DYONDZO 4

Nghenisa Matsalwa Hi Ndlela Leyi Faneleke

Matewu 22:41-45

HI KU KOMISA: Endla leswaku mianakanyo ya vayingiseri va wena yi lungheka u nga si hlaya tsalwa.

Boxa xivangelo lexi endlaka u hlaya tsalwa. Endla vayingiseri va wena va lava ku twa tinhla ta nkoka eka tsalwa leri u lavaka ku ri hlaya.

Xiyisisa mongo wa tsalwa ra kona. Loko u lava ku boxa vito ra munhu loyi a vuleke marito ya ndzimana leyi u lavaka ku yi hlaya kumbe mutsari wa buku ya kona, tiyiseka leswaku leswi u swi vulaka i ntiyiso.
Tirhisa Bibele leswaku u seketela leswi u swi vulaka. Loko u vulavula ni vanhu lava pfumelaka eka Xikwembu, va tiyisekise leswaku Bibele i “Rito ra Xikwembu.” Loko u endla tano, va ta swi xiya leswaku Bibele hi yona ntsena leyi nga ni vutlhari lebyi pfunaka swinene.
Va endle va lunghekela ku twa leswi matsalwa ma swi vulaka. Vutisa swivutiso leswi u nga ta swi hlamula hi ku tirhisa tsalwa, vula xiphiqo lexi tsalwa rero ri nga pfunaka eka xona kumbe u vula nsinya wa nawu lowu Tsalwa rero ri tirhaka eka wona.

Anakanyisisa hi leswi vayingiseri va wena va swi tivaka hi mhaka leyi u vulavulaka ha yona ni hi tsalwa leri u lavaka ku ri hlaya. Loko tsalwa ra kona va ri toloverile, ri nghenise hi ndlela leyi nga ta endla va lava ku twa tindlela tin’wana leti ri pfunaka ha tona.