Ku Yima eMasungulweni Ya Ntirho Lowukulu
LOKO Richard na Lusia va hlamusela hi ta swichudeni-kulobye swa ntlawa wa vu-105 wa Xikolo xa Bibele xa Gilead xa Watchtower, va te: “Moya wa ku phikizana a wu nga ri kona. Un’wana ni un’wana a a lava leswaku un’wana ni un’wana a humelela. Hi hambanile swinene hinkwerhu, kambe eka hina, xichudeni ha xin’we i xa risima.” Lowell, xichudeni-kulobye, u engetele hi ku pfumela a ku: “Ku nga fani ka hina ku endle leswaku hi tshinelelana.”
Ntlawa lowu, lowu thwaseke hi September 12, 1998, a wu hambanile hakunene. Swichudeni swin’wana a swi phayone etindhawini leti ti nga ni xilaveko lexikulu xa vahuweleri va Mfumo; swin’wana a swi tirhe hi ku tshembeka ekusuhi ni le kaya. Swi nga ri swingani, ku fana na Mats na Rose-Marie, a swi fanele swi tirha tiawara to leha hi matimba leswaku swi antswisa Xinghezi xa swona swi nga si ta exikolweni. Swichudeni swo tala swi anakanye hi ntirho wa vurhumiwa ku sukela evuhlangini. Mpatswa wun’wana wu endle xikombelo ku ringana ka 12; a wu tsakile swonghasi ku va wu rhambiwile ku ta entlaweni lowu wa vu-105!
Mavhiki ya 20 ya dyondzo leyi enteke ma hundze hi ku hatlisa swinene. Swichudeni swi nga si swi xiya, se a swi tise ntirho wa swona wo hetelela lowu swi wu tsaleke naswona swi nyikele xiviko xa swona xo hetelela xa nomu naswona siku ra ku thwasa a ri fikile.
Mutshama-xitulu wa nongonoko, Albert Schroeder, ku nga xirho xa Huvo leyi Fumaka ya Timbhoni ta Yehovha, u tsundzuxe ntlawa lowu leswaku a wu “yime emasungulweni ya ntirho lowukulu entirhweni wa ku dyondzisa Bibele,” wu landzela van’wana vo tlula 7000, lava va wu rhangeleke ku ta eGilead. U vule leswaku hi nkarhi wa ximumu, swichudeni swi tsakele lunghelo ro hlawuleka ra ku hlangana ni varhumiwa va nkarhi wo leha, loko va tile ku ta endzela yindlu-nkulu ya misava hinkwayo hi nkarhi wa mintsombano ya matiko hinkwawo.
Hiloko Makwerhu Schroeder a vita Max Larson wa Komiti ya Mintirho ya Bethele. U vulavule hi xihloko lexi nge, “Dyondzo Leyi Yisaka eVuton’wini Lebyi Nga Heriki.” Makwerhu Larson u tshahe Swivuriso 1:5, leyi nge: “L’a tlhariheke, a a yingise, o ta tiengetela ku tiv̌a; l’a nga ni ku twisisa o ta tikumela mano.” Mano ya laveka leswaku u va murhumiwa la humelelaka. Vanhu lava nga ni mano va yima emahlweni ka tihosi. (Swivuriso 22:29) Endzhaku ko leteriwa tin’hweti ta ntlhanu, swichudeni a swi hlomisiwe kahle leswaku swi ya yimela Tihosi letikulu swinene, Yehovha Xikwembu na Kreste Yesu.
David Olson wa Ndzawulo ya Ntirho u vulavule hi nhloko-mhaka leyi landzeleke, leyi nge: “Tinyiketele Ku Tsakisa Mbilu Ya Yehovha.” U vutisile, a ku: “I yini lexi vanhu lava nga hetisekangiki va nga xi endlaka leswaku va tsakisa mbilu ya Xikwembu?” Nhlamulo? Va nga xi tirhela hi ku tshembeka ni hi ntsako. Yehovha u lava leswaku vanhu vakwe va tsakela ntirho lowu va n’wi endlelaka wona. Loko hi endla leswi rhandziwaka hi Xikwembu hi tsakile, hi tsakisa mbilu ya xona. (Swivuriso 27:11) Makwerhu Olson u hlaye papila leri humaka eka mpatswa wa varhumiwa lowu thwaseke eka ntlawa wa vu-104 wa Gilead. Xana wu tsakela xiavelo xa wona? Malunghana ni vandlha leri wu nga eka rona wu tsarile, wu ku: “Hi ni vahuweleri va kwalomu ka 140, kasi lava vaka kona eminhlanganweni va le xiringanisweni xa 250 ku ya eka 300. Ntirho wa nsimu hi wona lowu tsakisaka swinene. Ha un’we wa hina u na tidyondzo ta mune, naswona van’wana ana se va ta eminhlanganweni.”
Lyman Swingle, wa Huvo leyi Fumaka, u vulavule hi nhloko-mhaka leyi nge “Nkarhi Wa Ku Yima U Hlayela Mikateko Ya Wena.” Ndzetelo wa Gilead wu tise mikateko yo tala. Wu pfune swichudeni leswaku swi kula evutivini, swi kula eku tlangeleni ka nhlengeletano ya Yehovha ni le ku hlakuleleni ka timfanelo ta nkoka, to fana ni vutitsongahati. Makwerhu Swingle u ye emahlweni a ku: “Swi lava ku titsongahata ku ta laha u ta heta nkarhi u yingisele ndzetelo. U suka laha u hlomisiwe ku antswa leswaku u twarisa Yehovha.”
“U Ni Ntsako Lowukulu—Xisweswo Ha Yini U Karhateka?” a ku ri xihloko xa nkulumo ya Daniel Sydlik, loyi na yena a nga wa Huvo leyi Fumaka. U khutaze leswaku loko ku humelela swiphiqo, lava nkongomiso lowu humaka eMatsalweni. A tirhisa tindzimana leti hlawuriweke ta ndzima ya vutsevu ya Matewu, Makwerhu Sydlik u kombise ndlela leyi leswi swi nga endliwaka ha yona. Ku kayivela ripfumelo ku nga hi vangela leswaku hi karhateka hi swilo swa misava, swo fana ni swakudya ni swiambalo. Hambiswiritano, Yehovha u tiva leswi hi swi lavaka. (Matewu 6:25, 30) Ku karhateka ku to engetela swiphiqo leswi siku rin’wana ni rin’wana ri hi tiselaka swona. (Matewu 6:34) Hi tlhelo rin’wana swa laveka ku kunguhata. (Ringanisa Luka 14:28.) Makwerhu Sydlik u te: “Leswi Yesu a swi alelaka a hi ku anakanya hi ndlela ya vutlhari hi vumundzuku, kambe i ku karhateka hi ndlela leyi nga riki ya vutlhari hi byona. Xin’wana xa switshungulo swo antswa swa ku karhateka i xiendlo. Loko hi sungula ku karhateka, i swinene leswaku hi sungula ku vulavula hi ntiyiso.”
Ndzayo Yo Lelana Leyi Humaka Eka Valeteri
Ku landzele tinkulumo ta swirho swinharhu swa vadyondzisi va Gilead. Karl Adams a a ri wo sungula ku vulavula hi nhloko-mhaka leyi nge, “Xana U Ta N’wi Hakela Hi Yini Yehovha?” Nkulumo yakwe a yi sekeriwe eka Pisalema ya vu-116, leyi swi nga endlekaka leswaku Yesu u yi yimbelerile evusikwini bya le mahlweni ka ku fa ka yena. (Matewu 26:30, nhlamuselo ya le hansi ya NW) Xana Yesu a a anakanya ha yini loko a yimbelela marito lama nge: “Nḍi ta [hakela] Yehova hi yini? Mikateko hikwayo ya yena yi le henhla ka mina”? (Pisalema 116:12) Swi nga ha endleka leswaku u yise nyingiso eka miri lowu hetisekeke lowu Yehovha a n’wi lunghiseleleke wona. (Vaheveru 10:5) Siku leri tlhandlamaka, a a ta nyikela miri wolowo wu va gandzelo, a kombisa ku enta ka rirhandzu rakwe. Swichudeni swa ntlawa wa vu-105 swi nantswe vunene bya Yehovha etin’hwetini ta ntlhanu leti hundzeke. Sweswi a swi ta kombisa rirhandzu ra swona eka Xikwembu hi ku tirha hi matimba eswiavelweni swa swona swa vurhumiwa.
Mark Noumair, muleteri wa Gilead la nga va xivulavuri xa vumbirhi, u tsundzuxe swichudeni a ku, “Yanani eMahlweni Mi Endla Leswinene.” Endzhaku ko va Yosefa a xavisiwe evuhlongeni aEgipta, u tiyisele malembe ya 13 ya ku khomiwa hi ndlela leyi nga lulamangiki. Xana u pfumelele swihoxo swa van’wana leswaku swi n’wi sivela? E-e, u hambete a endla leswinene. Kutani hi nkarhi lowu vekiweke wa Xikwembu, Yosefa u ponisiwile emiringweni yakwe. Hi xitshuketa, u hume ekhotsweni a ya tshama exigodlhweni. (Genesa, tindzima 37-50) Muleteri u vutise swichudeni swakwe a ku: “Loko leswi u swi languteleke swi nga humeleli exiavelweni xa wena xa vurhumiwa, xana u ta tshika? Xana u ta hluriwa hi gome? Kumbe, xana u ta tiyisela, hilaha Yosefa a endleke hakona?”
Eku heteleleni, mutsarisi wa Xikolo xa Gilead, Wallace Liverance, u fambise mbulavurisano lowu hanyaka ni swirho swa ntlawa, eka nhloko-mhaka leyi nge, “Twarisani Hosi Ni Mfumo.” Swichudeni swin’wana swi hlamusele mintokoto leyi swi veke na yona loko swi ri karhi swi chumayela yindlu hi yindlu, xitolo hi xitolo ni le switarateni. Swin’wana swi hlamusele ndlela leyi swi nyikeleke vumbhoni ha yona eka vanhu lava vulavulaka tindzimi tin’wana. Kambe ke, swin’wana swi kombise ndlela leyi ha yona u nga chumayelaka vanhu va mindhavuko yo hambana-hambana ya vukhongeri. Mathwasana hinkwawo a ma hisekela ku va ni xiphemu lexikulu entirhweni wa vurhumiwa.
Varhumiwa Va Nkarhi Wo Leha Lava Tsakeke
Xiyenge lexi landzelaka, lexi nga ni xihloko lexi nge, “Vuyelo Lebyi Tsakisaka Bya Ntirho Wa Vurhumiwa,” xi nyikeriwe hi Robert Wallen naswona a xi ri ni mimbulavurisano ni vamakwerhu va mune lava nga vatirhi va yindlu-nkulu, lava sweswinyana va veke ni vunakulobye lebyi akaka ni varhumiwa lava nga ni ntokoto. Varhumiwa volavo va swi pfumele hi ku hatlisa leswaku a swi nga va oloveli ku dyondza ririmi lerintshwa, ku tolovelana ni ndhavuko wun’wana kumbe ku tolovela xiyimo lexi hambaneke xa maxelo. Kutani a ku ri ni swiphiqo swa ku tsundzuka ekaya, leswi a va fanele va langutana na swona. Minkarhi yin’wana, a ku va ni swiphiqo swa rihanyo. Hambiswiritano, varhumiwa va ve ni vonelo lerinene, kutani ku tiyisela ka vona ku katekisiwile. Van’wana va endle leswaku vanhu vo tala swinene va tiva Yehovha. Van’wanyana va hoxe xandla hi tindlela to hambana-hambana eka ku andza ka ntirho wa Mfumo ematikweni lawa va averiweke eka wona.
Xivulavuri xo hetelela a ku ri Carey Barber, xirho xa Huvo leyi Fumaka. U pfuxete tinhla-nkulu ta nongonoko wa ntsombano wa “Ku Hanya Hi Ndlela Ya Xikwembu.” U vutise vayingiseri vakwe a ku: “Xana nongonoko wa ntsombano wu byi khumbise ku yini vuxaka bya n’wina na Yehovha?” Xivulavuri xi kombise ku hambana ka mikateko leyi vaka kona hikwalaho ka ku landzela ndlela ya Xikwembu ni makumu lama nga ni khombo eka lava va landzelaka ndlela ya misava. Loko a kombetela eka xidyoho xa Muxe eMeriba, u tsundzuxile a ku: “Hambiloko munhu a tirhe hi vutshembeki malembe yo tala, Yehovha a nga ku honisi ku tluriwa lokutsongo ka milawu Yakwe leyi lulameke.” (Tinhlayo 20:2-13) Onge kun’wana ni kun’wana malandza hinkwawo ya Xikwembu ma nga khomelela swi tiya eka malunghelo ya risima ya ntirho wa wona!
Nkarhi wa leswaku swichudeni swi amukela maphepha ya swona yo thwasa wu fikile. Hiloko muyimeri wa ntlawa a hlaya papila ra ku tlangela ndzetelo lowu swichudeni swi wu kumeke. Endzhaku ka risimu ro pfala ni xikhongelo lexi humaka embilwini, nongonoko wa ku thwasa wu herile. Kambe eka ntlawa wa vu-105, leswi a ku ri masungulo ntsena, hikuva varhumiwa lava lavantshwa a va “yime emasungulweni ya ntirho lowukulu.”
[Xifaniso lexi nga eka tluka 23]
TinhlayoTa Ntlawa
Nhlayo ya matiko lama yimeriweke: 9
Nhlayo ya matiko lawa va averiweke eka wona: 17
Nhlayo ya swichudeni: 48
Nhlayo ya mimpatswa leyi tekaneke: 24
Xiringaniso xa malembe: 33
Xiringaniso xa malembe entiyisweni: 16
Xiringaniso xa malembe evutirhelini bya nkarhi hinkwawo: 12
[Bokisi leri nga eka tluka 24]
Va Hlawule Ntirho Wa Nkarhi Hinkwawo
Ben, thwasana ra ntlawa wa vu-105, u ri: “Loko ndza ha ri ntsongo, a ndzi nga anakanyi hi ku nghenela vuphayona.” U engetela a ku: “A ndzi anakanya leswaku vanhu lava nga ni vuswikoti byo hlawuleka ni swiyimo leswi va pfumelelaka hi vona va nga phayonaka. Kambe ndzi dyondze ku rhandza ntirho wa nsimu. Hiloko siku rin’wana ndzi swi lemuka leswaku ku va phayona swi vula ntsena ku tirha swinene evutirhelini. Hi kona ndzi nga swi xiya leswaku ndzi nga phayona.”
Lusia u ri: “Vatirheli va nkarhi hinkwawo a va tsakeriwa swinene ekaya.” Wa ha yi tsundzuka ndlela leyi vandlha ra ka vona a ri nyanyuka ha yona nkarhi ni nkarhi loko varhumiwa va endza. U ri: “Loko ndza ha kula, a swi tikomba leswaku ntirho wa nkarhi hinkwawo wu ta va exikarhi ka leswi ndzi swi kunguhateke.”
Mana wa Theodis u love loko yena a ri ni malembe ya 15 hi vukhale. U ri: “Hi nkarhi wolowo, vandlha ri ndzi seketerile hakunene, hiloko ndzi tivutisa, ‘Xana ndzi nga endla yini ku kombisa ku tlangela ka mina?’” Leswi swi n’wi vangele leswaku a nghenela ntirho wa nkarhi hinkwawo kutani sweswi a nghenela ntirho wa vurhumiwa.
[Xifaniso lexi nga eka tluka 25]
Ntlawa Wa Vu-105 Lowu Thwasaka Wa Xikolo xa Bibele Xa Gilead Xa Watchtower
Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana
(1) Sampson, M.; Brown, I.; Heggli, G.; Abuyen, E; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.