Loko Misava Hinkwayo Se Yi Pfunana

XANA u tshame u vona vanhu vambirhi lava cinaka swin’we, lava fambaka ehenhla ka ayisi kumbe va tijimineziyamu va tlanga swin’we? Goza ha rin’we ri lava vutshila lebyikulu, va fambisana hi vun’we ni ntwanano. Mawaku ndlela leyi a swi ta tsakisa ha yona loko vutomi a byi ri tano namuntlha—ku ri na ntirhisano naswona nkwetlembetano ni ku lwa swi nga ha ri kona. Ematshan’weni ya sweswo, vanhu a ‘va lavi ntwanano hambi wu ri wihi,’ hilaha Bibele yi profeteke hakona malunghana ni nkarhi wa hina.—2 Timotiya 3:1-5.

Kambe, eminkarhini leyi yo nonon’hwa, vanhu va timiliyoni lava nga ni timbilu letinene va dyondza ku hanya hi ku rhula ka ntiyiso ni van’wana. Njhani? Hi ku amukela xirhambo xa rirhandzu lexi kumekaka eBibeleni eka Esaya 48:17, 18. Xi ri: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona. Kunene loko a wu yingise swileriso swa mina! Kutani ku rhula ka wena a ku ta fana ni nambu, ni ku lulama ka wena a ku ta fana ni magandlati ya lwandle.”

Loko hi amukela xirhambo xexo lexinene, hi ndlela yo karhi, Yehovha u va Mupfuni wa hina. U hi kombisa ndlela leyi hi faneleke hi “famba” ha yona ya ku rhula ni ntwanano wa xiviri. Hi hala tlhelo—ku amukela tidyondzo ni tifilosofi ta vanhu lava nga hetisekangiki, i vuphukuphuku. Matimu ya vanhu ma wu tiyisekise hi ku phindha-phindha ntiyiso lowu kumekaka eka Yeremiya 10:23: “Ndzi swi tiva kahle leswaku ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” Ku vula ntiyiso, hina a hi nge swi koti ku tifuma ni ku veka milawu leyinene leyi amukelekaka emisaveni hinkwayo. I Xikwembu lexi nga endlaka sweswo.—Esaya 33:22.

Ku Rhula Ni Ntwanano Wa Xiviri

Ku nga ri khale Xikwembu xi ta tisa ntwanano emisaveni ya hina. Xi tshembisa leswaku ku ta va ni nkarhi lowu ha wona “kunene misava yi [nga] ta tala hi ku tiva Yehovha kukota mati lama funengetaka lwandle.” (Esaya 11:9) Ina, ku rhula loku nga heriki ku ta hetelela ku ri kona.

Entiyisweni, swilo leswi hanyaka emisaveni swi ta va ni ntwanano lowuntshwa, hikuva Xikwembu xi ta dyondzisa vanhu va xona lavo tshembeka ndlela yo khathalela kaya ra vona. Xi ta tlhela xi ‘endla ntwanano,’ hi ndlela yo fanekisela ni swivandzana leswi karhataka, xi endla leswaku swi ti tsongahata hi ku rhula eka vanhu.—Hosiya 2:18; Genesa 1:26-28; Esaya 11:6-8.

Ntshembo lowu a wo va norho ntsena. Phela, eDyondzweni yakwe ya le Ntshaveni ntsena, Yesu u kombetele eka wona kambirhi. U rhange a ku: “Va tsaka lava nga ni moya wo rhula, hikuva va ta dya ndzhaka ya misava.” Kutani loko a dyondzisa vadyondzisiwa vakwe ku khongela u te: “Tata wa hina . . . , ku rhandza ka wena a ku endleke emisaveni, hilaha ku endlekaka hakona etilweni.” (Matewu 5:5; 6:9, 10) Loko a gimeta vutomi byakwe, Yesu u katsakanye leswi sweswo a swi ta vula swona eka vanhu hi rito rin’we lerinene ngopfu—‘paradeyisi.’ (Luka 23:43) Kunene, ngati leyi halatiweke ya Yesu yi tiyisekisa ntshembo wa vutomi lebyi nga heriki emisaveni ya paradeyisi!—Yohane 3:16.

[Xifaniso lexi nga eka tluka 11, 12]

EParadeyisini ya Xikwembu leyi taka, swivumbiwa hinkwaswo emisaveni swi ta va ni vun’we lebyintshwa