Swivutiso Swa Vahlayi

◼ Tanihi leswi Daniyele a vuleke leswaku a a nga ta ti amukela tinyiko leti humaka eka Hosi Belxatsar hikwalaho ka ku hlamusela leswi tsariweke hi voko ekhumbini, ha yini endzhakunyana a kumeke a ambale nguvu na vuhlalu bya le nhan’wini?

Emahlweninyana ka ku va Vameda ni Vapersia va hlule Babilona, Hosi Belxatsar na huvo ya yena a va ri exikarhi ka nkhuvo. Hi nkarhi wa nkhuvo u teke swibya leswi a swi huma etempeleni ya Yehova ivi a swi tirhisela ku nwa vhinya, a dzunisa swikwembu swa Babilona. Kambe nkhuvo wu kavanyetiwile xikan’we-kan’we loko voko leri tlulaka ra munhu ri tsale swilo leswo hlamarisa ekhumbini.—Daniel 5:1-5.

Vavanuna lavo tlhariha ni vangoma va tinyeleti va le Babilona a va swi kotanga ku hlamusela leswi tsariweke, hambi leswi Belxatsar a tshembiseke ku nyika un’wana ni un’wana vuhlalu bya le nhan’wini bya nsuku ni xikhundla xa vuhosi eka un’wana ni un’wana loyi a a ta swi kota ku hlaya a tlhela a hlamusela leswi tsariweke hi voko leswi hlamarisaka.—Daniel 5:7-9.

Loko Muheveru loyi a vitaniwaka Daniyele eku heteleleni a tisiwile, hosi yi phindhe nyiko ya yona—ku ambexa Daniyele nguvu, ku n’wi vekela vuhlalu bya le nhan’wini bya nsuku ni ku n’wi endla mufumi wa vunharhu emfun’weni. Muprofeta u hlamurile hi ku xixima a ku: “Tinyiko ta wena a ti ṭhame na wena, u nyika uṅwana e šuma ša wena! Hambi ŝi ri tano, nḍi ta hlayela hosi le’ŝi ṭariweke, nḍi ṅwi hlav̌utela nhlamuselo ya ŝona.”—Daniel 5:17.

Kutani Daniyele a nga lavanga ku beriwa mati kumbe ku hakeriwa leswaku a nyikela nhlamuselo. Hosi a yi ta swi kota ku tshama ni tinyiko ta yona kumbe yi ti nyika un’wana. Daniyele a a ta nyika nhlamuselo, ku nga ri hikwalaho ka hakelo, kambe hikwalaho ka leswi a nyikiweke matimba yo endla tano hi Yehova, Xikwembu xa ntiyiso, lexi ku avanyisa ka xona ehenhla ka Babilona a ku ri kusuhi.

Tanihi loko hi hlaya eka Daniel 5:29, endzhaku ka loko Daniyele a hlayile ni ku hlamusela marito tanihi laha a vuleke ha kona leswaku a a ta swi endla, hambi swi ri tano hosi yi lerise leswaku tihakelo ti nyikiwa Daniyele. Daniyele hi yexe a nga tiambexanga nguvu ni vuhlalu bya le nhan’wini. U ambexiwe swona hi ku lerisa ka mufumi wa xiviri, Hosi Belxatsar. Kambe leswi a swi himpfilitani na Daniel 5:17, laha muprofeta a swi vekeke erivaleni leswaku nsusumeto wa yena a wu nga ri wona wa vutianakanyi.

Endzhakunyana Yesu u vule leswaku “loyi a rhurhelaka muprofeta hi leswi a nga muprofeta, u ta kuma hakelo yo kota ya muprofeta.” (Matewu 10:41) Sweswo a swi tirhanga eka Belxatsar nakantsongo, tanihi leswi a a nga hanyisani na Daniyele hi vunene kumbe hi ku xixima hikwalaho ka leswi a xiximeke wanuna loyi wo tshembeka tanihi muprofeta wa Xikwembu xa ntiyiso. Hosi Belxatsar a a navela ku nyika tinyiko leti fanaka eka un’wana ni un’wana loyi a a ta kota ku hlamusela xihundla xa leswi tsariweke hi voko, hambi ku ri vangoma van’wana va tinyeleti va vahedeni. Hosi yi kume hakelo leyi faneleke, leyi a yi pfumelelana ni vuprofeta lebyi tsariweke ekhumbini: “Hi byona v̌usiku byebyo, Belšatsar, hosi ya v̌a-Kaldea, a dlawa. Kutani Darius, wa ka Meda, a kuma v̌uhosi.”—Daniel 5:30, 31.