeta yi tswala mihandzu niloko se yi ri ni malembe yo tlula dzana.
Hosi Solomoni wa le Israyele wa khale u hlamusele xiyimo xa nhwanyana wo saseka wa Muxulami hi ndlela yo phata, a ku xi fana ni murhi wa ncindzu. (Risimu Ra Solomoni 7:7) Buku leyi nge Plants of the Bible yi ri: “Rito ra Xiheveru ra murhi wa ncindzu lowu tswalaka mihandzu leyi vuriwaka ti-date i ‘tàmâr.’ . . . Ri ve xifaniso xa Vayuda xa vumbhurhi ni vuxongi naswona hakanyingi a ri thyiwa vanhwanyana.” Hi xikombiso, makwavo wa Solomoni hi tatana loyi a a sasekile u thyiwe vito ra Tamari. (2 Samuwele 13:1) Vatswari van’wana va ha thya vana va vona va vanhwanyana vito rero.
A hi vavasati vo saseka ntsena lava fanisiwaka ni murhi wo saseka wa ncindzu. Mupisalema u yimbelerile a ku: “Lowo lulama u ta rhumbuka ku fana ni murhi wa ncindzu; u ta kula ku fana ni mukedari eLebanoni. Lava va byariweke endlwini ya Yehovha, va ta rhumbuka eswivaveni swa Xikwembu xa hina. Va ta hambeta va humelela niloko va ri timpunga, va ta hambeta va nyuhela va va vantshwa.”—Pisalema 92:12-14.
Hi ndlela yo fanekisela, lava tirhelaka Xikwembu hi ku tshembeka loko se va dyuharile, va ni swilo swo tala leswi va endlaka va fana ni murhi wo saseka wa ncindzu. Bibele yi ri: “Misisi ya mpunga i harhi ya ku saseka loko yi kumeka endleleni ya ku lulama.” (Swivuriso 16:31) Hambileswi va nga ha heleriwaka hi matimba loko va ri karhi va dyuhala, vadyuhari va nga tlhela va kuma matimba hi tlhelo ra moya loko va tiwundla hi ku dyondza Rito ra Xikwembu, ku nga Bibele nkarhi na nkarhi. (Pisalema 1:1-3; Yeremiya 17:7, 8) Hikwalaho ka marito ya vona lama tsakisaka ni xikombiso xa vona lexinene, vadyuhari lava tshembekaka i xihlovo lexikulu xa xikhutazo eka van’wana naswona va hambeta va tswala mihandzu lembe ni lembe. (Tito 2:2-5; Vaheveru 13:15, 16) Ku fana ni murhi wa ncindzu lowu tswalaka mihandzu leyi vuriwaka ti-date, vadyuhari va nga humelela emalembeni ya vona ya vudyuhari.
Tinhlankulu Ta Buku Ya Vunharhu Ni Ya Vumune Ya Tipisalema
92:12—Xana lavo lulama va “rhumbuka ku fana ni murhi wa ncindzu” hi ndlela yihi? Murhi wa ncindzu wu tiveriwa ku veka mihandzu yo tala. Munhu wo lulama u fana ni murhi wa ncindzu hileswi a lulameke emahlweni ka Yehovha naswona a hambetaka a tswala “mbhandzu lowunene” lowu katsaka mintirho leyinene.—Matewu 7:17-20.
(Pisalema 92:13, 14) Lava va byariweke endlwini ya Yehovha, Va ta rhumbuka eswivaveni swa Xikwembu xa hina.14 Va ta hambeta va humelela niloko va ri timpunga, Va ta hambeta va nyuhela va va vantshwa,
Tirhela Yehovha Masiku Ya Khombo Ma Nga Si Ta
17 Namuntlha, hi fanele hi lava tindlela to pfuna Vakreste lava dyuhaleke kumbe lava vabyaka. Van’wana lava a va ta swi tsakela ku va kona eminhlanganweni ya vandlha ni le tinhlengeletanweni va tsandzeka ku ya. Etindhawini tin’wana, hi rirhandzu mavandlha ma hlela leswaku vadyuhari volavo va yingisela minhlangano hi riqingho. Sweswo swi nge koteki etindhawini tin’wana. Nilokoswiritano, Vakreste lava tsandzekaka ku ya eminhlanganweni va nga pfuneta eku seketeleni ka vugandzeri bya ntiyiso. Hi xikombiso, swikhongelo swa vona swi nga endla leswaku swilo swi famba kahle evandlheni ra Vukreste.—Hlaya Pisalema 92:13, 14.
(Pisalema 92:15) Va vula leswaku Yehovha u lulamile. I Ribye ra mina, eka yena a xi kona lexi nga lulamangiki.
Vadyuhari I Swirho Swa Nkoka Swa Vandlha Ra Hina Ra Vukreste
“Va Ta Hambeta Va Nyuhela Va Va Vantshwa”
9 Loko a kokela nyingiso eka mihandzu leyi tswariwaka hi malandza lama dyuhaleke ya Yehovha, mupisalema u yimbelerile: “Lowo lulama u ta rhumbuka ku fana ni murhi wa ncindzu; u ta kula ku fana ni mukedari eLebanoni. Va ta hambeta va humelela niloko va ri timpunga, va ta hambeta va nyuhela va va vantshwa.”—Pisalema 92:12, 14.
10 Xana u nga endla yini leswaku u tshama u tiyile emoyeni hambiloko u dyuharile? Lexi endlaka leswaku nsinya wa ncindzu wu tshama wu sasekile hileswi wu kumaka mati yo tenga minkarhi hinkwayo. Hilaha ku fanaka, u nga kuma matimba ematini lawa ma nga ntiyiso wa le Bibeleni, hi ku dyondza Rito ra Xikwembu na hi ku hlanganyela ni nhlengeletano ya xona. (Pisalema 1:1-3; Yeremiya 17:7, 8) Ku tiya ka wena hi tlhelo ra moya ku ku endla u va wa risima eka vapfumerikulobye. Xiya ndlela leyi leswi swi tiyisekisiweke ha yona emhakeni ya Yoyada, Muprista la Tlakukeke loyi a a dyuharile.
Vadyuhari I Swirho Swa Nkoka Swa Vandlha Ra Hina Ra Vukreste
13 Kumbexana rihanyo leri tsaneke kumbe swiyimo swin’wana swa ku sivela ku kondletela vugandzeri bya ntiyiso. Nilokoswiritano, u nga swi kota ku ‘endla leswinene eka Xikwembu xa ntiyiso ni le ka yindlu ya xona.’ U nga kombisa leswaku u hisekela yindlu ya Yehovha ya moya hi ku va kona eminhlanganweni ya vandlha u tlhela u nyikela tinhlamulo, na hi ku ya ensin’wini loko u swi kota. Ku tiyimisela ka wena ku amukela ndzayo ya Bibele ni ku ri seketela hi ku tshembeka “hlonga ro tshembeka ni ro tlhariha” ni vandlha, swi ta tiyisa Vakrestekuloni. (Matewu 24:45-47) U nga tlhela u khutaza vapfumerikuloni “erirhandzwini ni le mintirhweni leyinene.” (Vaheveru 10:24, 25; Filemoni 8, 9) Naswona u ta pfuna van’wana loko u endla swilo hi ku pfumelelana ni ndzayo ya muapostola Pawulo leyi nge: “Vavanuna lava kuleke a va ringanisele emikhuveni, va tiyimisela, va va lava hlutekeke emianakanyweni, va va lava hanyeke [“tiyeke,” An American Translation] eripfumelweni, erirhandzwini ni le ku tiyiseleni. Hilaha ku fanaka vavasati lava kuleke a va ve ni mahanyelo ya xichavo, va nga vi lava lumbetaka, hambi ku ri ku va mahlonga ya vhinyo yo tala, va va vadyondzisi va leswi nga swinene.”—Tito 2:2-4.
14 Xana se u ni malembe yo tala u ri nkulu evandlheni? Makwerhu un’wana loyi se a nga ni nkarhi wo leha a ri nkulu wa vandlha u nyika xitsundzuxo lexi: “Avela van’wana vutivi lebyi u byi hlengeleteke eka malembe lama hundzeke, u nga va tsoni. Nyika van’wana vutihlamuleri naswona dyondzisa lava va tiyimiseleke ku dyondza mintirho . . . Ringeta ku vona vuswikoti lebyi vanhu van’wana va nga na byona. Va pfune leswaku va byi hlakulela. Va pfune leswaku va lunghekela nkarhi lowu taka.” (Deteronoma 3:27, 28) Loko u wu rhandza hi mbilu hinkwayo ntirho lowu wo chumayela hi Mfumo, van’wana lava nga le vandlheni ra Vukreste va ta kuma mikateko yo tala hikwalaho ka wena.
“Vula Leswaku Yehovha U Lulamile”
15 Malandza ya Xikwembu lama dyuhaleke ma byi hetisisa ma tsakile vutihlamuleri bya wona byo “vula leswaku Yehovha u lulamile.” Loko u ri Mukreste la dyuhaleke, marito ni swiendlo swa wena swi nga va kombisa van’wana leswaku ‘Yehovha i Ribye ra wena, loyi eka yena xi nga riki kona lexi nga lulamangiki.’ (Pisalema 92:15) Hambileswi murhi wa ncindzu wu nga vulavuriki, vukona bya wona byi kombisa leswaku Muvumbi wa wona u tlharihe swinene. Kambe Yehovha u ri nyike wena lunghelo ra ku nyikela vumbhoni ha yena eka lava va amukelaka vugandzeri bya ntiyiso sweswi. (Deteronoma 32:7; Pisalema 71:17, 18; Yuwele 1:2, 3) Ha yini leswi swi ri swa nkoka?
16 Loko Yoxuwa, murhangeri wa Vaisrayele, a “dyuhele naswona a ri wa masiku,” u “vitane tiko hinkwaro ra Israyele, vakulukumba va rona ni varhangeri va rona ni vaavanyisi va rona ni tindhuna ta rona,” a va tsundzuxa hi ndlela leyinene leyi Xikwembu xi tirhisaneke na vona ha yona. U te: “A ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina.” (Yoxuwa 23:1, 2, 14) Marito lawa ma tiyise vanhu leswaku va tiyimisela ku tshama va tshembekile ku ringana nkarhi wo karhi. Kambe, endzhaku ka ku fa ka Yoxuwa “ku [pfuke] xitukulwana xin’wana . . . lexi a xi nga n’wi tivi Yehovha hambi wu ri ntirho lowu a wu endleleke Israyele. Vana va Israyele va endla swo biha ematihlweni ya Yehovha ni ku tirhela Vabali.”—Vaavanyisi 2:8-11.
17 Ku tshembeka ka vandlha ra Vukreste ra namuntlha a ku titsheganga hi leswi vuriweke hi malandza lama dyuhaleke ya Xikwembu. Kambe ripfumelo ra hina eka Yehovha ni le ka switshembiso swakwe ra tiyisiwa loko hi titwela hi ta hina swiviko swa ‘ntirho lowukulu’ lowu a wu endleleke vanhu vakwe emasikwini lawa ya makumu. (Vaavanyisi 2:7; 2 Petro 1:16-19) Loko se u ri ni malembe yo tala u ri karhi u hlanganyela ni nhlengeletano ya Yehovha, swi nga ha endleka wa ha wu tsundzuka nkarhi lowu a ko va ni vahuweleri va Mfumo va nga ri vangani endhawini ya ka n’wina kumbe etikweni ra ka n’wina kumbe loko ntirho wo chumayela wa ha kanetiwa swinene. Hi ku famba ka nkarhi u swi vonile loko Yehovha a susa swihinga swin’wana kutani a “hatlisisa” ku andza ka vahuweleri va Mfumo. (Esaya 54:17; 60:22) U xiye nhlamuselo leyi antswisiweke ya ntiyiso wa le Bibeleni naswona u vone ku antswisiwa loku yaka emahlweni ka xiphemu lexi vonakaka xa nhlengeletano ya Xikwembu. (Swivuriso 4:18; Esaya 60:17) Xana wa tinyika nkarhi wo khutaza van’wana hi ku va hlamusela ntokoto wa wena malunghana ni ndlela leyinene leyi Yehovha a tirhisaneke ni vanhu vakwe ha yona? Leswi swi nga va ni vuyelo lebyinene ni lebyi tiyisaka evandlheni ra Vukreste!
18 Ku vuriwa yini hi minkarhi leyi u voneke nkhathalelo wa Yehovha wa rirhandzu ni nkongomiso wakwe evuton’wini bya wena? (Pisalema 37:25; Matewu 6:33; 1 Petro 5:7) Makwerhu wa xisati la dyuhaleke la vuriwaka Martha a a tolovele ku khutaza van’wana a ku: “Hambi ko endleka yini, u nga tshuki u fularhela Yehovha. U ta ku tiyisa.” Xitsundzuxo lexi xi ve ni vuyelo lebyikulu eka Tolmina, xin’wana xa swichudeni swa Bibele swa Martha, lexi khuvuriweke eku sunguleni ka va-1960. Tolmina u ri: “Loko ndzi feriwa hi nuna ndzi hele matimba, kambe marito wolawo ma endle ndzi tiyimisela ku ka ndzi nga hundziwi ni hi nhlangano wun’we. Naswona Yehovha u ndzi tiyisile hakunene leswaku ndzi ya emahlweni.” Tolmina u nyike swichudeni swa yena swo tala swa Bibele xitsundzuxo lexi fanaka eka malembe lama landzeleke. Hakunene, loko u khutaza van’wana u tlhela u vulavula hi ndlela leyinene leyi Yehovha a tirhisanaka ha yona ni vanhu vakwe, u nga pfuna swinene eku tiyiseni ka ripfumelo ra vapfumerikuloni.
Endla Ndzavisiso
(Pisalema 99:6, 7) Muxe na Aroni a va ri exikarhi ka vaprista vakwe, Samuwele a ri exikarhi ka lava va vitanaka vito rakwe. A va vitana Yehovha, naswona yena a a tshamela ku va hlamula. 7 A a vulavula na vona a ri epapeni lerikulu. A va hlayisa switsundzuxo ni swileriso leswi a a va nyika swona.
Tikarhatele Ku Sasekisa Paradeyisi Ya Moya
5 Loko hi dzunisa Yehovha, hi tekelela xikombiso xa malandza ya Xikwembu yo tshembeka lawa ku vulavuriweke ha wona eka Pisalema 99:1-3, 5. (Yi hlaye.) Vavanuna vo tshembeka vo tanihi Muxe, Aroni na Samuwele va ri seketele hi ku helela lunghiselelo ra Xikwembu ra vugandzeri bya ntiyiso enkarhini lowu hundzeke. ( Ps. 99:6, 7) Namuntlha, loko vatotiwa lava ha riki laha misaveni va nga si va vaprista na Yesu etilweni, va tirhela Yehovha hi ku tshembeka exiphen’wini xa laha misaveni xa tempele ya moya. “Tinyimpfu tin’wana” ta timiliyoni ti va seketela hi ku tshembeka. (Yohane 10:16) Mintlawa leyi hayimbirhi yi gandzela Yehovha hi vun’we. Hambiswiritano, un’wana ni un’wana wa hina u fanele a tivutisa xivutiso lexi nge, ‘Xana ndzi ri seketela hi ku helela lunghiselelo ra Yehovha ra vugandzeri bya ntiyiso?’
(Pisalema 101:2) Ndzi ta endla hi vutlhari hi ndlela leyi pfumalaka xihoxo. Xana u ta ta rini eka mina? Ndzi ta famba-famba hi ku tshembeka ka mbilu ya mina endzeni ka yindlu ya mina.
Xana U Ta Famba Ni Xikwembu?
Famba Onge Hi Loko U “Vona Loyi A Nga Vonakiki”
14 Loko hi lava ku famba na Yehovha, u fanele a va wa xiviri eka hina. Tsundzuka, Yehovha u tiyisekise vanhu vo tshembeka eIsrayele wa khale leswaku a nga tumbelanga eka vona. Ni namuntlha u tihlavutela eka vanhu va yena tanihi Muleteri Lonkulu. Xana Yehovha i wa xiviri hi ndlela yoleyo eka wena, onge hiloko a yime emahlweni ka wena a ku dyondzisa? Rero i ripfumelo leri hi faneleke hi va na rona loko hi lava ku famba ni Xikwembu. Muxe a a ri ni ripfumelo ro tano, “hikuva a a hambeta a tserhama onge hiloko a vona Loyi a nga vonakiki.” (Vaheveru 11:27) Loko Yehovha a ri wa xiviri eka hina, kutani hi ta yi tekela enhlokweni mintlhaveko yakwe loko hi endla swiboho. Hi xikombiso, a hi nge tshuki hi anakanya hi ku endla swilo swo biha kutani hi ringeta ku tumbeta swidyoho swa hina leswaku swi nga tiviwi hi vakulu va le vandlheni ra Vukreste kumbe hi swirho swa ndyangu. Ematshan’weni ya sweswo, hi endla matshalatshala yo famba ni Xikwembu hambiloko vanhukulorhi va nga hi voni. Hi tiyimisele ku tekelela xikombiso xa Hosi Davhida wa khale loyi a nga te: “Ndzi ta famba-famba hi ku tshembeka ka mbilu ya mina endzeni ka yindlu ya mina.”—Pisalema 101:2.
AUGUST 15-21
LESWI HI SWI DYONDZAKA EBIBELENI | TIPISALEMA 102-105
“Yehovha Wa Tsundzuka Leswaku Hi Ntshuri”
(Pisalema 103:8-12) Yehovha u ni tintswalo ni nsovo, U hlwela ku hlundzuka naswona u ni musa wa rirhandzu wo tala. 9 A nge tshameli ku kuma xihoxo nkarhi hinkwawo, Hambi ku ri ku tshama a karihile. 10 A nga hi khomanga hi ku ya hi swidyoho swa hina; Naswona a nga hi tiselanga leswi swi hi faneleke hi ku ya hi swihoxo swa hina. 11 Hikuva tanihi leswi matilo ma tlakukeke ku tlula misava, Musa wakwe wa rirhandzu wu tlakukile ehenhla ka lava va n’wi chavaka. 12 Kukota leswi vuhuma-dyambu byi nga ekule ni vupela-dyambu, Hi ndlela leyi fanaka, ku tlula ka hina milawu u ku veke ekule na hina.
Tlangela Ku Tshembeka Ni Ku Rivalela Ka Yehovha
14 Hi nga chaveleleka loko hi anakanyisisa hi ku rivalela ka Yehovha. Anakanya hi xikombiso lexi. Emalembeni yo tala lama hundzeke, makwerhu un’wana wa xisati loyi hi nga ta n’wi vitana Elaine u susiwile evandlheni. Endzhaku ka malembe yo hlayanyana, u vuyiseriwile evandlheni. Elaine u ri: “Hambileswi a ndzi tibyerile ndzi tlhela ndzi byela van’wana leswaku a ndzi swi tshemba leswaku Yehovha u ndzi rivalerile, minkarhi hinkwayo a ndzi titwa onge u le kule na mina kumbe leswaku van’wana hi vona a va ri ekusuhi na yena nileswaku a a ri wa xiviri swinene eka vona.” Hambiswiritano, Elaine u chavelelekile loko a hlaya a tlhela a anakanyisisa hi ndlela leyi Bibele yi yi hlamuselaka ha yona ndlela leyi Yehovha a rivalelaka ha yona. Elaine u tlhele a ku: “Ndzi swi xiyile leswaku Yehovha wa ndzi rhandza naswona wa ndzi khathalela hi ndlela leyi a ndzi nga si tshama ndzi yi xiya.” U khumbiwe swinene hi mhaka leyi: “Loko Yehovha a hi rivalela swidyoho swa hina, a hi fanelanga hi tivona nandzu hikwalaho ka swona vutomi bya hina hinkwabyo.” Elaine u ri: “Ndzi swi xiyile leswaku a ndzi nga tshembi leswaku Yehovha a nga ndzi rivalela hi ku helela, naswona a ndzi anakanya leswaku ndzi ta tivona nandzu vutomi bya mina hinkwabyo. Ndza swi tiva leswaku swi ta teka nkarhi, kambe ndzi sungula ku swi twa leswaku ndzi nga tshinela eka Yehovha, naswona ndzi titwa onge ndzi lo rhuliwa ndzhwalo.” Hakunene hi tirhela Xikwembu lexi nga ni rirhandzu naswona xi rivalelaka!—Ps. 103:9.
Tirhela Xikwembu Lexi Nyikaka Ntshunxeko
17 I ntiyiso leswaku hi endla swihoxo minkarhi yin’wana. (Ekl. 7:20) Loko u endla xihoxo, u nga heli matimba kumbe u titeka u nga pfuni nchumu. Loko wo tshuka u khuguleka hi ndlela yo fanekisela, pfuka u yima kutani u kongoma emahlweni, hambiloko sweswo swi lava leswaku u ya kombela mpfuno eka vakulu. Yakobo u tsale a ku: “Xikhongelo [xa vona] xa ripfumelo xi ta hanyisa la nga pfukiki swinene, naswona Yehovha u ta n’wi pfuxa. Nakambe, loko a lo endla swidyoho, u ta rivaleriwa swona.” (Yak. 5:15) U nga tshuki u rivala leswaku Xikwembu xi ni tintswalo letikulu nileswaku xi ku kokele evandlheni ra xona hileswi xi voneke swilo leswinene eka wena. (Hlaya Pisalema 103:8, 9.) Kutani loko u hambeta u tirhela Yehovha hi mbilu leyi heleleke, a nge pfuki a ku fularherile.—1 Tikr. 28:9.
(Pisalema 103:13, 14) Kukota loko tatana a kombisa tintswalo eka vana vakwe, Yehovha u kombise tintswalo eka lava va n’wi chavaka. 14 Hikuva yena u ku tiva kahle ku vumbeka ka hina, Wa tsundzuka leswaku hi ntshuri.
Tshemba Yehovha Minkarhi Hinkwayo!
8 Nakambe, tsundzuka leswaku Yehovha wa swi tiva leswi munhu ha un’we a nga kotaka ku swi tiyisela ni leswi a nga tsandzekaka ku swi tiyisela. (Ps. 103:14) Hikwalaho u hi nyika matimba lawa hi ma lavaka. I ntiyiso leswaku minkarhi yin’wana hi nga ha vona onge a ha ha ri na matimba ya ku tiyisela. Kambe Yehovha wa hi tshembisa leswaku loko hi tsandzeka ku tiyisela ndzingo, u ta hi “nyika ndlela yo huma.” (Hlaya 1 Vakorinto 10:13.) Swa chavelela ku tiva leswaku hi nga swi tshemba leswaku Yehovha wa swi tiva leswaku hi nga kota ku tiyisela ku fika kwihi.
Tlangela Ku Hanana Ni Ku Anakanyela Ka Yehovha
16 Tianakanye u ri Muisrayele naswona u ri xisiwana. Loko u fika etabernakeleni ni mapa ya wena lamatsongo leswaku u ta endla gandzelo, u vona Vaisrayele lava nga ni mali yo tala va ta nyikela hi swifuwo. U nga ha khomiwa hi tingana hikwalaho ka gandzelo ra wena ra mapa leri vonakaka ri nga ri ra nkoka. Ivi u tsundzuka leswaku emahlweni ka Yehovha, gandzelo ra wena i ra nkoka. Ha yini? Yehovha a a lava leswaku mapa ya kona ma va ya xiyimo xa le henhla. Entiyisweni, a swi fana ni loko Yehovha a byela Vaisrayele lava nga swisiwana a ku: ‘Ndza swi xiya leswaku a mi nge swi koti ku nyikela hileswi van’wana va nyikelaka ha swona, kambe ndza swi tiva leswaku leswi mi ndzi nyikaka swona hi leswinene ngopfu swa n’wina.’ Hakunene, Yehovha u kombisa ku anakanyela hileswi a nga languteliki leswaku malandza ya yena ma nyikela hileswi ma nga taka ma nga koti ku nyikela ha swona.—Ps. 103:14.
(Pisalema 103:19) Yehovha u simeke xiluvelo xakwe xi tiya ematilweni; Naswona vuhosi byakwe byi fuma swilo hinkwaswo.
(Pisalema 103:22) Dzunisani Yehovha, n’wina mintirho yakwe hinkwayo, Etindhawini takwe hinkwato leti a ti fumaka. Dzunisa Yehovha, Wena moya-xiviri wa mina.
Yehovha I Hosi Ya Hina Leyi Lawulaka!
Tanihi Muvumbi, Yehovha Xikwembu i Hosi leyi Lawulaka ya misava ni ya vuako hinkwabyo. (Hlaya Nhlavutelo 4:11.) Nakambe Yehovha i Muavanyisi wa hina, Munyiki wa nawu wa hina ni Hosi ya hina. (Esa. 33:22) Tanihi leswi vutomi bya hina hi byi kolotaka Xikwembu naswona hi titshegeke hi xona, hi fanele hi xi teka tanihi Hosi ya hina leyi Lawulaka. Hi ta susumeteleka ku seketela xikhundlha xa xona lexi tlakukeke loko minkarhi hinkwayo hi tsundzuka leswaku “Yehovha u simeke xiluvelo xakwe xi tiya ematilweni; naswona vuhosi byakwe byi fuma swilo hinkwaswo.”—Ps. 103:19; Mint. 4:24.
Vuhosi Bya Yehovha Ni Mfumo Wa Yena
“YEHOVHA u simeke xiluvelo xakwe xi tiya ematilweni; naswona vuhosi byakwe byi fuma swilo hinkwaswo.” (Pisalema 103:19) Hi marito wolawo, mupisalema u hlamusele mhaka ya nkoka malunghana ni vuhosi. Yehovha Xikwembu, loyi a nga Muvumbi, u ni mfanelo ya ku va Mufumi la Tlakukeke wa vuako hinkwabyo.
Endla Ndzavisiso
(Pisalema 102:12) Oho Yehovha, loko ku ri wena, u ta tshama hilaha ku nga riki na makumu, Naswona u ta tsundzukiwa eka xitukulwana xin’wana ku ya eka xitukulwana xin’wana.
(Pisalema 102:27) Kambe wena u tshama u ri tano, naswona malembe ya wena a ma nge heli.
Ndlela Yo Tshama Hi Ri Ni Langutelo Lerinene
“XIKHONGELO XA LA XANISEKAKA”
19 Mutsari wa Pisalema 102 a a heleriwe hi ntshembo. A a ‘xaniseka,’ a a ri ni ntshikilelo lowukulu emirini kumbe emintlhavekweni naswona a a nga ri na wona matimba yo langutana ni swiphiqo swakwe. (Ps. 102, xingheniso) Marito yakwe ma kombisa leswaku a ku nga ri na nchumu wun’wana lowu a a anakanya ha wona handle ka xitlhavi xa yena, xivundza ni ndlela leyi a titwa ha yona. (Ps. 102:3, 4, 6, 11) A a anakanya leswaku Yehovha a a lava ku n’wi cukumeta.—Ps. 102:10.
20 Nilokoswiritano, mupisalema u tirhise vutomi byakwe leswaku a dzunisa Yehovha. (Hlaya Pisalema 102:19-21.) Hilaha hi swi vonaka hakona eka Pisalema 102, ni vanhu lava nga ni ripfumelo va nga va ni xitlhavi naswona swi nga ha va tikela ku anakanya hi swilo swin’wana. Mupisalema a a titwa ku “fana ni nyenyana leyi nga yoxe ehenhla ka lwangu,” onge hiloko a rhendzeriwe hi swiphiqo ntsena. (Ps. 102:7) Loko u tshuka u titwa hi ndlela yoleyo, chululela mbilu ya wena eka Yehovha hilaha mupisalema a endleke hakona. Swikhongelo swa la xanisekaka—swikhongelo swa wena—swi nga ku pfuna loko u ri karhi u lwisana ni mianakanyo yo biha. Yehovha u tshembisa leswaku “u ta hundzulukela exikhongelweni xa lava va tekeriweke hinkwaswo, naswona a nge xi languteli ehansi xikhongelo xa vona.” (Ps. 102:17) Xi tshembe xitshembiso xexo.
21 Pisalema 102 yi tlhela yi kombisa ndlela leyi u nga vaka ni langutelo lerinene ha yona. Mupisalema u hlawule ku anakanya hi vuxaka byakwe na Yehovha. (Ps. 102:12, 27) U chaveleriwe hi ku tiva leswaku Yehovha minkarhi hinkwayo u pfuna vanhu Vakwe leswaku va kota ku tiyisela miringo. Hikwalaho loko langutelo leri hoxeke ri ku sivela ku endla leswi u lavaka ku swi endla entirhweni wa Xikwembu swa xinkarhana, khongela hi mhaka yoleyo. Kombela Xikwembu leswaku xi yingisa xikhongelo xa wena ku nga ri ntsena leswaku xiphiqo xa wena xi hela kambe ni “leswaku vito ra Yehovha ri ta vuriwa.”—Ps. 102:20, 21.
(Pisalema 103:13) Kukota loko tatana a kombisa tintswalo eka vana vakwe, Yehovha u kombise tintswalo eka lava va n’wi chavaka.
Tshemba Yehovha Minkarhi Hinkwayo!
7 Ha yini Yehovha minkarhi yin’wana a nga swi hlamuli hi nkarhi wolowo swikhongelo swa hina? Bibele yi vula leswaku Yehovha i Tata wa hina naswona hina hi vana vakwe. (Ps. 103:13) Tatana a nga nyiki n’wana wa yena nchumu wun’wana ni wun’wana lowu a wu kombelaka kumbe a n’wi nyika wona hi nkarhi lowu a wu kombelaka ha wona. Tatana wa swi tiva leswaku n’wana a nga ha lava nchumu wo karhi ivi a cinca a nga ha wu lavi. Nakambe tatana wa swi tiva leswi nga vuyerisaka n’wana wa yena, naswona wa yi tiva ndlela leyi swi nga va khumbaka ha yona van’wana. Wa swi tiva leswi n’wana wa yena a swi lavaka ni nkarhi lowu a faneleke a swi kuma ha wona. Loko tatana a a nyika n’wana wa yena swilo hinkwaswo leswi a swi kombelaka hi nkarhi lowu a swi kombelaka ha wona, tatana yoloye a a ta va hlonga ra n’wana wa yena. Yehovha, Tata wa hina wa le tilweni wa hi rhandza. Leswi a nga Muvumbi wa hina la tlhariheke, wa swi tiva leswi hi swi pfumalaka naswona hi yena a endlaka xiboho xa leswaku hi wihi nkarhi lowunene wo hi nyika leswi hi swi kombelaka. I swinene leswaku hi rindza kutani hi vona ndlela leyi Yehovha a swi hlamulaka ha yona swikhongelo swa hina.—Ringanisa na Esaya 29:16; 45:9
AUGUST 22-28
LESWI HI SWI DYONDZAKA EBIBELENI | TIPISALEMA 106-109
“Nkhensani Yehovha”
(Pisalema 106:1-3) Dzunisani Yah! Nkhensani Yehovha, hikuva hi lonene; Hikuva musa wakwe wa rirhandzu i wa hilaha ku nga riki na makumu. 2 I mani la nga vulaka swiendlo swa matimba swa Yehovha, Kumbe la nga endlaka leswaku ku dzunisiwa kakwe hinkwako ku twiwa? 3 Va tsaka lava hlayisaka vululami, Lava endlaka swo lulama nkarhi hinkwawo.
Nkhensani Yehovha Kutani Mi Katekisiwa
YEHOVHA, Munyiki wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke,” u faneriwa hi ku va hi n’wi nkhensa. (Yak. 1:17) Tanihi Murisi wa hina la nga ni rirhandzu, u swi khathalela hi ndlela leyinene swilaveko swa hina hinkwaswo swa nyama ni swa moya. (Ps. 23:1-3) U tikombise a ri “vutumbelo ni ntamu wa hina”—ngopfu-ngopfu hi minkarhi ya maxangu! (Ps. 46:1) Hakunene hi ni swivangelo swo tala swo pfumelelana ni mupisalema hi mbilu hinkwayo loyi a tsaleke a ku: “Nkhensani Yehovha, hikuva hi lonene; hikuva musa wakwe wa rirhandzu i wa hilaha ku nga riki na makumu.”—Ps. 106:1.
Tsakela Ku Lulama Ka Yehovha
19 Emasikwini lawa yo homboloka ni lama nga ni makhombo, ku tsakela ku lulama ka Yehovha i xihlovo xa nsirhelelo ni ku hlayiseka. Eka xivutiso lexi nge: “Oho Yehovha, i mani la nga ta va muendzi entsongeni wa wena? I mani la nga ta tshama entshaveni ya wena yo kwetsima?” Hosi Davhida u hlamule a ku: “Hi loyi a fambaka a nga ri na xihoxo naswona a hanyaka hi ku lulama.” (Pisalema 15:1, 2) Loko hi lava ku lulama ka Xikwembu hi tlhela hi ku tsakela, hi ta hlayisa vuxaka lebyinene na xona kutani xi ta ya emahlweni xi hi tsakela xi tlhela xi hi katekisa. Xisweswo, hi ta eneriseka evuton’wini, hi tixixima hi tlhela hi va ni ku rhula ka mianakanyo. Rito ra Xikwembu ri ri: “Loyi a lavaka ku lulama ni musa wa rirhandzu u ta kuma vutomi, ku lulama ni ku vangama.” (Swivuriso 21:21) Ku tlula kwalaho, loko hi ringeta hi matimba ku endla leswi lulameke etimhakeni ta hina hinkwato, hi ta va ni vuxaka lebyinene ni van’wana naswona hi ta tsakela vutomi hi tlhela hi tshama hi hanyile emoyeni. Mupisalema u te: “Va tsaka lava hlayisaka vululami, lava endlaka swo lulama nkarhi hinkwawo.”—Pisalema 106:3.
(Pisalema 106:7-14) Loko ku ri vatatana aEgipta, A va yi twisisanga mintirho ya wena yo hlamarisa. A va ku tsundzukanga ku tala ka musa wa wena wa rirhandzu, Kambe va tikhome hi ndlela ya vuxandzuki elwandle, eLwandle ro Tshwuka. 8 Kutani a va ponisa hikwalaho ka vito rakwe, Leswaku matimba yakwe ma tiviwa. 9 Hiloko a tshinya Lwandle ro Tshwuka, kutani ri oma hakatsongo-tsongo; Kutani a va tsemakanyisa hi le xidziveni xa mati ku fana ni le mananga; 10 Hiloko a va ponisa hi ndlela yoleyo evokweni ra loyi a va vengaka A va kutsula evokweni ra nala. 11 Kutani mati ma fika ma funengeta swirha swa vona; A ku salanga ni xin’we xa swona. 12 Xisweswo va va ni ripfumelo eritweni rakwe; Va sungula ku yimbelela swidzuniso swakwe. 13 Va rivala mintirho yakwe hi ku hatlisa; A va xi rindzanga xitsundzuxo xakwe. 14 Kambe va kombise ku navela ka vona ka vutianakanyi emananga Kutani va ringa Xikwembu ekwandzasini.
(Pisalema 106:19-25) Ku tlula kwalaho, va endla rhole eHorebe Kutani va nkhinsamela xifaniso lexi endliweke hi ku n’okisiwa, 20 Lerova va cinca ku vangama ka mina Ku yimeriwa hi nkunzi, leyi dyaka leswi milaka. 21 Va rivala Xikwembu Muponisi wa vona, Muendli wa swilo leswikulu aEgipta, Mintirho leyi hlamarisaka etikweni ra Hamu, Swilo leswi chavisekaka eLwandle ro Tshwuka. 23 A a ri ekusuhi ni ku vula leswaku va lovisiwa, Loko a ku nga ri Muxe muhlawuriwa wakwe, La yimeke evangweni emahlweni ka yena, Leswaku a tlherisa vukarhi byakwe byi nga va lovisi. 24 Va nyenye tiko leri navelekaka; A va nga ri na ripfumelo eritweni rakwe. 25 Kutani va hambeta va dzumadzuma emintsongeni ya vona; A va ri yingisanga rito ra Yehovha.
(Pisalema 106:35-39) Kutani va tipfanganisa ni matiko Va dyondza mintirho ya vona. 36 Va hambeta va tirhela swifaniso swa vona swa hava, Kutani swi va ntlhamu eka vona. 37 Kutani a va endla xitlhavelo hi vana va vona va majaha Ni vana va vona va vanhwanyana eka madimona. 38 Xisweswo va ya emahlweni va halata ngati leyi nga riki na nandzu, Ngati ya vana va vona va majaha ni va vanhwanyana, Lava va va endleke xitlhavelo xa swifaniso swa hava swa Kanana; Kutani tiko ri nyamisiwa hi ku halatiwa ka ngati. 39 Va hundzuka lava nga basangiki hi mintirho ya vona Va hambeta va va ni rimbewu leri nga amukelekiki hi swiendlo swa vona.
Nkhensani Yehovha Kutani Mi Katekisiwa
2 Ha yini swi ri swa nkoka leswaku hi kambisisa mhaka leyi ya ku nkhensa? Hilaha swi profetiweke hakona, emasikwini lawa ya makumu vanhu a va ha nkhensi. (2 Tim. 3:2) Vo tala a va na mhaka ni swilo leswinene leswi Yehovha a va endleleke swona. Hikwalaho ko kuceteriwa hi vaxavisi ni swinavetiso swa vona, vanhu va timiliyoni va tikarhatela ku kuma swilo swo tala ematshan’weni yo eneriseka hi leswi va nga na swona. Na hina wu nga hi tlulela moya lowu wa ku nga nkhensi. Ku fana ni Vaisrayele va khale, hi nga sungula ku nga ha nkhensi kutani hi nga ha byi teki byi ri bya nkoka vuxaka bya hina na Yehovha lebyi nga bya risima swin’we ni mikateko leyi a hi nyikeke yona.—Ps. 106:7, 11-13.
3 Kutani, anakanya hi leswi nga humelelaka loko hi langutane ni miringo yo tika. Eminkarhini yo tano, hi nga hela matimba hi ku olova lerova hi dzikisa mianakanyo ya hina eka miringo yoleyo ematshan’weni yo yi dzikisa eka mikateko leyi hi nga na yona. (Ps. 116:3) Hikokwalaho, hi nga swi hlakulela njhani ku va ni mbilu leyi tlangelaka hi tlhela hi tshama hi ri na yona? Naswona i yini leswi nga hi pfunaka leswaku hi tshama hi ri ni langutelo lerinene hambiloko hi langutane ni miringo leyikulu? A hi voneni.
Mi Nga Vi Vatwi Lava Rivalaka
XIGA lexi nge “a ma rivaleki,” xi ma fanela kahle masingita lawa Yehovha a ma endleke le Egipta wa khale. Rin’wana ni rin’wana ra Makhombo ya Khume, a ri chavisa swinene. Endzhaku ka makhombo lawa vanhu va Israyele va ponisiwe hi ndlela leyi hlamarisaka, va tsemakanya exikarhi ka mati lama aviweke hi le xikarhi ya Lwandle ro Tshwuka. (Deteronoma 34:10-12) Loko a wu swi vone hi ya wena swiendlakalo leswi, handle ko kanakana a wu nga ta n’wi rivala Muendli wa swona. Hambiswiritano, mupisalema u yimbelele a ku: “[Vaisrayele] va rivala Xikwembu Muponisi wa vona, Muendli wa swilo leswikulu aEgipta, mintirho leyi hlamarisaka etikweni ra Hamu, swilo leswi chavisekaka eLwandle ro Tshwuka.”—Pisalema 106:21, 22.
2 Endzhaku ko tsemakanya Lwandle ro Tshwuka, Vaisrayele “va sungula ku chava Yehovha ni ku kombisa ripfumelo eka Yehovha.” (Eksoda 14:31) Vavanuna va Israyele va yimbelele risimu ra ku hlula eka Yehovha swin’we na Muxe, kutani Meriyamu ni vavasati van’wana na vona va nghenelerile va chaya swingomana va tlhela va cina. (Eksoda 15:1, 20) Ina, vanhu va Xikwembu va tsakisiwe swinene hi mintirho ya Yehovha ya matimba. Kambe ku tlangela ka vona Loyi a nga endla mintirho leyi, a ku tlhaveriwanga hi dyambu. Hi ku hatlisa vo tala va vona va sungule ku tikhoma ku fana ni munhu la suriweke byongo a rivala hinkwaswo leswi a tshameke a swi vona. Va sungule ku gungula ni ku vilela eka Yehovha. Van’wana va sungule ku gandzela swifaniso swa hava ni ku tikhoma hi ndlela yo biha hi tlhelo ra rimbewu.—Tinhlayo 14:27; 25:1-9.
I Yini Lexi Nga Hi Endlaka Hi Rivala?
3 Swa hlamarisa hakunene ku vona ndlela leyi Vaisrayele a va nga tlangeli ha yona. Na hina hi nga humeleriwa hi nchumu lowu fanaka. Ina, hi nga ha va hi nga ma vonanga mahlori lawa ya Xikwembu. Kambe, eka vuxaka bya hina ni Xikwembu, handle ko kanakana ku ni minkarhi leyi nga rivalekiki. Van’wana va hina hi nga ha tsundzuka nkarhi lowu hi amukeleke ntiyiso wa Bibele ha wona. Minkarhi yin’wana leyi tsakisaka yi nga ha katsa xikhongelo lexi hi xi endleke loko hi tinyiketela eka Yehovha ni ku khuvuriwa ka hina ematini hi va Vakreste va ntiyiso. Vo tala va hina hi pfuniwe hi Yehovha eka timhaka tin’wana evuton’wini bya hina. (Pisalema 118:15) Ku tlula hinkwaswo, hi ni ntshembo wo kuma ku pona hikwalaho ka rifu leri nga gandzelo ra N’wana wa Xikwembu hi byakwe, Yesu Kreste. (Yohane 3:16) Kambe hikwalaho ka ku nga hetiseki ka hina, loko hi langutane ni ku navela loku hoxeke ni mintshikilelo ya vutomi, na hina hi nga hatla hi swi rivala swilo leswinene leswi Yehovha a hi endleleke swona.
(Pisalema 106:4, 5) Oho Yehovha, ndzi tsundzuke hi vunene ehenhla ka vanhu va wena. Ndzi khathalele hi ku ponisa ka wena, 5 Leswaku ndzi ta vona vunene eka vahlawuriwa va wena, Leswaku ndzi ta tsaka hi ku tsaka ka tiko ra wena, Leswaku ndzi ta tibuma hi ndzhaka ya wena.
(Pisalema 106:48) A a dzunisiwe Yehovha Xikwembu xa Israyele Ku suka enkarhini lowu nga riki na makumu ku ya enkarhini lowu nga riki na makumu; Vanhu hinkwavo va fanele va ku Amen. Dzunisani Yah!”
A Hi Tsakeni Swin’we!
Hambiswiritano, langutelo ra Vakrestekulorhi a ri tano. Muapostola Pawulo u te: “Tsakani minkarhi hinkwayo.” (1 Tes. 5:16) Hi ni swivangelo swo tala leswi hi endlaka hi tsaka ni ku khana. Hi gandzela Yehovha, Xikwembu lexi Tlakukeke; hi twisisa tidyondzo ta ntiyiso leti nga eBibeleni; hi ni ntshembo wo hanya hilaha ku nga heriki; naswona hi nga pfuna van’wana leswaku va kuma mikateko leyi fanaka.—Ps. 106:4, 5; Yer. 15:16; Rhom. 12:12.
“Tikombeni Mi Ri Ni Ku Nkhensa”
Swivangelo Swa Ku Nkhensa
3 Hi fanele hi nkhensa Yehovha Xikwembu, Muvumbi wa hina ni Munyiki wa Vutomi, ngopfungopfu loko hi kambisisa tin’wana ta tinyiko leti a hi nyikeke tona hi xitalo. (Yakobo 1:17) Siku ni siku hi nkhensa Yehovha hileswi hi hanyaka. (Pisalema 36:9) Laha hi nga kona hi vona swilo swo tala leswi kombisaka vutshila bya Yehovha, swo tanihi dyambu, n’weti ni tinyeleti. Misava ya hina leyi teleke timinerali leti kondletelaka vutomi, xibakabaka lexi nga ni mpfangano lowu ringaneleke kahle wa mimoya ni ndzhendzheleko wo hlamarisa wa swilo swa ntumbuluko, hinkwaswo swi kombisa nchumu lowu hi wu kolotaka Tata wa hina wa le tilweni la nga ni rirhandzu. Hosi Davhida u yimbelerile a ku: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina; a nga kona la nga fanisiwaka na wena. Loko a ndzi lava ku vulavula ha yona, yi tele swinene lerova a ndzi nge yi runguli.”—Pisalema 40:5.
4 Malandza ya Yehovha a ma si fika eparadeyisini ya xiviri, kambe namuntlha ma tsakela vutomi eparadeyisini ya moya. ETiholweni ta hina ta Mfumo, emintsombanweni ni le tinhlengeletanweni, hi xiya ndlela leyi moya wa Xikwembu wu tirhaka ha yona eka vapfumeri-kulorhi. Ina, Timbhoni tin’wana ti tirhisa leswi Pawulo a swi hlamuseleke epapileni rakwe leri a ri tsaleleke Vagalatiya, loko ti chumayela eka vanhu lava nga riki na vutivi ngopfu hi vukhongeri. Ti rhanga ti vulavula hi “mintirho ya nyama” kutani ti vutisa vayingiseri va tona leswaku i yini leswi vona va swi xiyeke malunghana ni mhaka leyi. (Vagalatiya 5:19-23) Vo tala va hatla va swi xiya leswaku sweswo hileswi vunyingi namuntlha byi hanyisaka swona. Loko va kombiwa nhlamuselo ya mihandzu ya moya wa Xikwembu ni loko va rhamberiwe eHolweni ya Mfumo ya le ndhawini ya ka vona leswaku va ta tivonela hi voxe leswaku yi tirhisiwa njhani, vo tala va hatla va pfumela va ku: “Xikwembu xi le xikarhi ka n’wina hakunene.” (1 Vakorinto 14:25) Mihandzu yoleyo ya moya a yi vonaki eHolweni ya Mfumo ntsena. Kwihi ni kwihi laha u nga yaka kona, loko u hlangana ni un’wana ni un’wana wa Timbhoni ta Yehovha leti tlulaka timiliyoni ta tsevu, u ta kuma leswaku ti kombisa moya lowu fanaka wa ntsako. Kunene, vuxaka byebyo lebyinene byi hi nyika xivangelo xa ku nkhensa Yehovha, loyi a hi nyikaka moya wakwe lowu kondletelaka vuxaka byo tano.—Sofaniya 3:9; Vaefesa 3:20, 21.
5 Nyiko leyikulu leyi hetisekeke leyi Yehovha a hi nyikeke yona i N’wana wakwe Yesu, loyi ku nyikeriweke gandzelo ra nkutsulo hi ku tirhisa yena. Muapostola Yohane u tsarile a ku: “Loko leyi ku ri ndlela leyi Xikwembu xi hi rhandzeke ha yona, kutani hina hi boheka ku rhandzana.” (1 Yohane 4:11) Ina, nkutsulo a hi wu nkhensi hi ku kombisa rirhandzu eka Yehovha ni ku n’wi tlangela ntsena, kambe ni hi ku hanya vutomi bya hina hi ndlela leyi kombisaka rirhandzu eka van’wana.—Matewu 22:37-39.
6 Hi nga dyondza swo tala malunghana ni ku kombisa ku nkhensa loko hi kambisisa ndlela leyi Yehovha a va khomeke ha yona Vaisrayele va khale. Yehovha u dyondzise tiko rero swilo swo tala hi ku tirhisa Nawu lowu a ri nyikeke wona hi ku tirhisa Muxe. Hi ku tirhisa “ntila wa vutivi ni wa ntiyiso hi tlhelo ra Nawu,” hi nga dyondza swo tala leswi nga ta hi pfuna ku tirhisa xitsundzuxo xa Pawulo lexi nge: “Tikombeni mi ri ni ku nkhensa.”—Varhoma 2:20; Vakolosa 3:15.
Endla Ndzavisiso
(Pisalema 109:8) Masiku yakwe a ma hunguteke; Ntirho wakwe wa vulanguteri a wu tekiwe hi un’wana.
Mi Yima Mi Hetiseka Mi Va Ni Ku Khorwiseka Loku Tiyeke
20 A wu fanelanga u hetiwa matimba hi mhaka ya leswaku a hi hinkwavo lava yimaka hi ku hetiseka ni hi ku khorwiseka loku tiyeke. Van’wana va nga ha tsandzeka, va hambukisiwa, kumbe va lan’wa kunene. Sweswo swi humelerile eka vanhu lava a va ri ekusuhi ngopfu na Yesu, ku nga vaapostola va yena. Kambe loko Yudasi a hundzuke muxengi, xana vaapostola lavan’wana va debyise voko kumbe va tshika? Nikatsongo! Petro u tirhise Pisalema 109:8 a kombisa leswaku un’wana a a ta siva Yudasi. Loyi a nga ta n’wi siva u hlawuriwile, naswona vanhu lava tshembekaka eka Xikwembu va ye emahlweni ni xiavelo xa vona xo chumayela hi ku hiseka. (Mintirho 1:15-26) A va tiyimiserile ku yima va hetisekile, va ri ni ku khorwiseka loku tiyeke.
it-1 857-858
Ku Tiva Mhaka Ka Ha Ri eMahlweni Ni Ku Yi Kunguhata
Xana Xikwembu a xi kunguhate leswaku Yudasi a xenga Yesu leswaku ku ta hetiseka vuprofeta?
Swiendlo swa Yudasi Iskariyota swo xenga swi hetisise vuprofeta bya Xikwembu naswona swi kombisa vuswikoti bya Yehovha ni N’wana wakwe byo tiva mhaka ka ha ri emahlweni. (Ps 41:9; 55:12, 13; 109:8; Min 1:16-20) Hambiswiritano, a hi nge vuli leswaku Xikwembu xi kunguhate leswaku Yudasi a endla tano. Vuprofeta byi kombisa leswaku Yesu a a ta xengiwa hi munhu loyi va tolovelaneke kambe a byi kombisanga leswaku munhu wa kona a ku ta va ku ri mani. Milawu ya Bibele a yi yimi na yona mhaka ya leswaku Xikwembu xi kunguhate swiendlo swa Yudasi. Nawu wa Xikwembu lowu vuriweke hi muapostola hi lowu nge: “U nga tshuki u tlhandleka munhu mavoko hi ku anghwetla; naswona u nga hlanganyeli eswidyohweni swa van’wana; tihlayise u tengile.” (1Tm 5:22; ringanisa na 3:6.) Ku kombisa ndlela leyi a khumbeka ha yona hi ndlela leyinene yo hlawula vaapostola vakwe va 12, Yesu u hete vusiku hinkwabyo a ri karhi a khongela eka Tata wakwe a nga si endla xiboho. (Lk 6:12-16) Loko ku ri hileswaku Yudasi se a kunguhateriwile leswaku a a ta va muxengi, swi vula leswaku milawu ni nkongomiso wa Xikwembu swa cincacinca naswona hi ku ya hi nawu, leswi a swi ta vula leswaku xa katseka eswidyohweni swa yena.
Hikokwalaho, swi le rivaleni leswaku hi nkarhi lowu a hlawuriweke leswaku a va muapostola, Yudasi a nga tikombi leswaku u ta cinca a va muxengi. U pfumelele leswaku ku ‘mila rimitsu ra vuxungu’ kutani ri n’wi nyamisa, leswi endleke leswaku a hambuka ivi a nga wu pfumeleli nkongomiso wa Xikwembu kambe a kongomisa hi Diyavulosi leswi endleke leswaku a va khamba tlhelo mukanganyisi. (Hv 12:14, 15; Yh 13:2; Min 1:24, 25; Yk 1:14, 15; vona YUDASI No. 4.) Loko swi ve erivaleni leswaku se wa hambuka, Yesu u sungule ku vona leswi a swi ri embilwini ya Yudasi ivi a vula ka ha ri emahlweni hi ta ku xenga ka yena.—Yh 13:10, 11.
I ntiyiso leswaku eka rungula leri nga eka Yohane 6:64, loko vadyondzisiwa van’wana va khunguvanyisiwe hi tidyondzo tin’wana ta Yesu, hi hlaya leswaku “ku sukela eku sunguleni Yesu a a va tiva lava nga kholwiki ni loyi a a ta n’wi xenga.” Rito leri nge “eku sunguleni” ri tlhela ri tirhisiwa eka 2 Petro 3:4 leswaku ri kombetela eka masungulo ya ntumbuluko naswona ri nga tlhela ri kombetela eka minkarhi yin’wana. (Lk 1:2; Yh 15:27) Hi xikombiso, loko muapostola Petro a vulavule hi leswaku moya lowo kwetsima wu xikele eka Vamatiko “hilaha wu endleke hakona ni le ka hina eku sunguleni” a a nga kombeteli eka loko a sungula ku va mudyondzisiwa kumbe muapostola kambe a a kombetela eka nkarhi wa nkoka wa vutirheli byakwe hi siku ra Pentekosta ya 33 C.E., ku nga “eku sunguleni” ka loko ku chululeriwa moya lowo kwetsima hi xikongomelo xo karhi. (Min 11:15; 2:1-4) Hikwalaho, swa tsakisa ku xiya nhlamuselo leyi nga eka buku leyi nge Lange’s Commentary on the Holy Scriptures (tl. 227) leyi nge: “Eku sunguleni. . . a ri kombeteli eka masungulo ya swilo hinkwaswo, . . . kumbe masungulo ya ku va Yesu a tolovelana ni van’wana, . . . kumbe masungulo ya loko A hlawula vadyondzisiwa kumbe loko a sungula vutirheli Byakwe tanihi Mesiya, . . . kambe ri kombetela eka nchumu lowu endlaka leswaku munhu a nga ha kholwi [lowu endlaka leswaku vadyondzisiwa van’wana va khunguvanyeka]. Kutani na yena A a n’wi tiva loyi a ta n’wi xenga ku sukela eku sunguleni.” Ri hundzuluxeriwe hi P. Schaff, 1976; ringanisa na 1Yh 3:8, 11, 12.
(Pisalema 109:31) Hikuva u ta yima evokweni ra xinene ra xisiwana, Leswaku a xi ponisa eka lava va avanyisaka moya-xiviri wa xona.
Tinhlankulu Ta Buku Ya Vuntlhanu Ya Tipisalema
109:30, 31; 110:5. Voko ra xinene ra socha leri ri tirhaka ku khoma banga kahle hakanyingi a ri nga koti ku sirheleriwa hi xitlhangu, lexi a xi khomiwa hi voko ra ximatsi. Hi ndlela yo fanekisela, Yehovha u va a ri “evokweni ra xinene” ra malandza yakwe, leswaku a ma lwela. Xisweswo, wa ma sirhelela ni ku ma pfuna—ku nga xona xivangelo lexi endlaka hi n’wi “dzunisa swinene”!
AUGUST 29–SEPTEMBER 4
LESWI HI SWI DYONDZAKA EBIBELENI TIPISALEMA | 110-118
“Xana Ndzi Ta Tlherisela Yini Eka Yehovha?”
(Pisalema 116:3, 4) Mapindza ya rifu ma ndzi rhendzerile Ni swiyimo leswi karhataka swa Sheol swi ndzi kumile. Ndzi hambeta ndzi kuma maxangu ni gome. 4 Kambe ndzi hambete ndzi vitana vito ra Yehovha: “Oho Yehovha, ponisa moya-xiviri wa mina!”
(Pisalema 116:8) Hikuva u ponise moya-xiviri wa mina eku feni, tihlo ra mina emihlotini, nenge wa mina eku khunguvanyekeni.
Xikwembu Lexi Tsakeke, Vanhu Lava Tsakeke!
◆ 116:3—I yini “mapindza ya rifu”?
Swi tikombe onge hi loko rifu ri bohe mupisalema swinene hi mapindza lama nga tsemekiki laha ku pona a swi nonon’hwa. Mapindza lama boheke swinene swirho ma vanga switlhavi, kumbe ku vaviseka naswona Septuagint ya Xigriki yi hundzuluxela rito ra Xiheveru leri nge “mapindza” tanihi “ku vaviseka.” Kutani, loko Yesu Kreste a ri karhi a fa a a twa ku vava lokukulu ka rifu. Loko Yehovha a pfuxe Yesu, A a n’wi ‘ntshunxa eka switlhavi swa rifu.’—Mint. 2:24.
(Pisalema 116:12) Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?
Amukela Hi Ntsako U Tlhela U Nyika Hi Mbilu Hinkwayo
Mupisalema u vutisile a ku: “Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?” (Ps. 116:12) Xana u vuyeriwe hi yini? Yehovha u n’wi pfunile hi nkarhi wa “maxangu ni gome.” Ku tlula kwalaho, Yehovha u “ponise moya-xiviri wa [yena] eku feni.” Kutani a a lava ku “tlherisela” Yehovha swo karhi. Xana mupisalema a a ta endla yini? U te: “Switshembiso leswi hlambanyiweke ndzi ta swi hetisisa eka Yehovha.” (Ps. 116:3, 4, 8, 10-14) A a tiyimisele ku hetisisa switshembiso hinkwaswo leswi a swi hlambanyeke eka Yehovha ni ku endla hinkwaswo leswi a a n’wi lerise swona.
Na wena u nga endla hilaha ku fanaka. Hi ndlela yihi? Hi ku hanya hi milawu ya Xikwembu minkarhi hinkwayo. Hikwalaho, tiyiseka leswaku ku gandzela Yehovha i mhaka ya nkoka evuton’wini bya wena naswona u pfumelela moya wakwe leswaku wu ku kongomisa eka swilo hinkwaswo leswi u swi endlaka. (Ekl. 12:13; Gal. 5:16-18) I ntiyiso leswaku a wu nge swi koti hi ku helela ku tlherisela Yehovha hinkwaswo leswi a ku endleleke swona. Hambiswiritano, ‘Yehovha wa tsaka’ loko a vona leswaku u endla ntirho wa yena hi mbilu hinkwayo. (Swiv. 27:11) Hakunene i lunghelo lerikulu ku tsakisa Yehovha hi ndlela leyi!
Ku Yima eMasungulweni Ya Ntirho Lowukulu
Ku landzele tinkulumo ta swirho swinharhu swa vadyondzisi va Giliyadi. Karl Adams a a ri wo sungula ku vulavula hi nhlokomhaka leyi nge, “Xana U Ta N’wi Hakela Hi Yini Yehovha?” Nkulumo yakwe a yi sekeriwe eka Pisalema ya vu-116, leyi swi nga endlekaka leswaku Yesu u yi yimbelerile evusikwini bya le mahlweni ka ku fa ka yena. (Matewu 26:30, nhlamuselo ya le hansi ya NW) Xana Yesu a a anakanya ha yini loko a yimbelela marito lama nge: “Ndzi ta [hakela] Yehovha hi yini? Mikateko hinkwayo ya yena yi le henhla ka mina”? (Pisalema 116:12) Swi nga ha endleka leswaku a a anakanyisisa hi miri lowu hetisekeke lowu Yehovha a n’wi lunghiseleleke wona. (Vaheveru 10:5) Siku leri tlhandlamaka, a a ta nyikela miri wolowo wu va gandzelo, a kombisa leswaku hakunene wa va rhandza vanhu. Swichudeni swa ntlawa wa vu-105 swi vone vunene bya Yehovha eka tin’hweti ta ntlhanu leti hundzeke. Ku sukela kwalaho a swi ta kombisa leswaku swa xi rhandza Xikwembu hi ku tirha hi matimba eswiavelweni swa swona tanihi varhumiwa.
(Pisalema 116:13, 14) Ndzi ta teka xinwelo xa ku ponisiwa lokukulu, Naswona ndzi ta vitana vito ra Yehovha. 14 Switshembiso leswi hlambanyiweke ndzi ta swi hetisisa eka Yehovha, Ina, emahlweni ka vanhu vakwe hinkwavo.
(Pisalema 116:17, 18) Ndzi ta ku endlela xitlhavelo xa ku nkhensa, Naswona ndzi ta vitana vito ra Yehovha. 18 Switshembiso swa mina leswi hlambanyiweke ndzi ta swi hetisisa eka Yehovha, Ina, emahlweni ka vanhu vakwe hinkwavo,
w10 4/15 27, bokisi
Xana U Landzela Kreste Hi Xitalo?
I Yini Leswi Nga Ku Pfunaka Ku Ya eMahlweni U Landzela Kreste?
▪ Hlaya Rito ra Xikwembu siku ni siku naswona u anakanyisisa hi leswi u swi hlayaka.—Ps. 1:1-3; 1 Tim. 4:15.
▪ Khongela nkarhi na nkarhi u kombela ku seketeriwa ni ku kongomisiwa hi moya wa Xikwembu.—Zak. 4:6; Luka 11:9, 13.
▪ Endla xinghana ni lava hisekelaka ntirho wa nsimu hi mbilu hinkwayo.—Swiv. 13:20; Hev. 10:24, 25.
▪ Xiya leswaku nkarhi lowu hi hanyaka eka wona i wa nkoka.—Efe. 5:15, 16.
▪ Anakanyisisa hi vuyelo byo biha lebyi nga ha vaka kona hikwalaho ko ‘tilandzula.’—Luka 9:59-62.
▪ Nkarhi na nkarhi anakanyisisa hi xihlambanyo xa wena xa ku tinyiketela ni mikateko yo tala leyi munhu a yi kumaka hikwalaho ko tirhela Yehovha ni ku landzela Kreste hi mbilu hinkwayo.—Ps. 116:12-14; 133:3; Swiv. 10:22.
Endla Ndzavisiso
(Pisalema 110:4) Yehovha u hlambanyile (naswona a nge tisoli): “U muprista hilaha ku nga riki na makumu Hi ku ya hi mukhuva wa Melkisedeke!”
Mi Va Ni Ripfumelo Leri Tiyeke Eka Mfumo Wa Xikwembu
NTWANANO WA MUPRISTA
15 Ntwanano wa Abrahama ni wa Davhida wu swi tiyisekisile leswaku mbewu ya wansati a a yi ta va hosi, kambe mbewu yoleyo a yi nga ta swi kota ku katekisa vanhu va matiko hinkwawo loko yi ri hosi ntsena. Leswaku va katekisiwa, a va fanele va ntshunxiwa exidyohweni kutani va va xiphemu xa ndyangu wa Yehovha lowu nga ni vun’we. Leswaku leswi swi hetiseka a ku laveka leswaku mbewu yi tlhela yi va muprista. Muvumbi wo tlhariha u endle leswaku sweswo swi koteka hi ku endla lunghiselelo rin’wana, ku nga ntwanano wa muprista la fanaka na Melkisedeke.
16 Yehovha u tirhise Hosi Davhida ku vula leswaku U ta endla ntwanano na Yesu lowu katsaka swilo swimbirhi: ku va a “tshama evokweni ra [Xikwembu] ra xinene” ku kondza a hlula valala va yena ni ku va “muprista hilaha ku nga riki na makumu hi ku ya hi mukhuva wa Melkisedeke.” (Hlaya Pisalema 110:1, 2, 4.) Ha yini a fanele a va muprista “hi ku ya hi mukhuva wa Melkisedeke”? Hikuva loko vatukulu va Abrahama va nga si nghena eTikweni leri Tshembisiweke, Melkisedeke, hosi ya le Salema, a a ri “muprista wa Xikwembu Lexi nge Henhla-henhla.” (Hev. 7:1-3) A a vekiwe hi Yehovha hi ku kongoma leswaku a endla tano. Hi yena ntsena loyi a boxiweke eMatsalweni ya Xiheveru loyi a veke hosi tlhelo muprista. Ku tlula kwalaho, leswi a nga riki kona loyi a veke hosi tlhelo muprista emahlweni ka yena kumbe endzhaku ka yena, a nga vitaniwa “muprista hilaha ku nga heriki.”
17 Yesu u vekiwe hi ku kongoma leswaku a va muprista hikwalaho ka ntwanano lowu Yehovha a wu endleke na yena naswona u ta tshama a ri “muprista hi masiku hi ku ya hi mukhuva wa Melkisedeke.” (Hev. 5:4-6) Ntwanano lowu wu swi kombisa kahle leswaku Yehovha u tiyisekisa leswaku u ta tirhisa Mfumo wa Mesiya ku endla leswaku xikongomelo xakwe xa le ku sunguleni malunghana ni vanhu ni misava xi hetiseka.
Tinhlankulu Ta Buku Ya Vuntlhanu Ya Tipisalema
110:4—Xana Yehovha a a ‘hlambanya malunghana na yini handle ka ku tisola’? Xihlambanyo lexi i ntwanano lowu Yehovha a nga wu endla na Yesu Kreste wa leswaku u ta fuma tanihi Hosi tlhelo Muprista Lonkulu.—Luka 22:29.
(Pisalema 116:15) I ka risima ematihlweni ya Yehovha Ku fa ka lavo tshembeka vakwe.
Swivutiso Swa Vahlayi
Loko ku nyikeriwa nkulumo ya xilahlo, swi hoxile ku tirhisa Pisalema 116:15 ku kombetela eka mufi hambiloko a fe a tshembekile eka Yehovha. Ha yini? Hikuva marito ya mupisalema ma ni nhlamuselo leyi anameke. Ma vula leswaku Xikwembu a xi nge pfumeleli leswaku ntlawa hinkwawo wa malandza ya xona yo tshembeka ma fa hikuva xi ma teka ma ri ya risima.—Hlaya Pisalema 72:14; 116:8.