Ku Antswisa Vutshila Bya Hina Ensin’wini​—Tirhisa Swivutiso Hi Ndlela Leyinene

LEXI ENDLAKA SWI VA SWA NKOKA: Loko “xitsundzuxo lexi nga embilwini ya munhu xi fana ni mati yo enta,” swi vula leswaku swivutiso swi fana ni bakiti ro ka ha rona. (Swiv 20:5) Swivutiso swi endla leswaku vanhu lava hi vulavulaka na vona va katseka ebulwini. Hakanyingi tinhlamulo leti baka nhloko ya mhaka ti va ni vuyelo lebyinene. Yesu u tirhise swivutiso hi ndlela leyinene. Hi nga n’wi tekelela njhani?

NDLELA LEYI U NGA SWI ENDLAKA HA YONA:

• Vutisa swivutiso leswi nga ta endla munhu a vula vonelo rakwe. Yesu u vutise vadyondzisiwa vakwe swivutiso leswi a swi ta endla va vula vonelo ra vona. (Mt 16:13-16; be 238 ¶3-5) I swivutiso swa njhani leswi u nga swi vutisaka?

• Vutisa swivutiso leswi nga ta endla leswaku a hlamula hi ku kongoma. Leswaku a lulamisa langutelo leri hoxeke ra Petro, Yesu u n’wi vutise swivutiso leswi endleke leswaku Petro a kuma tinhlamulo letinene hi yexe. (Mt 17:24-26) I swivutiso swa njhani leswi u nga swi vutisaka leswaku u pfuna munhu un’wana a kuma tinhlamulo letinene hi yexe?

• Bumabumela munhu loyi u vulavulaka na yena. Endzhaku ka loko mutsari un’wana a “hlamule hi ku twisisa,” Yesu u n’wi bumabumerile. (Mr 12:34) U nga n’wi bumabumela njhani munhu loko a xi hlamule kahle xivutiso xa wena?

HLALELANI XIPHEMU XO SUNGULA XA VHIDIYO LEYI NGE ENDLANI MINTIRHO LEYI ENDLIWEKE HI YESU—KU DYONDZISA, KUTANI ENDZHAKU MI HLAMULA SWIVUTISO LESWI LANDZELAKA:

• Hikwalaho ka yini swi hoxile ku dyondzisa hi ndlela leyi, hambileswi rungula ra kona ri nga rinene?

• Hikwalaho ka yini hi fanele hi endla swo tala ku tlula ku hlamusela rungula ntsena?

HLALELANI XIPHEMU XA VUMBIRHI XA VHIDIYO, KUTANI ENDZHAKU MI HLAMULA SWIVUTISO LESWI LANDZELAKA:

• Xana makwerhu u swi tirhise njhani swivutiso hi ndlela leyinene?

• Hi swihi swin’wana leswi hi nga swi tekelelaka eka ndlela leyi a dyondziseke ha yona?