Xana U Hetisisa Vutihlamuleri Hinkwabyo Lebyi U Nga Na Byona Eka Xikwembu?
“Šikwembu ša ha ta yisa mitiro hikwayo e ku av̌anyiseni ni le’ŝi fihliweke hikwaŝo, hambi ŝi ri le’ŝo biha, hambi ŝi ri le’ŝo saseka.”—EKLESIASTA 12:14.
1. Hi wahi malunghiselelo lawa Yehovha a ma endleleke vanhu vakwe?
YEHOVHA u seketela lava va hambetaka va n’wi tsundzuka tanihi Mutumbuluxi wa vona Lonkulu. Rito ra yena leri huhuteriweke ri va nyika vutivi lebyi lavekaka leswaku va n’wi tsakisa hi xitalo. Moya wo kwetsima wa Xikwembu wa va kongomisa leswaku va endla ku rhandza ka xona ni ku “veka mihandzu entirhweni wun’wana ni wun’wana lowunene.” (Vakolosa 1:9, 10) Ku tlula kwalaho, Yehovha u lunghiselela swakudya swa moya ni vukongomisi bya swa le tilweni hi ku tirhisa “hlonga ro tshembeka ni ro tlhariha.” (Matewu 24:45-47) Kutani, hi tindlela to tala, vanhu va Xikwembu va kuma nkateko wa le tilweni hi ku tirhela Yehovha ni ku hetisisa ntirho wa nkoka wa ku chumayela mahungu lamanene ya Mfumo.—Marka 13:10.
2. Malunghana ni ku tirhela Yehovha, i swivutiso swihi leswi hi nga tivutisaka swona?
2 Vakreste va ntiyiso va tsaka hileswi va khomekeke hi ntirho wo kwetsima lowu va wu endlelaka Yehovha. Hambiswiritano, van’wana va nga hela matimba, va anakanya leswaku matshalatshala ya vona i ya hava. Hi xikombiso, minkarhi yin’wana Vakreste lava tinyiketeleke va nga tivutisa loko matshalatshala ya vona lawa va ma endlaka hi mbilu hinkwayo ma fanerile hakunene. Loko ku khomiwa dyondzo ya ndyangu ni loko ku endliwa mintirho yin’wana, nhloko ya ndyangu yi nga tivutisa swivutiso swo tanihi leswi landzelaka: ‘Xana swa n’wi tsakisa Yehovha hakunene leswi hi swi endlaka? Xana ha byi hetisisa hakunene vutihlamuleri hinkwabyo lebyi hi nga na byona eka Xikwembu?’ Marito ya vutlhari ya muhlengeleti ma nga hi pfuna ku hlamula swivutiso swo tano.
Xana Hinkwaswo I Vuhava?
3. Ku pfumelelana na Eklesiasta 12:8, hi byihi vuhava lebyikulu?
3 Van’wana va nga anakanya leswaku marito ya wanuna wo tlhariha a ma khutazi munhu—hambi i vantshwa kumbe vadyuhari. “V̌uhav̌a bya ŝahav̌a, ku v̌ula [muhlengeleti], hikwaŝo i ŝa hav̌a.” (Eklesiasta 12:8) Kahle-kahle, i vuhava lebyikulu ku va munhu a honisa Mutumbuluxi Lonkulu loko a ha tsakama, a dyuhala a nga n’wi tirhelanga, a siya matimu ya ku va a hanye nkarhi wo leha ntsena. Sweswo hinkwaswo i vuhava eka munhu wo tano, hambiloko a fa a ri ni rifuwo ni ndhuma emisaveni leyi, leyi nga ehansi ka matimba ya lowo homboloka, Sathana Diyavulosi.—1 Yohane 5:19.
4. Ha yini ku nga vuriwaka leswaku a hi swilo hinkwaswo leswi nga vuhava?
4 A hi swilo hinkwaswo leswi nga vuhava eka lava va tihlayiselaka xuma etilweni, tanihi malandza ya Yehovha lama tshembekaka. (Matewu 6:19, 20) Va ni swo tala swo swi endla entirhweni wa Hosi lowu vuyerisaka, naswona ntirho wo tano a hi wa hava nikatsongo. (1 Vakorinto 15:58) Kambe loko hi ri Vakreste lava tinyiketeleke, xana hi tshama hi khomekile entirhweni lowu Xikwembu xi hi nyikeke wona emasikwini lawa yo hetelela? (2 Timotiya 3:1) Kumbe, xana hi tekelele mahanyelo lama nga hambaniki ngopfu ni ya vanhu lava hi akelaneke na vona? Swi nga endleka va tihlanganisa ni vukhongeri hi ku hambana ka byona naswona va tinyiketele swinene eka byona, va ya etikerekeni ta vona nkarhi na nkarhi, naswona va ringeta ku endla leswi vugandzeri bya vona byi lavaka swona eka vona. Kunene, a hi vahuweleri va rungula ra Mfumo. A va na byona vutivi lebyi kongomeke bya leswaku lowu i ‘nkarhi wa makumu,’ naswona a va swi voni leswaku masiku lawa hi hanyaka eka wona ma lava leswaku va tshama va hitekile.—Daniyele 12:4.
5. Loko hi tikuma hi hlongorisa ngopfu swilo swa vutomi lebyi, xana hi fanele hi endla yini?
5 Malunghana ni minkarhi ya hina ya mangava, Yesu Kreste u te: “Hilaha masiku ya Nowa a ma ri hakona, ni masiku ya vukona bya N’wana wa munhu ma ta va tano. Hikuva kukota leswi a va ri xiswona emasikwini wolawo ya le mahlweni ka ndhambi, va dya, va nwa, vavanuna va teka ni vavasati va hlomisiwa, ku fikela siku leri Nowa a ngheneke ha rona engalaveni; nileswi va nga lemukangiki nchumu ku fikela loko ndhambi yi fika yi va kukula hinkwavo, swi ta va tano ni hi vukona bya N’wana wa munhu.” (Matewu 24:37-39) Ku dya ni ku nwa hi ku ringanisela a swi hoxanga, naswona vukati i lunghiselelo leri sunguriweke hi Xikwembu hi xoxe. (Genesa 2:20-24) Kambe, loko hi xiya leswaku hi hlongorisa ngopfu swilo swa vutomi lebyi, ha yini hi nga khongeli hi mhaka leyi? Yehovha a nga hi pfuna leswaku hi hambeta hi rhangisa timhaka ta Mfumo, hi endla leswi lulameke, naswona hi hetisisa vutihlamuleri lebyi hi nga na byona eka yena.—Matewu 6:33; Varhoma 12:12; 2 Vakorinto 13:7.
Ku Tinyiketela Ni Vutihlamuleri Lebyi Hi Nga Na Byona Eka Xikwembu
6. Vanhu van’wana lava khuvuriweke va tsandzeka ku hetisisa vutihlamuleri lebyi va nga na byona eka Xikwembu hi ndlela yihi leyi nga ni khombo?
6 Vakreste van’wana lava khuvuriweke va fanele va khongela hi mahika, hikuva a va endli leswi va tiboheke ku endla swona loko va tinyiketela eka Xikwembu. Masiku lawa se ku khuvuriwa vanhu vo tlula 300 000 lembe na lembe, kambe nhlayo ya Timbhoni ta Yehovha leti hisekaka a yi kulanga hi ndlela leyi faneleke. Van’wana lava veke vahuweleri va Mfumo va tshike ku chumayela mahungu lamanene. Hambiswiritano, vanhu va fanele va hlanganyela kahle evutirhelini bya Vukreste va nga si khuvuriwa. Kutani va xi tiva kahle xileriso lexi Yesu a xi nyikeke valandzeri vakwe hinkwavo lexi nge: “Fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Handle ka loko va ri ni swihinga leswikulu ngopfu hikwalaho ka rihanyo kumbe swilo swin’wana leswi va nga kotiki ku swi lawula, vanhu lava khuvuriweke kambe va nga ha ri Timbhoni leti hisekaka ta Xikwembu na Kreste, a va hetisisi vutihlamuleri hinkwabyo lebyi va nga na byona emahlweni ka Mutumbuluxi wa hina Lonkulu.—Esaya 43:10-12.
7. Ha yini hi fanele hi hlangana nkarhi na nkarhi evugandzerini?
7 Vaisrayele va khale a va ri tiko leri tinyiketeleke eka Xikwembu, naswona hi ku ya hi ntwanano wa Nawu, vanhu va kona a va ri ni vutihlamuleri byo karhi eka Yehovha. Hi xikombiso, vavanuna hinkwavo a va fanele va hlangana kanharhu hi lembe va tlangela minkhuvo yo karhi, naswona wanuna loyi a nga yi tlangelangiki Paseka ha vomu, a a fanele a ‘dlayiwa.’ (Tinhlayo 9:13; Levhitika 23:1-43; Deteronoma 16:16) Leswaku va hetisisa vutihlamuleri lebyi a va ri na byona eka Xikwembu tanihi vanhu va xona lava tinyiketeleke, Vaisrayele a va fanele va hlengeletana va xi gandzela. (Deteronoma 31:10-13) A wu nga ri kona Nawu lowu a wu ku, ‘Endla leswi loko xiyimo xa wena xi ku pfumelela.’ Eka lava sweswi va tinyiketeleke eka Yehovha, leswi swi engetela ntikelo wa marito ya Pawulo lama nge: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Ina, ku hlangana ni vapfumeri-kulorhi nkarhi na nkarhi i vutihlamuleri byin’wana lebyi Mukreste la tinyiketeleke a nga na byona eka Xikwembu.
Hluta Swiboho Swa Wena Kahle!
8. Ha yini munhu la ha tsakamaka, loyi a tinyiketeleke, a fanele ku wu anakanyisisa hi xikhongelo ntirho wakwe wo kwetsima?
8 Kumbexana u muntshwa loyi a tinyiketeleke eka Yehovha. U ta va ni mikateko leyi fuweke loko u hambeta u rhangisa timhaka ta Mfumo evuton’wini bya wena. (Swivuriso 10:22) Hi xikhongelo ni ku kunguhata lokunene, u nga swi kota ku heta malembe yo karhi ya vuntshwa bya wena u endla vutirheli byin’wana bya nkarhi hinkwawo—ku nga ndlela leyinene yo kombisa leswaku u tsundzuka Mutumbuluxi wa wena Lonkulu. Handle ka swona, ku hlongorisa swilo leswi vonakaka ku nga sungula ku ku tekela nkarhi wo tala, naswona u nga tikuma u khomeke ngopfu ha swona. Ku fana ni vanhu van’wana vo tala, u nga nghenela vukati wa ha ri ntsongo naswona u tipeta eswikweletini leswaku u kuma swilo leswi vonakaka. Ntirho lowu hakelaka mali yo tala wu nga lava nkarhi ni matimba ya wena yo tala. Loko u ri ni vana, u ta boheka ku byarha vutihlamuleri bya ndyangu hi makume ya malembe. (1 Timotiya 5:8) Swi nga endleka u nga n’wi rivalanga Mutumbuluxi wa wena Lonkulu, kambe i vutlhari ku xiya leswaku vumundzuku bya wena loko se u dyuharile byi ta titshega hi ku kunguhata ka wena ka ha ri emahlweni kumbe ku tsandzeka ka wena ku kunguhata. Loko se u dyuharile, u nga tisola hi ku ka u nga hetanga nkarhi wo tala u endlela Mutumbuluxi Lonkulu ntirho wo kwetsima loko wa ha tsakama. Ha yini u nga anakanyisisi hi vumundzuku bya wena hi xikhongelo sweswi, leswaku u ta eneriseka hi ku endlela Yehovha ntirho wo kwetsima loko wa ha tsakama?
9. I yini leswi nga kotekaka eka munhu la dyuhaleke loyi a tshameke a va ni vutihlamuleri lebyikulu evandlheni?
9 Xiya swiyimo swin’wana—swa wanuna loyi a tshameke a va murisi wa “ntlhambi wa Xikwembu.” (1 Petro 5:2, 3) Hi xivangelo xo karhi, a nga va a tshike malunghelo yo tano hi ku tirhandzela. Kunene, sweswi a nga va a dyuharile, naswona swi nga va swi n’wi tikela swinene ku ya emahlweni ni ntirho wa Xikwembu. Kambe, xana a nga swi kota ku tikarhatela ku tlhela a fanelekela malunghelo ya swa le tilweni? Wanuna wo tano a nga va nkateko lowukulu eka van’wana, loko a kota ku byarha vutihlamuleri lebyi engetelekeke evandlheni! Naswona, leswi ku nga riki na loyi a tihanyelaka ntsena, vanghana ni lava va n’wi rhandzaka va ta tsaka loko a kota ku engetela vutirheli bya yena, a dzunisa Xikwembu. (Varhoma 14:7, 8) Xa nkoka ku tlula hinkwaswo, Yehovha a nge swi rivali leswi munhu a swi endlaka entirhweni wa yena. (Vaheveru 6:10-12) Kutani ke, i yini lexi nga hi pfunaka ku tsundzuka Mutumbuluxi wa hina Lonkulu?
Swilo Leswi Nga Hi Pfunaka Ku Tsundzuka Mutumbuluxi Wa Hina Lonkulu?
10. Ha yini muhlengeleti a a swi fanelekela kahle ku andlala vukongomisi emhakeni ya ku tsundzuka Mutumbuluxi wa hina Lonkulu?
10 Muhlengeleti a a swi fanelekela kahle ku andlala vukongomisi bya ku tsundzuka Mutumbuluxi wa hina Lonkulu. Yehovha u hlamule swikhongelo swakwe leswi humaka embilwini hi ku n’wi nyika vutlhari lebyikulu. (1 Tihosi 3:6-12) Solomoni u kambisise timhaka hinkwato ta vanhu hi vuenti. Ku tlula kwalaho, u huhuteriwe hi Xikwembu leswaku a tsala swilo leswi a swi tshubuleke leswaku a ta pfuna van’wana. U tsarile a ku: “[Muhlengeleti] a v̌a a tlharihile; a engeta kambe a dyonḍisa tiko e ku tlhariha, kutani a v̌utisisa, a lav̌isisa, a lungisa marito la’yo tala ya v̌utlhari. [Muhlengeleti] o tšhiv̌erike ku kuma ŝihlambanyiso le’ŝi ṭakisaka, kutani le’ŝi ṭariweke hi ku lulama, i marito ya ntiyiso.”—Eklesiasta 12:9, 10.
11. Ha yini hi fanele hi amukela ndzayo ya Solomoni ya vutlhari?
11 Septuagint ya Xigriki yi hundzuluxela marito lawa hi ndlela leyi: “Ku tlula kwalaho, muchumayeri a a tlharihile, kutani u dyondzise vanhu vutlhari; leswaku ndleve yi twa swifaniso leswinene, muchumayeri u endle ndzavisiso lowukulu leswaku a kuma marito lama tsakisaka ni ku tsala timhaka letinene—marito ya ntiyiso.” (The Septuagint Bible, leyi hundzuluxeriweke hi Charles Thomson) Solomoni u ringete ku fikelela timbilu ta vahlayi va yena hi marito lamanene ni timhaka leti tsakisaka swinene ni leti faneleke. Tanihi leswi marito yakwe lama kumekaka eMatsalweni ma huhuteriweke hi moya wo kwetsima, hi nga swi amukela hi mbilu hinkwayo leswi a swi tshubuleke, kun’we ni ndzayo yakwe ya vutlhari.—2 Timotiya 3:16, 17.
12. Hi marito ya wena, u nga swi hlamusela njhani leswi vuriweke hi Solomoni, hi ku ya hi Eklesiasta 12:11, 12?
12 Hambileswi a ku nga si va ni michini ya manguva lawa ya ku kandziyisa, a ku ri ni tibuku to tala enkarhini wa Solomoni. Xana tibuku leti a ti fanele ti langutiwa njhani? U te: “Marito ya la’v̌o tlhariha, ma fana ni tinsungunhu, loko ma hlengeletiwa ma fana ni timhingu le’ti gongonḍeriweke. V̌a nyikiwile hi Murisi a ri uṅwe. Oho! ṅwana nga, wa nga ṭunḍušiwa hi v̌ona, hikuv̌a a ku na ku hela e ku endleni ka tibuku le’to tala, kutani ku dyonḍa ngopfu ku karata nyama.”—Eklesiasta 12:11, 12.
13. Marito ya lava va nga ni vutlhari bya Xikwembu ma fana njhani ni tinsungunhu, naswona i vamani lava fanaka ni “timhingu le’ti gongonḍeriweke”?
13 Marito ya lava va nga ni vutlhari bya Xikwembu ma fana ni tinsungunhu. Njhani? Ma susumetela vahlayi kumbe vayingiseri leswaku va endla nhluvuko hi ku ya hi marito ya vutlhari lawa va ma hlayeke kumbe ku ma twa. Ku tlula kwalaho, lava va tinyiketeleke ku ‘hlengeleta swivulwa,’ kumbe marito ya vutlhari ni lama faneleke hakunene, va fana ni “timhingu le’ti gongonḍeriweke,” kumbe leti tiyisiweke. Leswi swi nga va swi vangiwa hileswi marito lamanene ya vanhu vo tano ma kombisaka vutlhari bya Yehovha, kutani ma nga tiyisa vahlayi kumbe vayingiseri. Loko u ri mutswari la chavaka Xikwembu, xana a swi nga ta va swinene leswaku u lwela ku nghenisa vutlhari byo tano emianakanyweni ni le mbilwini ya n’wana wa wena?—Deteronoma 6:4-9.
14. (a) I tibuku ta muxaka muni leti “ku [ti] dyonḍa ngopfu” swi nga pfuniki nchumu? (b) I tibuku tihi leti hi faneleke hi ti tirhisa swinene, naswona ha yini?
14 Kambe ke, ha yini Solomoni a vule leswi a swi vuleke mayelana ni tibuku? Loko hi teka tibuku to tala ta misava leyi hi ti ringanisa ni Rito ra Yehovha, hi kuma leswaku tibuku ta misava ti tamele miehleketo ya vanhu ntsena. Hakanyingi miehleketo ya kona yi fambisana ni mianakanyo ya Sathana Diyavulosi. (2 Vakorinto 4:4) Hikwalaho, “ku dyonḍa ngopfu” tibuku to tano ta misava a swi yisi helo. Kahle-kahle to tala ta tona ti nga vanga khombo hi tlhelo ra moya. Ku fana na Solomoni, a hi anakanyisiseni hi leswi Rito ra Xikwembu ri swi vulaka malunghana ni vutomi. Leswi swi ta tiyisa ripfumelo ra hina ni ku hi tshineta ekusuhi na Yehovha. Ku heta nkarhi wo tala ngopfu hi hlaya tibuku tin’wana, kumbe swilo leswi tameleke rungula ro karhi, swi nga hi hlakata. Ngopfu-ngopfu loko xihlovo xa swilo swo tano ku ri mianakanyo ya misava leyi lwisanaka ni vutlhari bya Xikwembu, swi va leswi nyameke naswona swi onha ripfumelo leri munhu a nga na rona eka Xikwembu ni le ka swikongomelo swa xona. Kutani ke, a hi tsundzukeni leswaku matsalwa lama pfunaka ngopfu ya le nkarhini wa Solomoni ni wa hina hi lama kombisaka vutlhari bya “Murisi a ri uṅwe,” ku nga Yehovha Xikwembu. U lunghiselele tibuku ta 66 ta Matsalwa yo Kwetsima, kutani hi fanele hi ti kambisisa swinene. Bibele ni tibuku leti pfunaka ta “hlonga ro tshembeka” ti hi pfuna ku kuma ku “tiv̌a ka Šikwembu.”—Swivuriso 2:1-6.
Vutihlamuleri Hinkwabyo Lebyi Hi Nga Na Byona Eka Xikwembu
15. (a) Xana u nga ma hlamusela njhani marito ya Solomoni malunghana ni “vutihlamuleri hinkwabyo bya munhu”? (b) Hi fanele hi endla yini leswaku hi hetisisa vutihlamuleri lebyi hi nga na byona eka Xikwembu?
15 Loko a katsakanya vulavisisi byakwe hinkwabyo, muhlengeleti, Solomoni, u ri: “Loko hinkwaswo swi twiwile, makumu ya mhaka hi lawa: Chava Xikwembu xa ntiyiso u hlayisa swileriso swa xona. Hikuva lebyi hi byona vutihlamuleri hinkwabyo bya munhu. Hikuva Xikwembu xa ntiyiso xi ta avanyisa ntirho wa muxaka wun’wana ni wun’wana malunghana ni nchumu wun’wana ni wun’wana lowu fihliweke, mayelana ni loko wu ri wunene kumbe wu ri wo biha.” (Eklesiasta 12:13, 14, NW) Ku va ni xichavo lexinene eka Mutumbuluxi wa hina Lonkulu swi ta sirhelela hina, kumbexana ni mindyangu ya hina, leswaku hi papalata mahanyelo lama nga vangaka maxangu ni ku karhateka lokukulu eka hina ni le ka lava hi va rhandzaka. Ku va ni xichavo lexinene eka Xikwembu i nchumu lowunene naswona i masungulo ya vutlhari ni vutivi. (Pisalema 19:9; Swivuriso 1:7) Loko hi ri ni ku twisisa loku sekeriweke eRitweni ra Xikwembu leri huhuteriweke, naswona hi tirhisa ndzayo ya rona eka swilo hinkwaswo, hi ta va hi hetisisa “vutihlamuleri hinkwabyo” lebyi hi nga na byona eka Xikwembu. Kunene, leswi a swi vuli ku endla nxaxamelo wa vutihlamuleri lebyi u nga na byona. Ku ri na sweswo, leswi lavekaka hi leswaku hi tirhisa Matsalwa loko hi tlhantlha swiphiqo swa vutomi, naswona minkarhi hinkwayo hi endla swilo hi ndlela ya Xikwembu.
16. Malunghana ni ku avanyisa, i yini leswi Yehovha a nga ta swi endla?
16 Hi fanele hi lemuka leswaku a ku na nchumu lexi Mutumbuluxi wa hina Lonkulu a nga xi xiyiki. (Swivuriso 15:3) U “ta avanyisa ntirho wa muxaka wun’wana ni wun’wana.” Ina, La nge Henhla-henhla u ta avanyisa swilo hinkwaswo, ku katsa ni leswi vanhu va nga swi voniki. Ku lemuka sweswo swi nga hi susumetela ku hlayisa swileriso swa Xikwembu. Kambe nsusumeto lowukulu swinene ku fanele ku va ku rhandza Tata wa hina wa le tilweni, hikuva muapostola Yohane u tsarile a ku: “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.” (1 Yohane 5:3) Naswona, leswi swileriso swa Xikwembu swi endleriweke ku hi hlayisa hilaha ku nga heriki, kutani ku swi yingisa swi fanerile naswona i vutlhari lebyikulu. Leswi a hi khwarha eka vanhu lava rhandzaka Mutumbuluxi Lonkulu. Va swi tsakela ku hetisisa vutihlamuleri lebyi va nga na byona eka yena.
Hetisisa Vutihlamuleri Bya Wena Hinkwabyo
17. Hi ta endla yini loko hi swi tsakela hakunene ku hetisisa vutihlamuleri hinkwabyo lebyi hi nga na byona eka Xikwembu?
17 Loko hi tlharihile naswona hi swi tsakela hi mbilu hinkwayo ku hetisisa vutihlamuleri hinkwabyo lebyi hi nga na byona eka Xikwembu, handle ko hlayisa swileriso swa xona, hi ta chava ku xi hlundzukisa. Kunene, “ku tšhav̌a Yehova i ku sungula ka v̌utlhari,” naswona lava va yingisaka swileriso swa yena va ni “ku twisisa lo’kunene.” (Pisalema 111:10; Swivuriso 1:7) Hikwalaho, a hi endleni hi vutlhari hi yingisa Yehovha etimhakeni hinkwato. Sweswo i swa nkoka swinene sweswi, hikuva Hosi Yesu Kreste se u kona, naswona siku ra ku avanyisa ka yena tanihi Muavanyisi la vekiweke hi Xikwembu ri tshinele.—Matewu 24:3; 25:31, 32.
18. Ku ta va ni vuyelo byihi eka hina loko hi hetisisa vutihlamuleri hinkwabyo lebyi hi nga na byona eka Yehovha Xikwembu?
18 Un’wana ni un’wana wa hina u le ku kambisisiweni hi Xikwembu sweswi. Xana hi rhandza timhaka ta moya, kumbe, xana hi tshike minkucetelo ya misava yi tsanisa vuxaka lebyi hi nga na byona na Xikwembu? (1 Vakorinto 2:10-16; 1 Yohane 2:15-17) Hambi ha ha tsakama kumbe hi dyuharile, a hi endleni hinkwaswo leswi hi nga swi kotaka leswaku hi tsakisa Mutumbuluxi wa hina Lonkulu. Loko hi yingisa Yehovha naswona hi hlayisa swileriso swa yena, hi ta papalata swilo swa hava swa misava leyi ya khale yi hundzaka. Kutani hi nga va ni ntshembo wo kuma vutomi lebyi nga heriki emafambiselweni lamantshwa ya swilo lama tshembisiweke hi Xikwembu. (2 Petro 3:13) Lowu i ntshembo lowunene swonghasi eka hinkwavo lava hetisisaka vutihlamuleri hinkwabyo lebyi va nga na byona eka Xikwembu!
A Wu Ta Hlamurisa Ku Yini Ke?
◻ Ha yini u nga vulaka leswaku a hi swilo hinkwaswo leswi nga vuhava?
◻ Ha yini Mukreste la ha riki muntshwa a fanele a wu anakanyisisa hi xikhongelo ntirho wakwe wo kwetsima?
◻ I tibuku ta muxaka muni leti swi nga pfuniki nchumu ku ti “dyonḍa ngopfu”?
◻ Hi byihi “vutihlamuleri hinkwabyo bya munhu”?
[Xifaniso lexi nga eka tluka 20]
A hi swilo hinkwaswo swi nga vuhava eka lava va tirhelaka Yehovha
[Xifaniso lexi nga eka tluka 23]
Ku hambana ni tibuku to tala ta misava leyi, Rito ra Xikwembu ra phyuphyisa ni ku pfuna