DYONDZO 2

Vulavula Hi Ndlela Yo Bula

2 Vakorinto 2:17

HI KU KOMISA: Vulavula hi ndlela ya ntumbuluko leyi kombisaka ndlela leyi u titwaka ha yona hi rungula leri u lavaka ku ri vula ni hi vayingiseri va wena.

NDLELA LEYI U NGA SWI ENDLAKA HA YONA:

Lunghiselela kahle. Khongela u kombela Yehovha leswaku a ku pfuna u dzikisa mianakanyo eka rungula ra wena. Anakanyisisa hi tinhlankulu leti u lavaka ku vulavula ha tona. Veka tinhla hi marito ya wena ku nga ri ku hlaya leswi tsariweke.

Loko u lava ku hlaya Bibele kumbe rungula leri nga eka nkandziyiso wo karhi, ri tolovele kahle leswaku u ta ri hlaya hi ndlela yo khuluka. Loko u hlaya mitshaho ya vanhu, yi hlaye hi ndlela leyi khumbaka mbilu kambe u nga hundzeleti.
Vulavula swi huma embilwini. Anakanyisisa hi xivangelo xo va vayingiseri va wena va fanele va twa rungula rero. Dzikisa mianakanyo ya wena eka vona. Ndlela leyi u yimaka ha yona, u tshukatshukisaka miri ha yona ni ndlela leyi nghohe ya wena yi langutekaka ha yona swi ta kombisa loko u ri ni xinghana naswona u khathala hi vayingiseri va wena.

Hambiloko u vulavula hi ndlela yo bula, kombisa xichavo ni ndlela leyi rungula ra wena ri nga ra nkoka ha yona. Tirhisa ririmi leri amukelekaka.
Languta vayingiseri. Langutisa vayingiseri loko u ri karhi u vulavula. Tinyike nkarhi wo languta muyingiseri ha un’we ematshan’weni yo va languta tanihi ntlawa.