Swikombo Swa Mikandziyiso Leyi Nga Eka Xiyimiso Xa Mihlangano Xa Mahanyelo Ni Ntirho Wa Hina Wo Chumayela
FEBRUARY 4-10
LESWI HI SWI DYONDZAKA EBIBELENI | VARHOMA 1-3
“Tshama U Ri Karhi U Letela Ripfalo Ra Wena”
(Varhoma 2:14, 15) Hikuva loko vanhu va matiko lava nga riki na nawu, va swi endla hi ntumbuluko swilo swa nawu, vanhu lava, hambileswi va nga riki na nawu, vona i nawu eka vona vini. 15 Hi vona lava kombisaka leswaku mhaka ya nawu yi tsariwile etimbilwini ta vona, kasi na rona ripfalo ra vona i mbhoni ya vona, kutani miehleketo ya vona vini, ya va hehla kumbe hambi ku ri ku va yimelela.
U Fanele U Endla Yini Leswaku U Va Ni Ripfalo Lerinene?
Xana nyiko leyi ya ripfalo yi kumiwa hi malandza ya Yehovha ntsena? Anakanya hi marito ya muapostola Pawulo lama huhuteriweke loko a ku: “Hikuva loko vanhu va matiko lava nga riki na nawu, va swi endla hi ntumbuluko swilo swa nawu, vanhu lava, hambileswi va nga riki na nawu, vona i nawu eka vona vini. Hi vona lava kombisaka leswaku mhaka ya nawu yi tsariwile etimbilwini ta vona, kasi na rona ripfalo ra vona i mbhoni ya vona, kutani miehleketo ya vona vini, ya va hehla kumbe hambi ku ri ku va yimelela.” (Varhoma 2:14, 15) Hambi ku ri vanhu lava nga wu tiviki nawu wa Yehovha, minkarhi yin’wana ripfalo ra vona ri nga va khutaza leswaku va endla nchumu lowu fambisanaka ni nawu wa Xikwembu.
(Varhoma 2:15) Hi vona lava kombisaka leswaku mhaka ya nawu yi tsariwile etimbilwini ta vona, kasi na rona ripfalo ra vona i mbhoni ya vona, kutani miehleketo ya vona vini, ya va hehla kumbe hambi ku ri ku va yimelela.
U Fanele U Endla Yini Leswaku U Va Ni Ripfalo Lerinene?
Xana u nga xi endla njhani xiboho lexi pfumelelanaka ni ripfalo ra wena? Swi vonaka onge van’wana va yingisela ndlela leyi va titwaka ha yona kutani va endla xiboho hi ku ya hi leswaku va titwa njhani hi mhaka ya kona. Va nga ha ku, “Ripfalo ra mina a ri karhateki.” Kambe ku navela ka mbilu ku nga va kukulu lerova ku kanganyisa ni ripfalo. Bibele yi ri: “Mbilu yi kanganyisa ngopfu ku tlula hinkwaswo naswona yi ni khombo. I mani la nga yi tivaka?” (Yeremiya 17:9) Hikwalaho, a hi fanelanga ku rhanga hi ku kambisisa leswi laviwaka hi mbilu ya hina. Kambe hi fanele hi rhanga hi kambisisa leswi tsakisaka Yehovha Xikwembu.
Loko hi endla xiboho lexi pfumelelanaka ni ripfalo ra hina leri leteriweke kahle, xiboho xa kona xi ta komba leswaku hi xixima Xikwembu ku nga ri ku endla leswi naveriwaka hi timbilu ta hina. Xiya xikombiso lexi landzelaka. Ndhuna-nkulu Nehemiya, loyi a a ri ni ripfumelo a a ri ni mfanelo yo hakerisa vanhu va le Yerusalema xibalo xo karhi. Kambe a nga swi endlanga sweswo. Ha yini? Hikuva a a nga lavi ku hlundzukisa Yehovha, hi ku tshikilela vanhu va yena. U te: “A ndzi endlanga hi ndlela yoleyo hikwalaho ka ku chava Xikwembu.” (Nehemiya 5:15) I swa nkoka ku chava Xikwembu hi mbilu hinkwayo, hi nga hlundzukisi Tata wa hina la nge matilweni. Xichavo xo tano xi ta hi pfuna leswaku hi rhanga hi lava nkongomiso wa Rito ra Xikwembu hi nga si endla swiboho swo karhi.—Vona nhlamuselo ya le hansi 6.
Endla Ndzavisiso
(Varhoma 3:4) Sweswo swi nga tshuki swi endleka! Kambe Xikwembu a xi kumeke xi ri ni ntiyiso, hambiloko munhu un’wana ni un’wana a kumeka a ri muhembi, hilaha swi tsariweke hakona: “Leswaku u ta kombisiwa u ri loyi a lulameke emaritweni ya wena ni leswaku u ta hlula loko u avanyisiwa.”
Tinhla-nkulu Ta Papila Leri Yaka Eka Varhoma
3:4. Loko leswi vanhu va swi vulaka swi hambana ni leswi vuriwaka hi Xikwembu eRitweni ra xona, hi endla leswaku ‘Xikwembu xi kumeka xi ri ni ntiyiso’ hi ku tshemba rungula ra le Bibeleni ni ku hanya hi ku pfumelelana ni ku rhandza ka Xikwembu. Hi nga pfuna van’wana leswaku va vona Xikwembu xi ri ni ntiyiso hi ku hiseka entirhweni wo chumayela hi Mfumo ni wa ku endla vadyondzisiwa.
(Varhoma 3:24, 25) kutani i nyiko ya mahala leyi endleke leswaku va vuriwa lava lulameke hi musa lowu nga faneriwiki, hi ku ntshunxiwa hi nkutsulo lowu hakeriweke hi Kreste Yesu. 25 Xikwembu xi n’wi nyikerile a va gandzelo ra ku vuyelelana hi ku va ni ripfumelo engatini ya yena. Leswi xi swi endlele ku kombisa ku lulama ka xona n’wini, hikuva a xi rivalela swidyoho leswi humeleleke enkarhini lowu hundzeke loko Xikwembu xi ri karhi xi lehisa mbilu.
Tinhla-nkulu Ta Papila Leri Yaka Eka Varhoma
3:24, 25—Xana “nkutsulo lowu hakeriweke hi Kreste Yesu” wu nga swi funengeta njhani “swidyoho leswi humeleleke enkarhini lowu hundzeke” wu nga si nyikeriwa? Vuprofeta byo sungula lebyi vulavulaka hi Mesiya lebyi tsariweke eka Genesa 3:15 byi hetiseke hi 33 C.E. loko Yesu a dlayiwa emhandzini ya nxaniso. (Gal. 3:13, 16) Hambiswiritano, loko Yehovha a vula vuprofeta byebyo a swi fana ni loko hakelo ya nkutsulo se yi hakeriwile hi ku ya hi langutelo ra yena, hikuva a xi kona lexi nga sivelaka Xikwembu leswaku xi hetisisa leswi xi tiyimiseleke ku swi endla. Kutani Yehovha a a ta rivalela swidyoho swa vatukulu va Adamu lava kombiseke ripfumelo eka xitshembiso xolexo, exisekelweni xa gandzelo ra le nkarhini lowu taka ra Yesu Kreste. Nakambe nkutsulo wu ta endla leswaku lava feke Vukreste byi nga si va kona va pfuxiwa eku feni.—Mint. 24:15
Ku Hlayiwa Ka Bibele
(Varhoma 1:1-17) Mina Pawulo, hlonga ra Yesu Kreste, la vitaniweke leswaku a va muapostola, la hlawuleriweke mahungu lamanene ya Xikwembu, 2 lawa xi ma tshembiseke ka ha ri emahlweni eMatsalweni yo kwetsima hi ku tirhisa vaprofeta va xona, 3 malunghana ni N’wana wa xona, la humeke eka mbewu ya Davhida hi tlhelo ra nyama, 4 kambe loyi hi matimba a vuriweke N’wana wa Xikwembu hi tlhelo ra moya wa vukwetsimi hi ku pfuxiwa eka lava feke—ina, Yesu Kreste Hosi ya hina, 5 loyi ha yena hi amukeleke musa lowu nga faneriwiki ni vuapostola leswaku matiko hinkwawo ma va ni ripfumelo evitweni rakwe, 6 ku nga matiko lawa na n’wina mi vitaniweke eka wona leswaku mi va va Yesu Kreste— 7 eka hinkwavo lava va nga eRhoma lava nga varhandziwa va Xikwembu, lava vitaniweke leswaku va va vakwetsimi: Onge mi nga va ni musa lowu nga faneriwiki ni ku rhula leswi humaka eka Xikwembu Tata wa hina ni le ka Hosi Yesu Kreste. 8 Xo sungula eka hinkwaswo, ndzi nkhensa Xikwembu xa mina ha Yesu Kreste hikwalaho ka n’wina hinkwenu, hikuva ku vulavuriwa hi ripfumelo ra n’wina emisaveni hinkwayo. 9 Hikuva Xikwembu, lexi ndzi endlaka ntirho wa xona wo kwetsima hi moya wa mina mayelana ni mahungu lamanene ya N’wana wa xona, i mbhoni ya mina emhakeni ya leswaku a ndzi tshiki ku vulavula hi n’wina eswikhongelweni swa mina nkarhi hinkwawo, 10 ndzi kombela leswaku loko swi koteka, ndzi nga hetelela ndzi humelerile loko Xikwembu xi swi rhandza leswaku ndzi ta eka n’wina. 11 Hikuva ndzi navela ku mi vona, leswaku ndzi ta mi nyika nyiko yo karhi ya moya, mi ta tiyisiwa; 12 kumbe, leswaku mi ta khutazana, un’wana hi ripfumelo ra un’wana, ra n’wina ni ra mina. 13 Kambe, vamakwerhu, a ndzi lavi mi nga swi tivi leswaku hi minkarhi yo tala a ndzi tiyimisele ku ta eka n’wina, kambe ndzi siveriwile ku fikela sweswi, leswaku ndzi ta kuma mihandzu yo karhi ni le ka n’wina, tanihi le ka matiko laman’wana hinkwawo. 14 Eka Magriki swin’we ni le ka Vabarbara, eka lavo tlhariha swin’we ni le ka swihunguki ndzi ni nandzu: 15 kutani ndzi ni mapfundza yo vula mahungu lamanene ni le ka n’wina kwalaho Rhoma. 16 Hikuva a ndzi khomiwi hi tingana hi mahungu lamanene; entiyisweni, i matimba ya Xikwembu ya ku ponisa un’wana ni un’wana la nga ni ripfumelo, ku sungula hi Muyuda, ku ya ni le ka Mugriki; 17 hikuva ku lulama ka Xikwembu ka hlavuteriwa eka wona hikwalaho ka ripfumelo ni le ripfumelweni, hilaha ku tsariweke hakona: “Kambe loyi a lulameke—u ta hanya hikwalaho ka ripfumelo.”
FEBRUARY 11-17
LESWI HI SWI DYONDZAKA EBIBELENI | VARHOMA 4-6
“Xikwembu Xi Tiyisekisa Rirhandzu Ra Xona N’wini Eka Hina”
(Varhoma 5:8) Kambe Xikwembu xi tiyisekisa rirhandzu ra xona n’wini eka hina, hileswi Kreste a hi feleke, loko ha ha ri vadyohi.
(Varhoma 5:12) Hi yona mhaka leyi, tanihi leswi xidyoho xi ngheneke emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile—.
Xikwembu Xi Tiyisekisa Rirhandzu Ra Xona Eka Hina
Pawulo u hlamusele mhaka leyi hi ku vula yinhla leyi: “Xidyoho xi [nghene] emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” (Rhom. 5:12) Hi nga swi kota ku twisisa mhaka leyi hikuva Xikwembu xi yi tsale ehansi ndlela leyi vanhu va vumbiweke ha yona. Yehovha u vumbe vanhu vambirhi, ku nga Adamu na Evha. Muvumbi u hetisekile, xisweswo vatswari va hina vo sungula na vona a va hetisekile. Xikwembu xi va nyike nawu wun’we ntsena naswona xi va byele leswaku loko va nga wu yingisi a va ta gweveriwa rifu. (Gen. 2:17) Hambiswiritano, va hlawule ku teka goza leri nga ni khombo, va tlula nawu wa Xikwembu lowu twisisekaka, xisweswo va fularhela Xikwembu lexi nga Munyiki wa nawu ni Hosi leyi Lawulaka.—Det. 32:4, 5.
(Varhoma 5:13, 14) Hikuva wu nga si fika Nawu xidyoho a xi ri kona emisaveni, kambe a ku hehliwi munhu hi xidyoho loko ku nga ri na nawu. 14 Nilokoswiritano, rifu i hosi ku sukela eka Adamu ku ya fika eka Muxe, hambi ku ri ni le ka lava va nga dyohangiki hi ku landza ku tlula nawu ka Adamu, loyi a nga xifanekiselo xa loyi a a ta ta.
Xikwembu Xi Tiyisekisa Rirhandzu Ra Xona Eka Hina
Adamu u veleke vana endzhaku ka loko a dyohile, kutani u hundzisele xidyoho ni vuyelo bya xona eka vana volavo hinkwavo. Entiyisweni, ku hambana na Adamu, vona a va xi tlulanga xileriso xa Xikwembu, xisweswo a va gweveriwanga xidyoho lexi fanaka; naswona hi nkarhi wolowo ku hava nawu lowu a va nyikiwe wona. (Gen. 2:17) Hambiswiritano, vana va Adamu va velekiwe va ri ni xidyoho. Kutani xidyoho ni rifu swi fume kukondza Xikwembu xi nyika Vaisrayele nawu lowu wu swi vekeke erivaleni leswaku i vadyohi. (Hlaya Varhoma 5:13, 14.) Vuyelo bya xidyoho byi nga ha fanisiwa ni mavabyi man’wana lawa hi nga ha velekiwaka na wona. Hambileswi vana van’wana va nga ha velekiwaka ni vuvabyi byo karhi, a hi vana hinkwavo endyangwini wolowo va nga velekiwaka ni vuvabyi byebyo. Kambe a swi tano hi xidyoho. Hinkwerhu hi velekiwe hi ri ni xidyoho lexi hi xi kumeke eka Adamu naswona hikwalaho ka sweswo hinkwerhu hi ta fa. Xana xidyoho xexo xi ta kala xi hluriwa?
(Varhoma 5:18) Hikwalaho, leswi vanhu va mixaka hinkwayo va soriweke hikwalaho ka xivi xin’we, hi ku fanana ni hikwalaho ka xiendlo xin’we ntsena xa ku tsetselela, vanhu va mixaka hinkwayo va vuriwa lava lulameleke vutomi.
(Varhoma 5:21) Hi xikongomelo xihi? Leswaku leswi xidyoho xi veke hosi swin’we ni rifu, hi ku fanana, ni musa lowu nga faneriwiki wu kota ku va hosi hikwalaho ka ku lulama hi xikongomelo xa vutomi lebyi nga heriki, ha Yesu Kreste Hosi ya hina.
Xikwembu Xi Tiyisekisa Rirhandzu Ra Xona Eka Hina
Xi vula yini xiga xa Xigriki lexi nge “va vuriwa lava lulameke”? Muhundzuluxeri un’wana wa Bibele u tsale leswi hi xiga lexi: “I xigego lexi tirhisiwaka ehubyeni kambe xi nga humiki etimhakeni ta nawu. Xi vulavula hi ku cinca ka xiyimo xa munhu hi ku ya hi Xikwembu, ku nga ri ku cinca ka le ndzeni ka munhu . . . Xigego lexi xi hlamusela Xikwembu tanihi muavanyisi loyi a tekeke xiboho xo yima ni muhehliwa loyi a tisiweke ehubyeni ya xona yo fanekisela, loyi a hehliwaka hi ku endla swilo leswi nga lulamangiki. Kambe Xikwembu xi vula leswaku muhehliwa a nga na nandzu.”
‘Muavanyisi wo lulama wa misava hinkwayo’ a a nga ta n’wi vona nandzu munhu loyi a nga lulamangiki hi ku ya hi xisekelo xihi? (Gen. 18:25) Goza ro sungula leri Xikwembu xi ri tekeke i ku rhumela N’wana wa xona loyi a nga swakwe emisaveni. Yesu u endle ku rhandza ka Tata wakwe hi ku hetiseka ku nga khathariseki ku ringiwa, ku hlekuriwa ni ku khomiwa hi ndlela yo biha. U tshame a tshembekile kukondza a fa emhandzini ya nxaniso. (Hev. 2:10) Loko Yesu a nyikela hi vutomi byakwe lebyi hetisekeke, u nyike vana va Adamu nkutsulo lowu a wu ta va ntshunxa eka xidyoho ni rifu.—Mat. 20:28; Rhom. 5:6-8.
Endla Ndzavisiso
(Varhoma 6:3-5) Kumbe, xana a mi swi tivi leswaku hinkwerhu ka hina lava hi khuvuriweke eka Kreste Yesu hi khuvuriwe eka rifu ra yena? 4 Hikokwalaho, hi yimberiwe na yena hileswi hi khuvuriweke eka rifu ra yena, leswaku, leswi Kreste a pfuxiweke eka lava feke hikwalaho ka ku vangama ka Tatana, na hina hi fanele hi famba hi vutomi lebyintshwa. 5 Hikuva loko hi hlanganile na yena hi rifu leri fanaka ni ra yena, hakunene hi ta tlhela hi hlanganisiwa na yena hi ku pfuka loku fanaka ni ka yena.
Tinhla-nkulu Ta Papila Leri Yaka Eka Varhoma
6:3-5—Xana swi vula yini ku khuvuriwa eka Kreste Yesu ni ku khuvuriwa eka rifu ra yena? Loko Yehovha a tota valandzeri va Kreste hi moya lowo kwetsima, va va ni vun’we na Yesu kutani va va swirho swa vandlha hileswaku miri wa Kreste, tanihi leswi yena a nga Nhloko ya rona. (1 Kor. 12:12, 13, 27; Kol. 1:18) Leswi hi swona leswi ku khuvuriwa eka Kreste Yesu swi vulaka swona. Vakreste lava totiweke na vona va “khuvuriwe eka rifu ra [Kreste]” hileswi va hanyaka vutomi bya ku tinyiketela kutani va tshika ntshembo wa vutomi lebyi nga heriki laha misaveni. Hikwalaho, rifu ra vona i ra ku tinyiketela ku fana ni rifu ra Yesu, hambileswi rifu ra vona ri nga riki na matimba yo kutsula. Ku khuvuriwa eka Kreste ka hela loko va fa kutani va pfuxeriwa ku ya hanya etilweni.
(Varhoma 6:7) Hikuva loyi a feke, xidyoho xa yena xi hlanguriwile.
Hi Wihi Ntshembo Lowu Nga Kona Hi Maxaka Ya Mina Lama Feke?
Loko lava nga lulamangiki va pfuxiwa, xana va ta avanyisiwa hi ku ya hi swiendlo swa vona swa nkarhi lowu hundzeke? Doo! Varhoma 6:7 yi ri: “Loyi a feke, xidyoho xa yena xi hlanguriwile.” Lava nga lulamangiki va ta va va hakele swidyoho swa vona hi ku fa. Va ta avanyisiwa hi ku ya hi leswi va nga ta swi endla endzhaku ka loko va pfuxiwile, ku nga ri leswi va swi endleke va nga si fa. Xana va ta vuyeriwa njhani?
Ku Hlayiwa Ka Bibele
(Varhoma 4:1-15) Leswi swi nga tano, xana hi ta ku yini hi Abrahama tata wa hina hi tlhelo ra nyama? 2 Hi xikombiso, loko Abrahama a vuriwe la lulameke hikwalaho ka mintirho, ingi a ve ni xivangelo xo tibuma; kambe hayi eka Xikwembu. 3 Hikuva tsalwa ri ri yini ke? “Abrahama u kombise ripfumelo eka Yehovha, naswona swi hlayiwe eka yena leswaku i ku lulama.” 4 Kutani eka munhu loyi a tirhaka, muholo a wu hlayiwi wu ri musa lowu nga faneriwiki, kambe wu ri nchumu lowu kolotiwaka. 5 Hi hala tlhelo, loko ku ri munhu loyi a nga tirhiki kambe a vaka ni ripfumelo eka loyi a kotaka ku vula la nga xiximiki Xikwembu leswaku u lulamile, ripfumelo ra yena ri hlayiwa leri lulameke. 6 Hilaha na Davhida a vulavulaka hakona hi ntsako wa munhu loyi Xikwembu xi n’wi hlayaka la lulameke handle ka mintirho: 7 “Va tsaka lava swiendlo swa vona swo kala nawu swi rivaleriweke, ni lava swidyoho swa vona swi funengetiweke; 8 wa tsaka munhu loyi xidyoho xakwe xi nga ta ka xi nga tsundzukiwi hi Yehovha.” 9 Kutani, xana ntsako lowu wu kumiwa hi vanhu lava yimbeke, kumbe wu kumiwa ni hi vanhu lava nga yimbangiki ke? Hikuva hi ri: “Ripfumelo ra Abrahama ri hlayeriwe yena leswaku i ku lulama.” 10 Kutani ri hlayiwe ehansi ka swiyimo swihi? Xana hi loko a yimbile kumbe a nga si yimba? Hayi loko a yimbile, kambe a nga si yimba. 11 Naswona u amukele xikombiso, lexi nga ku yimba, xi va mfungho wa ku lulama hikwalaho ka ripfumelo leri a a ri na rona loko a nga si yimba, leswaku a ta va tata wa hinkwavo lava va nga ni ripfumelo loko va ri evukhuneni, leswaku va hlayiwa lava lulameke; 12 ni leswaku a va tata wa vana lava yimbeke, ku nga ri wa lava va namarhelaka ku yimba ntsena, kambe ni wa lava fambaka hi mfanelo emitileni ya ripfumelo leri tata wa hina Abrahama a a ri na rona loko a nga si yimba. 13 Hikuva Abrahama kumbe mbewu ya yena a nga kumanga xitshembiso xa leswaku u ta va mudyandzhaka wa misava hikwalaho ka nawu, kambe u xi kume hikwalaho ka ku lulama, hi ripfumelo. 14 Hikuva loko lava va namarhelaka nawu va ri vadyandzhaka, ripfumelo ri endliwe leri nga tirhiki nchumu, naswona xitshembiso xi herisiwile. 15 Hakunene Nawu wu tswala vukarhi, kambe laha ku nga riki na nawu, ni ku tlula nawu a ku kona.”
FEBRUARY 18-24
LESWI HI SWI DYONDZAKA EBIBELENI | VARHOMA 7-8
“Xana U Ku ‘Langutele Hi Mahlongati’?”
(Varhoma 8:19) Hikuva ku langutela hi mahlongati ka ntumbuluko ku rindzele ku hlavuteriwa ka vana va Xikwembu.
Pfumelela Yehovha A Ku Kongomisa eNtshunxekweni Wa Xiviri
Loko Pawulo a vulavula hi ntshunxeko lowu Yehovha a wu vekeleke malandza yakwe ya laha misaveni, u tsale a ku: “Ku langutela hi mahlo-ngati ka ntumbuluko ku rindzele ku hlavuteriwa ka vana va Xikwembu.” U tlhele a ku: “Ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.” (Rhom. 8:19-21) “Ntumbuluko” wu fanekisela vanhu lava nga ni ntshembo wo hanya laha misaveni lava nga ta vuyeriwa loko ku “hlavuteriwa” vana va Xikwembu lava totiweke hi moya. Ku hlavuteriwa koloko ku ta sungula loko “vana” volavo lava nga etilweni va pfuna Kreste leswaku a lovisa vanhu hinkwavo vo homboloka ivi va kongomisa “ntshungu lowukulu” emisaveni leyintshwa.—Nhlav. 7:9, 14.
(Varhoma 8:20) Hikuva ntumbuluko wu vekiwe ehansi ka vuhava, ku nga ri hi ku rhandza ka wona, kambe hikwalaho ka loyi a wu vekeke, exisekelweni xa ntshembo
Ku Tsaka Hi Ntshembo Lowu Hi Nga Na Wona
“Yehovha u nyike vanhu ‘xisekelo xa ntshembo’ loko a va tshembisa ku va kutsula eka Sathana Diyavulosi, “nyoka ya khale,” hi ku tirhisa “mbewu” leyi tshembisiweke. (Nhlav. 12:9; Gen. 3:15) Xiphemu xo sungula xa “mbewu” yoleyo a ku ri Yesu Kreste. (Gal. 3:16) Rifu ra Yesu ni ku pfuxiwa kakwe swi endle leswaku vanhu va kota ku va ni ntshembo lowu tiyeke wo ntshunxiwa eka xidyoho ni rifu. Ku hetiseka ka ntshembo lowu ku fambisana ni “ku hlavuteriwa ka vana va Xikwembu.” Vatotiwa lava vangamisiweke i xiphemu xa vumbirhi xa “mbewu.” Va ta “hlavuteriwa” loko va pfuna Kreste leswaku a lovisa mafambiselo yo biha ya swilo ya Sathana. (Nhlav. 2:26, 27) Leswi swi ta endla leswaku lava tinyimpfu tin’wana lava humaka enhlomulweni lowukulu, va ponisiwa.—Nhlav. 7:9, 10, 14.
(Varhoma 8:21) leswaku ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.
Ku Tsaka Hi Ntshembo Lowu Hi Nga Na Wona
Hakunene hi nkarhi wa Mfumo wa Kreste wa Gidi ra Malembe, vanhu va ta kuma ntshunxeko lowukulu! Hi nkarhi wolowo, “vana va Xikwembu” va ta tlhela va “hlavuteriwa” loko va nyika vanhu mikateko ya gandzelo ra nkutsulo tanihi vaprista swin’we na Kreste. Loko Mfumo wa le tilweni se wu fuma misava, vanhu va ta ntshunxiwa hakatsongo-tsongo eka vuyelo bya xidyoho ni rifu. Va ta tlhela va “ntshunxiwa evuhlongeni bya ku onhaka” hakatsongo-tsongo. Loko va tshama va tshembekile eka Yehovha hi nkarhi wa gidi ra malembe ni hi nkarhi wa ndzingo wo hetelela lowu nga ta landzela, mavito ya vona ma ta tsariwa hi ku helela eka “buku-nsongwa ya vutomi.” Kutani va ta nghena eka “ntshunxeko lowu vangamaka wa vana va Xikwembu.” (Nhlav. 20:7, 8, 11, 12) Hakunene wolowo i ntshembo lowu hlamarisaka!
Endla Ndzavisiso
(Varhoma 8:6) Hikuva ku anakanya swa nyama swi vula rifu, kambe ku anakanya swa moya swi vula vutomi ni ku rhula;
Wa Tsundzuka Xana?
Hi kwihi ku hambana loku nga kona exikarhi ka ku “anakanya swa nyama” ni ku “anakanya swa moya”? (Rhom. 8:6)
Munhu loyi a anakanyaka swa nyama u lawuriwa hi ku navela kakwe kumbe u pfumela ku kanganyisiwa hi ku nga hetiseki kakwe naswona u tala ku vulavula hi swilo swa misava leyi. Munhu loyi a “anakanyaka swa moya” u anakanyisisa hi swilo leswi fambisanaka ni vuxaka byakwe ni Xikwembu naswona mianakanyo yakwe yi kongomisiwa hi moya lowo kwetsima. Ku anakanya swa nyama swi vula rifu kasi ku anakanya swa moya swi vula vutomi ni ku rhula.—w16.12, matl. 15-17.
(Varhoma 8:26, 27) Hi mukhuva lowu fanaka, ni moya wu hoxa xandla wu hi pfuna eku tsaneni ka hina; hikuva xiphiqo xa leswi hi faneleke ku khongelela swona, hilaha hi fanelaka ku endla hakona, a hi xi tivi, kambe moya hi woxe wa hi kombelela hi ku konya loku nga phofuriwiki. 27 Kambe loyi a lavisisaka timbilu u tiva leswi moya wu vulaka swona, hikuva wu kombelela vakwetsimi hi ku pfumelelana ni Xikwembu.
Swikhongelo Swa Wena Swi Paluxa Yini Hi Wena?
Minkarhi yin’wana hi nga ha va hi nga swi tivi leswi hi faneleke ku swi vula loko hi khongela hi ri hexe. Pawulo u tsale a ku: “Xiphiqo xa leswi hi faneleke ku khongelela swona, hilaha hi fanelaka ku endla hakona, a hi xi tivi, kambe moya [lowo kwetsima] hi woxe wa hi kombelela hi ku konya loku nga phofuriwiki. Kambe [Xikwembu lexi] lavisisaka timbilu [xi] tiva leswi moya wu vulaka swona.” (Rhom. 8:26, 27) Yehovha u endle leswaku swikhongelo swo tala swi tsariwa eMatsalweni. U amukela swikhongelo sweswo leswi huhuteriweke onge hiloko swi vuriwe hi hina kutani a swi hetisisa. Xikwembu xa hi tiva naswona xi tiva ni nhlamuselo ya swilo leswi xi endleke leswaku moya wa xona wu swi vula hi ku tirhisa vatsari va Bibele. Yehovha u hlamula swikhongelo swa hina loko moya wu hi “kombelela.” Kambe loko hi ya hi tiva Rito ra Xikwembu, leswi hi faneleke hi swi khongelela swi ta titela kunene emianakanyweni.
Ku Hlayiwa Ka Bibele
(Varhoma 7:13-25) Kutani, xana leswi nga swinene swi ve rifu eka mi-na? Sweswo swi nga tshuki swi endleka! Kambe i xidyoho lexi veke rifu, leswaku swi ta kombisiwa leswaku i xidyoho xi ndzi vangelaka rifu hi leswi nga swinene; leswaku xidyoho xi ta va ni vudyoho lebyikulu ngopfu hikwalaho ka xileriso. 14 Hikuva ha swi tiva leswaku Nawu i wa moya; kambe mina ndzi wa nyama, ndzi xaviseriwe xidyoho. 15 Hikuva leswi ndzi swi endlaka a ndzi swi tivi. Hikuva leswi ndzi swi navelaka a ndzi hanyi hi swona; kambe leswi ndzi swi vengaka hi swona leswi ndzi swi endlaka. 16 Hambiswiritano, loko leswi ndzi nga swi naveliki ku ri swona leswi ndzi swi endlaka, ndza pfumela leswaku Nawu i wunene. 17 Kambe a swa ha endliwi hi mina, kambe i xidyoho lexi tshamaka eka mina. 18 Hikuva ndza swi tiva leswaku eka mina, ku nga enyameni ya mina, a ku tshami nchumu lexinene; hikuva vuswikoti byo navela byi kona eka mina, kambe vuswikoti byo endla leswi nga swinene a byi kona. 19 Hikuva leswinene leswi ndzi swi navelaka a ndzi swi endli, kambe leswo biha leswi ndzi nga swi naveliki hi swona leswi ndzi hanyaka hi swona. 20 Loko leswi ndzi nga swi naveliki ku ri swona leswi ndzi swi endlaka, a swa ha endliwi hi mina, kambe i xidyoho lexi tshamaka eka mina. 21 Kutani eka mina ndzi kuma nawu lowu: leswaku loko ndzi navela ku endla leswi lulameke, leswo biha swi kona eka mina. 22 Kunene ndza wu tsakela nawu wa Xikwembu hi ku ya hi munhu loyi ndzi nga yena endzeni, 23 kambe eswirhweni swa mina ndzi vona nawu wun’wana lowu lwaka ni nawu wa mianakanyo ya mina, wu ndzi endla khumbi ra nawu wa xidyoho lowu nga eswirhweni swa mina. 24 Mina munhu wa maxangu! I mani loyi a nga ta ndzi ponisa eka miri lowu weriwaka hi rifu leri? 25 Ndzi nkhensa Xikwembu ha Yesu Kreste Hosi ya hina! Hikwalaho, emianakanyweni ya mina, ndzi hlonga ra nawu wa Xikwembu, kambe enyameni ya mina ndzi hlonga ra nawu wa xidyoho.
FEBRUARY 25–MARCH 3
LESWI HI SWI DYONDZAKA EBIBELENI | VARHOMA 9-11
“Xifaniso Xa Murhi Wa Mutlhwari”
(Varhoma 11:16) Ku tlula kwalaho, loko xiphemu lexi tekiweke tanihi swirhangana xi ri xo kwetsima, mbila na yona ya kwetsima; naswona loko rimitsu ri ri ro kwetsima, ni marhavi i yo kwetsima.
‘Mawaku Ku Enta Ka Vutlhari Bya Xikwembu!’
Muapostola Pawulo u fanisa lava vaka xiphemu xa mbewu ya Abrahama ni marhavi ya murhi wo fanekisela wa mutlhwari. (Rhom. 11:21) Murhi lowu wa mutlhwari wa le ntangeni wu fanekisela ku hetiseka ka xikongomelo xa Xikwembu malunghana ni ntwanano wa Abrahama. Rimitsu ra murhi lowu ra kwetsima naswona ri fanekisela Yehovha tanihi loyi a nyikaka Israyele wa moya vutomi. (Esa. 10:20; Rhom. 11:16) Miri wa murhi wu fanekisela Yesu tanihi xiphemu xo sungula xa mbewu ya Abrahama. Marhavi hinkwawo i “nhlayo leyi heleleke” ya lava katsiweke eka xiphemu xa vumbirhi xa mbewu ya Abrahama.
(Varhoma 11:17) Hambiswiritano, loko man’wana ya marhavi ma phatluriwile kambe wena u tlhomiwa ematshan’weni ya wona, hambileswi u nga mutlhwari wa nhova, kutani u hlanganyela eka rimitsu ra mafurha ra mutlhwari,
(Varhoma 11:20, 21) Hi swona! Ma phatluriwile hikwalaho ka ku pfumala ka wona ripfumelo, kambe wena u yimile hikwalaho ka ripfumelo. Tshika ku tikurisa, kambe u va ni xichavo. 21 Hikuva loko Xikwembu xi nga ma tsetselelanga marhavi ya ntumbuluko, na wena a xi nge ku tsetseleli.
‘Mawaku Ku Enta Ka Vutlhari Bya Xikwembu!’
Kutani i yini leswi Yehovha a swi endleke leswaku a hetisisa xikongomelo xakwe? Pawulo u hlamusele leswaku marhavi ya murhi wa mutlhwari lowu nga wa nhova ma tlhomiwe eka murhi wa mutlhwari wa le ntangeni leswaku ma siva lama phatluriweke. (Hlaya Varhoma 11:17, 18.) Xisweswo, Vakreste lava nga vamatiko lava totiweke hi moya, vo fana ni van’wana evandlheni ra le Rhoma, a va tlhomiwe hi ndlela yo fanekisela eka murhi lowu wo fanekisela wa mutlhwari. Hi ndlela yoleyo va ve xiphemu xa mbewu ya Abrahama. Eku sunguleni, a va fana ni marhavi ya mutlhwari wa nhova, a va nga ri na rona lunghelo ro va xiphemu xa ntwanano lowu wo hlawuleka. Kambe Yehovha u va pfulele ndlela yo va Vayuda va moya.—Rhom. 2:28, 29.
(Varhoma 11:25, 26) Hikuva, vamakwerhu, a ndzi lavi leswaku mi nga xi tivi xihundla lexi xo kwetsima, leswaku mi nga tivoni onge mi tlharihile ematihlweni ya n’wina: leswaku tiko ra Israyele ri tlanyarile, ku fikela loko nhlayo leyi heleleke ya vanhu va matiko yi nghenile, 26 kutani tiko hinkwaro ra Israyele ri ta ponisiwa hi mukhuva lowu. Hilaha ku tsariweke hakona: “Mukutsuri u ta huma hi le Siyoni, a susa mikhuva ya ku nga xiximi Xikwembu eka Yakobe.
‘Mawaku Ku Enta Ka Vutlhari Bya Xikwembu!’
Xikongomelo xa Yehovha malunghana na “Israyele wa Xikwembu” xi le ku hetisekeni hi ndlela leyi hlamarisaka. (Gal. 6:16) Hilaha Pawulo a vuleke hakona, “tiko hinkwaro ra Israyele ri ta ponisiwa.” (Rhom. 11:26) Hi nkarhi lowu faneleke wa Yehovha, “tiko hinkwaro ra Israyele,” ku nga nhlayo leyi heleleke ya Vaisrayele va moya, ri ta va tihosi ni vaprista etilweni. Ku hava nchumu lowu nga sivelaka xikongomelo xa Yehovha!
Endla Ndzavisiso
(Varhoma 9:21-23) Yini? Xana muvumbi a nga na wona matimba eka vumba, leswaku hi gavadi rin’we a endla xibya xin’wana leswaku xi tirhiseriwa leswi xiximekaka, xin’wana xi tirhiseriwa leswi nga xiximekiki? 22 Loko Xikwembu, hambileswi xi rhandzaka ku kombisa vukarhi bya xona ni ku tivisa matimba ya xona, xi swi tiyiselele hi mbilu yo leha swinene swibya swa vukarhi leswi endliweke swi faneriwa hi ku lovisiwa, 23 leswaku xi ta tivisa ku fuwa ka ku vangama ka xona ehenhla ka swibya swa tintswalo, leswi xi swi lunghiseleleke ka ha ri emahlweni leswaku swi va ni ku vangama,
Pfumelela Ku Tshinyiwa Hi Yehovha Ku Ku Vumba
Ku vuriwa yini loko vanhu va ala hi vomu ku pfumela ku vumbiwa hi Muvumbi Lonkulu? Kutani, u byi tirhisa njhani vulawuri bya yena? Anakanya hi leswi humelelaka eka vumba loko swi nga ha koteki ku vumba nchumu lowu muvumbi a a lava ku wu endla ha byona. Phela, muvumbi a nga ha vumba xibya xo karhi ha byona kumbe a byi lahla! Kambe, loko vumba byi nga ha pfuni nchumu hi ntolovelo xihoxo xi va xi ri ni muvumbi. Sweswo a swi tano hi Muvumbi wa hina. (Det. 32:4) Loko munhu a nga pfumeli ku vumbiwa hi Yehovha, minkarhi hinkwayo xihoxo xi va xi ri ni munhu yoloye. Yehovha u tirhisa vulawuri bya yena lebyi fanaka ni bya muvumbi eka vanhu hi ku cinca ndlela leyi a va vumbaka ha yona hi ku ya hi ndlela leyi va angulaka ha yona. Lava va n’wi yingisaka, va va va nkoka eka yena. Hi xikombiso, Vakreste lava totiweke i “swibya swa tintswalo” leswi vumbiweke swi va ‘swibya leswi tirhiseriwaka swilo leswi xiximekaka.’ Hi hala tlhelo, lava va alaka ku yingisa Xikwembu va ta va “swibya swa vukarhi leswi endliweke swi faneriwa hi ku lovisiwa.”—Rhom. 9:19-23.
(Varhoma 10:2) Hikuva ndzi mbhoni ya vona leswaku va xi hisekela Xikwembu; kambe ku nga ri hikwalaho ka vutivi lebyi kongomeke.
it-1 1260 ¶2
Mavondzo, Vukwele
Ku Hisekela Etlhelo. Munhu a nga ha hisekela ku endla ntirho wo karhi kambe wu bihile naswona wu nga xi tsakisi Xikwembu. A swi ri tano hi Vayuda vo tala va le minkarhini ya vaapostola. A va endla mintirho leyi a va ehleketa leswaku i yinene hi ku ya hi Nawu wa Muxe. Kambe Pawulo u va byele leswaku a va hisekela swa hava hikwalaho ka leswi a va pfumala vutivi lebyi kongomeke. Hikwalaho ka sweswo Xikwembu a xi nga va teki va ri lava lulameke. A va fanele va vona xihoxo xa vona ivi va hundzukela eka Xikwembu ha Kreste leswaku va ta tiva ku lulama va tlhela va tshunxeka eka xigwevo xa Nawu. (Rhm 10:1-10) Sawulo wa le Tarso a a ri un’wana wa lava byi hisekelaka etlhelo vukhongeri bya Xiyuda lerova u kale a “xanisa vandlha ra Xikwembu ni ku ri hlakata hilaha ku tlurisaka.” A a wu namarhela swinene Nawu lerova a ‘tikombisa a ri la pfumalaka xisandzu.’ (Ga 1:13, 14; Flp 3:6) Kambe mavondzo yakwe eka lava nga byi landzeleriki vukhongeri bya Xiyuda a ma nga amukeleki eka Xikwembu. A nga lo biha mbilu kambe o pfumala vutivi, hi swona swi endleke leswaku Yehovha a n’wi kombisa musa hi ku tirhisa Kreste leswaku a n’wi hundzulela eka vugandzeri bya ntiyiso.—1Tm 1:12, 13.
Ku Hlayiwa Ka Bibele
(Varhoma 10:1-15) Vamakwerhu, leswi mbilu ya mina yi swi navelaka ni xikombelo xa mina eka Xikwembu hikwalaho ka vona, kunene i ku ponisiwa ka vona. 2 Hikuva ndzi mbhoni ya vona leswaku va xi hisekela Xikwembu; kambe ku nga ri hikwalaho ka vutivi lebyi kongomeke; 3 hikuva, hikwalaho ka leswi va nga ku tiviki ku lulama ka Xikwembu, kambe va lavaka ku simeka ku lulama ka vona vini, a va tivekanga ehansi ka ku lulama ka Xikwembu. 4 Hikuva Kreste hi yena makumu ya Nawu, leswaku un’wana ni un’wana loyi a kombisaka ripfumelo a ta kuma ku lulama. 5 Hikuva Muxe u tsala leswaku munhu loyi a endleke ku lulama ka Nawu u ta hanya hi kona. 6 Kambe ku lulama loku humaka eripfumelweni ku vulavula hi mukhuva lowu: “U nga tshuki u vula embilwini ya wena u ku, ‘I mani loyi a nga ta tlhandlukela etilweni?’ hileswaku, a rhelerisa Kreste; 7 kumbe, ‘I mani loyi a nga ta xikela ekheleni ro enta?’ hileswaku, a humesa Kreste eka lava feke.” 8 Kambe ri ri yini? “Rito ri le kusuhi na wena, enon’wini wa wena, ni le mbilwini ya wena”; ku nga “rito” ra ripfumelo, leri hi ri chumayelaka. 9 Hikuva loko u ri vula erivaleni ‘rito leri nga enon’wini wa wena n’wini,’ leswaku Yesu i Hosi, ni loko u kombisa ripfumelo embilwini ya wena ra leswaku Xikwembu xi n’wi pfuxile eka lava feke, u ta ponisiwa. 10 Hikuva munhu u kombisa ripfumelo hi mbilu leswaku a va la lulameke, kambe u vula erivaleni hi nomu wa yena leswaku a ponisiwa. 11 Hikuva Tsalwa ri ri: “A nga kona loyi a pfumelaka eka yena, loyi a nga ta khomisiwa tingana.” 12 Hikuva a ku na ku hambana exikarhi ka Muyuda ni Mugriki, hikuva ku ni Hosi yin’we ehenhla ka hinkwavo, leyi fuweke eka hinkwavo lava yi vitanaka. 13 Hikuva “un’wana ni un’wana loyi a vitanaka vito ra Yehovha u ta ponisiwa.” 14 Hambiswiritano, va ta n’wi vitanisa ku yini loyi va nga pfumelangiki eka yena? Hilaha ku fanaka, va ta pfumerisa ku yini eka loyi va nga twangiki nchumu hi ta yena? 15 Hilaha ku fanaka, va ta swi twisa ku yini loko ku nga ri na loyi a chumayelaka? Hilaha ku fanaka, va ta chumayerisa ku yini va nga rhumiwanga? Hilaha ku tsariweke hakona: “Ya languteka hakunene milenge ya lava va vulaka mahungu lamanene ya swilo leswinene!”